1, 2. (a) Eaa te ka akaketaketa i to tatou irinakianga e ka akatupu te Patireia i te akakoroanga o te Atua no te tangata? (e) Kia tau kia Ephesia 2:12, akapeea te au koreromotu i te akaketaketa anga ia tatou? (Akara i te tutu mua o teia atikara.)

EI Au Kite no Iehova, te tutu aere nei tatou e ko te Patireia anake ua o te Atua te ka apai ke i to tatou au manamanata. Tera ra, kua papu ainei ia tatou e e Patireia tika tikai teia e na te reira e akatupu i te akakoroanga o Iehova? Eaa te au tumu ka irinaki pu tikai ei tatou i te Patireia?—Ebe. 11:1.

² Na te Patireia o te Mesia e akatupu i te akakoroanga o Iehova no te tangata. Kua akatumuia te Patireia ki runga i te papa tinamou o to Iehova tikaanga kia tutara. Koai ra te Ariki o teia Patireia? Koai ma te ka tutara kapiti e teia Ariki? Koai ma ta ratou ka tutara ki rungao? Kua akamou a Iehova i teia au tuanga puapinga no te Patireia na roto i te au koreromotu. Ko teia au koreromotu, na Iehova me kore na tana Tamaiti ko Iesu Karaiti i akamana. Me apii tatou i teia au koreromotu, ka mārama tatou e akapeea to Iehova akakoroanga i te akatupuia anga e te tumu ka irinaki ei tatou e e ngaueue kore te Patireia.—E tatau ia Ephesia 2:12.

3. Eaa ta tatou ka uriuri i roto i teia atikara e te atikara ka aru mai?

 ³ E ono koreromotu puapinga i roto i te Pipiria e pirianga to ratou ki te Patireia o te Atua i raro i te tutaraanga a Iesu Karaiti. (1) Ko te koreromotu a Aberahama, (2) te Ture koreromotu, (3) te koreromotu a Davida, (4) te koreromotu no tetai taunga mei ia Melekizedeka te tu, (5) te koreromotu ou, e te (6) ko te koreromotu Patireia. Ka uriuri ana tatou e akapeea teia au koreromotu i te piri atu anga ki te Patireia e akapeea te reira i te akatupu anga i to te Atua akakoroanga no te enua e te tangata.—Akara i te papaanga “ Akapeea te Atua i te Akatupu Anga i Tona Akakoroanga.”

4. Mei tei taikuia i roto i te puka o Genese, eaa te au akauenga ta Iehova i tuku no te tangata?

⁴ Kua akapapa a Iehova i te enua ei ngai nooanga no te tangata. E oti, kua tuku Aia i teia au akauenga: (1) Ka anga te Atua i te tangata i tona uaorai tu. (2) Ka akariro te tangata i te enua ei Parataito e ka akaki i te reira ki ta ratou uanga tuatua tika. (3) Auraka te tangata e kai i te ua o te rakau e kite ei i te meitaki e te kino. (Gene. 1:26, 28; 2:16, 17) Te akataka meitaki maira teia au akauenga e toru i to te Atua akakoroanga no te tangata e te enua. Eaa ra i reira te Atua i papau ei i teia au koreromotu?

5, 6. (a) Eaa ta Satani i tauta i te rave kia kore te akakoroanga o te Atua e tupu? (e) Akapeea a Iehova i te akatikatika anga i te meameaau i Edene?

⁵ Kua meameaau a Satani i te Atua e tona akakoroanga. Kua tauta aia i te akanauru i te nga tangata mua kia akarongo kore ki te Atua na te timata anga ia Eva kia kai i te ua o te rakau e kite ei i te meitaki e te kino. (Gene. 3:1-5; Apo. 12:9) Na te rave anga i teia, kua patoi a Satani i to Iehova tikaanga kia tutara ki rungao i te au mea Tana i anga. Muri mai, kua akaapa katoa aia i te tangata e te akamori ua ra ratou i te Atua no ta ratou ka rauka.—Iobu 1:9-11; 2:4, 5.

⁶ Ka akapeea a Iehova me akatikatika i teia meameaau? Ka rauka ua iaia kia takore i te aronga meameaau. Inara, me akapera aia kare e tupu tona akakoroanga kia akaki i te enua ki te uanga a Adamu raua ko Eva. Kua iki a Iehova eiaa e takore i taua aronga meameaau ra. Inara, kua oronga aia i tetai totou puapinga tikai, koia oki te taputou i Edene. Kua riro teia ei akapapuanga e ka tupu te au mea ravarai ta te Atua i taputou no te enua e te tangata.—E tatau ia Genese 3:15.

7. Eaa ta te taputou i Edene i akaari mai no runga i te ovi e tana uanga?

⁷ I roto i te taputou i Edene, kua akautunga te Atua i te ovi ko Satani te Tiaporo e tana uanga kia mate, pera katoa te aronga pouroa tei piri kiaia i te patoi i to te Atua tikaanga kia tutara. Kua oronga te Atua i te mana ki te uanga a te vaine kia takore i teia aronga meameaau. No reira kua akaari mai te taputou i Edene e ka takoreia a Satani e te au mea kino pouroa tei tupu no tana meameaau. Kua akaari katoa teia taputou e ka akapeea teia me akatupuia.

8. Eaa ta tatou i kite mai no runga i te vaine e tana uanga?

⁸ Koai te uanga a te vaine? E tano ei e e vaerua teia uanga. No teaa ra? No te mea e vaerua katoa a Satani, e ka takore teia uanga iaia. (Ebe. 2:14) No reira ko te vaine tei anau mai i teia uanga, ka tano katoa rai e e vaerua aia. I te uanga a te ovi e maata atura, kua vai rai te vaine e tana uanga ei mea muna mei  tetai 4,000 mataiti i muri ake i te taputou i Edene. I taua tuatau ra, kua papau a Iehova i tetai au koreromotu tei akakite mai e koai te uanga, e tei akaari mai e akapeea te Atua me akatikatika i te kino ta te meameaau a Satani i akatupu.

9. Eaa te koreromotu a Aberahama, e eaa te mataiti i akamanaia ai te reira?

⁹ Mei te 2,000 mataiti i muri ake i te taputou i Edene, kua akaue a Iehova ia Aberahama kia akaruke i tona kainga i te oire ko Ura e kia aere ki te enua o Kanaana. (Anga. 7:2, 3) Akakite te Atua kiaia e: “E aere ke mai koe i to enua na, e toou kopu-tangata, e te ngutuare o toou metua, ki te enua taku e akakite atu kia koe na: E akariro oki au ia koe ei iti-tangata maata, e ka akameitaki au ia koe, e akamaata atu au i to ingoa; e ka riro koe ei meitaki. E ko te aronga e akameitaki ia koe ra, ko taku ia e akameitaki; e ko te akakino ia koe ra, ko taku ïa e taumaa: e ei ia koe e meitaki ei te au kopu-tangata katoa o te ao nei.” (Gene. 12:1-3) Kua kapikiia te taputou a te Atua kia Aberahama e ko te koreromotu a Aberahama. Kare tatou i kite i te tuatau tikai i papau ei a Iehova i teia koreromotu kia Aberahama. Tera ra, kua kite tatou e kua akamanaia te koreromotu i te mataiti 1943 M.T.N., te akaruke anga a Aberahama ia Harana, e 75 ona mataiti i tera taime, e kua aere aia ki tetai tua mai o te Kauvai Eupharati.

10. (a) Akapeea a Aberahama i te akaari anga e e akarongo ketaketa tona i roto i te au taputou a te Atua? (e) Eaa te au mea ta Iehova i akakite mai no runga i te uanga a te vaine?

¹⁰ E maata te taime i akakite ei a Iehova i tana taputou kia Aberahama e kua kapiti atu Aia i tetai au akakiteanga ke mai. (Gene. 13:15-17; 17:1-8, 16) No te mea e ketaketa tikai te akarongo o  Aberahama i roto i te au taputou a te Atua, kua ariki ua aia kia akaatinga i tana tamaiti akaperepere. No reira kua akakeuia a Iehova kia akatinamou i te koreromotu na te akapapu anga e ka tupu tana i taputou. (E tatau ia Genese 22:15-18; Ebera 11:17, 18.) Muri ake i te akamanaia anga te koreromotu a Aberahama, kua akakite a Iehova i tetai au mea puapinga no runga i te uanga a te vaine. Ka na roto mai te uanga i te kopu tangata o Aberahama, e maata ratou, ka riro ratou ei au ariki, ka takore ratou i te au enemi pouroa o te Atua, e ka riro ratou ei akameitakianga no te tangata e manganui.

11, 12. Akapeea te Pipiria i te akaari mai anga e ka akatupuia te koreromotu a Aberahama, e eaa te puapinga ka rauka ia tatou?

¹¹ Kua tupu te au taputou o te koreromotu a Aberahama no te taime mua i te riro anga te Enua Taputouia no tona uanga. Inara, te akaari maira te Pipiria e e maata roa atu te au akameitakianga ta teia koreromotu ka oronga mai. (Gala. 4:22-25) Kua akataka te apotetoro ko Paulo e ko te tuanga maata o te uanga a Aberahama, ko Iesu Karaiti. Ko te rua o te tuanga, ko te 144,000 Kerititiano akatainuia. (Gala. 3:16, 29; Apo. 5:9, 10; 14:1, 4) Te vaine i roto i te taputou i Edene kua kapikiia aia e ko “Ierusalema i runga,” ko te tuanga ïa o te akaaerenga a te Atua i te rangi tei kapiti mai i te au mea ora vaerua tiratiratu. (Gala. 4:26, 31) Mei tei taputouia i roto i te koreromotu a Aberahama, ka apai mai te uanga a te vaine i te au akameitakianga mutu kore no te tangata.

¹² Oronga mai te koreromotu a Aberahama i tetai akapapuanga akamanaia no te Patireia i te rangi, e ka riro taua Patireia ra i te Ariki e te aronga ka tutara kapiti e ïa. (Ebe. 6:13-18) Eaa te roa o teia koreromotu? Te na ko ra a Genese 17:7 e ka riro teia “ei koreromotu mutu kore.” Ka vai rai te reira e tae ua atu ki te tuatau e takore ei te Patireia i te au enemi o te Atua, e e akameitakiia ai te au kopu tangata pouroa i te enua nei. (1 Kori. 15:23-26) Inara, ka vai rai te au akameitakianga no teia koreromotu e tuatau ua atu. Te akapapu maira te koreromotu a te Atua kia Aberahama e ka tupu to Iehova akakoroanga kia “akaki i te enua nei” ki te au tangata tuatua tika.—Gene. 1:28.

13, 14. Eaa ta te koreromotu a Davida i akapapu mai?

¹³ Te apii maira te taputou i Edene e te koreromotu a Aberahama e kua akatumuia te tutaraanga a Iehova ki runga i tona turanga tuatua tika. No reira kua akatumu katoaia te Patireia o te Atua i raro i te tutaraanga a te Mesia ki runga i taua au turanga ra. (Sala. 89:14) Ka o mai ainei te tutaraanga kino ki roto i teia Patireia? Ka anoanoia ainei kia monoia teia Patireia? Te akapapu maira tetai koreromotu ke mai e kare rava teia e tupu.

¹⁴ Kua akakite a Iehova i tetai taputou kia Davida te Ariki o Iseraela i taito. Kua kapikiia teia taputou e ko te koreromotu a Davida. (E tatau ia 2 Samuela 7:12, 16.) Kua taputou a Iehova e ka na roto mai te Mesia i te uanga o Davida. (Luka 1:30-33) I roto i teia taputou, kua oronga mai a Iehova i tetai au akakiteanga ke mai no te papaanga o te Mesia. Akakite a Iehova e ko teia uanga na Davida “te pu tikai” te ka riro mai ei Ariki no te Patireia o te Atua. (Eze. 21:25-27) Ka vai rai te tutaraanga a Davida e tuatau ua atu no te mea “ka vai rai tona uanga [ko Iesu] e tuatau ua atu, e tona terono mei  te rā ïa.” (Sala. 89:34-37) Ka papu ia tatou e ka vai apa kore ua rai te tutaraanga a te Mesia e ka vai rai te puapinga ka rauka mei tana tutaraanga e tuatau ua atu!

15-17. Kia tau ki te koreromotu no tetai taunga mei ia Melekizedeka te tu, eaa atu ta te uanga ka rave, e no teaa ra?

¹⁵ Te akapapu maira te koreromotu a Aberahama e te koreromotu a Davida e ka tutara te uanga a te vaine ei ariki. Inara e maata atu ta te uanga ka anoanoia kia rave e rauka ai i te tangata te puapinga maata. Ae, ka anoanoia te uanga kia riro mai ei taunga. Ko te taunga anake te ka rauka i te oronga i te atinga ei akamatara i te tangata mei te ara, e kia riro mai ei tuanga no te au tavini tiratiratu o Iehova i te rangi e te enua. Ei akapapu e ka riro mai te uanga ei taunga, kua akanoo a Iehova i tetai koreromotu ke mai, koia oki ko te koreromotu no tetai taunga mei ia Melekizedeka te tu.

¹⁶ Kua akaari mai te Atua na roto i te Ariki ko Davida e ka papau Aia i tetai koreromotu i rotopu iaia e Iesu. E rua tuanga i roto i teia akanoonooanga: te mea mua, ‘ka noo a Iesu ki te rima katau o te Atua’ e ka orongaia te mana kiaia kia takore i tona au enemi pouroa; e te rua, ka riro a Iesu ei “taunga e tuatau ua atu, mei ia Melekizedeka te tu.” (E tatau ia Salamo 110:1, 2, 4.) Eaa te tumu ka riro ei a Iesu ei taunga “mei ia Melekizedeka te tu”? I mua ake ka noo ei te uanga a Aberahama i te Enua Taputouia, ko Melekizedeka te ariki no te oire ko Salema e “e taunga [aia] na te Atua teitei.” (Ebe. 7:1-3) Kua akataoonga a Iehova ia Melekizedeka ei ariki e ei taunga, e koia anake ua te tangata i mua ake ia Iesu tei rauka taua nga taoonga ra. Tetai katoa, no te mea kare i rekotiia tetai ua atu tangata i mua ake e i muri ake ia Melekizedeka tei rauka teia nga taoonga, tera te aiteanga e “taunga [aia] e tuatau ua atu.”

¹⁷ I roto i teia koreromotu, na te Atua tikai i akataoonga ia Iesu ei taunga. “E taunga [a Iesu] e tuatau ua atu mei ia Melekizedeka te tu.” (Ebe. 5:4-6) Te akaari pu ua maira teia koreromotu e ka akatupu a Iehova i tona akakoroanga no te tangata e te enua na roto i tona Patireia i raro i te tutaraanga a te Mesia.

18, 19. (a) Eaa te pirianga o te au koreromotu ki te Patireia? (e) Eaa ta tatou ka uriuri i roto i te atikara ka aru mai?

¹⁸ Kua kite tatou e eaa te pirianga o teia au koreromotu ki te Patireia o te Atua i raro i te tutaraanga a te Mesia e kua akatumu katoaia te Patireia ki runga i te au koreromotu akamanaia. Te akapapu maira te taputou i Edene e ka akatupu a Iehova i tona akakoroanga no te enua e te tangata na roto i te uanga a te vaine. Te akamārama ra te koreromotu a Aberahama e koai te uanga e eaa tana ka rave.

¹⁹ Te oronga maira te koreromotu a Davida i tetai au akakiteanga ke mai no te papaanga o te Mesia. Te oronga katoa ra teia koreromotu i te tikaanga no Iesu kia tutara e tuatau ua atu. Ko te koreromotu no tetai taunga mei ia Melekizedeka te tu, te akapapu maira te reira e ka riro te uanga ei taunga. Inara kare ko Iesu anake ua te ka tauturu i te tangata kia riro mai ei aronga apa kore. E aronga ke atu tetai tei akataoongaia ei au ariki e ei au taunga. Noea mai ratou? Ka uriuriia teia i roto i te atikara ka aru mai.