I ROTO ia Tepetema rā 6, 1926, kua oki tetai akaaere tutaka no Marike mai ki te ngai i anauia ai aia i Tiapani ei mitinari. Te tangata e tiaki maira iaia, koia anake te tangata e tatau ana i Te Punanga Tiaki e kua akamata aia i tetai pupu apii Pipiria i Kobe. Kua aere te Aronga Apii Pipiria ki ta ratou akaputuputuanga mua i roto i taua oire ra ia Tianuare 2, 1927. E 36 tei tae mai e e 8 tei papetitoia. E akamataanga puapinga tikai te reira, inara ka akapeea te 60 mirioni tangata i Tiapani e kite ei te karere o te Patireia mei te mea e e pupu meangiti ua teia?

I roto ia Me 1927, kua akamata te Aronga Apii Pipiria i te tutu aere i te evangeria ei akakite no runga i tetai au akoanga Pipiria. No te akoanga mua te ka raveia i Osaka, kua akanoo te au taeake i tetai au papa akakitekiteanga i roto i te oire, e kua tuku e 3,000 patianga ki te aronga mana taoonga. Kua tuʼa aere ratou e 150,000 aenga pepa e kua tuku i te akakiteanga ki roto i te au nutipepa i Osaka e ki runga i te 400,000 tiketi rerue. I te rā ka raveia te akoanga, e rua pairere tei rere na rungao i taua oire ra i te akatotoa e 100,000 aenga pepa. Mei te 2,300 tangata tei akaki mai ki roto i te Are Osaka Asahi i te akarongo ki te akoanga “Kua Vaitata Mai te Patireia o te Atua.” No te mea kua ki te are uipaanga, e tauatini tuma tangata kare i o ana ki roto. I muri ake i te akoanga, e 600 tuma tangata tei noo mai no te tuatau ui uianga e te au pauanga. I te au marama tei aru mai, kua orongaia tetai au akoanga i Kyoto e tetai au oire i te tua opunga o Tiapani.

I roto ia Okotopa 1927, kua parani te Aronga Apii Pipiria kia raveia tetai au akoanga i Tokyo. Akaou, kua tukuia atu tetai au patianga ki te aronga mana taoonga—koia oki te parai minita, te au mema paramani, te au arataki akonoanga e te au arataki vaeau. Kua taangaanga katoaia te au papa akakitekiteanga, te nutipepa, pera katoa e 710,000 aenga pepa, e e 4,800 aronga tei tae ki te au akoanga e toru i roto i te oire maata o Tiapani.

Kua riro te au painia ei aronga puapinga i te akakite i te karere o te Patireia mei tera are ki tera are. Kua rauka ia Matsue Ishii, tetai o te au painia mua i Tiapani e tana tane ko Jizo, i te tutu aere i roto i te maataanga o te enua i Tiapani, mei ia Sapporo i te tua tokerau ki Sendai, Tokyo, Yokohama, Nagoya, Osaka, Kyoto, Okayama, e Tokushima. Te aere anga te tuaine Ishii e tetai tuaine ko Sakiko Tanaka i te atoro i te aronga mana taoonga o te kavamani, kua aao raua i to raua kakau kimono. Kua pati mai tetai tangata mana e 300 puka The Harp of God e e 300 puka Deliverance, kia tukuia ki roto i te au ngai vairanga puka i roto i te au areauri.

Kua āriki a Katsuo e Hagino Miura i tetai au puka mei ko i te Tuaine Ishii e kare i roa ana, kua kite mai raua i te tuatua mou. I te mataiti 1931, kua papetitoia  raua e kua riro mai ei nga painia. I mua ake i te mataiti 1930, kua āriki a Haruichi raua ko Tane Yamada e te maataanga o to raua kopu tangata i te karere o te Patireia. Kua piri a Haruichi raua ko Tane Yamada ki roto i te angaanga painia e kua tavini ta raua tamaine ko Yukiko i roto i te Betela i Tokyo.

I tera tuatau, kare te au mataara e meitaki ana e te oko maata i te au motoka. No reira, e na runga ana a Kazumi Minoura e te au painia mapu i te au pereoo kare e matini. Kua tapa ratou i te ingoa o teia au pereoo e ko Iehu, te ingoa o tetai tangata akaoro kariota tei riro mai e ko tetai o te au ariki o Iseraela. (2 Ari. 10:15, 16) Ka o e ono painia ki roto i te au Pereoo Maatamaata mei te 2.2 mita te roroa, 1.9 mita te atea, e te 1.9 mita te teitei, e toru tei maaniia. Pera katoa, e rua tangata ka o ki roto i te au Pereoo Meangitika, e 11 tei maaniia i ko i te opati manga i Tiapani. Te taeake tei tauturu i te maani i teia au pereoo ko Kiichi Iwasaki, kua akakite aia e, “E tapoki to teia au pereoo e te patiri motoka ei akataka i te uira no te mori.” Kua akamata te au painia i te akakite i te tuatua mou i roto ia Tiapani na te opara e te totō anga i te au pereoo na runga i te au maunga e te au ō mei te tua tokerau i Hokkaido ki te tua tonga i Kyushyu.

Akakite te painia ko Ikumatsu Ota e: “Me tae matou ki roto i tetai oire, kua akaruke matou i te pereoo i te pae kauvai me kore i tetai ngai ateatea ua. Kua aere matou na mua i te aravei i te aronga mana o te oire koia oki te mayor, i muri mai kua aere matou mei tera are ki tera are i te oronga i te au puka. Me oti te ngai tutuanga i te kapi, kua aere matou ki tetai mai oire.”

Te rave anga te 36 Aronga Apii Pipiria i ta ratou akaputuputuanga mua i Kobe, ko te akamataanga te reira i “te rā o te au mea rikiriki.” (Zeka. 4:10) E rima mataiti i muri mai—i te mataiti 1932—e 103 painia e te au papuritia tei ripoti i ta ratou angaanga i Tiapani, e e 14,000 puka tei tuʼa aereia. I teia rā, te raveia nei te angaanga tutu aere i te au ngai maata i Tiapani e kua vaitata i te 220,000 papuritia e akakite ra i te tuatua mou i roto i Te Enua o Tiapani.—Au apinga takere i Tiapani.