I te anere mataiti mua, kua akakite te apotetoro ko Paulo ki te aronga pakari i roto i te putuputuanga i Ephesia e: ‘E teianei, e matakite ia kotou uaorai, e te anana katoa i akariroia’i kotou e te vaerua tapu ei tiaki i rungao, kia akaangai oki kotou i te ekalesia a te Atua, ko tana i oko i tona uaorai toto.’ (Anga. 20:28) Akapeea te vaerua tapu te o mai anga ki roto i te akamana anga i te aronga pakari e te au tavini tauturu i teia tuatau?

Te mea mua, kua akakeu te vaerua tapu i te aronga tata Pipiria kia tata i te au turanga ka anoanoia no te au taeake kia riro mai ei aronga pakari e ei tavini tauturu. Okotai ngauru ma ono turanga tukeke i roto ia 1 Timoteo 3:1-7 ka umuumuia no te aronga pakari. Tetai au turanga katoa tei roto ia Tito 1:5-9 e Iakobo 3:17, 18. Te au turanga no te au tavini tauturu, kua akatakaia mai i roto ia 1 Timoteo 3:8-10, 12, 13. Te rua, te pupu aronga pakari tei iki i te au taeake kia akamanaia, ka pure ratou kia Iehova no tona vaerua tapu kia arataki ia ratou i te akara e me te rotai ra te oraanga o te au taeake ki te au kaveinga tei akatakaia i roto i te Pipiria. Te toru, ka anoanoia te taeake tei ikiia kia akaari i te au ua o te vaerua tapu o te Atua i roto i tona oraanga. (Gala. 5:22, 23) No reira, te o maira te vaerua o te Atua i roto i te au tuanga pouroa no te akamana anga i te aronga pakari e te au tavini tauturu.

Inara, naai tikai e akamana ana i taua au taeake ra? I mua ana, e tukuia ana te au ikianga kia akamana i te aronga pakari e te au tavini tauturu ki te opati manga. I reira, na te au taeake tei akamanaia e te Pupu Akaaere e akara i te au turanga o teia au taeake tei ikiia e na ratou katoa e akamana ia ratou. Me oti te reira, ka akakite te opati manga ki te pupu o te aronga pakari. E oti, na te aronga pakari e akakite ki te au taeake e ka akamanaia ratou e ka pati katoa e me ka āriki ratou i teia apainga. Te mea openga, ka akakiteia ki te putuputuanga.

Inara i akapeea te au taeake te akamanaia anga i te anere mataiti mua? I tetai au taime, na te au apotetoro i akamana ia ratou, mei te tuatau rai i akamana ratou e itu au tane kia tu’a i te kai na te au vaine takaua. (Anga. 6:1-6) Tera ra, penei kua tavini ke ana teia au taeake ei aronga pakari i mua ake ka orongaia ai teia apainga ou.

Noatu kare te Pipiria e akataka meitaki mai ana akapeea te au taeake te akamanaia anga i tera tuatau, te kite ra tatou i tetai au akaraanga no  runga i teia. Te akakite maira te Pipiria e, i to Paulo e Banaba oki anga ki Anetioka mei to raua tere mitinari, kua akamanaia “e raua te aronga orometua no ratou i te au ekalesia katoa ma te pure e te akakoreanga i te kai, kua tuku atura raua ia ratou ki te Atu, i ta ratou i akarongo.” (Anga. 14:23) Tetai au mataiti i muri mai, kua tata a Paulo ki tona oa ko Tito e: “Teia te mea i vaoo ei au ia koe i Kereta na, kia akameitaki koe i tei toe ra, kia akataoonga i te aronga orometua i te au oire katoa ra mei taku i ikuiku ia koe na.” (Tito 1:5) Mei te reira katoa a Timoteo, i te akara anga koia tetai tei akamana i te aronga pakari. (1 Timo. 5:22) Te taka meitaki ra e na te au akaaere tutaka i akamana i te au taeake, kare na te au apotetoro e te aronga pakari i Ierusalema.

No reira na te aru anga i teia au akaraanga Pipiria, kua taui te Pupu Akaaere o te Au Kite o Iehova i te tu me akamana i te aronga pakari e te au tavini tauturu. Akamata i roto ia Tepetema 1, 2014, ko teia te au akanoonooanga me akamana i te au taeake tei ikiia: Na te au akaaere kotinga e akara meitaki i te au taeake tei ikiia i roto i te au putuputuanga. Me atoro aia i te au putuputuanga, ka tauta aia i te akamatau atu ki te au taeake i ikiia na te angaanga kapiti anga kia ratou i roto i te angaanga orometua. Muri ake i te uriuri anga ki te pupu aronga pakari no runga i te au taeake tei ikiia, ka akamana te akaaere kotinga i te aronga pakari e te au tavini tauturu i roto i te au putuputuanga. Na roto i teia tu, te aru vaitata ra teia akanoonooanga i tei raveia i te anere mataiti mua.

Naai ma e akono ana i te au apainga no te akamanaanga? Na te “tavini akono meitaki e te pakari” te apainga maata i te angai i te ngutuare Kerititiano. (Mata. 24:45-47) Ma te tauturu a te vaerua tapu, ka kimikimi ratou i roto i te au Tuatua Tapu kia rauka mai te aratakianga kia taangaanga i te au kaveinga Pipiria ei akaaere i te putuputuanga i te ao katoa nei. Na ratou katoa e akamana i te au akaaere kotinga e te au mema o te Kumiti Manga. E oti na te opati manga e oronga i te tauturu no te taangaanga i te aratakianga a te Pupu Akaaere. Na te pupu aronga pakari i roto i te au putuputuanga e akara meitaki i te au turanga Tuatua Tapu o te au taeake tei ikiia kia akamanaia no te putuputuanga a te Atua. Tei runga i te au akaaere kotinga te apainga kia akamanako meitaki na roto i te pure no runga i te au taeake ta te aronga pakari i iki e oti kia akamana ia ratou.

Me mārama tatou akapeea me akamanaia te aronga pakari e te au tavini tauturu, ka mārama meitaki katoa tatou i te tuanga o te vaerua tapu i roto i teia au ikianga. I reira tatou e irinaki papu ei i te au taeake tei akamanaia i roto i te putuputuanga Kerititiano e te akangateitei ia ratou.—Ebe. 13:7, 17.

Te tuatua ra a Apokalupo 11:3 no runga i te nga kite tokorua te ka totou no te 1,260 rā. Te karanga katoa ra te irava e ‘ka vi te puaka taae ki rungao ia raua e mate takiri raua iaia.’ Inara ‘e ope akera nga rā e toru ra e te apa rā,’ ka akaora akaouia mai teia nga kite, e ka mataku te aronga tei kite ia raua.—Apo. 11:7, 11.

Koai oki teia nga kite tokorua? Na te irava e akataka mai e koai raua. Te mea mua, ko raua te ‘nga olive e rua, e te nga lamepa e rua.’ (Apo. 11:4) Te akamaara maira teia kia tatou i te ramepa e te nga pu rakau olive e rua tei akatakaia mai i roto i te totou a Zekaria. Karangaia e te akatutu ra te nga pu rakau olive i te ‘nga tangata toko rua tei akatainuia,’ koia oki te Rangatira ko Zerubabela e te Taunga Maata ko Iosua, “tei tu ki mua i te aroaro o te Atua o te ao katoa nei.” (Zeka. 4:1-3, 14) Te rua, te rave ra te nga kite tokorua i te au akairo mei ta Mose e Elia i rave.—Akaaite ia Apokalupo 11:5, 6 kia Numero 16:1-7, 28-35 e 1 Ariki 17:1; 18:41-45.

Eaa te mea aiteite i roto i teia au irava? Ko te aronga akatainuia o te Atua tei arataki i te iti tangata o te Atua i te tuatau timataanga. No reira, te totou ra a Apokalupo pene 11 no runga i te au taeake akatainuia tei arataki i te iti tangata o te Atua i te tuatau i akatumuia te Patireia o te Atua i te rangi i te mataiti 1914, e kua tutu aere ratou no te toru e te apa mataiti ma te “kakau paoa.” *

I te openga o ta ratou tutuanga ma te kakau paoa, kua tiria teia aronga akatainuia ki roto i te are tapekaanga no tetai tuatau poto ua, e toru e te apa rā. Kua rekareka te au enemi o te iti tangata o te Atua no te mea i roto i to ratou mata, kua akamutu rai te angaanga a te aronga akatainuia.—Apo. 11:8-10.

Tera ra, kia tau ki te au tuatua i roto i te totou, kua ora akaou mai te nga kite tokorua i te openga o te toru e te apa rā. Kua matara mai ratou mei roto i te are tapekaanga e na roto i to ratou Atu, ko Iesu Mesia, kua oronga te Atua i tetai angaanga puapinga ki te aronga tei vai tiratiratu. I te mataiti 1919, kua akataoongaia ratou ei “tavini akono meitaki e te pakari” kia akono i te au anoano pae vaerua o te iti tangata o te Atua i te au rā openga.—Mata. 24:45-47; Apo. 11:11, 12.

Te mea umere, te rotai ra a Apokalupo 11:1, 2 ki te tuatau i tutakaia te iero pae vaerua. Te taiku maira a Malaki pene 3 i tetai tutaka anga aiteite, e kua aru mai tetai tuatau tamā anga. (Mala. 3:1-4) Eaa te roa o teia tuatau tutaka e te tamā anga? Kua akamata i te mataiti 1914 ki te mataiti 1919. Teia tuatau, e 1,260 rā (42 marama) e te toru e te apa rā tei taikuia i roto ia Apokalupo pene 11.

Mataora tikai tatou e kua akanoo a Iehova i teia tamā anga pae vaerua ei tamā i tetai iti tangata tikai no te rave i te au angaanga memeitaki! (Tito 2:14) Pera katoa, te āriki rekareka nei tatou i te tu tiratiratu o te aronga akatainuia tei arataki i te iti tangata o te Atua i tera tuatau timataanga, e ko ratou tei riro mai e ko te nga kite tokorua. *