KUA oronga mai te Atua i te tikaanga ngateitei ki te tangata kia rave i ta ratou uaorai tukuanga tika. E akameitaki ana aia i te aronga tei taangaanga i ta ratou tukuanga tika ma te ngakau tae i te akatotoa i te akamorianga mou, te akatapu anga i tona ingoa e te turuturu anga i tona akakoroanga ngateitei. Kare ta Iehova au umuumuanga i te mea ngata mari ra e akaperepere ana aia i te tangata tei rauka i te akono i tana au ture ma te tae o te ngakau.

Ei akaraanga, i te tuatau i te ngati Iseraela i roto i te metepara i Sinai, kua ikuiku a Iehova kia ratou kia akatu i tetai ngai akamorianga. Karanga aia e: “E rave kotou i te atinga na Iehova no roto ia kotou uaorai nei: ko te tangata ngakau oronga, e apai mai aia i te reira, koia te atinga na Iehova.” (Exo. 35:5) Ka rauka i to Iseraela i te oronga i ta ratou atinga—noatu eaa te reira me kore eaa te maata—mei roto mai i to ratou ngakau e kia taangaanga meitakiia kia akatupu i to te Atua akakoroanga. Eaa te manako o te ngati Iseraela no runga i teia?

“Te tangata katoa i tae tona ngakau” e “te aronga katoa i tika to ratou ngakau” kua oronga i ta ratou atinga ma te ‘tae o te ngakau.’ Kua inangaro te tane e te vaine i te apai mai i tetai apinga no te angaanga a Iehova: te tapeʼa, te poe, te momonorima, te auro, te ario, te veo, te kakau kerekere, te purapura e te muramura, te orongā, te uru puakanio, te kiri mamoe rapakau muramuraia, te kiri tutu, te rakau sitima, te au toka sema, te rakau kakara, e te manongi. “E apinga maata oki tei rauka, e ope roa te au angaanga katoa i te oti, e e toe rai.”—Exo. 35:21-24, 27-29; 36:7.

Te mea ta Iehova i mareka roa atu, kare ko te au apinga tei orongaia mari ra, ko te ngakau oronga o te aronga tei turuturu i te akamorianga mou. Kua akakeu katoaia ratou kia oronga i to ratou taime i te rave i te angaanga. ‘Te au vaine i kamaatu me kore tei karape, tei tae te ngakau ra, kua taviriviri ratou i te uru puakanio.’ Pera katoa kua oronga a Iehova i te “karape, te pakari, e te kite i te angaanga tini ravarai” kia Bezaleela. Ko te tikaanga tikai, kua akaki a Iehova ia Bezaleela e Aholiaba ki te tu karape tei anoanoia kia rave i te au angaanga tei akaueia mai.—Exo. 35:25, 26, 30-35.

Te pati anga a Iehova i te ngati Iseraela kia oronga i tetai atinga, kua irinaki pu tikai aia e ko te aronga e “ngakau oronga” to ratou, ka turuturu ratou i te akamorianga mou. No reira, kua arataki e kua oronga aia i te mataora mutu kore no te au tangata ngakau oronga. No to ratou tu kauraro, kua akaari a Iehova e me akameitaki aia i te tu oronga o tona au tavini, ka rauka iaia i te akapapu e kare ratou e ngere i te apinga me kore te tu karape i te akatupu i tona anoano. (Sala. 34:9) Me tavini koe ia Iehova ma te ngakau tae, e mea papu roa e ka akameitaki aia i toou ngakau oronga.