1, 2. Eaa te mataara ta te Atua i inangaro i tona iti tangata, te au mapu e te au ruaine kia akamori iaia?

E MAPU ainei koe? Me koia ïa, ka rauka ia koe i te irinaki e e tuanga puapinga koe i roto i ta Iehova putuputuanga i te ao katoa nei. I roto i te au enua e manganui, te maataanga o te aronga tei papetitoia, e au mapu. E akameitakianga maata tikai te kite i te au mapu e iki ra i te tavini ia Iehova!

² Ei mapu, te reka ra ainei koe i te kapiti atu ki toou uaorai uki? Papu e ka pau koe, ae. E mea reka na tatou i te kapiti atu ki te au oa i to tatou uki. Noatu ra, te inangaro maira a Iehova ia tatou kia akamori kapiti iaia ma to tatou au taeake. Inangaro aia i tona iti tangata kia taokotaiia, noatu e eaa to ratou mataiti e noea mai ratou. Kua tata te apotetoro ko Paulo e ko te anoano o te Atua koia oki ko te “inangaro i te tangata katoatoa kia ora, e kia rauka te kite i te tuatua-mou.” (1 Timo. 2:3, 4) E te akatakaia ra te aronga tei akamori i te Atua i roto ia Apokalupo 7:9 e no roto i “te pa enua ravarai, e te au kopu ravarai, e te au iti-tangata ravarai, e te au reo katoa oki.”

3, 4. (a) Eaa te tu o te au mapu i teia tuatau? (e) I roto ia Ephesia 4:25, akapeea a Paulo i te akataka anga mai i te putuputuanga?

³ E tuke ake rai te au mapu e tavini ra ia Iehova ki te au mapu o teianei ao. Te maataanga o te au mapu kare e tavini ana ia Iehova,  te akamanako ua ra ratou ia ratou uaorai e ta ratou e inangaro ra. Kua karanga tetai aronga kimikimi e ko te au mapu i teia tuatau te uki karapii roa atu. Me tuatua mai e me akamanea mai ratou, ka akaari te reira e kare ratou e akangateitei ana i etai ke, te au ruaine tikai.

⁴ Kua koropiniia tatou e teia tu kino, no reira ka anoanoia tatou kia tauta pakari i te kopae i teia tu e kia akamareka ia Iehova. I te anere mataiti mua, kua akamatakite a Paulo i te au Kerititiano no runga i taua tu ra, koia oki “te vaerua e angaanga ririnui nei i roto i te aronga akarongo kore.” (E tatau ia Ephesia 2:1-3.) E mataora tikai i te kite i te au mapu i roto i te putuputuanga e kopae ra i teia tu. Te inangaro ra ratou i te tavini ia Iehova ma to ratou au taeake. Mārama ratou e te aite ra te putuputuanga ki tetai kopapa tangata, e maata tona mero e te angaanga taokotai ra. Mei ta Paulo i tata e, “e melo anake oki tatou no tatou uaorai.” (Ephe. 4:25) Ia tatou e vaitata atura ki te openga o te ao o Satani, e puapinga maata tikai kia taokotai ki to tatou au taeake e te au tuaine. Ka tauturu te au akaraanga Pipiria e aru maira kia kite tatou i te puapinga kia taokotai.

5, 6. Eaa ta tatou ka mou mai mei ia Lota e tona ngutuare tangata?

⁵ I mua ana, kua aro atu te iti tangata o Iehova i te au turanga kino pakari. Tera ra, no te mea kua taokotaiia ratou e kua tauturu i tetai e tetai, kua paruru a Iehova ia ratou. Ka rauka ia tatou pouroa, te au mapu e te au ruaine i te tamou i te apii mei teia au akaraanga Pipiria. Ka akara tatou i tei tupu kia Lota.

⁶ Kua rokoia a Lota e tona ngutuare tangata e te tumatetenga. Ka takore a Iehova ia Sodoma, te oire e noo ra ratou. Kua tono Aia i tana nga angera ei akamatakite ia Lota kia akaruke i te oire e kia oro ki te au maunga. “Kia ngakoikoi koe i te oro ki reira kia ora” i akakite ei nga angera kia Lota. (Gene. 19:12-22) Kua akarongo a Lota e tana nga tamaine i teia au ikuikuanga. Te mea mii ra, kare tetai pae i roto i te ngutuare o Lota i akarongo ana. Te akakite anga a Lota ki te nga tangata te ka akaipoipo i tana nga tamaine kia akaruke i taua oire ra, kua manako raua e te “takatakata ua ra aia” ia raua. Kare raua i akarongo ana no reira kua mate raua i te takoreia anga te oire. (Gene. 19:14) Ko Lota anake e tana nga tamaine tei ora mai no te mea kua akarongo e kua vai taokotai ratou.

7. Akapeea a Iehova i te tauturu anga i te pupu tangata tei taokotaiia e tei akaruke ia Aiphiti?

⁷ Ka kite katoa tatou i te au apiianga mei te akaraanga o te ngati Iseraela i te tuatau i akaruke ei ratou ia Aiphiti. Kare ratou i akatakake ia ratou ki roto i te au pupu rikiriki ei kimi i to ratou uaorai mataara ki te Enua Taputouia. Mari ra, kua aaere kapiti ratou ei pupu taokotaiia. Te vevete anga a Iehova i te Tai Muramura, kare a Mose i aere koia anake ua me kore e tetai pupu iti ua o te ngati Iseraela. Mari ra, kua aru te iti tangata pouroa ia Mose e kua paruru a Iehova ia ratou. (Exo. 14:21, 22, 29, 30) E maata katoa te aronga kare i te ngati Iseraela tei iki i te tavini ia Iehova e tei akaruke ia Aiphiti kia aru i te ngati Iseraela. Ae, kua taokotaiia ratou pouroa. (Exo. 12:38) Naringa tetai pupu meangiti, penei e au mapu ua, i aru i to ratou uaorai mataara ko ratou anake ua, ka riro teia ei mea neneva no ratou. Ko tetai ua atu tangata tei aru i tona uaorai mataara, kare a Iehova e paruru iaia.—1 Kori. 10:1.

8. I te tuatau o Iehosaphata, akapeea te iti tangata o te Atua i te taokotaiia anga?

⁸ I te tuatau o te Ariki ko Iehosaphata, kua tamaki mai tetai nuku vaeau maata e te ririnui i te iti tangata o te Atua. (2 Para. 20:1, 2) Eaa ta te ngati Iseraela i rave i te koropiniia anga ratou e to ratou au enemi? Kua irinaki ratou ia Iehova e kua pure no tana tauturu. (E tatau ia 2 Paraleipomeno 20:3, 4.) Kare te ngati Iseraela tataki tai i kimi i ta ratou uaorai ravenga ei akatikatika i  teia manamanata, mari ra kua akaputuputu ratou ki te ngai okotai. Te na ko ra te Pipiria e: “Te tu ua ra Iuda katoa ki mua ia Iehova, e ta ratou au tamariki varevare, ta ratou au vaine, e ta ratou au tamariki.” (2 Para. 20:13) Kua irinaki te iti tangata, te au mapu e te au ruaine ia Iehova e kua aru i te aratakianga a Iehova. Kua noo taokotai ratou e kua paruru a Iehova ia ratou mei to ratou enemi. (2 Para. 20:20-27) E akaraanga meitaki teia no te iti tangata o te Atua kia aru me aro atu i te patoianga.

9. Eaa ta tatou ka tamou mai mei te au Kerititiano i te anere mataiti mua?

⁹ I te anere mataiti mua, kua akamori kapiti te au Kerititiano ia Iehova ma te rotai e te au. Ei akaraanga, te riro mai anga te ngati Iuda e te aronga kare i te ngati Iuda ei au Kerititiano, kua aru ratou i te au apiianga a te au apotetoro. Kua piri atu ratou tetai ki te tetai, kua kaikai kapiti e kua pure kapiti ratou. (Anga. 2:42) I te takinokinoia anga te au Kerititiano, kua vai taokotai rai ratou. Ko te tuatau tikai teia e tauturu ei ratou tetai i tetai. (Anga. 4:23, 24) Me takinokinoia tatou, ka anoano katoaia tatou kia taokotai e kia tauturu tetai i tetai.

10. Eaa te tuatau ka anoanoia tatou kia taokotai meitaki?

¹⁰ Kare e roa atu, ka aro atu tatou i te tuatau ngata roa atu i roto i te tuatua enua o te tangata. Kua akataka te peroveta ko Ioela i teia e “e rā poiri, e te po āve.” (Ioela 2:1, 2; Zepha. 1:14) I taua tuatau ra, ka anoanoia te iti tangata o te Atua kia taokotai meitakiia. Akamaara i te tuatua a Iesu e: “Ko te basileia i mavete e rave iaia uaorai, e pou ïa.”—Mata. 12:25.

11. Eaa ta te iti tangata o te Atua ka kite mai mei tei tataia i roto ia Salamo 122:3, 4? (Akara i te tutu mua o teia atikara.)

¹¹ Eaa te tu o te taokotaianga ta tatou ka anoano? Ka kite tatou i tetai apiianga mei te tu i akatuia ai te au are i Ierusalema i taito. Kua vaitata te au are ki tetai e tetai e kua akataka te tata taramo i te reira “mei te oire, topiri akitaia te au are.” Kua noo tinamou te tangata no te mea kua vaitata ua ratou i tetai e tetai e e mama ua i te tauturu e te paruru ia ratou. Penei kua akamaara katoa te tu vaitata o te au are i te tata taramo no runga i te tuatau me akaputuputu te au kopu Iseraela ei iti tangata okotai kia akamori ia Iehova. (E tatau ia Salamo 122:3, 4.) I teianei e te au ra ki mua, e mea puapinga tikai no te iti tangata o Iehova kia “topiri akitaia” koia oki kia taokotai.

12. Eaa te ka tauturu ia tatou kia ora mai me tamaki mai a Goga i te iti tangata o te Atua?

¹² Eaa ra i puapinga ai no tatou kia taokotai no te tuatau ki mua? Te totou ra a Ezekiela pene 38 e ko “Goga i te enua o Magoga,” ka tamaki atu i te iti tangata o Iehova. A tera tuatau, kare tatou e inangaro kia akatakakeia tatou. E tarevake maata kia akamanako e ka paruru mai te ao o Satani ia tatou. No reira, ka anoanoia tatou kia piri vaitata ki to tatou au taeake. Tika rai, kare tatou e ora mai no te mea ua nei e e tuanga tatou no tetai pupu tangata. Ka anoanoia tatou tataki tai kia irinaki ia Iehova e kia akarongo iaia. I reira tatou e akaoraia ai e Iehova raua ko Iesu mei te reira tamaki e kia taki atu ia tatou ki roto i te ao ou. (Ioela 2:32; Mata. 28:20) Tera ra, ka anoano katoaia tatou kia vai taokotai ki te iti tangata o te Atua. I toou manako, ka akaora ainei a Iehova i te aronga tei iki i te aru i to ratou uaorai mataara?—Mika 2:12.

13. Eaa te au apiianga ta te au mapu ka kite mai mei te au akaraanga ta tatou i uriuri ake nei?

¹³ Me e mapu koe, te kite ra ainei koe i te puapinga kia noo vaitata ki toou au taeake? E kopae pakari i te anoano kia noo kapiti ua ki te aronga o toou uki me kore kia akamamao atu mei te aronga takapini ia koe. Kare e roa atu ana, ka anoano tatou pouroa, te au mapu e te au ruaine i te tauturu a tetai e tetai. No reira, e akaketaketa atu i toou  pirianga ki toou au taeake e te au tuaine i teianei, e kia mataora i te tavini kapiti ia Iehova. I te tuatau ki mua, me vai taokotai koe ki te iti tangata o Iehova, ka akaoraia koe!

14, 15. (a) No teaa ra a Iehova i tereni ei ia tatou kia taokotai? (e) Eaa te ako ta Iehova i oronga mai no tatou kia taokotai?

¹⁴ Te tauturu nei a Iehova ia tatou e to tatou au taeake e te au tuaine kia tavini iaia “ma te manako okotai.” (Zepha. 3:8, 9) Te tereni nei aia ia tatou no te tuatau ki mua me “tavaitai aia i te au mea katoatoa i te Mesia.” (E tatau ia Ephesia 1:9, 10.) Te akakoroanga o Iehova koia oki kia taokotai i tona au tavini pouroa i te rangi e te enua nei ei pamiri okotai e akamori ra iaia. E mea papu tikai e ka rave a Iehova i teia. E te au mapu, ka rauka ia kotou kia riro mai ei tuanga no taua pamiri ra e tuatau ua atu. Ka inangaro ainei koe kia taokotai mai ki te akaaerenga a Iehova?

¹⁵ Te tereni nei a Iehova ia tatou kia taokotai kia rauka ia tatou i te noo kapiti ma te tu au i roto i te ao ou. Ma te akakoromaki, te apii maira aia ia tatou kia “arite katoa ra to te au melo akono ia ratou uaorai,” “ei kapiti anga aroa mou to kotou ia kotou uaorai,” kia “akapumaana kotou tetai ki tetai,” e kia “akatupu i te meitaki tetai ki tetai.” (1 Kori. 12:25; Roma 12:10; 1 Tesa. 4:18; 5:11) Ka kite ua a Iehova e no to tatou tu apa, kare i te mea mama no tatou kia taokotai i tetai au taime. No reira Aia i akakite mai ei kia tatou e kia “akakore oki i te ara tetai e tetai.”—Ephe. 4:32.

16, 17. (a) Eaa tetai tumu i akanooia ai ta tatou au uipaanga? (e) Eaa ta te au mapu ka kite mai mei te akaraanga o Iesu?

¹⁶ Tetai atu mataara e tauturu maira a Iehova ia tatou kia taokotai, koia oki na roto i ta tatou au uipaanga. Te akamaara maira a Ebera 10:24, 25 i tetai tumu no tatou kia uipa kapiti, koia oki kia akamaroiroi tetai e tetai e kia rave i te angaanga memeitaki. Ka riro ta tatou au uipaanga ei mea puapinga maata ia tatou e vaitata atura ki te rā o Iehova.

¹⁷ E akaraanga meitaki a Iesu no tatou no te mea kua mataora aia i te kapiti atu ki te iti tangata o Iehova. E 12 ona mataiti, kua aru aia i tona nga metua ki tetai uipaanga puapinga i ko i te iero. I tetai rā, kua ngaro aia e kare tona nga metua i kite e teiea aia. Kua oro ainei aia kia aravei atu i te au mapu? Kare. Te kite anga tona nga metua iaia, tei ko a Iesu i te iero ma te au puapii e uriuri ra i te au Tuatua Tapu.—Luka 2:45-47.

18. Akapeea te pure i te akaketaketa anga i to tatou taokotaianga?

 ¹⁸ Me pure tatou i te pati ia Iehova kia tauturu i to tatou au taeake i roto i te au mataara taka meitaki, ka akaketaketaia to tatou taokotaianga. Me pure tatou no te au taeake, ka maara katoa ia tatou to tatou inangaro ia ratou. E puapinga tikai i te inangaro i to tatou au taeake, kia akamaroiroi ia ratou i ko i te au uipaanga e kia pure no ratou. E te au mapu, te tauta ra ainei kotou i te rave i teia au angaanga kia riro mai ei au oa meitaki no te au taeake i roto i ta kotou putuputuanga? Kia ora tatou me tae mai te openga, ka anoanoia tatou kia piri vaitata ki to tatou au taeake, kare e ki to Satani ao.

19-21. (a) Eaa ta tatou ka rave i te mea e “e melo oki tatou no tatou uaorai”? Akakite mai i te au akaraanga. (e) Eaa taau i tamou mai mei te akaraanga o te au taeake e tauturu ra i tetai e tetai i te tuatau tumatetenga?

¹⁹ E maata te au akaraanga e akaari maira i te iti tangata o Iehova i teia tuatau e ‘e melo anake oki ratou no ratou uaorai.’ (Roma 12:5) Me takinokinoia to tatou au taeake i roto i te au tumatetenga, ka mii tatou e ka inangaro i te tauturu ia ratou. I roto ia Titema 2011, kua tupu tetai uriia i te enua ko Mindanao i te Philippines. I te po okotai, tere atu i te 40,000 are tei puke ia e te vai, kapiti mai te au are o to tatou au taeake. Karanga te opati manga e i mua ake ka tae atu ei te au kumiti oronga tauturu ki te au taeake, “kua tae takere te tauturu a te au taeake Kerititiano o te au ngai ke.”

²⁰ I Tiapani, kua rokoia to tatou au taeake e te kino maata no te ngaruerue enua ririnui e te ngaru mamaata tei ū ki te tua itinga o te enua. Maata te tangata, kare a ratou apinga i toe mai. Ei akaraanga, kua takoreia te are o tetai tuaine ko Yoshiko. E mamao tona are ki te Are Uipaanga Patireia, mei te 40 kiro mita te mamao. Karanga aia e: “Muri mai, kua poitirere matou e i te rā i muri ake i te ngaruerue enua, kua kimi mai te akaaere kotinga e tetai atu taeake ia matou.” Akakite katoa aia ma te mata katakata e: “Kua mareka tikai matou e na roto i te putuputuanga, kua akonoia matou i te pae vaerua. Pera katoa, kua orongaia te au pereue, au tamaka, au kiri, e te au kakau moe no matou.” Karanga tetai taeake i roto i te kumiti tauturu e: “Kua taokotai te au taeake i roto i te au oire ke o Tiapani i te tauturu i tetai e tetai. Kua aere katoa mai tetai au taeake no Marike mai i te tauturu. Te ui ia anga ratou e eaa te tumu i aere mamao mai ei ratou, pau ratou e, ‘Kua taokotaiia matou ki te au taeake i Tiapani e te anoano ra ratou i te tauturu.’” Te mataora ra ainei koe kia riro ei tuanga no tetai akaaerenga tei akaari i te aroa mou no tetai e tetai? Akamanako ana i to Iehova rekareka maata i te kite i teia taokotaianga.

²¹ Me apii tatou i te irinaki i tetai e tetai i teia tuatau, ka papa ua tatou i te aro kapiti atu i te au turanga ngata a te tuatau ki mua. Noatu e kare e rauka ia tatou i te tuatua atu ki te au taeake i te au enua ke, ka vai taokotai tatou ki te au taeake i roto i to tatou enua. Tetai tuaine i Tiapani ko Fumiko, tei na roto ana i tetai uriia, kua karanga e: “Vaitata tikai te openga. Ka anoanoia tatou kia tauturu ua atu i to tatou au taeake ia tatou e tapapa atura i te tuatau me takoreia te au tumatetenga.”

22. Akapeea te taokotaianga me tauturu ia tatou i te tuatau ki mua?

²² Akapapa i teianei no te rā o Iehova na te rave anga i taau ka rauka kia taokotai ki toou au taeake. Me takoreia te ao kino o Satani, ka akaora a Iehova i tona iti tangata mei tana rai i rave i mua ana. (Isa. 52:9, 10) Me e mapu koe me kore e ruaine, ka anoanoia koe kia noo taokotai ki te iti tangata o te Atua kia ora mai koe. I roto i te atikara ka aru mai, ka uriuri tatou i te au tumu ka anoanoia tatou kia ariki rekareka i ta tatou i rauka.