KUA parani tetai au mapu Kerititiano i te aere i te akara i tetai teata. Kua akarongo ana ratou e e maata to ratou taeake i te apii tei reka tikai i tera teata. Te tae anga ratou ki reira, kua kite ratou i tetai au tutu no runga i te au apinga tamaki e te au vaine e akaariari ra i to ratou kopapa. Eaa ta ratou tukuanga tika ka rave? Ka aere ainei ratou ki roto ka akara i te teata?

Te akaari maira teia tupuanga e e maata ta tatou au tukuanga tika te ka riro ei akatuke i to tatou turanga pae vaerua e to tatou pirianga kia Iehova. Tetai au taime penei te akakoro ra koe i te rave i tetai angaanga, inara me akamanako koe no runga i tera turanga, ka taui koe i toou manako. E ikianga meitaki ainei te reira me e ikianga tau kore?

No to tatou inangaro ia Iehova i akakeuia ai tatou kia akatapu i to tatou oraanga Kiaia e kia papetitoia. Kua taputou tatou i te vai tiratiratu ki te Atua. Inara, te inangaro nei to tatou enemi ko Satani i te takino i to tatou tu tiratiratu. (Apo. 12:17) Na tatou i rave i te tukuanga tika kia tavini ia Iehova e kia akono i tana au akauenga. No reira e mea tangi tikai me ka taui tatou i to tatou manako no runga i to tatou akatapuanga kia Iehova! Ka ngere i reira tatou i te ora mutu kore.

Tere atu i te 2,600 mataiti i topa, kua akatu te Ariki o Babulonia ko Nebukanesa i tetai tiki auro maatamaata e kua akaue i te katoatoa kia akamori i taua tiki ra. Te aronga te ka patoi i tana akauenga, ka tiria ratou ki roto i te umu ai. E toru aronga akamori no Iehova—ko Sadaraka, ko Meseka, e ko Abede-nego—tei patoi i tera akauenga. No te mea kare ratou i tupou ana ki raro i te akamori i taua tiki ra, kua tiria ratou ki roto i te umu ai. Tera ra no te mea kare ratou e inangaro ana i te patoi i ta ratou tukuanga tika kia tavini i te Atua, kua rave a Iehova i tetai temeio e kua akaora mai ia ratou.—Dani. 3:1-27.

 Tetai tuatau i muri mai, kua kite te peroveta ko Daniela e me kitea e te pure ra aia ki te Atua, ka tiria aia ki roto i te vaarua o te au riona. Noatu rai, kua mou piri aia ki tana peu matau i te pure kia Iehova e toru taime i te rā. Kare roa a Daniela i taui ana i tana tukuanga tika kia akamori i te Atua mou. E tei tupu mai, kua akaoraia mai aia mei “te ririnui o te au liona.”—Dani. 6:1-27.

E akono ana rai te au tavini o te Atua i teia tuatau i ta ratou i taputou kia Iehova. I ko i tetai apii i Aperika, kua patoi tetai au tamariki Kerititiano i te piri ki roto i te akaepaepa anga i te reva o te enua. Kua akamatakiteia kia ratou e me kare ratou e piri ki te au tamariki apii i roto i teia akaepaepaanga, ka akaateaia ratou mei te apii. Kare i roa ana i muri mai, kua aere mai te minita o te pae apii ki to ratou oire e kua tuatua atu ki tetai au tamariki Kerititiano. Na roto i te tu akangateitei e te mataku kore, kua akamārama atu teia au tamariki Kerititiano i to ratou turanga. Mei tera taime mai, kare teia manamanata i tupu akaou ana. Ka rauka i te au taeake e te au tuaine mapu i te aere ki te apii ma te kore e māroia kia takino i to ratou pirianga kia Iehova.

Akamanako katoa ana ia Joseph, tei mate poitirere ua tana vaine no te maki. Kua mārama e kua akangateitei te kopu tangata o Joseph i tana akanoonooanga i te tanumanga. Inara, kare te ngutuare tangata o tana vaine i roto i te tuatua mou, e kua inangaro ratou i te rave i te au tukuanga tika no te tanumanga, kapiti mai te au peu kare e tau ana ki te Atua. Karanga a Joseph e: “No te mea kare au i inangaro i te taui i toku manako, kua akamata ratou i te akanauru i taku tamariki, tera ra kua vai tiratiratu ratou. Kua tauta katoa te kopu tangata i te akanoo kia raveia tetai apare i ko i toku ngutuare, inara kua maro au e me inangaro ratou i te rave i te reira, kare e akatikaia i te rave i ko i toku kainga. Kua kite ratou e kare te apare e tau ana ki ta maua irinakianga ko taku vaine, no reira muri ake i te uriurianga manako, kua apai ratou i te reira ki tetai ngai ke.

“I tera tuatau tumatetenga tikai, kua pati akatenga au kia Iehova no te tauturu kia kore toku ngutuare tangata e aati i tana au ture. Kua akarongo mai aia i taku au pure e kua tauturu ia matou kia vai ngaueue kore noatu te au taomianga.” Kare roa a Joseph e tana anau i manako ana i te taui i ta ratou tukuanga tika kia akamori ia Iehova.

Muri poto ua ake i te Pasa i te mataiti 32 T.N., kua aere tetai vaine kare i te ngati Iseraela i te aravei ia Iesu i Sidona. Kua putuputu aia i te pati kia Iesu kia tuaru i te temoni mei roto mai i tana tamaine. I te akamataanga, kare a Iesu i pau ana i tana patianga. Kua akakite aia ki tana au pipi e: “Kare au i tonokia mai i ko na, mari ra, ki te au mamoe i ngaro i te ngutuare o Iseraela.” No te māroanga a tera vaine, karanga a Iesu e: “Kare e tika kia rave i te kai a te tamariki, e titiri atu ei na te kuri.” No tona akarongo, kua pau atu te vaine e: “Tika rai, e te Atu: te kai nei ra te kuri i te ungaungā kai i topa no runga i te kaingakai a to ratou pu.” I na, kua taui a Iesu i tona manako e kua akaora i te tamaine a taua vaine ra.—Mata. 15:21-28.

No ta Iesu i rave, kua aru aia i te tu o Iehova tei akaari i te inangaro i te taui i tona manako i te tuatau tei anoanoia. Ei akaraanga, ka takore tikai te Atua i te ngati Iseraela no tei maani ratou i tetai puakatoro auro, inara kua akatika aia i te patianga a Mose e kua taui Aia i Tona manako.—Exo. 32:7-14.

Kua aru te apotetoro ko Paulo i te akaraanga o Iehova raua ko Iesu. No tetai tuatau, kare a Paulo i manako ana e e mea tau kia aru a Mareko iaia i tona tere mitinari no te mea kua akaruke aia ia Paulo raua ko Banaba i te tere mua. I muri mai ra, kua kite a Paulo e kua rako tangata mai a Mareko e ka meitaki ua i te aru iaia. No reira kua akakite a Paulo kia Timoteo e: “Arataki katoa mai koe ia Mareko; e meitaki oki au iaia i te angaanga i te taoonga nei.”—2 Timo. 4:11.

 Akapeea ra tatou? I te aru anga i te akaraanga aroa e te tu akakoromaki o to tatou Metua i te rangi, penei ka tau rai i tetai taime kia taui i to tatou manako. Ei akaraanga, penei ka taui tatou i to tatou manako no runga i etai ke. Kare tatou mei ia Iehova raua ko Iesu no te mea e aronga apa tatou. Me kua inangaro raua i te taui, kare ainei e rauka ia tatou i te akamanako i te au turanga o etai ke e penei kia taui i to tatou manako?

Penei e mea meitaki kia taui i to tatou manako no runga i tetai au akakoroanga pae vaerua. Tetai aronga e apii ra i te Pipiria e kua roa i te aere mai ki te au uipaanga, penei kare ratou e inangaro kia papetitoia. Me kore te emiemi ra tetai au taeake i te tomo ki roto i te angaanga painia noatu ka rauka rai ia ratou. E tetai au taeake, penei kare ratou e inangaro ana kia riro mai ei tavini tauturu me kore ei tangata pakari i roto i te putuputuanga. (1 Timo. 3:1) Te manako akapera ra ainei koe? Te pati aroa maira a Iehova ia koe kia taui i toou manako e kia kite i te mataora i te tavini anga i te Atua e etai ke.

Kua karanga a Ella, tetai tuaine tei tavini i ko i te opati manga o te Au Kite o Iehova i Aperika e: “Toku aere mai anga ki te Betela, kare au i manako ana e ka noo roa mai au. Inangaro au i te tavini ia Iehova ma toku ngakau katoa inara, kare au i inangaro ana i te akaruke i toku ngutuare tangata. I te akamataanga, kua maaraara tikai au i toku ngutuare tangata! Tera ra, kua rauka i toku taeake i te akamaroiroi iaku kia noo mai. Muri ake i te tai ngauru mataiti i toku noo anga i Betela, inangaro au i te tavini ua atu rai i toku au taeake e te au tuaine na te rave anga i taku tuanga angaanga i Betela.

Maara ainei ia koe tei tupu kia Kaina no tona vareae e te riri anga i tona teina? Kua  akakite te Atua kia Kaina e ka kiteaia mai aia me rave aia i te meitaki. Kua karanga te Atua kia Kaina e “te vai ra te tarangaara i te ngutupa na.” Ka rauka rai ia Kaina i te taui i tona tu e tona manako inara kua iki aia i te kopae i te ako a te Atua. Te mea tangi, kua tamate a Kaina i tona teina e kua riro mai aia e ko te tangata mua tei tamate i tetai tangata!—Gene. 4:2-8.

Akamanako katoa ana i te akaraanga o te Ariki ko Uzia. I te akamataanga, kua rave aia i te mea meitaki i mua i te aroaro o Iehova e kua rauka tetai pirianga vaitata ki te Atua. Te mea tangi ra, kua tupu te tu parau kia Uzia e kua motu tera pirianga. Kua tomo aia ki roto i te iero e kua tutungi i te atinga kakara ki runga i te atarau, e oti akera ko te au taunga anake te ka akatikaia kia rave i tera angaanga. Te akamatakite anga te kau taunga iaia kia kore e rave i teia, kua taui ainei aia i tona manako? Kare. “Riri akerā Uzia” e kua patoi i ta ratou akamatakiteanga. Tei tupu, kua tuku mai a Iehova i te maki repera ki runga iaia.—2 Para. 26:3-5, 16-20.

Ae, e au taime rai tetai ka umuumuia tatou kia taui i to tatou manako. Teia tetai akaraanga. Kua papetitoia a Joachim i te mataiti 1955, inara i te mataiti 1978 kua akaateaia mai aia mei roto i te putuputuanga. E 20 tuma mataiti i muri mai no tona tu tataraara, kua akatika akaouia aia ki roto i te putuputuanga. Tetai rā, kua ui tetai tangata pakari kiaia i te tumu i roa ai iaia i te oki mai kia Iehova. Kua pau atu a Joachim e: “No toku riri e toku tu parau. Tataraapa tikai au no te taroaroa iaku. Noatu kare au i roto i te putuputuanga i tera tuatau, kua irinaki rai au e te apii ra te Au Kite o Iehova i te tuatua mou.” Kua anoanoia aia kia taui i tona tu e kia tataraara.

Penei ka o tatou ki roto i tetai turanga e ka anoanoia kia taui i to tatou tukuanga tika e ta tatou angaanga e rave ra. No reira, kia inangaro tatou i te taui kia rauka ia tatou i te akamareka ia Iehova.—Sala. 34:8.