I KO i tetai uipaanga puapinga tei raveia i Nagoya, i Tiapani i te rā 28 o Aperira, mataiti 2013, kua akakite tetai mema o te Pupu Akaaere ko Anthony Morris i tetai nuti mataora: te tukuia anga te puka ou The Bible​—The Gospel According to Matthew i roto i te reo Tiapani. Tere atu i te 210,000 tangata tei tae mai ki te uipaanga me kore tei akara i te reira i runga i te vitio. Muri ake i te akarongo anga i teia nuti mataora, kua roa te pokarakara anga a te katoatoa no to ratou rekareka.

Teia Evangelia o Mataio, no roto mai i te New World Translation. Tera ra, e mea umere tikai teia puka e 128 kapi. Kua akamārama mai te Taeake Morris e kua maaniia te reira ei tauturu i te iti tangata Tiapani. Eaa teia puka i tuke ei? Eaa ra i anoanoia ai te reira? E eaa te manako o te tangata no runga i te reira?

Maata te tangata tei poitirere i te tu i tataia ai te puka Matthew. E tataia ana te au reta Tiapani mei te tua kaui ki te katau me kore mei runga roa i te kapi ki raro roa. I roto i te au puka e manganui, pera katoa ta tatou au puka, kua tataia te reira mei te tua kaui ki te katau. Inara, kua akapapaia te tataanga i roto i teia puka ou mei runga ki raro, aiteite rai ki te tu i tataia ai te au nuti pepa Tiapani e tetai atu au puka. No te maata anga o te iti tangata Tiapani, e māmā i te tatau i teia tu tataanga. Pera katoa, kua nekeia te au tumu tuatua i runga roa i te kapi ki roto i te tataanga ei au tumu tuatua rikiriki, kia tauturu i te aronga tatau kia mārama meitaki i te au tumu manako mamaata.

Kua akamata viviki te au taeake e te au tuaine i Tiapani i te tatau i te puka Matthew. Kua akakite tetai tuaine e 80 ona mataiti e: “Maata te taime i tatau ei au i te puka o Mataio i mua ana, inara kua tauturu teia tataanga mei runga ki raro e te au tumu tuatua rikiriki iaku kia mārama pu tikai i te ako a Iesu i runga i te maunga.” Tata tetai tuaine mapu e: “Kua tatau au i te puka Matthew mei te akamataanga ki te openga. Kua matau au i te tatau i te tataanga mei te tua kaui ki te katau, inara e inangaro ana te maataanga o te iti tangata Tiapani i te tatau i te tataanga mei runga ki raro.”

Eaa ra teia puka Pipiria i meitaki ei no te iti tangata Tiapani? Noatu e kare e maata ana te au tangata Tiapani i kite no runga i te Pipiria, e inangaro ana ratou i te tatau i te reira. No reira i teianei, ka rauka i te manganui ia ratou tei kore roa i kite ana i te Pipiria i te tatau i tetai tuanga o te reira.

No teaa ra te puka o Mataio i ikiia ai? Me akarongo te iti tangata Tiapani i te tuatua “Pipiria,” e manako ana ratou ia Iesu Karaiti. No reira i ikiia ai te puka o Mataio no te mea tei roto i reira to Iesu papaanga e tona anauanga, tana akoanga puapinga i runga i te maunga, e tana au totou umere no te au rā openga. E reka ana te iti tangata Tiapani i teia au tumu manako pouroa.

 Ma te tu maroiroi, kua oronga te au papuritia o Tiapani i teia puka ou mei tera are ki tera are e i roto i te au atoro akaou anga. Tata tetai tuaine e: “I teianei, e maata toku atianga no te oronga anga i te Tuatua a te Atua ki te tangata i roto i ta matou ngai tutuanga. Kua rauka katoa iaku i te oronga i tetai kopi o Matthew i taua aiai rai o te uipaanga!”

Akapeea ana te au papuritia me oronga i teia puka ou ki te tangata? Kua mārama takere te iti tangata Tiapani i te au irava mei ‘te ngutupa o iti,’ “auraka katoa ta kotou poe e titiriia atu na te puaka,” e “auraka e apiapi i to apopo.” (Mataio 6:34; 7:6, 13) Poitirere ratou i te kite e na Iesu Karaiti teia au tuatua. To ratou kite anga i teia au tuatua i roto ia Matthew, maata ia ratou tei karanga e: “E inangaro ua ana au i te tatau i te Pipiria.”

Te oki akaou anga te au papuritia i te atoro i te aronga tei āriki i te puka Matthew, kua akakite mai te au pu ngutuare e kua akamata ratou i te tatau i tetai tuanga me kore i te katoaanga o te puka. Kua akakite tetai tangata e 60 ona mataiti ki tetai papuritia e: “Maata te taime i toku tatau anga i te puka katoa e kua pumaana au. Apii mai koe iaku no runga i te Pipiria, ine.”

Kua oronga katoaia te puka Matthew i te ngai tangata. Iaia e tutu aere ra, kua oronga tetai Kite i tona imere ki tetai vaine mapu tei āriki i te puka. Okotai ora i muri mai, kua imere mai taua vaine ra i te tuaine i te akakite e kua tatau aia i tetai tuanga o te puka, e ka inangaro aia kia kite maata atu no runga i te reira. I tera mai epetoma, kua akamata taua vaine ra i te apii i te Pipiria e kare i roa ana, kua akamata aia i te aere ki te au uipaanga.

Tere atu i te 1,600,000 kopi o te puka Matthew tei tukuia ki te au putuputuanga i Tiapani. I te au marama tataki tai, te oronga ra te Au Kite e tauatini ua atu kopi ki te iti tangata. Te akakite maira te tataanga i mua i teia puka i te manako o te aronga tei nenei i te reira e: “Te irinaki nei matou e na te tatau anga i teia puka e akaoonu atu i to kotou inangaro no te Pipiria.”