KO TE tutu aere anga i te tuatua meitaki te angaanga puapinga roa atu e raveia ra i runga i te enua nei i teia tuatau. E tu ngateitei roa kia riro ei mata no Iehova i roto i teia angaanga apii. Inara i tetai taime, e akaaoanga no te au painia e te au papuritia kia tamou marie i to ratou maroiroi no te angaanga orometua. No teaa ra?

E kite mai ana tetai au papuritia e kare e maata ana ta ratou pukapukaanga me tutu aere ratou mei tera are ki tera are no te mea kare e tangata i te kainga. E me e tangata tetai i te kainga, penei kare ratou e inangaro i te akarongo i te karere Patireia e i tetai taime ka riri mai ratou. No tetai au papuritia, e mamaata ta ratou ngai tutuanga e te puapingaia ra te reira, inara e mataku ana ratou e kare e rauka ia ratou i te tutu aere ki te aronga pouroa i reira. Tetai pae, kua roa te tuatau i tutu aere ei ratou e kua akaparuparu ratou no te mea kare te openga i tae mai ake.

Te vai ra te au akaaoanga i roto i ta tatou angaanga orometua te ka akaparuparu i to tatou tu maroiroi. Te noo nei tatou i roto i tetai ao i raro ake i “taua vaerua kino ra” ko Satani te Tiaporo, no reira ka tau tatou kia tapapa e ka ngata ia tatou i te tutu aere i te tuatua meitaki.​—1 Ioane 5:19.

Noatu e eaa te au akaaoanga taau ka aro atu i roto i taau angaanga orometua, ka papu ia koe e ka tauturu a Iehova ia koe kia autu i te reira. Inara, akapeea e rauka ai ia koe te maroiroi i roto i taau angaanga orometua? Ka uriuri tatou i tetai au manako tauturu.

I te au mataiti ravarai, tauatini ua atu tangata tei papetitoia ei Au Kite no Iehova. Me ko koe tetai tei papetito ou ia, e maata taau ka apii mai mei te aronga tei tutu aere no te au mataiti e manganui. E me ko koe tetai papuritia no tetai tuatau roa, ka rauka ainei ia koe i te tereni i te au taeake ou? E merengo tikai me rave koe i te reira.

Kua kite a Iesu e ka anoanoia tana au pipi kia tereniia kia riro mai ei au puapii tukatau, e kua  akaari aia kia ratou e akapeea me tutu aere. (Luka 8:1) I teia tuatau, te anoano nei te au papuritia ou i te terenianga kia riro mai ei au puapii tukatau.

Auraka tatou e manako e no te mea te rave nei tetai papuritia ou i te angaanga orometua, kua kite aia i te apii i te tangata. Ka anoanoia aia kia apiiia e tetai taeake takinga meitaki e te aroa. Ka anoanoia te taeake karape kia apii i te papuritia ou akapeea me (1) akapapa i tana ka tuatua ki te tangata ngutuare, (2) pukapuka ki te tangata, (3) oronga i te au puka, (4) atoro akaou i te aronga tei āriki mai i te karere, e te (5) akamata i tetai apii Pipiria. Ka riro mai te papuritia ou ei puapii tukatau me akara e me aru aia i te akaraanga o te taeake karape. (Luka 6:40) Pera katoa, ka rauka i te papuritia ou kia manako papu me kite aia e kua papa ua tetai tangata i te tauturu iaia me ka anoanoia. Na te tuatua akamaroiroi ki te papuritia ou e te akakite anga i tetai au ravenga ei tauturu iaia, ka tukatau aia.​—Koheleta 4:9, 10.

Noatu e ka tauta koe kia pukapuka ki te au tangata ngutuare, i tetai au rā ia koe i roto i te angaanga tutuanga, ka rauka te pukapukaanga meitaki roa atu ki toou patana. Akamaara e kua “tataki toko rua” a Iesu i te tono anga i tana au pipi kia tutu aere. (Luka 10:1) Ia ratou e angaanga kapiti ra, kua rauka ia ratou i te akamaroiroi e te akakeu i tetai e tetai. E atianga meitaki to tatou kia akamaroiroi i tetai e tetai me angaanga kapiti tatou ki te au taeake e te au tuaine i roto i te angaanga orometua.​—Roma 1:12.

Eaa tetai au mea ta korua ka pukapuka? E tupuanga meitaki ainei ta korua i kite mai? E tumu manako ainei taau i reka mai i roto i taau uaorai apii me kore i roto i te apii a te ngutuare? Kua akamaroiroiia ainei koe e tetai apinga taau i akarongo i ko i te uipaanga? I tetai taime, penei ka angaanga kapiti koe ki tetai papuritia kare koe i matau. Penei ka ui koe kiaia e i akapeea aia i te apii anga i te tuatua mou. Eaa tei akapapu kiaia e na Iehova teia akaaerenga? Eaa te au akameitakianga me kore te au tupuanga tana i kite mai? Penei ka rauka ia koe i te akakite atu i te au akameitakianga taau i kite mai. Noatu e eaa te ka tupu i roto i te ngai tutuanga, me angaanga kapiti koe ki tetai taeake i roto i te angaanga orometua, e atianga meitaki te reira kia “akatupu i te meitaki tetai ki tetai.”​—1 Tesalonia 5:11.

Kia akono tamou i to tatou maroiroi i roto i te angaanga orometua, ka anoanoia tatou kia akameitaki atu i te tu o te apii na tatou uaorai. Kua nenei “te tavini akono meitaki e te pakari” i te au puka e te au makatini no runga i te au tumu manako tukeke ta tatou ka rauka kia apii. (Mataio 24:45) Ka  uriuri tatou i tetai akaraanga no tetai tumu manako meitaki no te apii naau uaorai: No teaa ra i puapinga ai te angaanga tutu aere? Te akakite maira te pia “ No Teaa ra ka Tamou ei i Toou Maroiroi no te Angaanga Orometua?” i tetai au tumu.

Na te akara matatio anga i te au manako i roto i te pia e akakeu ia tatou kia tutu ua atu ma te maroiroi. Ei apii naau uaorai, tata i te au irava ke no runga i te au tumu ka tutu aere tatou ma te maroiroi. E oti, akamanako oonu no runga i teia au tumu. Me rave koe i teia, ka maroiroi atu koe i roto i taau angaanga orometua.

E akakite putuputu ua ana te akaaerenga a Iehova i te au ravenga te ka tauturu ia tatou kia akameitaki atu i ta tatou angaanga tutuanga. Ei akaraanga, kapiti atu ki te tutu anga mei tera are ki tera are, penei ka tamata tatou kia tata i te au reta, kia akakitekite na runga i te tereponi, kia tutu aere i runga i te mataara e te ngai tangata, e te tuatua ki tetai ua atu tangata ta tatou ka aravei, e i ko i ta ratou ngai angaanga. Penei ka parani katoa tatou i te tutu aere i te au ngai kare e maata ana te Au Kite, me kore kare e Au Kite i reira.

Ka rauka ainei ia koe te tamata i tetai ravenga ou? Manganui te aronga kua tamata i teia au ravenga e kua puapingaia. Ka uriuri tatou e toru akaraanga.

Kua tamata tetai tuaine ko Aperira i te ravenga i roto i tetai atikara o te Angaanga Patireia, akapeea me akamata i te au apii Pipiria. Kua pati aia ki tona au oa angaanga e toru me ka inangaro ratou i te apii i te Pipiria. Kua poitirere e kua mataora a Aperira no tei āriki ratou pouroa i te apii e kua akamata katoa i te aere mai ki te au uipaanga a te putuputuanga.

Kua akamaroiroi katoaia tatou kia kimi i te aronga te ka inangaro i te tatau i tetai au atikara i  roto i ta tatou makatini. Kua akaari tetai akaaere kotinga i Marike i tetai atikara i roto i te Awake! no runga i te uira toroka ki te au manitia o te au toa oko uira toroka. Kua oronga katoa aia e tana vaine i te au atikara “Understanding Your Doctor” ki te 100 tuma opati taote. Karanga aia e kua riro teia au atoroanga ei tauturu i te tangata kia matau i ta tatou angaanga tutu aere e ta tatou au puka. Muri ake i te kite meitaki anga i te aronga i roto i te ngai tutuanga, kua rauka i te akaaere kotinga e tana vaine i te atoro akaou ia ratou.

Kua tata tetai tuaine ko Judy ki te opati maata no te mea kua mataora aia i te akamaroiroianga kia tutu aere na te taangaanga i te tereponi. Kua akakite aia e ko tona mama e 86 ona mataiti e tei makimaki, e tutu aere ana na runga i te tereponi. Tei tupu mai, kua akamata aia i tetai apii Pipiria ki tetai vaine e 92 ona mataiti!

E puapingaia ana te au ravenga i roto i ta tatou au puka. Tamata i te reira! Na te rave anga i teia e tauturu ia koe kia akono tamou i toou tu mataora e te maroiroi no te angaanga orometua.

Eaa ra tatou i puapinga ai i roto i ta tatou angaanga tutu aere? Kare e no te maata i te au puka ta tatou e oronga ra, te numero o te au apii Pipiria ta tatou e rave ra, me kore te numero o te tangata ta tatou i tauturu kia riro mai ei Au Kite no Iehova. Akamanako ana ia Noa. Eia tangata ke ta Noa e tona ngutuare tangata i tauturu kia riro mai ei aronga akamori ia Iehova? Noatu ra kua puapingaia tana angaanga tutu aere. Ko te mea puapinga koia oki kia tavini tiratiratu tatou ia Iehova.​—1 Korinetia 4:2.

Manganui te au papuritia tei kite mai e, kia mataora atu ta ratou angaanga tutu aere ka anoanoia ratou kia akanoo i te au akakoroanga tau. Eaa tetai o teia au akakoroanga? Tei roto tetai au manako i te pia “ Akanoo i te au Akakoroanga Tau.”

Pati i te tauturu a Iehova kia akariro i taau angaanga orometua ei mea puapinga e te mataora. Me taea toou akakoroanga, ka tupu te tu merengo no te mea kua rave koe i tei rauka ia koe kia tutu aere i te tuatua meitaki.

Tika rai, ka tupu te akaaoanga me tutu aere i te tuatua meitaki. Inara e au ravenga tetai te ka tauturu ia koe kia rave maroiroi i taau angaanga orometua. Pukapuka akamaroiroi ki toou patana, rave putuputu i taau uaorai apii, tamata i te au akakitekiteanga a te tavini akono meitaki e te pakari, e kia akanoo i te au akakoroanga tau. Te mea puapinga roa atu ra, e akamaara e kua oronga mai te Atua ko Iehova i teia tikaanga ngateitei noou kia tutu aere i te tuatua meitaki ei Kite nona. (Isaia 43:10) Ae, ka mataora koe me akono tamou koe i toou maroiroi i roto i te angaanga orometua!