I tuatua akapera ana rai tetai au tavini o te Atua tei kare i akaipoipo. Kua kite ratou e te inangaro maira a Iehova i tona au tavini kia akaipoipo ‘kia tau ki te Atu’ koia oki, kia akaipoipo i tetai tokorua Kerititiano. (1 Korinetia 7:39) No reira eaa te tumu i tuatua akapera ai tetai au Kerititiano?

Ko te au Kerititiano tei tuatua i teia, penei e manako ana ratou e e maata atu te au tuaine kare i akaipoipo i to te au taeake kare i akaipoipo. I roto i te au enua e manganui, e tika rai teia. Ei akaraanga, i Korea e 57 patene o te au tuaine Kerititiano kare i akaipoipo e e 43 patene o te au taeake kare i akaipoipo. I Colombia, e 66 patene au tuaine Kerititiano kare i akaipoipo e e 34 patene au taeake kare i akaipoipo.

I tetai au enua, penei ka māro te au metua kare i te Kite no Iehova kia orongaia mai te moni me kore te au apinga oko maata me akaipoipo ta ratou tamaine. E penei, kare te au taeake tei kare i akaipoipo e rauka i te oronga i taua au apinga ra. Tei tupu mai, ka manata te au tuaine e me ka akaipoipo ratou i tetai tokorua Kerititiano. *​—Akara i te tataanga rikiriki i raro.

Me i manako akapera ana rai koe, ka papu ia koe e te mārama ra a Iehova i toou turanga e toou manako.​—2 Paraleipomeno 6:29, 30

Tera ra i roto i te Pipiria, kua akaue mai a Iehova ia tatou e kia akaipoipo kia tau ki te Atu. No teaa ra? No te mea te kite nei a Iehova i te mea meitaki no tatou e te inangaro ra aia i te paruru ia tatou. Kare roa aia e inangaro ia tatou kia rave i te au ikianga te  ka riro ei mea kino e te ka akataitaia ia tatou. I to Nehemia tuatau, kua akaipoipo te au ngati Iuda i te au vaine kare e akamori ana i te Atua. No reira kua akakite atu a Nehemia kia ratou i te akaraanga kino o Solomona. E tangata akaperepereia a Solomona “e tona Atua, i akariro ei te Atua iaia ei ariki no Iseraela ravarai; kua ara katoaia ra aia i taua au vaine ke ra.” (Nehemia 13:23-26) Te kite nei a Iehova e e meitaki tana au akamaaraanga no tatou, ko teia te tumu i akaue ei aia i te au Kerititiano kia akaipoipo kia tau ki te Atu. (Salamo 19:7-10; Isaia 48:17, 18) Te mataora nei tatou e te ako maira aia ia tatou ma te aroa. Me akarongo tatou ia Iehova, to tatou Tutara, te āriki ra tatou i Tona tikaanga kia akakite mai kia tatou kia rave i tetai apinga.​—Maseli 1:5.

Kare e ekoko e kare koe e inangaro kia “kapitiia ma te tau kore” koia oki, kia akaipoipo i tetai tokorua kare e inangaro ia Iehova. Penei ka arai taua tangata ra ia koe mei te tavini anga i te Atua. (2 Korinetia 6:14) E riro ua ana rai te akoanga a Iehova ei mea meitaki, e e maata te au Kerititiano i teia tuatau tei iki kia tavini ia Iehova. Tera ra, e tuke rai te ikianga a etai ke.

Kua akamata a Maggy, tetai tuaine i Autireria, i te aere kapiti ki tetai tane kare i te Kerititiano mou. * (Akara i te tataanga rikiriki i raro.) Kua karanga aia e: “Kare au i aere ki te au uipaanga no te mea kua aere kapiti au e teia tangata. E kua akaparuparu te reira i toku turanga pae vaerua.” Kua aere kapiti tetai mai vaine i Initia ko Ratana tona ingoa e tetai tane tei apii i te Pipiria. Inara, kua apii teia tangata i te Pipiria kia rauka i te piri kiaia. I te openga, kua akamutu a Ratana i te tavini ia Iehova e kua piri atu ki tetai akonoanga ke kia rauka iaia i te akaipoipo i teia tane.

Ko tetai vaine mapu i Cameroon ko Ndenguè tona ingoa, i tona 19 mataiti kua akaipoipo aia i tetai tane tei kare i akamori ia Iehova. I mua ake i to raua rā akaipoipo, kua akatika te tane iaia kia riro ei Kite no Iehova. Inara, e rua epetoma i muri ake i to raua rā akaipoipo, kua akakite te tane kiaia e kare aia i akatikaia kia aere ki te au uipaanga a te putuputuanga. Kua akakite te vaine e: “Kua aue au. Kua kite mai au e kare e rauka akaou iaku i te akatere i toku uaorai oraanga. Kua taitaia tikai toku ngakau.”

E tika, kua akaipoipo tetai au Kerititiano i tetai tokorua tei kare e tavini ia Iehova, inara e tu meitaki to ratou. Tera ra, i te mea e e tu meitaki to te tokorua tei kare e tavini ia Iehova, eaa te ka tupu ki toou pirianga kia Iehova? Eaa toou tu i te kite anga e kare koe i akarongo ana ki te akoanga ta Iehova i oronga kia mataora koe? E tei puapinga atu, eaa to Iehova manako no runga i taau i rave?​—Maseli 1:33.

Ko te au taeake e te au tuaine takapini i teianei ao tei akarongo ki te akoanga a Iehova kia akaipoipo kia ‘tau ki te Atu,’ papu ia ratou e e ikianga meitaki atu ta ratou i rave. Te inangaro ra te au taeake e te au tuaine kare i akaipoipo i te akamareka ia Iehova na te akaipoipo anga i tetai tokorua te akamori ra Iaia. Kua inangaro maata tetai tuaine ko Michiko no Tiapani mai i te akarongo kia Iehova noatu kua inangaro tona kopu tangata iaia kia akaipoipo i tetai tokorua kare e inangaro ia Iehova. E ngata iaia me kite aia i tona au oa e akaipoipo ra i tetai tokorua Kerititiano. Kua karanga aia e: “Kua manako au e no te mea e Atua mataora a Iehova, ka mataora te tangata me kua akaipoipo ratou e me kare. Te irinaki katoa nei au e te oronga maira a Iehova i te au anoano o to tatou ngakau. No reira, me kare e rauka ia tatou i te kimi i tetai tokorua noatu te inangaro nei tatou i te akaipoipo, e meitaki atu kia kore tatou e akaipoipo e kia tiaki ua.” (1 Timoteo 1:11) I muri mai, kua akaipoipo a Michiko i tetai tokorua Kerititiano, e te mataora nei aia no tei akarongo ki te akoanga a Iehova.

Te vai ra rai tetai au taeake tei tiaki no te taime tau kia akaipoipo. Ei akaraanga, kua akakite a Bill no Autireria mai e i tetai taime, kua tupu tona inangaro no te au vaine kare i te Kite no Iehova. Inara kare roa aia i piri atu kia ratou no te mea kare aia e inangaro kia ‘kapiti atu ma te tau kore’ ki tetai vaine akarongo kore. I te au mataiti i aereia, kua tupu tona inangaro no tetai au tuaine, kare ra ratou i inangaro iaia. Kua tiaki a Bill no tetai 30 mataiti, e kua akaipoipo aia i tetai vaine Kerititiano kua aiteite to raua akakoroanga. Karanga aia e: “Kare au e tataraapa ana. E akameitakianga teia no te mea e aere kapiti ana maua ki runga i te angaanga orometua, e apii kapiti  ana maua, e e akamori kapiti ana maua ia Iehova. E mataora ana au i te aravei i te au oa a taku vaine no te mea e aronga akamori ratou ia Iehova. Kua akatumuia to maua oraanga akaipoipo ki runga i te au kaveinga Pipiria.”

Eaa taau ka rauka i te rave ia koe e irinaki ra ki te akoanga a Iehova e me tiaki koe no tetai tokorua tei tavini Iaia? Penei ka akamanako koe i te tumu kare koe i akaipoipo ake. Me kare koe i akaipoipo ake no te mea te inangaro ra koe i te akono i te akauenga a Iehova, ka papu ia koe e ka mataora a Iehova. (1 Samuela 15:22; Maseli 27:11) Pera katoa, e pure putuputu kia Iehova e e akakite kiaia i toou manako. (Salamo 62:8) Ia koe e tauta ra kia kopae i te au timataanga e te au manako kino, ka akaketaketa atura toou pirianga kia Iehova. Ka papu ia koe e te manako maira a Iehova i toou inangaro e toou au anoano no te mea te akaperepere ra aia ia koe. Kare aia e taputou mai ana i tetai tokorua noou. Inara me inangaro tikai koe kia akaipoipo, te kite maira a Iehova i te mataara meitaki atu kia akamerengo i toou inangaro.​—Salamo 145:16; Mataio 6:32.

I tetai au taime, penei ka manako koe mei ia Davida rai tei karanga e: “E akarongo vave mai koe iaku e Iehova; kua taravai toku vaerua: auraka koe e uuna i to mata iaku.” (Salamo 143:5-7, 10) Auraka koe e tuku i te au. Akatika ia Iehova kia akaari kia koe i tana e inangaro ra kia rave koe. Akarongo ki te tuatua a Iehova na te tatau anga i te Pipiria e te akamanako oonu anga i taau e tatau ra. Na teia e tauturu ia koe kia kite e eaa ta Iehova e umuumu maira ia koe e i akapeea aia i te tauturu anga i tona au tavini i mua ana. Me akarongo tatou ia Iehova, ka tupu to tatou inangaro kia akarongo ua rai kiaia.

Me kare koe i akaipoipo ake, eaa atu taau ka rauka i te rave kia mataora toou oraanga? E akaketaketa atu i toou pirianga kia Iehova e e akatupu i tetai turanga meitaki i mua iaia. Ka rauka katoa ia koe i te angaanga pakari, i te akaari i te tu oronga ua, te tu oaoa, e te tiratiratu i mua ia Iehova. E au tu puapinga teia i roto i tetai oraanga akaipoipo. (Genese 24:16-21; Ruta 1:16, 17; 2:6, 7, 11; Maseli 31:10-27) E kimi na mua i te Patireia na te rave maata anga i te angaanga orometua e te au angaanga i roto i toou putuputuanga. Na teia e paruru ia koe kia kore e rave i te au ikianga tarevake. Kua akakite a Bill no runga i tona tuatau kare i akaipoipo e: “Kua aere viviki tera tuatau e kua taangaanga au i toku taime i roto i te tavinianga ia Iehova ei painia.”

Ko te akauenga a Iehova kia akaipoipo kia ‘tau ki te Atu,’ e mea meitaki te reira no tatou i teia tuatau. Na te akaipoipo anga i tetai tokorua Kerititiano, ka mareka e ka mataora a Iehova. Te na ko ra te Pipiria e: “E ao to te tangata i mataku ia Iehova, tei rekareka maata i tana ra au akauenga. E apinga nui tei tona are, e te taongaia: e tika oki tana tuatua-tika i te vai marie anga.” (Salamo 112:1, 3) No reira e akapapu e kia akarongo ki te akauenga a te Atua e kia akaipoipo kia ‘tau ki te Atu.’