I roto i te Watchtower o Tepetema 15, 1950, kua akataka mai te reira i te aiteanga o te “akatutuanga” e te “aiteiteanga.” Kua akamārama mai e te akatutu maira tetai tangata, akakoroanga, me kore apinga i tetai tangata me kore i te ka tupu a tetai tuatau ki mua. Ko te aiteiteanga, ko te reira tikai te tangata, te akakoroanga, me kore te apinga e akatutuia ra. E kapiki katoaia ana te akatutuanga e ko te ata, e te aiteiteanga e ko te tupuanga tikai.

I mua ana, i tuatua ana ta tatou au puka e te akatutu maira te au tane e te au vaine akarongo mou mei ia Debora, Eliu, Iepheta, Iobu, Rahaba, Rebeka, e etai ke, i te aronga akatainuia me kore te “aronga maata rava.” (Apokalupo 7:9) Ei akaraanga, i tuatua ana tatou e te akatutu maira a Iepheta, Iobu, e Rebeka i te aronga akatainuia e te akatutu maira a Debora e Rahaba i te aronga maata rava. Inara, i teia tuatau, kare tatou e rave akaou ana i te au akatutuanga mei teia rai. Eaa ra i akapera ai?

Te apii maira te au Tuatua Tapu e te akatutu maira tetai aronga e taikuia ra i roto i te Pipiria i tetai tangata me kore apinga te ka tupu a tetai tuatau ki mua. Ei akaraanga, i roto ia Galatia 4:21-31, te akataka ra te apotetoro ko Paulo i tetai tupuanga te o maira tetai nga vaine. Ko Hagara te vaine mua, e vaine tuikaa aia na Aberahama. Kua akamārama mai a Paulo e te akatutu maira teia vaine i te iti tangata Iseraela, tei piri atu kia Iehova mei tei umuumuia i raro ake i te Ture a Mose. Te rua, ko Sara te vaine a Aberahama, e “vaine rangatira” aia. Te akatutu ra aia i te vaine a te Atua koia oki, te tuanga o ta Iehova akaaerenga i te rangi. Kua taiku katoa a Paulo i te au akatutuanga i rotopu i te ariki ko Melekizedeka e Iesu. (Ebera 6:20; 7:1-3) Tetai katoa, kua akaaite a Paulo i te peroveta ko Isaia e tana tamariki tamaroa kia Iesu e te au Kerititiano akatainuia. (Ebera 2:13, 14) Kua akaue a Iehova ia Paulo kia rave i teia au akatutuanga, no reira papu ia tatou e e mea tika tikai teia.

Tera ra, i te mea te akatutu ra te Pipiria i tetai tangata ki tetai apinga, eiaa tatou e manako e ko te au mea pouroa tei tupu i roto i tona oraanga, te akatutu  ra i te ka tupu a tetai tuatau ki mua. Tetai akaraanga, kua akamārama mai a Paulo e te akatutu ra a Melekizedeka ia Iesu. I na, kare roa a Paulo i taiku ana i te taime i oronga ai a Melekizedeka i te varaoa e te uaina na Aberahama i muri ake te autu anga aia i te au ariki e a. Tera te aiteanga, kare e tumuanga tau i roto i te Pipiria kia kimi tatou e eaa tikai te aiteanga o teia tupuanga.​—Genese 14:1, 18

I te au anere mataiti i muri ake te matenga o Iesu, kua rave tetai aronga tata i te au tarevake. Kua akaaite ratou i te au akaraanga Pipiria ki tetai akatutuanga. I roto i te International Standard Bible Encyclopaedia, te akamārama maira i te au apii anga o Origen, Ambrose, e Jerome e: “E maata te au akatutuanga ta ratou i taangaanga no te au tupuanga e te au turanga i roto i te Pipiria, noatu kare e puapingaia te reira. Pera katoa te au tupuanga tei māmā ua i te mārama, kua manako tetai pae e e tumuanga tetai i muri ake i taua au tupuanga ra tei ngata i te mārama . . . , mei tei manakoia i roto i te numero o te au ika ta te au pipi i mou i te po i mama mai ei a Iesu ki mua ia ratou​—e tauta tikai ana tetai aronga i te kimi i te puapinga o te numero 153, ko te numero teia o te au ika ta te au pipi i mou!”

Kua akamārama katoa tetai tangata tata ko Aukuteine o Hippo e e tumuanga puapinga tetai no runga i te angai anga a Iesu e 5,000 tangata ki te rima varaoa kerite e te nga ika e rua, mei tei tuatuaia i roto i te Pipiria. Kua karanga aia e te akatutu ra te rima varaoa kerite i te au puka mua e rima o te Pipiria. E no te mea e manakoia ana e e puapinga atu te titona ki te kerite, ko te aiteanga i reira e puapinga atu te “Koreromotu Ou” ki te “Koreromotu Taito.” Kua akamārama katoa aia e te akatutu ra te nga ika i tetai ariki e te kau taunga. Kua karanga atu tetai tangata kite e ko te oko anga a Iakobo i te taoonga mataiapo o Esau no tetai kai, te akatutu ra te reira i te oko anga a Iesu i te manakonakoanga no tetai aronga kia aere ki runga i te rangi ma tona toto!

Ae, e ngata ia tatou i te mārama i teia au akamāramaanga. Kare roa e rauka i te tangata i te kite e me te akatutu maira tetai tua Pipiria i tetai mea te ka tupu a te tuatau ki mua e me kare. No reira, eaa te mea meitaki no tatou kia rave? Me apii mai te au Tuatua Tapu e te akatutu maira tetai tangata, akakoroanga, me kore apinga i tetai mea te ka tupu a tetai tuatau ki mua, ka āriki ua tatou i taua akamāramaanga. Tera ra, auraka tatou e rave i te akatutuanga no runga i tetai tua Pipiria me kare te reira e akatumuia ki runga i te au Tuatua Tapu.

Akapeea i reira tatou e puapinga ai mei te au tupuanga ta tatou e tatau ra i roto i te Pipiria? Kua tata te apotetoro ko Paulo e: “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.” (Roma 15:4) I roto i teia irava, te tata ra a Paulo ki te au Kerititiano akatainuia i te anere mataiti mua, te akakiteanga e akapeea ratou me puapingaia mei te au tua Pipiria. Tae mai ki teia tuatau, e puapingaia ana te au Kerititiano pouroa, kapiti mai te “mamoe ke atu,” mei te au akaraanga i roto i te au Tuatua Tapu.​—Ioane 10:16; 2 Timoteo 3:1.

Inara, kare te au tua Pipiria pouroa i tataia no te aronga ua tei akatainuia, te “mamoe ke atu,” me kore te au Kerititiano i tetai tuatau ua o te tuatua enua. Tera ra, e puapingaia ana te au tavini pouroa o te Atua i te tuatau i topa e i teia tuatau katoa mei te au tua Pipiria. Ei akaraanga, kare te takinokinoanga tei tupu kia Iobu i akatutu ua i te takinokinoanga o te aronga akatainuia i te tuatau o te Tamaki I o te Ao. Maata te iti tangata o Iehova, te aronga akatainuia e te “mamoe ke atu,” i takinokinoia mei ia Iobu rai e kua puapingaia ratou mei te apii anga i taua tupuanga ra. Kua kite ratou “i ta te Atu [Iehova] i rave i te openga ra; e kua ki te Atu i te aroa e te takinga-meitaki maata.”​—Iakobo 5:11.

I roto i ta tatou au putuputuanga i teia tuatau, te kite nei tatou i te au vaine akarongo mou mei ia Debora rai, pera katoa te aronga pakari kua aite to ratou tu mei to Eliu rai. Ka kite katoa tatou i te au painia tei maroiroi e tei akaari i te tu ngakau toa mei to Iepheta rai, pera katoa te au tane e te au vaine akarongo mou tei akaari i te tu akakoromaki mei to Iobu rai. Te mataora nei tatou e kua oronga mai a Iehova kia tatou i teia tuatau “te au tuatua ravarai oki i tataia i muatangana,” kia rauka ia tatou “te akakoromaki e te pumaana o te tuatua i tataia ra”!

No reira no teia au tumu, kare roa tatou e kimi i te au akatutuanga me kore te au aiteanga ki te au tua Pipiria pouroa. Tera ra, te akamou ra ta tatou au puka ki runga i te apii anga i te au manako puapinga mei roto mai i te au Tuatua Tapu.