1. Eaa te tumu i “rekareka atura” a Iesu ma te vaerua tapu? (Akara i te tutu mua o teia atikara.)

AKAMANAKO ana e te kite ra koe ia Iesu e “rekareka atura” ma te vaerua tapu. Penei kua oraora tona mata e kua akaari aia i te mata katakata. Eaa te tumu? Koi tono ua ake aia i tana au pipi e 70 kia tutu aere i te tuatua meitaki o te Patireia o te Atua. I te mea e maata te au enemi ririnui tei patoi i te tuatua meitaki, kua inangaro aia i te kite e akapeea tana au pipi i te akono anga i ta ratou tukuanga angaanga. Kapiti mai ki teia au enemi, ko te au tata tuatua e te au Pharisea, e pupu teia tei apiiia e tei kite maata. Inangaro ratou kia manako e e tangata kamuta a Iesu, e e ‘aronga apii koreia e te kite kore’ tana au pipi. (Angaanga 4:13; Mareko 6:3) Noatu te reira, te oki mai anga te au pipi mei ta ratou tukuanga angaanga, kua rekareka maata ratou. Kua tutu ratou noatu te patoi anga a te au enemi e te au temoni! Eaa te tumu i rauka ai ia ratou te tu rekareka e te ngakau toa?—E tatau ia Luka 10:1, 17-21.

2. (a) Akapeea te au pipi a Iesu i aite ei ki te tamariki? (e) Eaa tei tauturu i te au pipi a Iesu kia mārama i te au apiianga pakari o te Pipiria?

² Kua akakite a Iesu kia Iehova e: “E akameitaki au ia koe, e taku Metua, e te Atu no te rangi e te enua, i te mea ko koe  i uuna ke atu i teianei au mea i te aronga pakari e te kite, e kua akakite mai ki te tamariki nei. Koia ïa, e taku Metua, e mea tika ïa ia koe.” (Mataio 11:25, 26) Eaa a Iesu i kapiki ei i tana au pipi e ei au tamariki? No te mea kua puareinga ua te au pipi a Iesu kia apiiia ratou mei te tamariki rai, kare ratou e aite ki te au Pharisea tei apii meitakiia. Kua akaari te au pipi i te tu akaaka, kare i te tu ngakau parau. (Mataio 18:1-4) No to ratou tu akaaka, kua oronga a Iehova i tona vaerua tapu kia tauturu ia ratou kia mārama i te au apiianga pakari o te Pipiria. Kare ra te au arataki akonoanga i mārama i teia no to ratou uaorai ngakau parau e no te mea kua akapoiri a Satani i to ratou manako.

3. Eaa ta tatou ka uriuri i roto i teia atikara?

³ Ko te tumu teia i rekareka ai a Iesu no te mea kua mataora aia i te kite i te mataara i apii ei a Iehova i te au apiianga pakari o te Pipiria ki te aronga akaaka. Te āriki ra te Atua i teia tu no te apii anga, e kare tona tu e taui. Akapeea aia i te akaari anga e te āriki ra aia i teia tu no te apii anga? I roto i teia atikara, ka akara tatou e akapeea a Iehova i te apii atu i te au apiianga pakari o te Pipiria ki te aronga akaaka i teia tuatau.

4. Na roto i teea mataara i tauturu ei te tuanga māmā ua o te Watchtower ia tatou?

⁴ I te au mataiti i topa, kua meitaki atu te tu e apii atura te akaaerenga a te Atua na roto i te tu māmā ua e te taka meitaki. Ka uriuri tatou e toru akaraanga. Te mea mua, ko te tuanga māmā ua o te Watchtower. * (Akara i te tataanga rikiriki i raro.) Kua tauturu teia i te manganui tei ngata ia ratou i te tatau me kore i te mārama i te reo. Kua kite te au ngutuare tangata e no teia tuanga māmā ua, kua mārama meitaki ta ratou tamariki i Te Punanga Tiaki. E maata ia ratou tei tata i te au reta ei akaari i to ratou tu āriki rekareka. Akakite tetai tuaine e i mua ana, kua mataku aia i te paupau i ko i te Apii Punanga Tiaki. Inara kua taui te reira! Muri ake te tatau anga i te tuanga māmā ua o te Watchtower, kua tata aia e: “Teianei, e paupau ua ana au i ko i te uipaanga e kare au e mataku akaou ana! Te akameitaki nei au ia Iehova e ia kotou.”

5. Eaa te puapinga tei rauka mai no te urianga ou o te New World Translation of the Holy Scriptures?

⁵ Te rua o te akaraanga, te urianga ou o te New World Translation of the Holy Scriptures tei tukuia ki te katoatoa i roto i te reo Papaa i ko i te uipaanga mataiti tei raveia ia Okotopa 5, 2013. * (Akara i te tataanga rikiriki i raro.) I roto i teia urianga, kua akaitiia te numero o te au kupu i roto i te au irava, inara kare te aiteanga i tauiia e e māmā atu i te mārama i te reira. Ei akaraanga, i roto ia Iobu 10:1, kua akaitiia  te numero o te au kupu mei te 27 ki te 19 e i roto ia Maseli 8:6, kua akaitiia te numero o te au kupu mei te 20 ki te 13. Taka meitaki ua te aiteanga o teia nga irava i roto i te urianga ou. Kua karanga tetai taeake akatainuia kua roa i te tavini anga ia Iehova e, “Koi tatau ua ake au i te puka o Iobu i roto i te urianga ou, e ko te taime mua tikai teia i mārama ai au i te reira!” E manganui tei manako akapera.

6. Eaa toou manako no runga i to tatou māramaanga taka meitaki no runga ia Mataio 24:45-47?

⁶ Te toru, ko te au akameitaki anga no te tu i mārama ai tatou i tetai au irava. Tetai akaraanga, kua neneiia te māramaanga taka meitaki no runga i “te tavini akono meitaki e te pakari” i roto i te Punanga Tiaki o Tiurai 15, 2013. (Mataio 24:45-47) Kua akamārama te reira e ko te Pupu Akaaere te tavini akono meitaki. Pera katoa, ko te “ngutuare” te aronga akatainuia e te “mamoe ke atu” tei angaiia e te tavini akono meitaki. (Ioane 10:16) Mataora tikai tatou i te apii i teia au tuatua mou e ka mataora katoa i te apii atu i te reira ki te tangata! Eaa tetai au mataara ke i akaari ei a Iehova e kua āriki aia i te au apiianga tei māmā ua e te taka meitaki?

7, 8. Eaa tetai au akaraanga no te au tua Pipiria te akatutu maira i te ka tupu a tetai tuatau ki mua?

⁷ Me kua roa koe i te tavini anga ia Iehova, penei kua kite koe i te tauianga no runga i ta tatou akamāramaanga i te au tua Pipiria i roto i ta tatou au puka. I mua ana, i karanga ana tatou e te akatutu ra tetai au tua Pipiria i te ka tupu a tetai tuatau ki mua. Kua kapikiia taua tua ra e ko te akatutuanga. Ko te apinga tikai e akatutuia ra, e kapikiia ana te reira e ko te aiteiteanga. E tumuanga meitaki ainei tetai kia akamārama i te au tua Pipiria na roto i teia mataara? Ae. Ei akaraanga, kua tuatua a Iesu no ‘te akairo o te peroveta ko Iona.’ (E tatau ia Mataio 12:39, 40) Akamārama a Iesu e ko te tuatau ia Iona i roto i te kopu o te ika, te akatutu maira i te tuatau ia Iesu i roto i te vaarua.

⁸ E au akaraanga Pipiria katoa tetai te akatutu maira i te au mea ka tupu a tetai tuatau ki mua. E maata te au akaraanga ta Paulo i akataka mai. Tetai akaraanga, ko te pirianga o Aberahama kia Hagara e Sara, te akatutu maira i to Iehova pirianga ki te ngati Iseraela e te tuanga o ta Iehova akaaerenga i te rangi. (Galatia 4:22-26) Mei te reira katoa, kua riro te tapenakara, te iero, te Rā Tapokianga Ara, te taunga maata e tetai au mea ke i roto i te Ture ei ‘ata no te au mea memeitaki a muri atu.’ (Ebera 9:23-25; 10:1) Ka akaketaketaia to tatou akarongo me apii tatou i teia au tua Pipiria e ta te reira e akatutu maira. Inara ko te aiteanga ainei e ko te au tangata, au akakoroanga, e te au apinga pouroa i roto i te Pipiria, te akatutu maira i tetai tangata me kore apinga?

9. I mua ana, eaa te akamāramaanga o te tua Pipiria no runga ia Nabota?

⁹ I mua ana, kua akakite ta tatou au puka e ko te au tangata, akakoroanga, me  kore te au apinga i roto i tetai au tua Pipiria, kua akatutu mai i tetai tangata me kore apinga. Ei akaraanga, kua tamate te Ariki Vaine kino ko Iezebela ia Nabota kia rave tana tane ko Ahaba i te kainga vine a Nabota. (1 Ariki 21:1-16) I te mataiti 1932, kua akamārama te Watchtower e te akatutu maira a Ahaba raua ko Iezebela ia Satani e tona akaaereanga, te akatutu ra a Nabota ia Iesu, e te akatutu ra te mateanga o Nabota i te matenga o Iesu. Inara, i te mataiti 1961, kua tuatua te puka “Let Your Name Be Sanctified” e te akatutu maira a Nabota i te aronga akatainuia e te akatutu ra a Iezebela ia Kerititome. Pera katoa, te takinokino anga a Iezebela ia Nabota, te akatutu ra i te takinokino anga i te aronga akatainuia i te tuatau openga. Kua roa te tuatau te akamaroiroi anga teia au akamāramaanga i te akarongo o te iti tangata o te Atua. No reira, eaa ra i tuke ei te tu e akamārama ra tatou i te au tua Pipiria i teianei?

10. (a) Na roto i teea mataara e akamārama ra te tavini akono meitaki i tetai au tua Pipiria? (e) I teia tuatau, te akamou ra ta tatou au puka ki runga i teaa?

¹⁰ I te au mataiti i topa, kua tauturu a Iehova i “te tavini akono meitaki e te pakari” kia rauka te tu pakari. Na roto i teea mataara? I teia taime, ka taangaanga ua te tavini akono meitaki i te au akatutuanga no runga i te au tua Pipiria me kua akatumuia te reira ki runga i te au Tuatua Tapu. Tetai au akamāramaanga taito no runga i te au akatutuanga e te au aiteiteanga, kua ngata i te mārama, i te akamaara, e te  akono i te reira. Tei puapinga atu, me akamou ua i te manako ki runga i te au aiteiteanga i roto i te au tua Pipiria, ka māmā ua i te akangaropoina i te au apiianga. No reira i teia tuatau, te akamou ra ta tatou au puka ki runga i te au apiianga māmā ua e te taka meitaki no runga i te akarongo, te tu akakoromaki, te tu akono i te Atua, e tetai au tu meitaki ta tatou ka tamou mai mei roto i te au tua Pipiria. *​—Akara i te tataanga rikiriki i raro.

11. (a) Eaa to tatou māramaanga i teianei no te tua o Nabota, akapeea tona akaraanga me tauturu ia tatou? (e) I teianei, eaa te tumu kare ta tatou au puka e taiku putuputu ana i te au akatutuanga e te au aiteiteanga? (Akara i te atikara “Au Uianga a te Aronga Tatau” i roto i teia makatini.)

¹¹ I teianei, te taka meitaki ra to tatou māramaanga i te tua no runga ia Nabota. Te tumu i mate ei a Nabota, kare no te mea te akatutu ra aia ia Iesu me kore te aronga akatainuia. Mari ra, kua mate aia no tona tu tiratiratu ki te Atua. Kua akarongo aia ki te Ture a Iehova noatu te takinokinoanga pakari a tetai mana tutara. (Numero 36:7; 1 Ariki 21:3) E akaraanga meitaki tikai teia no te au tavini pouroa o te Atua i teia tuatau te ka na roto i te takinokinoanga. (E tatau ia 2 Timoteo 3:12.) Ka rauka i te au Kerititiano pouroa i te mārama, te akamaara, e te akono i te reira apiianga pera katoa i te akaketaketa i to ratou akarongo.

12. (a) Eaa te manako ka kopae tatou no runga i te au tua Pipiria? (e) Eaa te tumu i rauka ai te au akamāramaanga taka meitaki o te au apiianga pakari? (Akara i te tataanga rikiriki i raro.)

¹² Ka manako ua ainei tatou e te akakite maira te au tua Pipiria i te au apiianga tau e kare atu e aiteanga ke i roto i te reira? Kare. I teianei, te akamārama ra ta tatou au puka e akapeea tetai tua Pipiria i te piri atu anga ki tetai tua Pipiria ke. Ei akaraanga, ko te tu tiratiratu o Nabota noatu te takinokinoanga e te tamateanga, te akamaara nei ia tatou i te tu tiratiratu o Iesu e te aronga akatainuia. Tera ra, ka akamaara katoa tatou i te tu tiratiratu o te maataanga o te “mamoe ke atu.” Te kite nei tatou e te apii maira a Iehova ia tatou na roto i te tu māmā ua. *​—Akara i te tataanga rikiriki i raro.

13. Eaa te au akaraanga te akaari ra e te akamārama nei tatou i ta Iesu au akatutuanga ma te tu māmā ua e te taka meitaki?

¹³ Ko Iesu Mesia te Puapii maata roa atu tei ora ana. E reka ana aia i te akakite i te  au akatutuanga e te au akaraanga, ei apii i te tangata. (Mataio 13:34) E mea puapinga te au akatutuanga no te mea te akamārama ra te reira i te au tumu manako ngata na roto i tetai tu māmā ua te ka akakeu ia tatou kia akamanako meitaki e te ka taeria ki to tatou ngakau. Te au mataiti i topa, kua akamārama ta tatou au puka i ta Iesu au akatutuanga na roto i te tu māmā ua e te taka meitaki. Ei akaraanga, i roto i Te Punanga Tiaki o Tiurai 15, 2008, kua tauturu ia tatou kia mārama meitaki atu i ta Iesu akatutuanga no te akaopue, te ua tinapi, e te kupenga. I teianei kua kite tatou e te akamārama ra teia au akatutuanga i te Patireia o te Atua, e kua tauturu teia i te manganui kia kopae i te au tu kino o teia ao e kia riro ei au pipi na Iesu.

14. (a) I mua ana, eaa ta tatou akamāramaanga no runga i te parapore o te tangata Samaria? (e) Eaa to tatou māramaanga i ta Iesu parapore i teianei?

¹⁴ Akapeea tatou e mārama ai i te au tua, me kore te au parapore, ta Iesu i tuatua? Tetai o teia au tua, e akatutuanga te reira me kore e totou. Tetai atu, te apii maira i te au apiianga tau. Akapeea tatou e kite ei e ko teea te au tua te akatutu ra i tetai apinga me kore tangata? I te au mataiti i topa, kua taka meitaki te pauanga. Ei akaraanga, akamanako ana i ta tatou akamāramaanga taito no runga i te parapore a Iesu no te tangata Samaria. (Luka 10:30-37) I te mataiti 1924, kua akakite te Watch Tower e te akatutu maira te tangata Samaria ia Iesu, e ko te mataara e eke maira mei Ierusalema ki Ieriko, te akatutu ra i te turanga o te tangata tei kino roa atu mei te tuatau mai o te meameaau anga i roto i te kainga i Edene. Pera katoa, te akatutu maira te aronga keikeia i runga i te mataara i te au ngai pitiniti mamaata e te aronga noinoi, e kua akatutu katoa te taunga e te tangata Levi ia Kerititome. Inara i teia tuatau, te akamaara nei teia akatutuanga i te au Kerititiano pouroa e kia kore ratou e papakitai. Ka anoanoia tatou kia tauturu i te aronga tei ngere kia apii i te tuatua mou no runga i te Atua. Te rekareka nei tatou i te kite e akapeea a Iehova i te apii anga i te tuatua mou ki te tangata na roto i te mataara taka meitaki.

15. Eaa ta tatou ka uriuri i roto i te atikara ka aru mai?

¹⁵ I roto i te atikara ka aru mai, ka uriuri tatou i ta Iesu parapore no te tai ngauru paretenia. (Mataio 25:1-13) Eaa te māramaanga ta Iesu i inangaro no tana au pipi kia rauka mai mei taua akatutuanga ra? Te akatutu ra ainei te au tangata, au akakoroanga, me kore te au apinga i roto i taua akatutuanga ra i tetai tangata me kore i te ka tupu a tetai tuatau ki mua? Me kore kua inangaro ainei a Iesu ia tatou kia tamou i te au apiianga te ka tauturu ia tatou i te au rā openga? Ka akara tatou.