1, 2. (a) Eaa ta Iesu i tuatua no runga i te tuatau openga? (e) Eaa te au uianga ta tatou ka uriuri?

AKAMANAKO ana ia Iesu e noo ra i runga i te maunga o Oliveta e akara atura i te iero i Ierusalema ma tana au apotetoro tokoā ko Petero, Anederea, Iakobo, e Ioane. Kua akarongo meitaki ratou ia Iesu i tana akataka anga i tetai totou umere no te tuatau ki mua. Te akaari maira teia totou i te ka tupu i te tuatau openga o teia ao kino me tutara a Iesu i te Patireia o te Atua. Akakite a Iesu kia ratou e i taua tuatau ra, ka riro te “tavini akono meitaki e te pakari” ei mata nona i te enua nei e ka oronga teia tavini i te kai vaerua i te ora mou.​—Mataio 24:45-47.

² Aru mai, i roto i taua parapore ra kua akakite a Iesu no runga i te tai ngauru paretenia. (E tatau ia Mataio 25:1-13.) I roto i teia atikara, ka pau tatou e toru uianga: (1) Eaa te apiianga maata i roto i teia parapore? (2) Akapeea te aronga akatainuia i te aru anga i te kaveinga o teia parapore, e eaa  tei tupu mai? (3) Eaa te puapinga no tatou tataki tai i teia tuatau mei ta Iesu parapore?

3. I mua ana, akapeea ta tatou au puka i te akamāramaanga i te parapore o te tai ngauru paratenia, eaa te ka tupu no te reira?

³ I roto i te atikara mua, kua kite mai tatou e i te au mataiti i topa, kua taui te tavini akono meitaki i te tu e akamārama ra tatou i te au tua Pipiria. I teianei te akamou ra te tavini akono meitaki ki runga i te au apiianga tau, kare ki runga i te au akatutuanga e te me kore te au totou. Ei akaraanga, akara tatou i ta Iesu parapore no te tai ngauru paretenia. I mua ana, kua karanga ta tatou au puka e te akatutu maira te au lamepa, te inu, e te au āriki inu i tetai apinga me kore tangata. Me akamou tatou i te manako ki runga i te au mea rikiriki i roto i teia parapore, ka ngaropoina ainei ia tatou te apiianga māmā ua e te puapinga i roto i te parapore? E mea puapinga tikai te pauanga ki teia uianga.

4. I roto i te parapore, akapeea tatou i kite ei e (a) koai te tane akaipoipo ou? (e) koai ma te au paretenia?

⁴ Ka uriuri ana tatou i te apiianga maata o te parapore a Iesu. Te mea mua, akamanako ana e koai ma tei roto i te parapore o te tai ngauru paretenia. Koai te tane akaipoipo ou? Ko Iesu. Te tumu i kite ei tatou no te mea i tetai atinga i mua ake, kua tuatua a Iesu e koia te tane ou. (Luka 5:34, 35) Koai ma te au paretenia? Ko ratou te “anana iti” o te au Kerititiano akatainuia. Akapeea tatou i kite ei? I roto i te parapore, kua anoanoia te au paretenia kia papa ua e kia kā ua ta ratou lamepa me tae mai te tane akaipoipo ou. I teianei, akara ana i ta Iesu i tuatua atu ki te aronga akatainuia: “Kia tatuaia to kotou taukupu, e kia vai kakā ua ta kotou mori; E kia tau kotou uaorai ki te aronga e tatari i to ratou pu, i te oki anga mai mei te akaipoipoanga.” (Luka 12:32, 35, 36) Pera katoa, kua akaaite te apotetoro ko Paulo raua ko te apotetoro ko Ioane i te au pipi akatainuia a Karaiti ki te au paretenia viivii kore. (2 Korinetia 11:2; Apokalupo 14:4) No reira, te kite nei tatou e ko te akoanga e te akamatakiteanga i roto ia Mataio 25:1-13, kua tau te reira no te au pipi akatainuia a Iesu.

5. Akapeea a Iesu i te akakite anga i te tuatau ka akatupuia ai tana parapore?

⁵ Aru mai, eaa te tuatau ka akatupuia ai te parapore a Iesu? Ei pau i teia uianga, ka akara tatou i ta Iesu i tuatua i te pae openga o te parapore. Kua na ko aia e: “Tae maira taua tane akaipoipo ou ra.” (Mataio 25:10) I roto i te Punanga Tiaki o Tiurai 15, 2013, kua apii tatou e i roto i te totou a Iesu i roto ia Mataio pene 24 e te 25, e varu taime te akakite ra i to Iesu “tae anga mai.” Me tuatua a Iesu no runga i tona “tae anga mai,” te tuatua ra  aia no runga i te tuatau o te mate maata me tae mai aia i te akautunga e te takore i teia ao kino. Tera te aiteanga, ka tau tatou kia manako e te tuatua ra te parapore no te au rā openga, inara ka ‘tae mai’ aia i te tuatau o te mate maata.

6. Eaa te apiianga maata o te parapore?

⁶ Eaa te apiianga maata ta tatou ka tamou mai mei teia parapore? Akamaara i te aerenga tuatua o teia tua Pipiria. I roto ia Mataio pene 24, kua akataka a Iesu i “te tavini akono meitaki e te pakari.” Ko taua tavini ra te pupu meangiti o te au taeake akatainuia tei arataki i te au pipi a Iesu i teia tuatau openga. Kua akamatakite a Iesu i taua au taeake ra kia vai akarongo mou. I roto i te pene tei aru mai, kua riro te parapore a Iesu no runga i te tai ngauru paretenia ei akoanga ki tana au pipi akatainuia pouroa i te tuatau openga. Ko te apiianga maata koia oki “kia matakite” ratou ko te ngaro aea to ratou tutaki kia aere ki te rangi. (Mataio 25:13) I teianei ka uriuri tatou i teia parapore e ka akara e akapeea te aronga akatainuia i te aru anga i teia apiianga.

7, 8. (a) Eaa te tumu i papa ai te au paretenia pakari? (e) Eaa ra te aronga akatainuia i papa ua ai?

⁷ I roto i te parapore, kua akamou a Iesu i te manako ki runga i te au paretenia pakari tei akateateamamao no te tae anga mai o te tane akaipoipo ou, kare mei te au paretenia neneva. No teaa ra? No te mea kua papa ratou e kua vai matakite. Kua anoanoia te au paretenia e tai ngauru kia matakite e kia kā ua ta ratou au lamepa i te po. Kua papa ua te au paretenia pakari no te mea kua apai katoa ratou i te inu no ta ratou au lamepa. Akapeea te au Kerititiano akatainuia i te akapapa anga no to Iesu tae anga mai?

⁸ Kua papa ua te aronga akatainuia i te akaoti i ta ratou tukuanga angaanga e tae ua atu ki te openga. Kua kite ratou e ka anoanoia kia kopae i te au apinga meitaki i roto i to Satani ao kia tavini i te Atua, tera ra kua puareinga ua ratou i te rave i te reira. Ka inangaro ratou i te tavini tiratiratu ia Iehova, kare no te mea te vaitata maira te openga, mari ra no to ratou inangaro i te Atua e tana Tamaiti. Ka vai tiratiratu ratou e ka kopae i te tu noinoi e te tau kore o teianei ao. Mei te au paretenia pakari rai tei papa ua ta ratou au lamepa, kua papa katoa te aronga akatainuia i te tiaki anga i te Tane Akaipoipo Ou kia tae mai, noatu i te akaraanga te taroaroa ra aia.​—Philipi 2:15.

9. (a) Eaa te akamatakiteanga ta Iesu i oronga no te tu varea e te moe? (e) Eaa ta te aronga akatainuia i rave i te akarongo anga i te kapiki e: “Te aere mai nei te tane akaipoipo ou”? (Akara katoa i te tataanga rikiriki i raro.)

⁹ Kua papa katoa te au paretenia pakari no te tae anga mai o te tane akaipoipo ou no te mea kua vai matakite ratou. Tera ra i roto i te parapore, ‘kua varea  iora ratou ravarai e te moe, e kua moe atura’ no te mea kua roa te tae anga mai te tane akaipoipo ou. No reira ka moe ainei te au Kerititiano akatainuia i teia tuatau koia oki ka akavareia ratou i te tiaki anga ia Iesu me tae mai? Ae. Kua kite a Iesu e noatu e inangaro maata to tetai tangata, penei ka akaparuparuia e ka akavareia aia i te tiaki ia Iesu me tae mai. No reira kua angaanga pakari te au Kerititiano akatainuia kia vai matakite ua. Akapeea ra? I roto i te parapore, kua akarongo te au paretenia i te kapikianga e: “I na, te aere mai nei te tane akaipoipo ou nei!” Tera ra, ko te au paretenia pakari anake tei vai matakite. (Mataio 25:5, 6; 26:41) Mei te reira katoa i teia tuatau openga, kua akarongo te au Kerititiano akatainuia i te kapikianga e: “I na, te aere mai nei te tane akaipoipo ou nei!” Kua āriki ratou i te au akapapuanga taka meitaki e ka tae mai a Iesu, e kua papa ratou no tona aere anga mai. * (Akara i te tataanga rikiriki i raro.) I teianei ka uriuri tatou i te tuanga openga o te parapore a Iesu, tei akakite mai i tetai tuatau tikai.

10. Eaa ta tatou ka ui no runga i te pukapukaanga i rotopu i te au paretenia pakari e te au paretenia neneva?

¹⁰ Vaitata ki te tuanga openga o te parapore, kua pati te au paretenia neneva i te au paretenia pakari kia oronga i ta ratou inu no te au lamepa. Inara kare te au paretenia pakari i oronga ana i te tauturu. (E tatau ia Mataio 25:8, 9.) No reira, eaa te tuatau i kore ei te aronga akatainuia e tauturu atu i te aronga tei ngere? Akamaara i te tuatau ka tupu ei te parapore. Ka tae mai te Tane Akaipoipo Ou ko Iesu i te akava i te tangata, vaitata ki te openga o te mate maata. No reira, i te akaraanga kua tupu teia pukapukaanga i mua ua ake i te openga o te mate maata. Eaa te tumu i karanga ai tatou i te reira? No te mea i tera tuatau, ka orongaia te akairo openga ki te aronga akatainuia.

11. (a) Eaa te ka tupu i mua ua ake te akamataanga te mate maata? (e) Eaa te aiteanga o te tuatua a te paretenia pakari kia aere te au paretenia neneva e oko i te inu na ratou?

¹¹ No reira, i mua ake ka akamata ai te mate maata, pouroa te aronga akatainuia i te enua nei tei vai tiratiratu, ka orongaia to ratou akairo openga. (Apokalupo 7:1-4) Mei taua tuatau ra, kua akapapuia e ka aere ratou ki te rangi. Inara akamanako ana no runga i te au mataiti i mua ake i te mate maata. Eaa te ka tupu ki te aronga akatainuia tei kore i vai matakite ua e kua akarongo kore? Kare te akairo openga e orongaia kia ratou. I taua tuatau ra, ka akatainuia tetai au Kerititiano ke tei vai tiratiratu. Me akamata i reira te mate maata, ka poitirere te aronga neneva e kua takoreia a Babulonia Maata. Penei ko teia te tuatau e kite ei ratou e kare ratou i papa no te tae anga mai o Iesu. Eaa te ka tupu kia ratou me pati ratou no te tauturu i tera taime? Ka kite tatou i te pauanga i roto i te parapore. Kare te au paretenia  pakari i oronga i te inu ki te au paretenia neneva, mari ra kua karanga kia ratou e e aere e oko i tetai inu. No te mea kua “tae akera ki te turuaipo,” kare e tangata e oko atu i te inu kia ratou.

12. (a) I te tuatau o te mate maata, eaa te ka tupu ki te aronga akatainuia tei akarongo kore i mua ake i te akairo openga? (e) Eaa te ka tupu ki te aronga tei aite rai ki te au paretenia neneva?

¹² I te tuatau o te mate maata, kare te aronga akatainuia tei tiratiratu e rauka i te tauturu i te aronga akarongo kore. No reira, eaa te ka tupu ki teia aronga? Akara ana eaa tei tupu ki te au paretenia neneva tei aere i te oko inu na ratou: “Tae maira taua tane akaipoipo ou ra; e te aronga i vave ra, kua aere atura ratou ma ia katoa ki roto i te oroa akaipoipoanga ra; topiriia iora te pa.” Me tae mai a Iesu ma tona kakā vaitata ki te openga o te mate maata, ka akaputuputu aia i te aronga akatainuia tei tiratiratu ki te rangi. (Mataio 24:31; 25:10; Ioane 14:1-3; 1 Tesalonia 4:17) Inara, ka kopae a Iesu i te aronga akarongo kore. Mei te au paretenia neneva rai, penei ka karanga ratou e: “E te Atu, e te Atu, ka eeu ana ia matou.” Eaa ta Iesu ka pau atu? Te mea mii, ka oronga aia i te pauanga tei aiteite ki tana ka tuatua ki te aronga aite rai ki te puakanio: “Koia mou taku e karanga atu kia kotou nei, kare au i kite ia kotou.”​—Matthew 7:21-23; 25:11, 12

13. (a) Eaa te tumu kare tatou e manako e e maata te au pipi akatainuia a Karaiti te ka akarongo kore? (e) Eaa ra tatou i karanga ai e te akaari nei te parapore a Iesu i tona irinaki i roto i te au Kerititiano akatainuia? (Akara i te tutu mua o teia atikara.)

¹³ Te karanga ainei a Iesu e e maata te aronga akatainuia te ka akarongo kore e ka monoia? Kare. I roto ia Mataio pene 24, ka tatau tatou e kua akamatakite a Iesu i te tavini akono meitaki e te pakari e kia kore ratou e riro ei tavini kino. Kare te aiteanga e ka tupu te reira. Mei te reira katoa, e akamatakiteanga te parapore o te tai ngauru paretenia. I te mea e e rima paretenia neneva e e rima paretenia pakari ka anoanoia te au Kerititiano akatainuia kia papa ua e kia matakite. Me kare, ka riro ratou ei aronga neneva e te akarongo kore. Kua oronga katoa a Paulo i tetai akamatakiteanga mei teia rai ki te au taeake e te au tuaine akatainuia. (E tatau ia Ebera 6:4-9; akaaite ia Deuteronomi 30:19.) Kua akakite tika atu aia i teia akamatakiteanga ki tona au taeake e te au tuaine, noatu ra kua irinaki katoa aia e ka rauka ia ratou ta ratou tutaki. Te akaari maira te akamatakiteanga i roto i te parapore o te tai ngauru paretenia e te irinaki katoa nei a Iesu i te aronga akatainuia. Kua kite aia e ka rauka i tona au tavini akatainuia pouroa kia vai tiratiratu e kia rauka te tutaki maata!

14. Eaa te puapinga ta te “mamoe ke atu” ka rauka mai mei te parapore o te tai ngauru paretenia?

¹⁴ Kua akakite a Iesu i te parapore ki te au Kerititiano akatainuia. No reira, ka  puapingaia ainei te “mamoe ke atu” mei te parapore a Iesu? (Ioane 10:16) Ae! E apiianga meitaki tetai i roto i te parapore: “Kia matakite.” I karanga katoa a Iesu e: “Taku e karanga atu kia kotou nei, te karanga atu nei au ki te tangata ravarai, Ka ara.” (Mareko 13:37) Te umuumu maira a Iesu i tana au pipi pouroa kia matakite. Ka rauka katoa i te au Kerititiano kia aru i te akaraanga meitaki o te aronga akatainuia, tei tuku i te angaanga orometua ei mea puapinga i roto i to ratou oraanga. Akamaara e kua pati te au paretenia neneva ki te au paretenia pakari kia oronga i tetai inu na ratou. Inara, kare ta ratou patianga i akatikaia. Te apii maira te reira ia tatou e na tatou uaorai te apainga kia vai tiratiratu ki te Atua, kia papa ua, e kia matakite. Kare atu e tangata e rave i te reira no tatou. E apainga ta tatou pouroa ki te Akava tuatua tika, ko Iesu Mesia, e kare e roa atu ka tae mai aia. No reira kia papa ua tatou!

15. Eaa ra te au Kerititiano pouroa i umere ei i te akaipoipoanga o Iesu e tana vaine akaipoipo?

¹⁵ Kua umere te au Kerititiano pouroa no te akaipoipoanga i roto i te parapore a Iesu. A te tuatau ki mua, i muri ake i te tamaki anga o Aramakito, ka riro te au Kerititiano akatainuia ei vaine akaipoipo na Iesu. (Apokalupo 19:7-9) I reira ka puapingaia te katoatoa i te enua nei mei taua akaipoipoanga i te rangi. Eaa te tumu? No te mea te akapapu maira te reira e ka tutara tetai kavamani apa kore i rungao i te tangata pouroa. No reira, me e manakonakoanga to tatou kia ora e tuatau ua atu i te rangi me kore i te enua nei, kia tauta ua rai tatou kia papa ua e kia matakite. Me akapera tatou, ka rekareka tatou i te manakonakoanga umere ta Iehova i akapapa no tatou!