1, 2. Eaa ra a Iesu i akakite ei i te parapore o te au tareni?

KUA akakite a Iesu i te parapore o te au tareni ei akaari ki tana au pipi akatainuia e eaa ta ratou apainga. Tera ra, ka puapingaia te au pipi pouroa a Iesu mei te parapore. No reira, me e manakonakoanga to tatou i te noo i runga i te rangi me kore i te enua nei, ka anoanoia tatou kia mārama i te aiteanga o teia parapore.

² Inaea a Iesu i akakite ei i teia parapore? I te tuatau e akakite ra aia ki tana au pipi i te akairo no tana tutara anga ei Ariki e te akamataanga o te tuatau openga. (Mataio 24:3) No reira ko te parapore o te au tareni, e tuanga ïa no taua akairo ra e te akatupuia nei te reira i teia tuatau.

3. Eaa ta tatou i tamou mai mei te au parapore i roto ia Mataio pene 24 e te 25?

³ I te akakite anga a Iesu i te parapore o te au tareni, kua akakite katoa aia e toru parapore tei riro ei tuanga no te akairo o te tuatau openga. Te akataka maira teia au parapore i tetai au tu ta tana au pipi ka anoano i te akatupu. Te kite nei tatou i teia au parapore i roto ia Mataio 24:45 ki te 25:46. Ko  te parapore mua, no runga te reira i te tavini akono meitaki, koia oki tetai pupu meangiti o te au taeake akatainuia tei apii atu i te iti tangata o Iehova. Ka anoanoia ratou kia akaari i te tu akono meitaki e te pakari. * (Akara i te tataanga rikiriki i raro.) Aru mai, ko te parapore o te tai ngauru paretenia. I roto i te parapore, kua akamatakite a Iesu i te aronga akatainuia kia papa ua e kia vai matakite no te mea kare ratou i kite i te rā e te ora e tae mai ei aia. * (Akara i te tataanga rikiriki i raro.) E oti, kua akakite a Iesu i te parapore o te au tareni tei apii i te aronga akatainuia pouroa kia angaanga pakari i te akono anga i ta ratou apainga ei au Kerititiano. Muri mai, kua akakite a Iesu i te parapore o te au mamoe e te au puakanio. Kua tau teia no te aronga e manakonakoanga to ratou kia noo i te enua nei. Kua akakite aia e ka anoanoia ratou kia vai tiratiratu e kia rave i ta ratou ka rauka i te tauturu i tona au taeake akatainuia. * (Akara i te tataanga rikiriki i raro.) I roto i teia atikara, ka kite tatou i te aiteanga o te parapore o te au tareni.

4, 5. Koai te tangata i roto i teia parapore, e eaa teia mea e tareni?

⁴ E tatau ia Mataio 25:14-30. I roto i te parapore o te au tareni, kua tuatua a Iesu no runga i tetai tangata tei aere ki tetai enua mamao. I roto i tetai parapore ke mai, kua tuatua a Iesu no runga i tetai tangata tei aere ki tetai enua mamao kia riro mai ei ariki. * (Akara i te tataanga rikiriki i raro.) (Luka 19:12) I mua ana, kua akakite ta tatou au puka e i roto i teia nga parapore, ko Iesu taua tangata ra tei aere ki te rangi i te mataiti 33. Inara kare a Iesu i riro ake ei Ariki i tona aere anga ki te rangi. Kua tiaki aia e tae roa atu ki te mataiti 1914, i te riro anga “tona au enemi ei takainga vaevae nona.”​—Ebera 10:12, 13

⁵ Karanga a Iesu e ko te tangata i roto i teia parapore, e varu ana tareni. E maata tikai teia moni. * (Akara i te tataanga rikiriki i raro.) I mua ake ka aere ei taua tangata ra i tona tere, kua oronga mai aia i teia moni ki tona au tavini. Kua akakite aia kia ratou e kia taangaanga i teia moni na roto i te tu te ka akamaata atu i tana moni. Mei te moni rai tei puapinga ki taua tangata ra, te vai ra tetai apinga tei puapinga tikai kia Iesu. Eaa te reira? Ko te angaanga tana i rave i te enua nei.

6, 7. Eaa ta te au tareni e akatutu maira?

⁶ E mea puapinga tikai te angaanga tutuanga kia Iesu. Tei tupu mai, e manganui  tei riro mai ei au pipi nana. (E tatau ia Luka 4:43.) Inara kua kite aia e e maata te angaanga te ka raveia e e maata te tangata te ka āriki mai i te tuatua meitaki. Kua akakite aia ki tana au pipi e: “Ka akateitei i to kotou mata, ka akara i te au koro ra; kua teatea ïa i teianei kua mou.” (Ioane 4:35-38) Kare tetai tangata tanutanu e akaruke i tana koro me kua tae te tuatau mou. Aite katoa te reira ki to Iesu tu. I mua ake ka oki ei aia ki te rangi, kua akaue a Iesu i tana au pipi e: “E teianei, ka aere kotou, e akariro i to te pa enua katoa ei pipi.” (Mataio 28:18-20) Na roto i teia mataara, kua oronga a Iesu i tetai apinga akaperepere kia ratou, ko te apainga kia tutu aere.​—2 Korinetia 4:7.

⁷ Mei te tangata rai tei oronga i te moni ki tona au tavini, kua oronga a Iesu i te angaanga puapinga ki tona aronga akatainuia kia akariro i te tangata ei pipi. (Mataio 25:14) No reira, te akatutu maira te au tareni i te apainga kia tutu aere e kia akariro i te tangata ei pipi.

8. Noatu e e tuke te moni ta te au tavini i rauka mai, eaa ta te pu i tapapa ia ratou kia rave?

⁸ Karanga a Iesu e kua oronga te pu e rima tareni ki te tavini mua, e rua tareni ki te rua o te tavini, e e tai tareni ki te toru o te tavini. (Mataio 25:15) E tuke te moni ta te pu i oronga ki te au tavini tataki tai, noatu ra kua tapapa aia ia ratou kia rave i ta ratou ka rauka kia akamaata atu i tana moni. Mei te reira katoa, kua tapapa a Iesu i tana au pipi akatainuia kia rave i ta ratou ka rauka i roto i te angaanga  tutuanga. (Mataio 22:37; Kolosa 3:23) Ia Penetekote, mataiti 33, kua akamata te au pipi a Iesu i te akariro i to te pa enua katoa ei pipi. E me tatau tatou i te puka Pipiria o Angaanga, ka kite tatou e kua angaanga pakari ratou. * (Akara i te tataanga rikiriki i raro.)​—Angaanga 6:7; 12:24; 19:20.

9. (a) Eaa ta te nga tavini tiratiratu i rave ki ta raua moni, e eaa ta tatou ka tamou mai? (e) Eaa ta te aronga te ka noo e tuatau ua atu i te enua nei ka anoanoia kia rave?

⁹ Te nga tavini mua tei taangaanga meitaki i te moni a te pu, te akatutu maira i te au taeake e te au tuaine akatainuia tei tiratiratu i te tuatau openga. Mei te tuatau tikai i muri ake i te mataiti 1919, kua rave ratou i ta ratou ka rauka i roto i te angaanga tutuanga. I roto i te parapore, e tuke te moni tei orongaia ki teia nga tavini, tera ra kare te aiteanga e e nga pupu ke teia no te aronga akatainuia tei tiratiratu. Kua angaanga pakari teia nga tavini e kua akamaata i ta raua moni. Inara, ko te aiteanga ainei e ko te aronga akatainuia anake tei anoanoia kia angaanga pakari i roto i te angaanga tutu aere? Kare. Te apii maira ta Iesu parapore no te au mamoe e te au puakanio e ka anoanoia te aronga te ka noo i te enua nei e tuatau ua atu kia tauturu i te au taeake akatainuia i roto i te angaanga tutuanga e kia vai tiratiratu kia ratou. E tikaanga ngateitei no teia aronga kia tauturu i te aronga akatainuia. Ae, e “okotai oki anana” te iti tangata o Iehova e te angaanga pakari nei ratou i te tutu aere e te akariro i te tangata ei pipi.​—Ioane 10:16.

10. Eaa tetai tuanga o te akairo tei akaari mai e te noo nei tatou i te tuatau openga?

¹⁰ Te tapapa maira a Iesu i tana au pipi kia angaanga pakari i te akariro i te tangata ei au pipi. Ko teia ta tana au pipi i rave i te anere mataiti mua. I teia tuatua  openga koia oki te tuatau e akatupuia ai te parapore o te au tareni, te rave ra ainei tana au pipi i teia angaanga? Ae, kare atu e tuatau e maata tikai te tangata tei akarongo i te tuatua meitaki e tei riro mai ei au pipi! No te angaanga pakari a te au pipi a Iesu, e anere tauatini ua atu tangata tei papetitoia i te au mataiti. Ka piri katoa ratou kia tatou i te rave i te angaanga tutu aere. Te akaari maira teia au angaanga e te au tupuanga meitaki e ko te angaanga tutuanga tetai tuanga puapinga no te akairo ta Iesu i oronga mai no runga i te tuatau openga. Kare e ekoko, kua mareka a Iesu i tana aronga angaanga!

11. Akapeea tatou i kite ei e ka oki mai a Iesu i te tuatau o te mate maata?

¹¹ Kua tuatua a Iesu e: “E roa akera, oki maira te pu o taua aronga tavini ra, akatikatika maira i te tuatua ia ratou.” (Mataio 25:19) Ko Iesu te Pu te ka rave i te reira vaitata ki te openga o te mate maata. Akapeea tatou i kite ei? I roto i tana totou tei taikuia i roto ia Mataio pene 24 e te 25, e maata te taime i tuatua ai a Iesu no runga i tona tae anga mai. Ei akaraanga, kua karanga aia e ka kite te tangata “i te Tamaiti a te tangata i te aere anga mai na roto i te tiao rangi.” Te akataka ra teia i te tuatau o te mate maata me akava a Iesu i te tangata. Kua akamatakite katoa aia i tana au pipi i te tuatau openga e kia vai matakite. Karanga aia e: “Kare kotou i kite i te ora e tae mai ei to kotou Atu” e, “Ei te ora manako koreia e kotou, e tae mai ei te Tamaiti a te tangata.” (Mataio 24:30, 42, 44) No reira i roto i te parapore o te au tareni, te tuatua ra a Iesu no runga i te tuatau ka tae mai ei aia i te akava i te tangata e te takore i to Satani ao. *​—Akara i te tataanga rikiriki i raro.

12, 13 (a) Eaa ta te pu i karanga ki te nga tavini, e no teaa ra? (e) Aea e orongaia ai te akairo openga ki te aronga akatainuia? (Akara i te pia “ Akavaia ei Aronga Tiratiratu i to Ratou Mateanga.”) (ng) Eaa te tutaki ka rauka i te aronga tei turuturu i te aronga akatainuia?

¹² Te oki mai anga te pu mei tona tere, kua kite aia e ko te tavini e rima ana tareni, kua rauka akaou mai e rima tareni e ko te tavini e rua ana tareni kua rauka akaou mai e rua tareni. Kua akakite te pu  kia raua e: “Kua tika rava, e teianei tavini meitaki e te pikikaa kore; ko koe i akono i te reira apinga mea ngiti ua, e tuku au ia koe ki rungao i te mea maata.” (Mataio 25:21, 23) Eaa ta te Pu ko Iesu ka rave me tae mai aia a te tuatau ki mua?

¹³ I mua ua ake i te mate maata, ka oronga te Atua i te akairo openga ki te aronga akatainuia tei tiratiratu e te ora nei rai i te enua nei i taua tuatau ra. (Apokalupo 7:1-3) I reira, i mua ake ia Aramakito, ka oronga a Iesu i te tutaki kia ratou koia oki, te oraanga i runga i te rangi. Akapeea ra te aronga te ka noo i te enua nei e tuatau ua atu tei turuturu i te aronga akatainuia kia rave i te angaanga tutuanga? Ka akavaia ratou ei au mamoe. E ka tutakiia ratou ki te oraanga i runga i te enua nei i raro ake i te tutaraanga a te Patireia o te Atua.​—Mataio 25:34.

14, 15 Kua karanga ainei a Iesu e e maata te aronga akatainuia te ka riro mai ei aronga kino e te kōpē? Akamārama mai.

¹⁴ I roto i te parapore, te taikuia ra no runga i tetai tavini e tai ana tareni. Kare aia i taangaanga ana i te reira kia akamaata atu i te moni a tona pu e kare aia i tuku i te reira ki roto i te pangika kia maata te moni ka rauka mai. Mari ra, kua uuna aia i te moni. Kua karanga te pu e e tangata kino e te kōpē taua tavini ra. No reira kua rave aia i te tareni a te tavini kino e kua oronga atu ki te tavini mua. E oti, kua titiri aia i te tavini kino ki “vao i te poiri,” e kua aue te tavini ma te pakati anga i tona nio.​—Mataio 25:24-30; Luka 19:22, 23

¹⁵ Te karanga anga a Iesu e e tavini kino e te kōpē tetai i roto i te au tavini e toru, kare te aiteanga e e tai i roto i te toru  tangata akatainuia te ka aite rai ki taua tavini kino ra. Kua kite tatou i teia me akaaiteia teia parapore ki tetai nga parapore ke mai. I roto i te parapore o te tavini akono meitaki e te pakari, kua taiku a Iesu i tetai tavini kino tei takinokino i te au tavini ke. Kare te aiteanga e ka riro mai te au taeake i roto i te tavini akono meitaki e te pakari ei aronga kino. Mari ra, te akamatakite ra a Iesu i teia aronga akatainuia e auraka ratou e riro mai mei te tavini kino ra. I roto katoa i te parapore o te tai ngauru paretenia, kua taiku a Iesu e rima paretenia neneva. Kare te aiteanga e ka riro mai tetai āpa o te aronga akatainuia ei aronga neneva. Mari ra, te akamatakite ra a Iesu ia ratou i te ka tupu me kare ratou e papa ua e me kare ratou e vai matakite. * (Akara i te tataanga rikiriki i raro.) Mei te reira katoa te parapore o te au tareni, kare a Iesu e karanga nei e e maata te aronga akatainuia i te tuatau openga te ka riro mai ei aronga kino e te kōpē. Kare, mari ra te akamatakite ra aia i te aronga akatainuia kia kore ratou e aite ki te tavini kino, mari ra kia angaanga pakari ratou i te rave i te angaanga tutuanga.​—Mataio 25:16.

16. (a) Eaa te nga apiianga ta tatou ka tamou mai mei te parapore o te au tareni? (e) Akapeea teia atikara i te tauturu anga ia tatou kia mārama i te parapore o te au tareni? (Akara i te pia “ Eaa to Tatou Māramaanga no te Parapore o te au Tareni?”)

¹⁶ Eaa te nga apiianga ta tatou ka tamou mai mei te parapore o te au tareni? Te mea mua, kua oronga a Iesu i tetai apinga akaperepere ki tana au pipi akatainuia, koia oki ko te apainga puapinga kia tutu aere e kia akariro i te tangata ei pipi. Te rua, te tapapa maira a Iesu ia tatou pouroa kia angaanga pakari i roto i te angaanga tutuanga. Me rave tamou tatou i teia angaanga e me vai tiratiratu kia Iesu, papu e ka tutaki mai aia ia tatou.​—Mataio 25:21, 23, 34