1, 2. (a) Eaa te au parapore ta Iesu i akakite ki tona au oa? (Akara i te tutu mua o teia atikara.) (e) Eaa ta tatou ka inangaro i te kite no runga i te parapore o te au mamoe e te au puakanio?

KUA akakite a Iesu i tetai mea umere ki tona au oa mou ko Petero, Anederea, Iakobo, e Ioane. Muri ake i tona akakite anga i te au parapore no te tavini akono meitaki e te pakari, te tai ngauru paretenia, e te au tareni, kua akakite a Iesu i tetai atu parapore ki tona au oa. I roto i te parapore, kua tuatua aia no runga i tetai tuatau ka akava ei te “Tamaiti a te tangata” i “to te pa enua ravarai.” Kua karanga aia e ka akatakake te “Tamaiti a te tangata” i te pa enua ravarai ki roto i tetai nga pupu, koia oki te au mamoe e te au puakanio. Pera katoa kua akataka mai aia i tetai atu pupu, koia oki te “au taeake” o te Ariki.​—E tatau ia Mataio 25:31-46.

² Mei te au apotetoro rai, kua inangaro te au tavini o Iehova i teia tuatau i te kite no runga i teia parapore no te mea te o maira te oraanga o te tangata. Kua akakite a Iesu e ka rauka tetai pae i te ora mutu kore tera ra, ka takoreia tetai pae. Ko te tumu teia i puapinga ai no tatou kia mārama i te aiteanga o te parapore e kia kite e eaa ta tatou ka rave kia rauka te ora  mutu kore. No reira i roto i teia atikara, ka pau tatou i teia au uianga: Akapeea a Iehova i te tauturu anga ia tatou kia mārama i teia parapore? Akapeea tatou i kite ei e te tuatua ra teia parapore no runga i te angaanga tutuanga? Koai ma te ka rave i teia angaanga? E eaa te tumu i puapinga ai no te tangata kia vai tiratiratu ki “te Ariki” e tona “au taeake”?

3, 4. (a) Eaa ta tatou ka inangaro i te kite kia mārama i teia parapore? (e) I te mataiti 1881, eaa te akamāramaanga a te Watch Tower no runga i teia parapore?

³ Kia mārama tatou i te parapore o te au mamoe e te au puakanio, ka anoanoia tatou kia kite e (1) koai te “Tamaiti a te tangata,” koia oki “te Ariki,” koai ma te au mamoe e te au puakanio, e koai ma te “au taeake” o te Ariki? (2) aea te “Tamaiti a te tangata” e akatakake ei koia oki, e akava i te au mamoe e te au puakanio? e te (3) eaa ra tetai aronga i kapikiia ai ei au mamoe e tetai pae ei au puakanio?

⁴ I te mataiti 1881, kua akakite te Watch Tower e ko Iesu “te Tamaiti a te tangata,” koia oki “te Ariki.” Kua akamārama katoa e ko te “au taeake” o te Ariki, ko ratou te aronga te ka tutara kapiti kia Iesu i te rangi e te aronga te ka noo i te enua nei ei aronga apa kore. Akakite te Watch Tower e ka akatakakeia te au tangata i te tuatau o te Tauatini Mataiti me Tutara a Iesu, e ko te aronga tei aru vaitata i te aroa o te Atua, ka kapikiia ei au mamoe.

5. I te mataiti 1923, eaa te māramaanga o te iti tangata o te Atua no runga i teia parapore?

⁵ Muri mai, kua tauturu a Iehova i tona iti tangata kia mārama meitaki i teia parapore. I te mataiti 1923, kua akakite te Watch Tower o Okotopa 15 e ko Iesu te “Tamaiti a te tangata.” Tera ra, kua akamārama mai mei roto i te Pipiria e ko te “au taeake” i roto i te parapore, te akatutu maira i te aronga anake te ka tutara kapiti e Iesu i te rangi no te Tauatini Mataiti. Kua taiku katoa te reira e te akatutu maira te au mamoe i te aronga te ka noo i te enua nei i raro ake i te tutaraanga a Iesu e tona au taeake. E no te mea te akakite maira te parapore e ka tauturu teia aronga i te au taeake o te Ariki, ka tupu te akatakake anga koia oki, te akavaanga i te tuatau e ora ra te au taeake akatainuia o Iesu i te enua nei, i mua ake te Tutaraanga Tauatini Mataiti. Akakite katoa e ko te au mamoe te aronga tei irinaki ia Iesu e tei irinaki e na te Patireia e akameitaki atu i to tatou oraanga.

6. I te mataiti 1995, akapeea to tatou māramaanga no runga i te parapore i taui?

⁶ Kua roa te tuatau i manako ana tatou e ka akavaia te tangata na roto i te angaanga tutuanga i teia tuatau openga. Me āriki mai ratou i ta tatou karere, e au mamoe ratou, e me ka kopae i te karere, e karanga ana tatou e e au puakanio ratou. Inara i te mataiti 1995, kua taui to tatou māramaanga no runga i te parapore. Kua akaaite Te Punanga Tiaki ia Mataio 24:29-31 (e tatau) kia Mataio 25:31, 32 (e tatau), e kua akamārama e ka akava a Iesu i te tangata i te tuatau o te mate maata me tae mai te Tamaiti a te tangata “ma tona kakā.” *​—Akara i te tataanga rikiriki i raro.

7. Eaa te aiteanga o te parapore?

 ⁷ I teia tuatau, te mārama meitaki nei tatou i te parapore o te au mamoe e te au puakanio. Kua kite tatou e ko Iesu “te Tamaiti a te tangata” koia oki “te Ariki.” Te “au taeake” o te Ariki ko ratou te aronga tei akatainuia ki te vaerua tapu e ka tutara kapiti ratou e Iesu i runga i te rangi. (Roma 8:16, 17) “Te mamoe” e te “puaka-nio,” ko ratou te au tangata o te pa enua ravarai. Ka akavaia ratou vaitata ki te openga o te mate maata te ka tupu a te tuatau ki mua. Kua kite katoa tatou e ka akava a Iesu i te tangata kia tau ki te tu e akono ra ratou i te aronga akatainuia e ora nei rai i te enua nei. Mataora tikai tatou e kua tauturu a Iehova ia tatou kia mārama i teia parapore e te au parapore i roto ia Mataio pene 24 e te 25!

8, 9. Eaa ra a Iesu i karanga e e “aronga tuatua-tika” te au mamoe?

⁸ I roto i te parapore o te au mamoe e te au puakanio, kare a Iesu i taiku ana i te tuatua “tutu aere” me kore “angaanga tutuanga.” No reira akapeea tatou i kite ei e te apii maira te parapore e e mea puapinga tikai te angaanga tutuanga?

⁹ Kia kite i te pauanga, ka tau tatou kia akamaara e te apii maira a Iesu i tetai apiianga meitaki na roto i te parapore. Kare aia e tuatua no runga i te au mamoe e te au puakanio tika tikai. Mei te reira katoa, kare aia e karanga e ko te aronga pouroa te ka akavaia ei au mamoe, ka oronga i te kai e te kakau no te aronga akatainuia, ka akono ia ratou me rokoia e te maki, e ka atoro ia ratou i roto i te are tapekaanga. Mari ra, kua akataka a Iesu i te mamoe ei “aronga tuatua-tika,” no te mea kua kite ratou e ko te aronga akatainuia te au taeake o Iesu. Pera katoa, kua vai tiratiratu ratou ki te aronga akatainuia i te tuatau openga.​—Mataio 10:40-42; 25:40, 46; 2 Timoteo 3:1-5.

10. Akapeea te au mamoe te tauturu anga i te au taeake o Iesu?

¹⁰ I te akakite anga a Iesu i te parapore o te au mamoe e te au puakanio, koi oti ua ake aia i te tuatua no runga i te ka tupu a te tuatau openga. (Mataio 24:3) Ei akaraanga, kua tuatua aia e: “E tutu aereia te evangelia o te basileia nei, e kako rava ake te ao katoa.” (Mataio 24:14) E oti, i mua ake ka akakite ei aia i te parapore o te au mamoe e te au puakanio, kua akakite aia i te parapore no te au tareni. Kua akakite a Iesu i teia parapore ei apii i te aronga akatainuia kia angaanga pakari i roto i te angaanga tutuanga. Inara, kare e maata ia ratou e toe nei i runga i te enua, e e maata tikai te angaanga ka rave! Kua akaueia te aronga akatainuia kia tutu aere ki te “pa enua ravarai” i mua ake ka tae mai te openga. Kua apii katoa tatou i roto i te parapore o te au mamoe e te au puakanio e ka tauturu “te mamoe” i te au taeake o Iesu. Tetai angaanga meitaki roa  atu ka rauka ia ratou i te rave ei tauturu i te au taeake o Iesu koia oki, te angaanga tutuanga. Inara, ka rava ua ainei i te oronga ua i te moni no teia angaanga e te akamaroiroi i te aronga akatainuia kia rave i te angaanga tutuanga?

11. Eaa te uianga ta tatou ka ui, e no teaa ra?

¹¹ I teia tuatau, e varu mirioni tangata tei riro ei au pipi na Iesu, e kare te maataanga ia ratou i te aronga akatainuia. Kare a Iesu i oronga ana kia ratou i te au tareni. Mari ra, kua oronga aia i te reira ki tona au taeake akatainuia. (Mataio 25:14-18) No reira penei ka ui tatou e, ‘No te mea kare a Iesu i oronga ana i te au tareni ki te aronga kare i akatainuia, ka anoanoia ainei ratou kia rave i te angaanga tutuanga?’ Ae. Ka akara tatou i te tumu.

12. Eaa ta tatou ka tamou mai mei te tuatua a Iesu i roto ia Mataio 28:19, 20?

¹² Kua akaue a Iesu i tana au pipi pouroa kia tutu aere. I muri ake i to Iesu tuakaouanga, kua akakite aia ki tana au pipi kia “akariro i to te pa enua katoa ei pipi” e kia apii ia ratou “i te au mea katoa” tana i akaue mai. No reira, kua anoano katoaia teia au pipi kia akono i te akauenga a Iesu kia tutu aere. (E tatau ia Mataio 28:19, 20) Te taka ua ra e, ka anoanoia tatou pouroa kia tutu aere noatu e manakonakoanga to tatou kia noo ki runga i te rangi me kore i te enua nei.​—Angaanga 10:42.

13. Eaa ta tatou i tamou mai mei te orama ta Ioane i kite?

¹³ I roto i te puka o Apokalupo, ka kite tatou e ka rave te aronga akatainuia e etai ke i te angaanga tutuanga. Kua akaari a Iesu i tetai orama ki te apotetoro ko Ioane no runga i tetai “vaine akaipoipo ou” tei pati i te tangata kia aere mai e inu i te vai ora. Te akatutu maira te vaine akaipoipo ou i te 144,000 aronga akatainuia te ka tutara kapiti e Iesu i te rangi. (Apokalupo 14:1, 3; 22:17) Te akatutu maira te vai ora i te atinga oko o Iesu te ka tauturu i te tangata kia rauka mai te oraanga kare e ara e kare e mate. (Mataio 20:28; Ioane 3:16; 1 Ioane 4:9, 10) Te apii maroiroi nei te aronga akatainuia i te tangata no runga i te oko e akapeea ratou me puapingaia mei te reira. (1 Korinetia 1:23) Inara i roto i taua orama ra, te taikuia ra tetai pupu tangata ke kare i akatainuia te ka noo i te enua nei. Kua akaueia ratou kia akakite ki te tangata e, “E aere mai.” Ka akono ratou i teia akauenga na te apii anga i te tuatua meitaki ki te tangata. No reira te akaari maira teia orama e ka anoanoia te aronga pouroa tei āriki i te karere o te tuatua meitaki kia tutu aere ki te tangata.

14. Akapeea tatou me akono “i te ture a te Mesia”?

¹⁴ Ka anoanoia te aronga tei akono “i te  ture a te Mesia” kia tutu aere. (Galatia 6:2) Te tapapa maira a Iehova i te aronga pouroa tei akamori iaia kia akono i teia ture. I te tuatau i taito, kua tapapa aia i te ngati Iseraela pera katoa te aronga tuitarere e noo ra i rotopu ia ratou kia akono i tana au ture. (Exodo 12:49; Levitiku 24:22) E tika, i teia tuatau kare tatou e umuumuia kia akono i te au ture a te ngati Iseraela. Inara, noatu e e aronga akatainuia tatou e me kare, ka anoanoia tatou kia akono “i te ture a te Mesia.” Ko tetai mea puapinga roa atu ta Iesu i apii mai ia tatou, ko te aroa. (Ioane 13:35; Iakobo 2:8) Ka anoanoia tatou kia inangaro ia Iehova, ia Iesu, e te tangata. E ko te mataara meitaki atu ka akaari tatou i te aroa, ko te akakite anga i te tuatua meitaki o te Patireia ki te tangata.​—Ioane 15:10; Angaanga 1:8.

15. Eaa tatou i karanga ai e kua akaue a Iesu i tana au pipi kia tutu aere?

¹⁵ I tetai taime, ko ta Iesu i tuatua ki tetai pupu meangiti o tana au pipi, ka tau katoa te reira ki te manganui. Ei akaraanga, kua papau a Iesu i tetai koreromotu ki tana au pipi e 11 e kua taputou aia e ka tutara ratou i roto i tona Patireia. Inara, e 144,000 aronga akatainuia te ka tutara kapiti e ïa. (Luka 22:29, 30; Apokalupo 5:10; 7:4-8) I muri ake i to Iesu tuakaouanga, e tokoiti ua te au pipi tei akarongo ki tana akauenga kia tutu aere. (Angaanga 10:40-42; 1 Korinetia 15:6) Inara kua akono te au pipi pouroa a Iesu i te anere mataiti mua i taua akauenga ra. (Angaanga  8:4; 1 Petero 1:8) I teia tuatau katoa, kua kite tatou e ka anoanoia tatou kia tutu aere, noatu e kare tatou i akarongo tikai ki te reo o Iesu kia rave i teia angaanga. Ko te tika, e varu mirioni tangata te rave ra i te angaanga tutu aere. Kua kite tatou e me rave tatou i te angaanga tutuanga, te akaari ra te reira i to tatou irinaki i roto ia Iesu.​—Iakobo 2:18.

16-18. Akapeea tatou me tauturu i te au taeake o Iesu, e eaa ra tatou ka rave ei i te reira i teianei?

¹⁶ Te tamaki maira a Satani i te au taeake akatainuia o Iesu i te enua nei, e kua kite aia e “e manga tuatau poto ua tona e toe nei.” (Apokalupo 12:9, 12, 17) Inara noatu to Satani tamakianga, te rave tamou nei te aronga akatainuia i te angaanga tutuanga e e maata te tangata e akarongo ra ki te tuatua meitaki. Taka ua ra e, te vaitata ua ra a Iesu ki te aronga akatainuia e te arataki nei aia ia ratou.​—Mataio 28:20.

¹⁷ E tikaanga ngateitei no tatou kia tauturu i te au taeake o Iesu na te rave anga i te angaanga tutu aere. Ka tauturu katoa tatou na roto i te moni oronga ua e na te angaanga pakari anga kia akatu i te au Are Uipaanga Patireia, te au Are Akaputuputuanga e te au opati manga. Me akarongo tatou ki te aronga pakari e te au taeake tei ikiia e te “tavini akono meitaki e te pakari,” te akaari ra i to tatou inangaro kia tauturu i te au taeake o Iesu.​—Mataio 24:45-47; Ebera 13:17.

¹⁸ Kare e roa atu ana, ka orongaia te akairo openga ki te aronga akatainuia e toe nei i te enua. E oti, ka tuku te au angera i te “nga matangi e a o te ao nei,” e ka akamata te mate maata. (Apokalupo 7:1-3) I mua ake ia Aramakito, ka aere te aronga akatainuia ki te rangi. (Mataio 13:41-43) No reira, me inangaro tatou kia akavaia ei au mamoe me tae mai a Iesu, ko teia tikai te tuatau kia vai tiratiratu ua ki te au taeake akatainuia o Iesu.