1. Eaa te tumu ka anoanoia tatou kia akaketaketa i to tatou pirianga kia Iehova?

ME KUA papetitoia koe ei Kite no Iehova, e apinga akaperepere taau i rauka mai. Koia oki, tetai pirianga kia Iehova. Inara, te takinokino ra te ao o Satani i toou pirianga kia Iehova e ka akaparuparuia no to tatou uaorai tu apa. Ko te tumu teia ka anoanoia tatou pouroa kia akaketaketa i to tatou pirianga kia Iehova.

2. (a) Eaa te aiteanga o te pirianga i rotopu i tetai nga tangata? (Akara i te tataanga rikiriki i raro.) (e) Akapeea tatou me akaketaketa i to tatou pirianga kia Iehova?

² E tika tikai ainei a Iehova kia koe? E Oa mou tikai ainei a Iehova noou? Ka inangaro ainei koe kia ririnui atu toou pirianga kiaia? Te akakite maira a Iakobo 4:8 i taau ka rave: “E akavaitata atu ki te Atua, e nana e akavaitata mai kia kotou na.” Toou pirianga kia Iehova, tei rotopu ia koe e Iehova. *  (Akara i te tataanga rikiriki i raro.) Me rave koe i te au takainga kia akavaitata atu kia Iehova, ka akavaitata mai aia kia koe. Me rave koe i teia, ka ketaketa roa atu toou pirianga kiaia e ka akamanako koe mei ia Iesu rai tei karanga e: “Kareka tei tono mai iaku nei, e tuatua-mou tana,” e, “kua kite au iaia.” (Ioane 7:28, 29) Eaa taau ka rauka i te rave kia akavaitata atu kia Iehova?

3. Akapeea tatou me tuatua kia Iehova?

³ Me inangaro koe i te akavaitata atu kia Iehova, e mea puapinga tikai kia tuatua kiaia e kia akatika iaia kia tuatua mai kia koe. Akapeea ra teia i tupu ei? Akamanako ana e akapeea koe me tuatua atu ki tetai oa e noo ra i te ngai mamao. Penei ka tata reta korua me kore ka pukapuka na runga i te tereponi. E tuatua putuputu ana koe kia Iehova na roto i te pure. (E tatau ia Salamo 142:2.) Inara, akapeea koe me akatika ia Iehova kia tuatua mai kia koe? Ka rave koe i teia me tatau putuputu koe i tana tuatua te Pipiria, e me akamanako oonu koe no runga i te reira. (E tatau ia Isaia 30:20, 21) Ka akara tatou e akapeea teia tuatua i rotopu ia koe e Iehova i te akaketaketa anga i toou pirianga kiaia e te akariro anga iaia ei Oa mou tikai noou.

4, 5. Akapeea a Iehova i te tuatua anga kia koe me apii koe i te Pipiria? Oronga mai i tetai akaraanga.

⁴ Kua kite tatou e ko te Pipiria te karere a te Atua ki te tangata. Inara ka tauturu ainei te Pipiria ia koe kia akavaitata atu kia Iehova? Ae! Me tatau e me apii putuputu koe i te Pipiria, akara e eaa te akakeuanga tei rauka mai mei taau e tatau ra. E akamanako e akapeea koe me taangaanga i taau i apii mai. Me akapera koe, te akatika ra koe ia Iehova kia tuatua mai kia koe. Ka riro aia ei Oa mou tikai tei tauturu ia koe, e ka akavaitata atu koe kiaia.​—Ebera 4:12; Iakobo 1:23-25.

⁵ Ei akaraanga, eaa toou manako me tatau koe i te au tuatua a Iesu e: “Auraka e akaputu i te apinga na kotou i teianei ao”? Me tuku koe ia Iehova ei mea mua i roto i toou oraanga, ka kite koe e te mareka maira a Iehova ia koe. Me kare, ka kite koe e ka anoanoia kia akamāmā atu i toou oraanga e kia tavini maata atu i te Atua. Me koia ïa, te tauturu nei a Iehova  ia koe kia mārama i taau ka rave kia akavaitata atu kiaia.​—Mataio 6:19, 20

6, 7. (a) Me apii tatou i te Pipiria, eaa te ka tupu ki to tatou inangaro no Iehova e Tona inangaro ia tatou? (e) Eaa to tatou akakoroanga maata me apii tatou i te Pipiria?

⁶ E tika, me apii tatou i te Pipiria, ka kite mai tatou i te au tauianga ta tatou ka anoano i te rave kia tavini pu tikai ia Iehova. Inara, ka apii katoa tatou no runga i te au angaanga meitaki tana i rave e tona au tu manea, e ka akakeu teia ia tatou kia inangaro maata iaia. Me tupu to tatou inangaro no Iehova, ka tupu katoa tona inangaro no tatou, e ka ketaketa roa atu to tatou pirianga kiaia.—E tatau ia 1 Korinetia 8:3.

⁷ Me inangaro tatou i te akavaitata atu kia Iehova, e mea puapinga no tatou kia apii i te Pipiria ma te au tumuanga tau. Karanga a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Ka rauka ia tatou i te apii i te au mea ou i roto i te Pipiria, inara ko to tatou akakoroanga maata me tatau i te Pipiria koia oki, kia kite meitaki atu ia Iehova e tona au tu.​—E tatau ia Exodo 33:13; Salamo 25:4.

8. (a) Eaa ta tetai pae ka manako no runga i ta Iehova i rave ki te Ariki ko Azaria? (e) Me kua kite koe ia Iehova, eaa taau ka manako no runga i tana i rave?

⁸ Me e Oa mou tikai a Iehova no tatou, kare tatou e manata me kare te Pipiria e akamārama mai i te tumu i rave ei aia i tetai angaanga. Ei akaraanga, i te tuatau o Azaria te ariki o Iuda, kua akamori te iti tangata i te au atua pikikaa. Kare a Azaria i piri atu kia ratou. “Kua rave aia i te mea tika ki mua i te aroaro o Iehova.” (2 Ariki 15:1-5) Inara kua akautunga a Iehova ia Azaria e kua tuia aia i te maki repera. Eaa te tumu? Kare teia tuanga o te tua i akakite mai ana kia tatou. No reira, eaa toou manako no runga i ta Iehova i rave? Te manako ra ainei koe e kare a Iehova i rave i te mea tika, e kua akautunga aia ia Azaria e kare e tumuanga tau? Kare. Me kua kite meitaki koe ia Iehova, ka kite koe e e tau ua tana ako. Te ako maira aia ia tatou “ma te tuatua-tau.” (Ieremia 30:11) No reira, noatu e penei kare koe i kite i te tumu i akautunga ai a Iehova ia Azaria, ka papu ia koe e kua rave a Iehova i te mea tika.

9. Eaa te au akakiteanga ke mai tei tauturu ia tatou kia mārama i te tumu i akautunga ai a Iehova ia Azaria?

⁹ Te akakite maira te Pipiria i te au akakiteanga ke mai no runga i te Ariki ko Azaria, tei kapiki katoaia e ko te Ariki ko Uzia. (2 Ariki 15:7, 32) Te akakite maira a 2 Paraleipomeno 26:3-5, 16-21 e “kua rave aia i te mea tika ki mua i te aroaro o Iehova.” Inara, te akakite katoa ra e i muri mai “kua akateiteiia tona ngakau e mate atura.” Kua tauta te ariki i te rave i tetai angaanga na te au taunga anake ka akatikaia kia rave. E 81 taunga tei akakite kiaia e e mea tarevake tana e rave ra e kua tauta ratou i te tāpu iaia. Eaa tana i rave? Kua akaparau aia e kua riri akera aia ia ratou! Te tauturu maira teia au akakiteanga ia tatou kia mārama i te tumu i akautunga ai a Iehova i te ariki e kua tu aia i te maki repera.

10. Eaa te tumu kare tatou e anoanoia kia kite i te au tumuanga pouroa no ta Iehova i rave? Akapeea e rauka ai ia tatou i te irinaki e e rave ua ana a Iehova i te mea tika?

¹⁰ Eaa te apiianga puapinga ta tatou i mou mai? I roto i te tua o te Ariki ko  Azaria, e rava ua ta tatou i kite kia mārama i te tumu i akautunga ai a Iehova i te ariki. Inara, akapeea me kare te Pipiria e oronga mai ana i te au akakiteanga? Eaa taau ka rave? Ka manako ekoko ainei koe e kare a Iehova i rave ana i te mea tika? Me kore ka manako ainei koe e e rava ua te au akakiteanga e ka rauka i te irinaki ua rai ia Iehova kia rave i te mea tika? (Deuteronomi 32:4) Me kite maata atu koe ia Iehova e tona au tu, ka akaketaketa atu toou inangaro e toou irinakianga iaia. I reira, kare koe e anoanoia kia kite i te au tumuanga no te au angaanga tana i rave. Me apii koe i te Pipiria, ka riro mai a Iehova ei oa noou e ka akavaitata atu koe kiaia.​—Salamo 77:12, 13

11-13. Akapeea koe e kite ei e te akarongo maira a Iehova i te au pure? (Akara i te tutu mua o teia atikara.)

¹¹ Me pure tatou, te akavaitata ra tatou kia Iehova. Ka akapaapaa tatou iaia, ka akameitaki iaia, e ka pati tatou no tana tauturu. (Salamo 32:8) Inara, me inangaro koe kia piri vaitata kia Iehova, ka anoanoia koe kia irinaki papu e te akarongo maira aia i taau pure.

¹² E karanga ana tetai aronga e kare te Atua e akarongo mai ana i te au pure e e ravenga ua te pure no te akameitaki atu i toou turanga. Irinaki teia aronga e te tauturu ra te pure ia koe kia akamanako meitaki no runga i toou au manamanata e kia kimi i te ravenga kia akatikatika i te reira. E tika, ka tauturu te pure ia koe kia rave i teia au mea. Inara me tuatua  koe kia Iehova na roto i te pure, te akarongo maira aia ia koe. Akapeea ra koe e papu ei?

¹³ Akamanako ana i teia: I mua ake ka aere mai a Iesu ki te enua nei, kua kite aia ia Iehova e pau ra i te au pure a Tona au tavini i te enua nei. Ia Iesu i te enua nei, kua pure aia ki tona Metua i te rangi e kua akakite aia i tona au manako. I tetai atianga, kua pure aia i te po katoa. (Luka 6:12; 22:40-46) Ka rave ainei a Iesu i teia naringa kare a Iehova e akarongo maira? Pera katoa, kua apii a Iesu ki tana au pipi e akapeea me pure kia Iehova. Ka rave ainei aia i teia me kua kite aia e kare a Iehova e akarongo mai ki te au pure? Te taka ua ra e kua kite a Iesu e te akarongo tikai maira a Iehova i te au pure. Kua akakite aia e: “E taku Metua, e akameitaki au ia koe, ko koe i akarongo mai iaku nei. Kareka au, kua kite au e, ka akarongo ua mairai koe iaku.” Ka rauka katoa ia tatou i te irinaki e te akarongo maira a Iehova i ta tatou au pure.​—Ioane 11:41, 42; Salamo 65:2.

14, 15 (a) Eaa te puapinga ka rauka mai me akakite tikai tatou kia Iehova na roto i te pure i ta tatou e inangaro ra? (e) Akapeea te au pure a Kathy i te tauturu anga iaia kia akavaitata atu kia Iehova?

¹⁴ I tetai taime, kare tatou e kite taka meitaki i te pauanga ki ta tatou au pure. Inara me akakite koe i roto i taau pure e eaa tikai taau e inangaro, ka kite i reira koe i te au pauanga taka meitaki a Iehova ki taau pure, e ka riro mai aia ei oa noou. Me akakite koe kia Iehova i te au mea e tamanata ra ia koe, ka akavaitata mai aia kia koe.

¹⁵ Ei akaraanga, e aere putuputu ana tetai tuaine ko Kathy ki roto i te angaanga orometua, inara kare aia e reka ana i teia angaanga. * (Akara i te  tataanga rikiriki i raro.) Karanga aia e: “Kare roa au e reka ana i te angaanga orometua.” Te akaoti anga aia i tana angaanga moni, kua akamaroiroi tetai tangata pakari iaia kia painia tamou. Akakite a Kathy e: “Kua oronga katoa mai aia i te pepa kia akaki. Kua iki au i te painia, tera ra kua akamata au i te pure i te au rā kia tauturu a Iehova iaku kia inangaro i te rave i te angaanga orometua.” Kua pau ainei a Iehova i tana pure? E toru mataiti i pou iaia te painia tamou, kua karanga aia e: “No te mea e maata toku taime i roto i te angaanga orometua e kua apii katoa au mei te au tuaine, aere ua rai kua karape au i te rave i te angaanga tutuanga. I teianei, e inangaro maata toku no te angaanga orometua. Tetai katoa, kua ketaketa roa atu toku pirianga kia Iehova i to mua ana.” Kua tauturu tikai te au pure a Kathy kia akavaitata atu aia kia Iehova.

16, 17 (a) Eaa ta tatou ka rave i te akaketaketa ua rai i to tatou pirianga kia Iehova? (e) Eaa ta tatou ka uriuri i roto i te atikara ka aru mai?

¹⁶ Ka rauka ia tatou i te akavaitata atu kia Iehova e mutu kore ua atu. No reira, kia akarongo ua rai tatou kiaia na te apii putuputu i te Pipiria, e te tuatua anga kiaia na roto i te pure. Me rave tatou i teia, ka ketaketa roa atu to tatou pirianga kia Iehova, e ka tauturu mai aia ia tatou kia akakoromaki i te au timataanga.

¹⁷ Inara, i tetai taime ka aro atu tatou i te au manamanata noatu e kua pure putuputu tatou kia Iehova no te tauturu. Penei ka akamata to tatou irinakianga i te Atua i te akaparuparuia. Penei ka manako tatou e kare a Iehova e akarongo mai ki ta tatou au pure e ka manako ekoko tatou e me e oa tikai tatou nona. Me akamanako akapera koe, eaa taau ka rave? Ka riro te atikara ka aru mai ei tauturu ia koe.