ME AKAMANAKO tatou i tetai pu arezi (cedar) o Lebanona tei tupu ruperupe, penei i te akara anga kare te pu olive tei taviriviriia e manea ana. Tera ra, ka rauka i te pu olive i te tupu noatu e kino te reva. Mei te 1,000 mataiti te roa o tona oraanga. Ka toro te aka o te pu olive ki raro roa i te one, e ka tupu akaou te pu rakau noatu e kua tipuia. Me te ora ra rai te aka, ka tupu akaou te reira.

Kua irinaki papu te tangata akarongo mou ko Iobu e noatu ka mate aia, ka ora akaou mai aia. (Iobu 14:13-15) Kua taangaanga aia i te akaraanga o tetai pu rakau, penei ko te pu olive, i te akaari i tona irinaki papu ki roto i to te Atua mana i te akatuakaou iaia. Kua karanga a Iobu e: “E manakonako anga oki tei te rakau ra e, kia tipuia ra, e kao akaou ïa, e kare e kore te mea tupu ou ra.” Me ua mai i muri ake i te tuatau marō, ka rauka te pu olive i te ora akaou e ka “tupu akaou tona au rara mei te rakau tanu ra.”​—Iobu 14:7-9.

Mei tetai tangata tanutanu rai tei inangaro i te kite i te pu olive e tupu akaou noatu kua tipuia te reira, e inangaro maata katoa to te Atua ko Iehova i te akatuakaou i tona au tavini e etai ke. (Mataio 22:31, 32; Ioane 5:28, 29; Angaanga 24:15) E akamanako e mei teaa rai te rekareka me kite tatou i te aronga tei akatuakaouia mai ki te enua nei!