1. Eaa ra i riro ei ei mea meitaki no tatou kia tamanako atu i te au apinga kare tatou i kite mata ana? (Akara i te tutu mua o teia atikara.)

KUA oronga mai a Iehova i tetai apinga aroa manea kia tatou. Koia oki, ka rauka ia tatou i te tamanako atu i tetai au apinga kare tatou i kite mata ana. Ka tauturu teia apinga aroa ia tatou kia tapapa atu i te au mea meitaki no te tuatau ki mua, pera katoa kia akanoo i te au parani e kia kopae i te au manamanata. Kua kite a Iehova no runga i te tuatau ki mua, e te akakite nei aia kia tatou i tetai au mea ta tatou ka tapapa atu. Noatu e kare tatou e kite mata i te reira, ka rauka ia tatou i te tamanako atu e kia irinaki e ka tupu te reira.​—2 Korinetia 4:18.

2, 3. (a) Akapeea te tamanako anga me tauturu ia tatou? (e) Eaa te au uianga ta tatou ka pau i roto i teia atikara?

² E tika, i tetai au taime penei ka tamanako tatou i te au apinga te ka kore rava e tupu. Ei akaraanga, penei te tamanako ra tetai tamaine meangiti e tei runga aia i tetai pepe e rere ra. E tika, kare teia e tupu. Inara, kua tamanako atu a Hana, te metua vaine o Samuela i te au mea te ka tupu. Kua  tamanako ua rai aia i te rā me apai atu aia i tana tamaiti i ko i te tapenakara kia angaanga kapiti ki te au taunga. Kare teia i te moemoea ua. Kua iki takere aia i te rave i te reira. Na te tamanako anga i taua rā ra i akamaroiroi ia Hana kia akatupu i tana taputou kia Iehova. (1 Samuela 1:22) Me tamanako tatou i ta Iehova i taputou mai e ka rave aia, te tamanako ra tatou i te au mea te ka tupu.​—2 Petero 1:19-21.

³ E maata te au tavini o Iehova i te tuatau Pipiria tei tamanako i Tana i taputou. Eaa ra i riro ei ei mea meitaki no ratou kia rave i teia? E eaa ra i riro ei ei mea meitaki no tatou kia tamanako atu i to tatou uaorai oraanga me akatupuia te au taputou a te Atua?

4. No teaa ra i rauka ai ia Abela i te tamanako atu i tetai tuatau meitaki ki mua?

⁴ Ko Abela te tangata mua tei akatupu i te akarongo i roto i te au taputou a Iehova. Kua kite aia i ta Iehova i tuatua ki te ovi i muri ake i te rave anga a Adamu raua ko Eva i te ara: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:14, 15) Kare a Abela i kite tikai e akapeea teia e tupu ei. Inara e mea papu e kua akamanako maata aia i ta te Atua i tuatua mai. Penei kua ui a Abela e, ‘Koai te ka akaparuparuia e te ovi e te ka tauturu i te tangata kia apa kore akaou?’ Kua irinaki a Abela e ka tupu te au mea ravarai ta Iehova i taputou mai, e i te oronga anga aia i tetai atinga, kua mareka a Iehova i te reira.​—E tatau ia Genese 4:3-5; Ebera 11:4.

5. No teaa ra i meitaki ei no Enoka kia tamanako atu i te tuatau ki mua?

⁵ Ko Enoka tetai tangata tei akatupu i te akarongo mou ki roto i te Atua. Kua koropiniia aia e te au tangata kino tei tuatua i “te au tuatua māro katoa” i te Atua. Tera ra e tangata ngakau toa a Enoka e kua tutu aere aia i te karere a te Atua. Kua akakite aia ki te tangata e ka takore a Iehova i te aronga kino. (Iuda 14, 15) Eaa tei tauturu iaia kia rave i teia? Penei kua tamanako a Enoka e mei teaa rai teia ao me tavini te katoatoa ia Iehova.​—E tatau ia Ebera 11:5, 6.

6. I muri ake i te Vaipuke, eaa ta Noa i akamanako?

⁶ E akarongo to Noa ia Iehova, no reira kare aia i takoreia i roto i te Vaipuke. (Ebera 11:7) Pera katoa no tona akarongo, kua akaatinga a Noa i te au manu kia Iehova. (Genese 8:20) I muri ake i te Vaipuke, kua kino akaou te tangata. Kua akamata a Nimeroda i te tutara e kua inangaro aia i te tangata kia meameaau ia Iehova. (Genese 10:8-12) Inara kua vai ketaketa ua to Noa akarongo. Mei ia Abela rai, kua irinaki papu aia e ka akakore te Atua i te ara e te mate. Penei kua akamanako katoa a Noa i te tuatau me akaateaia te au tutara kino. Ka rauka katoa ia tatou i te tamanako atu i teia tuatau meitaki, te vaitata maira tikai!​—Roma 6:23.

7. Eaa te ka rauka ia Aberahama, Isaaka, e Iakoba i te tapapa atu no te tuatau ki mua?

⁷ Kua rauka ia Aberahama, Isaaka, e Iakoba i te tamanako atu i tetai tuatau umere ki mua. Kua taputou a Iehova kia ratou e ka akameitakiia te au tangata mei te pa enua katoa na roto i to ratou  “uanga.” (Genese 22:18; 26:4; 28:14) Kua taputou katoa te Atua kia ratou e ka riro mai to ratou uanga ei iti tangata maata e ka noo ratou i te Enua Taputouia e te manea. (Genese 15:5-7) No te mea kua kite a Aberahama, Isaaka, e Iakoba e ka tupu te au taputou a Iehova, kua rauka ia ratou i te tamanako atu i to ratou uanga e noo ra i taua enua ra. Te tika, mei te tuatau i ara ai a Adamu raua ko Eva, kua tauturu a Iehova i tona au tavini tiratiratu kia mārama e akapeea te au tangata e rauka akaou ei te oraanga apa kore.

8. Eaa tei tauturu ia Aberahama kia akono tamou e kia akarongo?

⁸ No tona akarongo ketaketa, kua akarongo a Aberahama kia Iehova, noatu e e ngata tikai te au turanga. Kua rauka ia Aberahama e tetai atu aronga tiratiratu i te tamanako meitaki i te au mea ta Iehova i taputou mai, noatu e kare teia au taputou e tupu i te tuatau e ora ra ratou. Te akakite maira te Pipiria e: “Kua akara ra i taua au mea ra i te atea ke, . . . e kua āriki marie.” (E tatau ia Ebera 11:8-13.) Kua kite a Aberahama e kua rave ua ana a Iehova i tana i taputou, no reira kua papu iaia e ka akatupuia te au taputou ravarai a Iehova no te tuatau ki mua.

9. Akapeea to Aberahama akarongo i roto i te au taputou a te Atua i te tauturu anga iaia?

⁹ No te mea e akarongo to Aberahama i roto i ta Iehova i taputou kiaia, kua rave tamou aia i ta Iehova i pati iaia kia rave. Ei akaraanga, kua akaruke aia i tona kainga oire ko Ura, e no te katoa anga o tona oraanga, kare aia i noo tamou ana i te ngai okotai. Kua kite aia e kare te au oire takapini iaia e vai tinamou ua no te mea kare te au tutara e tavini ana ia Iehova. (Iosua 24:2) Mari ra, kua tapapa aia i te tuatau me tutara a Iehova e tona kavamani ki rungao i te enua e tuatau ua atu. Ko teia kavamani “te oire tumu mou, ko te akatu e te tutara o taua oire ra, ko te Atua ïa.” (Ebera 11:10) Ko Aberahama, Abela, Enoka, Noa, e tetai atu, kua irinaki ratou i te tuakaouanga. Me akamanako ratou i te noo e tuatau ua atu i te enua manea nei, kua ketaketa atu to ratou akarongo i roto ia Iehova.​—E tatau ia Ebera 11:15, 16

10. No teaa ra i meitaki ei no Sara kia tapapa atu i te tuatau ki mua?

¹⁰ Te vaine a Aberahama ko Sara, e akarongo ketaketa tona i roto i te au taputou a Iehova. I te tuatau e 90 ona mataiti e kare rai ana tamariki, kua tapapa aia i te tuatau me anau pepe aia. Kua rauka katoa ia Sara te tamanako atu i tana tamariki me riro mai ratou ei iti tangata maata. (Ebera 11:11, 12) Akapeea aia i papu ei i te reira? No te mea kua akakite a Iehova ki tana tane e: “Ka akameitaki au iaia, e ka oronga au i tetai tamaiti iaia naau, e akameitaki rai oki au iaia, e akariro oki au iaia ei pa enua; ei ui ariki te ka anau iaia no te pa enua.” (Genese 17:16) Mei ta Iehova rai i taputou, kua anau a Sara i tetai tamaroa ko Isaaka. Kua riro  teia temeio ei akapapu kiaia e ka tupu te katoa anga o te au taputou a Iehova. Ka ketaketa katoa to tatou akarongo me tamanako tatou i te au mea manea pouroa ta Iehova i taputou mai kia tatou.

11, 12 Eaa tei tauturu ia Mose kia maata atu tona inangaro ia Iehova?

¹¹ E akarongo katoa to Mose i roto i te au taputou a Iehova. Kua utuutuia aia i Aiphiti ei tamaiti ariki. Inara e maata atu tona inangaro ia Iehova i tetai ua atu mea, kare a Mose i inangaro ana i te mana e te apinganui. Kua apii mai aia mei tona nga metua no runga ia Iehova, e kua apiiia aia i ta Iehova i taputou mai kia akarangatira i te iti tangata Epera mei te tuikaa e kia oronga i te Enua Taputouia kia ratou. (Genese 13:14, 15; Exodo 2:5-10) Ko te maata atu to Mose tamanako anga i teia au taputou, ko te maata atu tona inangaro ia Iehova.

¹² Te akakite maira te Pipiria kia tatou i ta Mose i akamanako ua rai: “No te akarongo i kore ei i tika ia Mose, ka pakari ei aia ra, kia tapaia i te tamaiti a te tamaine a Pharao ra; E mea meitaki iaia te rave katoa i te mate i te kapiti anga i te au tangata o te Atua, i te rave i te navenave poto ua o te tuatua kino ra; E apinga maata oki iaia te akakino i te Mesia nei, i te au taonga katoa o Aiphiti ra: te akono marie ra oki aia i te tutaki ra ei oko.”​—Ebera 11:24-26.

13. No teaa ra i meitaki ei no Mose kia akamanako ua rai i te au taputou a Iehova?

¹³ Papu e kua akamanako oonu a Mose i te taputou a Iehova kia akarangatira i te iti tangata Epera mei te tuikaa. Mei tetai au tavini o Iehova, kua kite katoa a Mose e ka akarangatira a Iehova i te tangata ravarai mei te mate. (Iobu 14:14, 15; Ebera 11:17-19) No reira kua marama a Mose i to Iehova aroa maata no te tangata. Kua akakeu teia ia Mose kia inangaro maata atu ia Iehova e kia ketaketa atu tona akarongo i roto iaia. Kua tauturu te reira iaia kia tavini ia Iehova no te katoa anga o tona oraanga. (Deuteronomi 6:4, 5) Noatu e kua inangaro a Pharao i te tamate iaia, kare a Mose i mataku ana. Kua kite aia e ka akapuapinga a Iehova iaia a te tuatau ki mua.​—Exodo 10:28, 29

14. Eaa ta tetai pae i manako no te tuatau ki mua?

¹⁴ E manganui te tangata e akamanako ra i te tuatau ki mua e te tamanako ra i te au mea kare e tupu. Ei akaraanga, te moemoea ra tetai aronga putaua e ka riro mai ratou ei aronga apinganui e kare e manamanata akaou. Inara te akakite maira te Pipiria e ka riro ua rai te oraanga i roto i to Satani ao ei mea “roiroi e ei taitaia anga.” (Salamo 90:10) Me kore penei ka manako tetai pae e na te kavamani tangata e akatikatika i te au manamanata o teianei ao. Tera ra te akakite maira te Pipiria e na te kavamani anake a te Atua e rave i teia. (Daniela 2:44) E manganui te tangata te manako ra e kare teianei ao e taui. Inara te akakite maira te Pipiria e ka takore te Atua i teia ao kino. (Zephania 1:18; 1 Ioane 2:15-17) Ko te aronga e akamanako ra i te au mea tei tuke ki ta Iehova i tuatua mai, ka maromaroa tikai ratou.

15. (a) Eaa ra i meitaki ei no tatou kia tamanako i te au mea ta te Atua i taputou mai no te tuatau ki mua? (e) Eaa tetai au mea taau e tapapa atura?

¹⁵ Kua taputou mai a Iehova i tetai tuatau meitaki no tatou ki mua. Me akamanako  tatou i taua tuatau ra, ka mataora atu tatou e ka maroiroi i te tavini iaia. Te tamanako ra ainei koe i te rave i te au angaanga ta Iehova i taputou mai kia koe, noatu e manakonako anga toou no te rangi me kore no te enua nei? Me te tapapa ra koe i te oraanga mutu kore i te enua nei, e tamanako ana i te angaanga kapiti ki toou au oa e te akariro anga i te enua ei kainga manea. Te aronga te akaaere ra i teia angaanga, te manako tikai maira ia koe. E te inangaro ra te katoatoa ia Iehova, mei ia koe rai. Ka meitaki toou oraanga kopapa e ka maata toou maroiroi, e kare rava koe e manamanata. Ka mataora koe no te mea te taangaanga ra koe i toou tareni e te tu karape kia tauturu i etai ke e kia akangateitei ia Iehova. Penei ka tauturu katoa koe i te aronga tei akatuakaouia mai kia kite no runga ia Iehova. (Ioane 17:3; Angaanga 24:15) Kare teia i te moemoea me tamanako koe i teia au mea. Ka tupu teia au mea pouroa no ta te Pipiria e akakite maira i te ka tupu a te tuatau ki mua.​—Isaia 11:9; 25:8; 33:24; 35:5-7; 65:22.

16, 17 No teaa ra i meitaki ei kia tuatua no runga i te au taputou a Iehova no te tuatau ki mua?

¹⁶ Me akakite tatou ki te au taeake e te au tuaine eaa ta tatou ka inangaro i te rave i roto i te ao ou, ka tauturu tatou i tetai e tetai kia tamanako meitaki i teia tuatau mataora ki mua. E tika, kare tatou e kite tikai i ta tatou ka rave. Inara me tuatua tatou no runga i ta tatou e tapapa atura, te akaari ra tatou i te akarongo ki ta Iehova i taputou mai. Na roto i teia mataara, ka akamaroiroi tatou i tetai e tetai kia tavini ua rai ia Iehova i te au tuatau ngata, mei ta te apotetoro ko Paulo e tona au taeake i rave i Roma.​—Roma 1:11, 12

¹⁷ Me akamanako koe i ta Iehova i taputou mai no te tuatau ki mua, kare koe e manako maata atu i toou uaorai au  manamanata. I tetai atianga, kua manamanata a Petero e kua karanga kia Iesu e: “I na matou, kua akaruke matou i te au mea katoa, e kua aru mai ia koe; eaa te ka rauka ia matou?” Kua inangaro a Iesu ia Petero e te au pipi kia akamanako i te au mea meitaki ta ratou ka rave a te tuatau ki mua. Kua akakite aia kia ratou e: “Kia noo te Tamaiti a te tangata ki runga i tona terono kakā, e noo katoa kotou, ko tei aru mai iaku, ki runga i te terono raungauru e rua ara, i te akava anga i te au kopu o Iseraela raungauru e rua ara. E te tangata katoatoa no toku nei ingoa i akaruke ei i te are, e te au taeake, e te au tuaine, e te metua tane, e te metua vaine, e te vaine, e te tamariki, e te enua, e anere ua atu tana e ka rauka, e e rauka oki iaia te ora mutu kore.” (Mataio 19:27-29) Kua rauka ia Petero e te au pipi i te tamanako atu i te tutara kapiti anga ma Iesu i te rangi e te tauturu anga i te au tangata akarongo i te enua nei kia vai apa kore.

18. No teaa ra i meitaki ei no tatou kia tamanako i te tuatau me akatupu te Atua i tana i taputou mai?

¹⁸ Kua apii mai tatou eaa tei tauturu i te au tavini o Iehova kia rauka te akarongo ketaketa. Kua tamanako a Abela i tetai tuatau meitaki atu ki mua ta Iehova i taputou mai, e no tona akarongo i roto i taua taputou ra kua akamareka aia ia Iehova. Kua tamanako a Aberahama i te tuatau me akatupuia ta Iehova taputou no te “uanga,” no reira kua akarongo aia kia Iehova noatu e ngata tikai te reira. (Genese 3:15) Kua tapapa a Mose i te akameitaki anga ta Iehova i taputou kiaia, e kua tauturu ia aia kia inangaro ia Iehova e kia vai tiratiratu. (Ebera 11:26) Me tamanako tatou i te tuatau me akatupu a Iehova i te au mea pouroa tana i taputou, ka akaketaketaia to tatou akarongo e to tatou inangaro ia Iehova. I roto i te atikara ka aru mai, ka apii tatou i tetai atu mataara ka rauka ia tatou i te akamanako atu.