1, 2. (a) Eaa ra koe i irinaki ei e te inangaro maira a Iehova i tona iti tangata? (e) Eaa te anoano o te au tangata i to ratou angaia mai anga?

EAA ra koe i irinaki ei e te inangaro maira a Iehova i tona iti tangata? I mua ake ka pau ei koe i teia uianga, akamanako ana i teia au akaraanga: No tetai au mataiti, kua akamaroiroi tetai au taeake e te au tuaine i tetai tuaine ko Taylene tona ingoa. Kua akakite ratou kiaia kia kore e manako maata roa no runga i tana ka rauka i te rave. Akakite mai aia e: “Naringa kare a Iehova e inangaro mai ana iaku, kare tana akoanga e putuputu.” Kua akakite mai a Brigitte, tei utuutu mai e rua nga tamariki koia anake ua i muri ake i te mateanga tana tane e: “E akaaoanga ngata tikai i te utuutu mai i te tamariki i roto i to Satani akatereanga, no tetai vaine takaua tikai. Inara te irinaki papu nei au i to Iehova aroa no te mea kua arataki aia iaku na roto i te tuatau aue anga e te mamae ngakau, e kare rava aia i tuku ana iaku kia na roto i tetai turanga kare e rauka iaku i te akakoromaki.” (1 Korinetia 10:13) E maki kino to Sandra kare e rauka i te rapakau. I ko i tetai uruoaanga, kua akaari tetai tuaine i te inangaro kia Sandra. Kua  karanga te tane a Sandra e, “Noatu e kare maua i kite tikai iaia, kua rekareka tikai maua i tona akaari mai anga i te inangaro kia maua. Me akaari mai te au taeake e te au tuaine i te aroa na roto i te au mataara meangiti, te kite ra au i to Iehova aroa maata ia tatou.”

² Kua anga mai a Iehova i te au tangata ma te anoano kia inangaro i tetai ke e kia kite e te inangaroia maira ratou. Inara, e ngoie ua i te taitaia no te maki, te au manamanata pae moni, e kare e puapinga e rauka mai ana i roto i te angaanga orometua. Me akamata tatou i te manako e kare a Iehova e inangaro akaou mai ana ia tatou, kia akamaara tatou e te akaperepere maira aia ia tatou e te vaitata ra aia kia tatou, te mou ra i to tatou rima katau e te tauturu maira ia tatou. Kare rava aia e akangaropoina ia tatou me tiratiratu tatou kiaia.​—Isaia 41:13; 49:15.

3. Eaa te ka akaketaketa i to tatou irinaki anga papu e e aroa mutu kore to Iehova no tatou?

³ Kua irinaki papu te Au Kite tei taikuia i mua ana e tei te pae a Iehova ia ratou i te au tuatau ngata. Ka rauka katoa ia tatou i te irinaki e tei ia tatou a Iehova. (Salamo 118:6, 7) I roto i teia atikara, ka uriuri tatou e ā apinga aroa te akapapu maira i to Iehova aroa no tatou. Koia oki, (1) tana au mea i anga mai, (2) te Pipiria, (3) te pure, e te (4) te atinga oko. Ka riro te akamanako oonu anga i te au mea meitaki ta Iehova i rave ei tauturu ia tatou kia āriki maata i tona aroa mutu kore.​—E tatau ia Salamo 77:11, 12

4. Eaa ta tatou i apii mai mei te au mea ta Iehova i anga?

⁴ Me akara tatou i te au mea ta Iehova i anga mai, ka kite tatou mei teaa te maata o tona aroa ia tatou. (Roma 1:20) Ei akaraanga, kua maani a Iehova i te enua kare e kia ora ua tatou mari ra kia rauka katoa te au mea ravarai ta tatou e anoano ra kia mataora te oraanga. Ka anoanoia tatou kia kaikai, inara kua oronga mai a Iehova i te au kai tukeke e kua riro te kaikai anga ei mea mataora tikai! (Koheleta 9:7) E rekareka ana tetai tuaine ko Catherine tona ingoa me akara aia i te au mea angaia, i te tuatau tikai o te tupu anga rau i Kanata. Karanga aia e: “E mea umere tikai akapeea te au mea ravarai i te tupu mai anga​—kua maaniia te au tiare kia puera mai e ka rere mai te au manu mei te au ngai mamao, kapiti mai te au manu rikiriki te ka rere ki ko i te kete kai i vao ake i toku maramarama i te ngai tunu kai. No to Iehova aroa ia tatou, te inangaro maira aia ia tatou kia mataora tikai.” E inangaro tikai to tatou Metua i tana au mea i anga mai, e te inangaro ra aia ia tatou kia mareka katoa i te reira.​—Angaanga 14:16, 17

5. Akapeea to Iehova aroa te akaari mai anga na roto i te tu i anga mai ei aia i te tangata?

⁵ Kua anga mai a Iehova ia tatou ma te tu karape kia rave i te angaanga puapinga e kia mataora i te rave i te reira. (Koheleta 2:24) Kua oronga mai aia ki te au tangata te angaanga kia akakī i te enua, kia tatanu i te reira, e kia akono i te au ika, au manu rere, e tetai atu au mea ora. (Genese 1:26-28) Kua anga katoa aia ia tatou ma te au tu meitaki tikai kia rauka ia tatou i te aru iaia!​—Ephesia 5:1.

6. Eaa ra tatou ka āriki oonu ei i te Tuatua a te Atua?

⁶ Kua oronga mai a Iehova i te Pipiria kia tatou no tona aroa maata. Te akakite maira te reira i ta tatou e anoano ra kia kite iaia e tona manako no te tangata. Ei akaraanga, te akakite maira te Pipiria i to Iehova manako no runga i te ngati Iseraela, tei putuputu i te akarongo kore kiaia. Te na ko ra a Salamo 78:38 e: “Koia ra, no te ki i te aroa, kua tapoki akera i ta ratou ara, kare akera i tamate ia ratou; kua akaoki putuputu ra aia i te riri nona ra, kare oki tona riri i akaope takiriia.” Na te akamanako oonu anga i teia irava e tauturu ia koe kia kite mai mei teaa te maata o to Iehova aroa e tona inangaro ia koe. Ka irinaki papu tatou e te manako tikai maira a Iehova ia tatou.​—E tatau ia 1 Petero 5:6, 7.

7. Eaa ra te Pipiria i riro ei ei apinga akaperepere kia tatou?

 ⁷ Ka tau te Pipiria kia riro mai ei apinga akaperepere kia tatou. No teaa ra? No te mea te komunikeiti maira a Iehova kia tatou na roto i tana Tuatua. Me komunikeiti maoraora ua tetai metua e tana tamaiti, te akaketaketa ra raua i to raua inangaro e te irinaki i tetai e tetai. Ko Iehova to tatou Metua aroa. Noatu e kare tatou e kite mata ana iaia me kore e rongo ana i tona reo, inara te komunikeiti tika maira aia kia tatou na roto i te Pipiria. Kia akarongo ua rai tatou kiaia! (Isaia 30:20, 21) Me tatau tatou i te Tuatua a te Atua, ka kite mai tatou ia Iehova e ka irinaki iaia, koia tei arataki e tei paruru mai ia tatou.​—E tatau ia Salamo 19:7-11; Maseli 1:33.

8, 9. Eaa ta Iehova e inangaro maira ia tatou kia kite? Oronga mai i tetai akaraanga i roto i te Pipiria.

⁸ Te inangaro maira a Iehova ia tatou kia kite i tona aroa no tatou e kare aia e akara ua i to tatou tu apa. Te kimi ra aia i te meitaki i roto ia tatou. (2 Paraleipomeno 16:9) Ka akamanako ana tatou akapeea a Iehova te kite anga i te mea meitaki i roto i te Ariki o Iuda ko Iehosaphata. Kua rave a Iehosaphata i tetai ikianga tarevake kia piri atu ki te Ariki o Iseraela ko Ahaba i te tamaki atu i to Arama i Ramota-gileada. Noatu e e 400 peroveta pikikaa tei akakite ki te ariki kino ko Ahaba e ka autu aia i te tamaki, kua akakite ra te peroveta mou o Iehova ko Mikaia kia Iehosaphata e Ahaba e me tamaki ratou, ka ruti ratou. Ko te reira rai tei tupu. Kua mate a Ahaba i roto i te tamaki, e mei mate rai a Iehosaphata. I muri ake i te tamaki, kua tono a Iehova ia Iehu kia ako atu ia Iehosaphata no tana ikianga tarevake. Inara kua akakite katoa a Iehu kiaia e: “Te vai nei rai te au mea meitaki i roto ia koe.”​—2 Paraleipomeno 18:4, 5, 18-22, 33, 34; 19:1-3.

⁹ I te au mataiti i mua atu ana, kua akakite a Iehosaphata ki te aronga mana, te ngati Levi, e te au taunga kia atoro i te au oire o Iuda kia apii i te tangata i te Ture a Iehova. Kua puapingaia ratou no te mea kua kite mai te au tangata no tetai atu au enua ia Iehova. (2 Paraleipomeno 17:3-10) No reira noatu e kua rave a Iehosaphata i tetai ikianga tarevake i muri mai, kare i ngaropoina ana ia Iehova te au mea meitaki tana i rave i mua ana. E pumaana tikai teia akaraanga no tatou no te mea i tetai au taime e rave ana tatou i te tarevake. Inara, me tauta pakari tatou i te tavini ia Iehova, ka aroa ua mai rai aia ia tatou e kare e ngaropoina iaia te au mea meitaki ta tatou i rave.

10, 11 (a) Eaa ra te pure i riro ei ei apinga aroa akaperepere no ko mai ia Iehova? (e) Akapeea te Atua me pau mai i ta tatou au pure? (Akara i te tutu mua o teia atikara.)

¹⁰ E tuku ana tetai metua tane aroa i tetai taime no te akarongo ki tana tamariki me inangaro ratou i te tuatua kiaia. Te inangaro ra aia i te kite i to ratou manako no te mea te akaperepere ra aia ia ratou. Mei tera katoa to tatou Metua aroa ko Iehova. Te akarongo maira aia me pure tatou kiaia. E tikaanga akaperepere me tuatua tatou ki to tatou Metua!

¹¹ Ka rauka ia tatou i te pure kia Iehova i tetai ua atu taime. E Oa aia no tatou, e te papa ua ra aia i te akarongo mai ki ta tatou pure. Karanga a Taylene, tei taikuia i mua ana e, “Ka rauka ia koe i te akakite i tetai ua atu mea e te au mea ravarai kiaia.” Me akakite tatou kia Iehova eaa to roto tikai i to tatou manako, penei ka pau mai aia ia tatou  na roto i tetai irava, tetai atikara i roto i ta tatou puka, me kore ka akamaroiroi mai tetai taeake me kore tuaine ia tatou. Te akarongo maira a Iehova i ta tatou au patianga akatenga, e te mārama maira aia ia tatou noatu kare tetai ke e mārama mai. Te akapapu maira tana au pauanga ki ta tatou pure e e mutu kore tona aroa no tatou.

12. Eaa ra tatou ka apii ei no runga i te au pure i roto i te Pipiria? Oronga i tetai akaraanga.

¹² Ka apii mai tatou i te au apiianga puapinga mei te au pure i roto i te Pipiria. I tetai au atianga, e mea meitaki i te apii i tetai o teia au pure i te tuatau o te akamorianga a te ngutuare. Ka meitaki mai te tu o ta tatou au pure me akamanako oonu tatou i te au pure akatenga a te au tavini o te Atua i te tuatau taito. Ei akaraanga, e apii i te pure akaaka a Iona iaia i roto i te kopu o te ika maata. (Iona 1:17–2:10) Akamanako i te pure ngakau tae a Solomona kia Iehova i te akatapuia anga te iero. (1 Ariki 8:22-53) E e akamanako oonu i te pure a Iesu. (Mataio 6:9-13) Te mea puapinga atu, “e akakite ua ra ki te Atua i to kotou anoano i te au mea katoa.” Te ka tupu mai, “na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.” Ka maata atu to tatou āriki rekareka anga i to Iehova aroa mutu kore.​—Philipi 4:6, 7.

13. Eaa te akameitakianga ka rauka ia tatou no tei orongaia mai te atinga oko?

¹³ Kua oronga mai a Iehova i te apinga aroa no te atinga oko “kia ora tatou.” (1 Ioane 4:9) I te taiku anga i teia akaari anga umere i te aroa o te Atua, kua tata te apotetoro ko Paulo e: “I mate ei te Mesia i te tuatau tika ra, no te aronga akono kore i te Atua ra. Kare paa e tika i tetai kia mate no tetai tangata tuatua-tika, e akakoromaki ra paa tetai tangata atu i te mate no te tangata meitaki. Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:6-8) Ko te atinga oko te akaraanga maata rava atu no te aroa o te Atua, e te oronga maira te reira i te akameitakianga no te au tangata kia rauka tetai pirianga vaitata kiaia.

14, 15 Eaa te puapinga o te atinga oko no te (a) au Kerititiano akatainuia? (e) te aronga e manakonakoanga to ratou i te noo i te enua nei?

¹⁴ Kua kite mai tetai pupu Kerititiano meangiti i to Iehova aroa mutu kore na roto i tetai mataara takake. (Ioane 1:12, 13; 3:5-7) Kua akatainu te Atua i teia aronga ma tona vaerua tapu, e no reira kua riro mai ratou ei tamariki nana. (Roma 8:15, 16) I te mea e te ora nei rai tetai papaki ia ratou i te enua nei, eaa ra a Paulo i karanga ai e kua akanooia ratou ki runga i te rangi “ma ia katoa . . . i te Mesia ra ia Iesu”? (Ephesia 2:6) No te mea kua oronga a Iehova kia ratou te manakonakoanga no te oraanga mutu kore i te rangi.​—Ephesia 1:13, 14; Kolosa 1:5.

¹⁵ Ka riro te aronga kare i akatainuia ei au oa no te Atua me akaari ratou i te akarongo ki roto i te atinga oko. Ka rauka katoa ia  ratou kia riro mai ei tamariki na te Atua e kia ora e tuatau ua atu i te enua parataito. Te akaari maira te atinga oko i to Iehova aroa no te au tangata ravarai. (Ioane 3:16) Mei teaa atura te mataora i te kite e me tavini tiratiratu tatou i te Atua, ka oronga mai aia i te oraanga meitaki rava atu i roto i te ao ou! No reira ka akaari tatou e te akaperepere ra tatou i te atinga oko, koia oki te akapapuanga maata rava atu i te aroa mutu kore o te Atua no tatou.

16. Eaa ta tatou ka rave i muri ake i te akamanako oonu anga i te aroa o te Atua?

¹⁶ E ngata i te tare i te au mataara e manganui i ta Iehova akaari anga mai i tona aroa no tatou. Kua imene te Ariki ko Davida e: “Ko te meitaki o to au manako iaku nei, e te Atua e! te maata roa anga kia tatauia e! Kia tatauia e au ra, e maata ïa te reira i te one taatai!” (Salamo 139:17, 18) Na te akamanako oonu anga i te au mataara e manganui i ta Iehova akaari mai anga i tona aroa no tatou i akakeu ia tatou kia aroa iaia e kia oronga i ta tatou ka rauka kiaia.

17, 18 Eaa tetai au mataara ka akaari tatou i to tatou aroa no te Atua?

¹⁷ E maata te au mataara kia akaari i to tatou aroa no Iehova. Ei akaraanga, ka rauka ia tatou i te akaari i to tatou aroa no Iehova na te akakite maroiroi anga ki tetai ke i te tuatua meitaki o te Patireia. (Mataio 24:14; 28:19, 20) Ka rauka katoa ia tatou i te akaari i te aroa no te Atua na te akakoromaki tiratiratu anga i te au timataanga te timata ra i to tatou akarongo. (E tatau ia Salamo 84:11; Iakobo 1:2-5.) Noatu e e pakari tikai te au timataanga, ka papu ia tatou e te kite maira a Iehova i to tatou au mamae e ka tauturu aia ia tatou no te mea te akaperepere nei aia ia tatou.​—Salamo 56:8.

¹⁸ Na to tatou aroa no Iehova e akakeu ia tatou kia akamanako oonu i te au mea umere tana i anga mai. Ka akaari tatou i to tatou aroa no Iehova e tana Tuatua na te riro mai anga ei aronga apii meitaki i te Pipiria. Ka pure putuputu tatou kia Iehova no to tatou aroa iaia e te inangaro i te akaketaketa i to tatou pirianga kiaia. E me akamanako oonu tatou i tana apinga aroa akaperepere, ko te atinga oko, ka oonu atu to tatou aroa nona. (1 Ioane 2:1, 2) Ko teia tetai o te au mataara e manganui ka akaari tatou kia Iehova e te akaperepere ra tatou i tona aroa mutu kore no tatou.