1. Mei teaa te puapinga o te akarongo? (Akara i te tutu mua o teia atikara.)

I UI ana ainei koe kia koe uaorai e: ‘Ka inangaro ainei a Iehova i te akaora iaku i te tuatau o te mate maata?’ Kua akakite mai te apotetoro ko Paulo e ko te tu meitaki rava atu ka anoanoia e ora ai tatou, koia oki ko te akarongo. Mei tana e karanga ra e: “Kare ra e akarongo ra kare rava [te Atua] e mareka.” (Ebera 11:6) Penei e māmā ua tena i te tuatua, ko te tikaanga ra, “kare oki i ope katoatoa te tangata i te akarongo.” (2 Tesalonia 3:2) Ka tauturu teia nga irava ia tatou kia mārama e mei teaa te puapinga i te akaketaketa i to tatou akarongo.

2, 3. (a) Mei teaa te puapinga o to tatou akarongo? (e) Eaa ta tatou ka uriuri i teianei?

² I tuatua ana te apotetoro ko Petero no runga i te “timata anga” i te akarongo. (E tatau ia 1 Petero 1:7.) Te vaitata roa mai nei te mate maata, e ka inangaro tatou kia riro mai ei “aronga ra i rauka te akarongo e ora atu ei.” (Ebera 10:39) No reira ka anoanoia tatou kia angaanga pakari i te akaketaketa i to tatou akarongo. Ka inangaro tatou i te noo i rotopu i te aronga tei akameitakiia me tae mai to tatou Ariki ko Iesu Karaiti. Mei te tangata rai tei pati akatenga kia Iesu kia akamaata mai i tona akarongo, ka tau rai tatou kia karanga e: “Tauturu mai koe i toku nei akarongo mea ngiti.” (Mareko 9:24) Me kore, kia karanga  katoa tatou mei te au apotetoro rai e: “E akamaata mai i to matou akarongo.”​—Luka 17:5.

³ I roto i teia atikara, ka uriuri tatou i teia au manako ka aru mai: akapeea tatou me akamatutu i to tatou akarongo, me akaari e te ketaketa ra to tatou akarongo, e te tumu i papu ei ia tatou e ka pau mai te Atua i ta tatou pure kia akamaata mai i to tatou akarongo.

4. Noai ma te au akaraanga te ka akakeu ia tatou kia akaketaketa i to tatou akarongo?

⁴ No te mea e puapinga tikai te akarongo, kua oronga mai a Iehova i te au akaraanga no te akarongo i roto i te Pipiria. “I tataia ïa kia kite tatou.” (Roma 15:4) Ka riro te au akaraanga o Aberahama, Sara, Isaaka, Iakoba, Mose, Rahaba, Gideona, Baraka, e tetai atu ei akakeu ia tatou kia akaketaketa i to tatou akarongo. (Ebera 11:32-35) Kapiti atu ki te au akaraanga o mua ana, e au akaraanga umere tetai no te au taeake e te au tuaine akarongo i teia tuatau. * (Akara i te tataanga rikiriki i raro.)

5. Akapeea a Elia te akaari anga e e ketaketa tona akarongo i roto ia Iehova, e eaa ta tatou ka ui kia tatou uaorai?

⁵ Tetai akaraanga no roto mai i te Pipiria, ko te peroveta ko Elia. Me akamanako oonu koe i tona akaraanga, ka kite koe e rima au atianga i tona akaari anga i te irinaki papu tikai ia Iehova. (1) Te akakite anga a Elia ki te Ariki ko Ahaba e ka tuku mai a Iehova i tetai tuatau marō, kua akakite papu aia e: “Te ora ra te Atua o Iseraela ko Iehova, taku e tu ua nei ki mua i tona aroaro, kare e au ïa, kare oki e ua, i eia nei puke mataiti.” (1 Ariki 17:1) (2) Kua irinaki a Elia e ka oronga mai a Iehova kiaia e ki tetai atu i ta ratou e anoano ra i taua tuatau marō ra. (1 Ariki 17:4, 5, 13, 14) (3) Kua papu ia Elia e ka akatuakaou mai a Iehova i te tamaiti a te vaine takaua. (1 Ariki 17:21) (4) Kua papu iaia e ka akapou takiri te aʼi a Iehova i tana atinga manu i runga i te Maunga Karamela. (1 Ariki 18:24, 37) (5) Noatu i mua ake ka topa ai te ua, kua tuatua a Elia ma te papu tikai kia Ahaba e: “E aere, e kaikai, e inu oki: e ua maata teia e aruru mai nei.” (1 Ariki 18:41) No reira me akamanako tatou i teia au tupuanga, e ui tatou kia tatou uaorai e, ‘E ketaketa ainei toku akarongo mei to Elia rai?’

6. Eaa te anoanoia ra mei ia Iehova ei akamatutu i to tatou akarongo?

⁶ I te mea e kare e rauka ia tatou i te akamatutu i to tatou uaorai akarongo, ka anoanoia tatou kia pati i te vaerua tapu o te Atua. No teaa ra? No te mea e tuanga te akarongo no te ua o te vaerua tapu. (Galatia 5:22) E mea meitaki me aru tatou i ta Iesu akoanga kia pure kia akamaata mai i te vaerua tapu. Kua taputou mai a Iesu e ka ‘oronga mai a Iehova i te vaerua tapu ki te aronga e pati atu kiaia ra.’​—Luka 11:13.

7. Akataka mai akapeea tatou me akaketaketa ua rai i to tatou akarongo.

 ⁷ Me ketaketa to tatou akarongo ki roto i te Atua, kia akono tamou tatou i te reira. Ka rauka ia tatou i te akaaite i te akarongo ki tetai aʼi. Me tutungi tatou i tetai aʼi, ka kā maata mai te reira. Inara, me kare tatou e tuku atu i tetai vaie ki runga i te aʼi, ka mate te aʼi e ka riro mai ei ngarau. Inara me tuku ua rai tatou i te vaie ki runga i te aʼi, ka kā ua te reira. Ka aite rai te reira ki to tatou akarongo. Me tatau e me apii ua rai tatou i te Tuatua a te Atua i te au rā ravarai, ka maata atu to tatou inangaro no te Pipiria e Iehova. Te ka tupu mai, ka rauka ia tatou i te akono tamou e te akaketaketa i to tatou akarongo.

8. Eaa tetai mea ka tauturu ia koe kia akaketaketa e te akono tamou i toou akarongo?

⁸ Auraka tatou e mareka ua i te au mea ta tatou i apii mai i mua ake ka papetitoia ai tatou. (Ebera 6:1, 2) Ei akaraanga, na te apii anga i te au totou Pipiria tei tupu ke ana e tauturu ia koe kia akamatutu e kia akono tamou i toou akarongo. Ka rauka katoa ia koe i te taangaanga i te Tuatua a te Atua kia kite me te ketaketa ra toou akarongo.​—E tatau ia Iakobo 1:25; 2:24, 26

9, 10 Akapeea to tatou akarongo me akaketaketaia e te (a) au oa meitaki? (e) au uipaanga a te putuputuanga? (ng) angaanga tutuanga?

⁹ Kua akakite mai te apotetoro ko Paulo e ka rauka i te au Kerititiano te akapumaana i tetai e tetai na roto “i to tatou akarongo.” (Roma 1:12) Eaa te aiteanga o te reira? Me akapou tatou i te taime ki to tatou au taeake e te au tuaine, ka akaketaketaia te akarongo o tetai e tetai. E mea tika tikai teia me akapouia to tatou taime ki te aronga tei “timata” ia ana to ratou akarongo. (Iakobo 1:3) E akakore ana te au oa kino i to tatou akarongo, inara e akamatutu ana te au oa meitaki i te reira. (1 Korinetia 15:33) Ko te tumu tera i akoia tatou kia aere ua rai ki te au uipaanga. Ka rauka i reira ia tatou i te “akamaroiroi” ua rai i tetai e tetai. (E tatau ia Ebera 10:24, 25) Ka riro katoa te au ikuikuanga no ko mai i te au uipaanga ei akaketaketa i to tatou akarongo. Te karanga ra te Pipiria e “na te kite mari e raukaʼi te akarongo.” (Roma 10:17) No reira e ui kia koe uaorai, ‘E angaanga matau ainei naku i te aere putuputu ki te au uipaanga?’

¹⁰ Ka akaketaketa katoaia to tatou akarongo me tutu aere tatou e te apii i te tuatua meitaki o te Pipiria ki tetai ke. Mei te au Kerititiano mua rai, ka rauka ia tatou i te irinaki kia Iehova e te tuatua ma te ngakau toa i roto i tetai ua atu atianga.​—Angaanga 4:17-20; 13:46.

11. Eaa ra te akarongo o Kaleba raua ko Iosua i ketaketa ai, e akapeea tatou me aru i to raua tu?

¹¹ Ka maata atu to tatou akarongo no Iehova me kite tatou akapeea aia i te tauturu mai anga e te pau anga i ta tatou pure. Ko te reira tei tupu kia Kaleba raua ko Iosua. Kua akaari raua i te akarongo ki roto ia Iehova i te tutaka anga raua i te Enua Taputouia. I te tuatau i aereia mai, kua ketaketa atu to raua akarongo i te au taime ravarai te kite anga i ta Iehova tauturu anga ia raua. Kua rauka ia Iosua  i te akakite ki to Iseraela e: “Kare rava tetai o te au mea meitaki ta to kotou Atua ta Iehova i tuatua mai ia kotou i poka.” Kua tuatua aia i muri mai e: “E tenana, e mataku kotou ia Iehova, e e akamori oki iaia ma te pikikaa kore, e ma te tuatua-mou.” E kua akakite katoa aia e: “Kareka au e toku ra ngutuare, e akamori ïa matou ia Iehova.” (Iosua 23:14; 24:14, 15) Me irinaki tatou ki roto ia Iehova e kia kite e akapeea aia i te tauturu anga ia tatou tataki tai, ka ketaketa atu to tatou akarongo.​—Salamo 34:8.

12. Akapeea tatou te akaari anga e e akarongo ketaketa to tatou?

¹² Akapeea tatou te akaari anga e e akarongo ketaketa to tatou? Karanga te pipi ko Iakobo e: “Ka akakite atu ei au ia koe i toku nei akarongo i taku nei angaanga.” (Iakobo 2:18) Ka akaari ta tatou angaanga e e akarongo ketaketa to tatou. Ka akara tatou akapeea.

13. Akapeea tatou te akaari anga i to tatou akarongo me tutu aere?

¹³ Ko te angaanga tutu aere tetai ravenga meitaki rava kia akaari i to tatou akarongo. No teaa ra? No te mea me tutu aere tatou, te akaari ra e te irinaki ra tatou te vaitata maira te openga e kare te reira “e tavarevare.” (Habakuka 2:3) E kite ei me e ketaketa rai to tatou akarongo, e ui kia tatou uaorai: ‘Mei teaa te puapinga o te tutu aere kiaku? Te rave ra ainei au i te au mea taku i rauka i te akakitekite ki tetai ke no runga i te Atua? Te kimi ra ainei au i te ravenga kia maata atu taku ka rave i te tavini ia Iehova?’ (2 Korinetia 13:5) Ka tau tatou kia akaari i to tatou akarongo maroiroi e kia “aaki te tuatua e kia rauka atu te ora,” koia oki na te tutu aere anga i te tuatua meitaki.​—E tatau ia Roma 10:10.

14, 15 (a) Akapeea tatou me akaari i te akarongo i to tatou oraanga i te au rā? (e) Akakite mai i tetai tupuanga te akaari ra i te akarongo ketaketa.

 ¹⁴ Ka akaari katoa tatou i te akarongo kia Iehova ia tatou e akakoromaki ra i te au akaaoanga o te oraanga i teianei ao. Me e putaua tatou, e maki, kare e maroiroi, e kua taitaia, me kore e manamanata ke atu to tatou, kia irinaki ia Iehova e Iesu kia “tauturu mai ia tatou i te tuatau e tau ei ra.” (Ebera 4:16) Ka akaari tatou i te akarongo i roto ia Iehova me pati tatou no tana tauturu. Kua akakite mai a Iesu e ka rauka ia tatou i te pati ia Iehova e “o mai i te kai e tau ia matou i tera rā i tera rā.” (Luka 11:3) Te akapapu maira te au papaanga Pipiria e ka rauka ia Iehova i te oronga mai i te au mea ravarai ta tatou e anoano ra. Ei akaraanga, i te tuatau marō i Iseraela, kua oronga a Iehova i te kai e te vai na Elia. Te karanga ra te Pipiria e “kua apai maira te orebi i te areto e te puaka i te popongi, e te areto e te puaka i te aiai; e kua inu ua aia i taua kauvai ra.” (1 Ariki 17:3-6) E akarongo katoa to tatou e ka oronga mai a Iehova i te au mea ravarai ta tatou e anoano ra.

¹⁵ Te papu ra ia tatou e me taangaangaia te au kaveinga Pipiria, ka rauka ia tatou i te akono i te au anoano o te ngutuare tangata. Akamārama mai a Rebecca, e tuaine akaipoipoia i Asia e akapeea ratou ko tona ngutuare tangata i te taangaanga anga i te nga kaveinga ia Mataio 6:33 e Maseli 10:4. Karanga aia e kua manako tana tane e kua riro tana ngai angaanga ei takino i to raua pirianga kia  Iehova. No reira kua akaruke aia i tana ngai angaanga. Inara e tokoʼa a raua tamariki e akono ra, no reira kua akamata ratou i te tunu kai ei oko. Tei tupu no ta ratou angaanga pakari, kua rava rai ta ratou moni ei akono i te au anoano o te ngutuare tangata. Karanga aia e: “Kua kite matou e kare rava a Iehova i akaruke ana ia matou. Kare okotai kaikai anga i kore ana.” E tupuanga ainei toou mei teia rai tei akaketaketa i toou akarongo?

16. Eaa te ka tupu me irinaki tatou i te Atua?

¹⁶ Auraka rava tatou e ekoko me aruia te aratakianga a Iehova, ka tauturu mai aia ia tatou. Kua taiku a Paulo i te au tuatua a Habakuka i te na ko anga e: “Ko te tangata tuatua-tika i te akarongo ra, e ora ïa.” (Galatia 3:11; Habakuka 2:4) No reira, kia rauka ia tatou te akarongo ketaketa ki roto i Tei tauturu tikai ia tatou. Te akamaara maira a Paulo kia tatou e ko te Atua tei “maata ua atu tana kia rave i te au mea katoa ta tatou e pati nei, e ta tatou e manako nei, i te mana i ririnui i roto ia tatou nei.” (Ephesia 3:20) Ka rave te au tavini o Iehova i te au mea pouroa kia akono i te anoano o te Atua, inara kua kite katoa ratou i to ratou au kotinga. Te rekareka tikai nei tatou e tei ia tatou te Atua e te akameitaki maira aia i ta tatou au tautaanga.

17. (a) Akapeea a Iesu te pau anga i te au apotetoro? (e) Eaa tatou ka tapapa atu ei e ka pau mai a Iehova i ta tatou patianga kia akamaata i te akarongo?

¹⁷ Mei ta tatou i uriuri mai ana, penei ka manako tatou mei te au apotetoro rai i te pati anga ratou kia Iesu e: “E akamaata mai i to matou akarongo.” (Luka 17:5) Kua pau mai a Iesu i tana au apotetoro na roto i te ravenga takake ia Penetekote 33, te rauka anga ia ratou te vaerua tapu e kua mārama oonu atu i te akakoroanga o te Atua. Kua akaketaketa teia i to ratou akarongo. Eaa tei tupu? Ko te angaanga tutu aere maata rava atu teia ta ratou i akamata e tae atu ki te reira tuatau. (Kolosa 1:23) Ka tapapa atu ainei tatou e ka pauia mai ta tatou patianga kia akamaata i to tatou akarongo? Kua taputou mai a Iehova e ka rauka ia tatou i te rave i te reira me “pati ua atu tatou i te au mea ravarai i tau iaia ra.”​—1 Ioane 5:14.

18. Akapeea a Iehova i te akameitaki anga i te aronga tei akamatutu i to ratou akarongo?

¹⁸ Me irinaki pu tikai tatou ia Iehova, ka mareka aia ia tatou. Ka pau mai aia i ta tatou patianga kia akamaata i te akarongo, ka ketaketa to tatou akarongo, e ka riro tatou ei aronga “tau i te basileia o te Atua.”​—2 Tesalonia 1:3, 5.