I TOKU iva mataiti anga, kua akamutu au i te tupu. I teia rā e 43 oku mataiti, e tai rai oku mita te roa. Te kite anga toku nga metua e kare au e tupu akaou, kua akamaroiroi raua iaku kia angaanga pakari kia kore au e manako ua atu i toku tu poto. Ei tavarenga iaku, kua akanoo au i tetai kaingakai okooko ua rakau i mua i to matou are e kua akamanea ua i te reira. Kua tapae mai te au tangata i te oko i te reira.

E tika, kare te angaanga pakari i riro ana ei taui i teia au mea. Te poto ra rai au, e e āka angaanga iaku i te rave i te au mea māmā ua o te oraanga, no te teitei o te paata okooko o te are toa. Mei te mea e kua maaniia te au mea ravarai no te aronga roroa. Kua tangi au iaku uaorai, inara kua taui te reira i toku 14 mataiti anga.

I tetai rā, kua oko tetai nga vaine Au Kite o Iehova i taku ua rakau e kua oronga mai i tetai apii Pipiria naku. Kare i roa kua kite mai au e e mea puapinga rava atu te kite ia Iehova e tona akakoroanga i toku tu poto. Kua riro te reira ei tauturu maata iaku. Kua riro mai a Salamo 73:28 ei irava reka tikai naku. Te karanga ra te tuanga mua o te irava e: “E mea meitaki ra iaku kia akavaitata atu ki te Atua.”

Kare i roa ana kua neke toku ngutuare tangata mei Côte d’Ivoire ki Burkina Faso, e kua taui maata toku oraanga. I toku ngai nooanga mua, kua matau ua te tangata i te kite iaku e tu ua ra i te pae i te kaingakai okooko ua rakau. Inara i toku ngai nooanga ou, e tangata tuke takiri au. Kua akara matariki ua te tangata iaku, no reira kua noo ua au ki te kainga no tetai tuatau roa. I reira, kua maara iaku e mei teaa ra te meitaki i te akavaitata atu kia Iehova. Kua tata au ki te opati manga o te Au Kite o Iehova e kua tono mai ratou i tetai vaine tau tikai. Kua aere mai a Nani, e mitinari i te atoro iaku na runga i tona patikara matini.

E patere ana te mataara oneone i to matou ngai nooanga e i te tuatau ua, e te varivari tikai. E topa putuputu ana a Nani mei tona patikara me aere mai i te apii iaku e kare aia i tuku i te au. I tetai rā, kua pati mai aia iaku kia aru iaia ki te au uipaanga. I reira au i kite ei e ka rauka iaku i te akaruke i toku kainga e ka akakoromaki i te akara matariki a te au tangata. Ei kapiti atu, me aru au na runga i te patikara ka teiaa atu te reira e ka āka angaanga i te akaoro. Noatu rai kua akatika au, te akamaara anga i te tuanga rua o taku irava inangaroia: “Kua irinaki au i te Atu ra, ia Iehova.”

 I tetai au taime kua inga maua ko Nani ki roto i te vari, kare ra maua i kea atu ana no te mea kua reka maua i te au uipaanga. Mei teaa atura te tuke i rotopu i te au mata katakata taku i kite i roto i te Are Uipaanga Patireia e te aronga akara matariki i vao! E iva marama i muri mai, kua papetitoia au.

Te tuanga toru o taku irava inangaroia “kia akakite rai au i taau katoa ra au angaanga.” Kua kite au e ko te angaanga tutu aere toku akaaoanga maata rava atu. Te maara nei rai iaku toku taime mua i te tutu aere anga mei tera are ki tera are. Kua akara matariki mai te tamariki e te aronga mamaata iaku, kua aru aere iaku, e kua kata aviri i taku aere. Kua mamae tikai au, inara i toku akamanako anga e te anoano ra ratou i te Parataito mei iaku rai, kua rauka iaku te akakoromaki.

Ei akamāmā mai i te au mea, kua rauka iaku tetai patikara e toru auira na te rima e akatere ana. Kua opara toku patana tutu aere iaku ki te ngai teitei e oti kua rere ki runga i te patikara ia maua e tere viviki ra ki raro. Noatu e i te akamata anga kua riro te angaanga tutu aere ei akaaoanga, kare i roa kua mataora tikai au i te reira e i te 1998 kua riro mai au ei painia tamou.

E maata taku au apii Pipiria i rave, e e ā aronga apiiia i papetitoia. Kapiti atu, kua āriki katoa tetai o toku uaorai teina i te tuatua mou! Te rongo anga au e akapeea tetai pae i te tere anga ki mua, kua riro teia ei akamaroiroi tikai iaku. I tetai rā te tu anga au i te maki mariri, kua tae mai tetai reta no Côte d’Ivoire mai. Kua akamata au i tetai apii Pipiria i te ngutupa o tetai tamaiti apii teitei i Burkina Faso e kua oronga atu i te reira ki tetai taeake kia akono. I muri mai kua neke te tamaiti apii teitei ki Côte d’Ivoire. Mataora tikai au te akarongo anga e kua riro mai aia ei papuritia kare i papetitoia!

Akapeea au i te akono anga iaku uaorai? Kua tauturu tetai akaaerenga no te aronga pakipakitai kia apii iaku i te tui kakau. Kua akara mai tetai vaine apiipii i toku tu angaanga e kua tuatua e: “E tano ei e apii tatou ia koe kia maani puʼa.” Kua pera rai ratou. I teianei e maani ana au i te puʼa kakau e te puʼa pai i te kainga. E reka ana te tangata i taku puʼa e kua akakitekite i te reira ki tetai ke. Naku rai e kave ana i te reira na runga i toku patikara matini e toru auira.

E mea tangi ra, i te 2004, kua akamutu au i te painia no te pakari tikai te mamae i toku mokotua. Inara te aere putuputu nei rai au i te angaanga tutu aere.

Karanga te tangata e e kite matauia ana au no toku tu katakata. E tumu anga mataora toku no te mea e mea meitaki iaku kia akavaitata atu ki te Atua.​—Akakiteia e Sarah Maiga.