MEI te 1992 mai, kua akanoo te Pupu Akaaere i te aronga pakari tukatau ei tauturu i te au kumiti kia akaoti i ta ratou angaanga. * (Akara i te tataanga rikiriki i raro.) Teia au tauturu, e au mema ratou no te “mamoe ke atu,” tei oronga i te turuturu anga puapinga ki te Pupu Akaaere. (Ioane 10:16) E aere ana ratou ki te au uipaanga epetoma a te kumiti tei akanooia ratou ki roto. Ta ratou angaanga ko te oronga i te akakitekiteanga tei anoanoia e kia oronga i te manako tauturu. Na te Pupu Akaaere te tukuanga openga, e na te au tauturu e akapapu kia oti meitaki te angaanga. Te puareinga ua nei teia au taeake i te rave i tetai ua atu angaanga tei orongaia kia ratou. Ka aru ratou i te au mema Pupu Akaaere i te teretere atu ki te au uruoaanga takake e to te pa enua. Penei ka tukuia ratou kia atoro i te au opati manga ei au komono no te opati maata.

Kua karanga tetai taeake tei tavini ana ei tauturu mei te 1992 mai e: “Me akono au i taku tuanga angaanga, ka rauka i reira i te Pupu Akaaere i te angaanga maata atu ki runga i te au mea pae vaerua.” Kua karanga tetai taeake tei tavini ei tauturu no tetai 20 mataiti e, “E akameitakianga maata atu teia i taku i manako.”

E āka apainga ta te Pupu Akaaere i oronga ki te au tauturu e te āriki rekareka ra ratou i te angaanga maata a teia au taeake akono meitaki. “E mei iaia ra te tu, kia manako meitakiia” teia au taeake e tatou.​—Philipi 2:29.