1. Mei teaa te puapinga o te angaanga tutu aere kia Iesu? Akamārama mai.

KUA reka tikai a Iesu i te tuatua no runga i te Patireia o te Atua. Ia Iesu i te enua nei, kua tuatua maata aia no runga i te Patireia. Kua taiku aia i te Patireia e tere atu i te 100 taime i roto i tana angaanga tutu aere. E puapinga tikai te Patireia kia Iesu.​—E tatau ia Mataio 12:34.

2. Eia aronga tei rongo i te akaueanga i roto ia Mataio 28:19, 20, e no teaa ra tatou ka karanga ai i te reira?

² I muri ake i to Iesu tuakaouanga, kua aravei aia i tetai pupu e tere atu i te 500 pipi. (1 Korinetia 15:6) Penei ko te taime teia i oronga ai a Iesu i te akaueanga no te tutu aere ki “to te pa enua.” Kare teia i te angaanga māmā ua. * (Akara i te tataanga rikiriki i raro.) Kua akakite aia kia ratou e ka raveia te  angaanga tutu aere no tetai tuatau roa, e tae ua atu ki “te openga o teianei ao.” Me tutu aere koe i te nuti meitaki i teia tuatau, te tauturu nei koe i te akatupu i teia totou.​—Mataio 28:19, 20.

3. Eaa te au mea e toru tei tauturu ia tatou kia tutu aere i te nuti meitaki?

³ I muri ake i to Iesu oronga anga i te akaueanga kia tutu aere, karanga aia e: “Tei vaitata ua ra au ia kotou.” (Mataio 28:20) No reira kua taputou a Iesu ki tana au pipi e nana e arataki i te angaanga tutu aere e ka tauturu aia ia ratou kia tutu ki teianei ao e pini ua ake. Tei ia tatou katoa a Iehova. Kua oronga mai aia i “te au angaanga memeitaki katoa” ei tauturu ia tatou i te tutu aere. (Ebera 13:20, 21) I roto i teia atikara, ka uriuri tatou e toru au mea memeitaki: (1) te au apinga tauturu tei orongaia mai kia tatou, (2) te au ravenga ta tatou i taangaanga, e te (3) te terenianga tei orongaia mai kia tatou. Te mea mua, ka uriuri tatou i tetai o te au apinga tauturu tei taangaangaia i te 100 mataiti i topa.

4. Akapeea te au apinga tauturu tukeke e manganui te tauturu anga ia tatou i roto i te angaanga tutu aere?

⁴ Kua akaaite a Iesu i te karere Patireia ki te ua tei tanuia i roto i te au ngai one tukeke. (Mataio 13:18, 19) Ei akapapa i te one, e maata te au apinga tauturu ta te tangata tanutanu e taangaanga ana. Na teia tu katoa, kua oronga mai to tatou Ariki i te au apinga tauturu kia taangaanga tatou ei tauturu i te tangata kia āriki i ta tatou karere. Kua puapingaia tetai au apinga tauturu no tetai tuatau poto ua, e ko tetai pae te taangaangaia nei rai i teia tuatau. Inara kua riro teia au apinga tauturu pouroa ei tauturu ia tatou kia akamaata atu i to tatou au tu karape no te tutu aere.

5. Eaa te kati akakiteanga, e akapeea te reira te taangaangaia anga?

⁵ I te 1933, kua akamata te au papuritia i te taangaanga i te kati akakiteanga, e apinga tei tauturu i te manganui kia akamata i te tutu aere. E kati meangiti te reira ma te karere Pipiria poto ua. I tetai taime ka neneiia tetai kati ou ma te karere ou. Te Taeake ko Erlenmeyer, e tai ngauru ona mataiti te taangaanga anga i tetai kati akakiteanga no te taime mua. Akamārama aia: “Te tuatua akamata anga, ‘E tatau mai koe i teia kati ine?’ Me oti te tangata ngutuare i te tatau i te kati, ka oronga matou i te puka i mua ake ka aere ei.”

6. Akapeea te kati akakiteanga i te riro anga ei tauturu i te au papuritia?

⁶ Kua riro te au kati akakiteanga ei tauturu i te au papuritia na roto i te au mataara ke ke. Ei akaraanga, e akama ana tetai au papuritia noatu kua inangaro tikai ratou i te tutu aere, e kare ratou i kite i ta ratou ka tuatua. Tetai au papuritia e ngakau toa to ratou. Ka akakite ratou ki te tangata ngutuare te au mea ravarai ta ratou i kite i nga miniti ua, inara te maata anga o te taime kare ta ratou tuatua e maru ana. Kua tauturu te kati akakiteanga i te au papuritia kia oronga i tetai karere poto ua e te taka meitaki.

7. Eaa tetai au akaaoanga no te kati?

 ⁷ Inara e au akaaoanga katoa tetai. Karanga te tuaine ko Grace Estep e: “I tetai au taime, ka uiia mai kia matou e, ‘Eaa ta tera e karanga ra? Kore koe e akakite mai i te reira?’” Pera katoa, kare tetai au tangata ngutuare e kite i te tatau i te kati. Tetai pae kua apai i te kati e kua topiri mai i te pa. Kare tetai pae i reka ana i ta matou karere, no reira kua vetevete ratou i te kati. Noatu ra te au akaaoanga, kua riro te au kati akakiteanga ei tauturu i te au papuritia kia tutu aere ki to ratou tangata tupu e kia kiteaia ei aronga tutu aere i te Patireia.

8. Akapeea te ponokarapa apai aere i te taangaanga angaia? (Akara i te tutu mua o teia atikara.)

⁸ Tetai atu apinga tauturu tei taangaangaia i muri ake i te 1930 ko te ponokarapa apai aere. Kua kapiki te Au Kite i te reira ko Aarona no te mea na te matini e tuatua kare na ratou. (E tatau ia Exodo 4:14-16.) Me inangaro te tangata ngutuare i te tuatua, ka akatangi te papuritia i tetai ako Pipiria poto ua e oti ka oronga i tetai puka. I tetai taime, ka taokotai mai te au ngutuare tangata katoatoa no te akarongo i te ako! I te 1934, kua akamata te Watch Tower Society i te maani i te au ponokarapa apai aere no te angaanga tutu aere. I muri akera, kua rekoti te au taeake e 92 ako ke ke.

9. Mei teaa te puapinga o te ponokarapa apai aere?

⁹ I te rongo anga a Hillary Goslin i tetai o te au ako anga, kua apai aia i te ponokarapa no tetai epetoma kia oronga i te karere Pipiria ki tona au tangata tupu. Tei tupu, e manganui te tangata tei inangaro i te tuatua mou e kua papetitoia. I muri akera, kua aere te nga tamaine a te Taeake ko Goslin ki te Apii Gileada e kua riro mai ei nga mitinari. Mei te kati akakiteanga rai, ka tauturu te ponokarapa apai aere i te au papuritia e manganui kia akamata i te tutu aere. I muri mai, na roto i te Apii Orometua Teokaratiki, ka tereni te Ariki i tona iti tangata kia riro ei au puapii meitaki.

10, 11. Akapeea te nutipepa e te ratio i te taangaanga angaia ei tutu aere i te nuti meitaki, e no teaa ra te reira au ravenga i meitaki ei?

¹⁰ I raro ake i te arataki anga a to tatou Ariki, kua taangaanga te iti tangata o te Atua i te au ravenga ke ke kia itae i te au tangata e manganui i roto i te angaanga tutu aere. E puapinga tikai teia au ravenga i te mea e iti ua te aronga angaanga. (E tatau ia Mataio 9:37.) Ei akaraanga, i te au mataiti i topa, kua taangaangaia te nutipepa ei tutu aere i te nuti meitaki. I te epetoma tataki tai kua tuku te Taeake ko Russell i tetai ako Pipiria ki tetai opati tata nuti. E oti, kua tuku ratou i tana ako anga ki te au nutipepa i Kanata, Europa, e Marike. I te tae anga ki te 1913, kua neneiia te au ako anga a te Taeake ko Russell i roto i te 2,000 nutipepa e kua tatauia e te 15,000,000 tangata!

 ¹¹ Kua taangaanga meitaki katoaia te ratio ei tutu aere i te nuti meitaki. Ia Aperira 16, 1922, kua oronga te Taeake ko Rutherford i tana ako anga mua na runga i te ratio, mei te 50,000 tangata tei akarongo. Kare i roa, kua akamata matou i te taangaanga i ta matou uaorai ratio tei kapikiia ko te WBBR, e kua rongoia te porokaramu mua i roto ia Peperuare 24, 1924. Karanga te Watch Tower o Titema 1, 1924 e: “Te irinaki nei matou e ko te ratio te ravenga meitaki roa atu e te māmā tei taangaangaia ei akatotoa i te karere o te tuatua mou.” Mei te au nutipepa rai, kua tauturu te ratio ia matou kia itae i te manganui o te tangata i te au ngai e iti ua te au papuritia.

12. (a) Eaa te au tutu anga i te ngai tangata taau e reka tikai ra? (e) Eaa te ka tauturu ia tatou kia autu i tetai ua atu tu mataku i te tutuanga i te ngai tangata?

¹² Ko te tutuanga i te ngai tangata tetai akaou ravenga te taangaangaia nei kia itae i te tangata i teia tuatau. E maata atu te au ravenga tei raveia kia tutu aere ki te tangata i te au ngai tapae anga bus, te au ngai tiaki anga rerue, te au ngai paka anga, te au ngai tangata, e te au makete. E ru ana ainei koe i te tutu aere i te ngai tangata? Me koia ia, e pure no te tauturu e e tamanako i ta te Taeake ko Manera, e akaaere tutaka i karanga e: “Kua akara matou i te au ravenga ou no te tutu aere ei ravenga kia tavini ia Iehova, ei akapapu i to matou tiratiratu kiaia, ei timata  anga i to matou tu tika, e te aruaru kia akapapu e kua puareinga ua matou i te tavini iaia na tetai ua atu tu tana ka pati mai.” Me autu tatou i te tu mataku ma te taangaanga i te au ravenga ou no te tutu aere, ka akaketaketaia to tatou irinaki kia Iehova e ka riro ei aronga meitaki atu i te tutu aere.​—E tatau ia 2 Korinetia 12:9, 10.

13. No teaa ra ta tatou website i riro ei e ravenga meitaki i roto i te angaanga tutu aere, e eaa te au tupuanga taau i kite mai?

¹³ E manganui te au papuritia e reka ra i te akakite aere ki te tangata i ta tatou website, jw.org, te ngai ka tatau e ka kopi ratou i te au puka Pipiria e tere atu i te 700 reo. I te au rā tataki tai, tere atu i te 1.6 mirioni tangata tei atoro i ta tatou website. I mua ana, kua itae te ratio i te tangata ki te nuti meitaki i te au ngai mamao. I teia rā, te pera katoa ra ta tatou website.

14. Eaa te terenianga ta te au papuritia e anoano ra, e eaa te apii tei tauturu ia ratou kia riro mai ei au puapii meitaki?

¹⁴ Te au apinga tauturu e te au ravenga ta tatou i uriuri kua puapinga meitakiia. Inara, kua anoanoia te au papuritia i tera tuatau kia tereniia akapeea me riro mai ei au tavini tutu aere. Ei akaraanga, i tetai taime kare te tangata ngutuare e akatika ki tana i rongo i runga i te ponokarapa. Tetai atu taime kua inangaro te tangata ngutuare i te apii kia maata atu. Kua anoanoia te au papuritia kia kite e akapeea me autu i te au patoi anga ma te maru e akapeea kia riro ei puapii meitaki. Kare e ekoko e ma te tauturu a te vaerua tapu o te Atua, kua kite te Taeake ko Knorr e e puapinga no te au papuritia kia apii akapeea me tuatua i te ngai tutu aere. No reira akamata i te 1943, kua akaaere te au putuputuanga i te Apii Orometua Teokaratiki. Na teia apii i tauturu i te katoatoa kia riro mai ei puapii meitaki.

15. (a) Eaa ta tetai pae i kite i te oronga anga i tetai ako i roto i te Apii Orometua Teokaratiki? (e) Akapeea ta Iehova taputou i roto ia Salamo 32:8 te akapapu anga i toou turanga?

¹⁵ E manganui te au taeake kare e matau ana i te tuatua ki mua i te tangata. Kua maara i te Taeake ko Ramu i tana ako mua i te mataiti 1944. No runga tana ako i te tangata ko Doega i roto i te Pipiria. Karanga aia e: “Ruketekete toku nga turi, ru toku nga rima, e kua katikati toku nio.” Karanga katoa aia: Ko toku taime mua te reira te tuatua anga ki runga i te paata, e kare au i akamutu ana.” Noatu e kare i te mea ngoie ua, kua oronga katoa te tamariki i te ako. Kua maara i te Taeake ko Manera i tei tupu te oronga anga tetai tamaiti i tana ako mua: “Kua ru tikai aia e i te akamata anga tana ako kua akamata aia i te aue. Inara no tona  inangaro i te oronga i te reira, kua aue ua atu aia i roto i tana ako.” Penei kare koe e paupau ana i ko i te au uipaanga me kore e piri atu ki roto no te mea e akama koe me kore kare e rauka ia koe i te rave i te reira. Me koia ia, e pati tauturu kia Iehova kia autu i toou mataku. Ka tauturu mai aia ia koe mei tana i tauturu i te aronga i te Apii Orometua Teokaratiki i mua ana.​—E tatau ia Salamo 32:8.

16. Eaa te akakoroanga o te Apii Gileada (a) i mua ana e te (e) mei te 2011 mai?

¹⁶ Kua oronga katoa mai te akaaereanga a te Atua i te terenianga na roto i te Apii Gileada. Tetai akakoroanga o te apii koia oki te tauturu i te aronga apii kia akaketaketa i to ratou anoano no te tutu aere i te nuti meitaki. Kua akamata te Apii Gileada i te 1943, e mei reira mai, e 8,500 aronga apii tei tereniia e kua tukuia ki te 170 enua. Mei te 2011 mai, te aronga tei patiia ki teia apii e au painia takake, e au akaaere tutaka, e aronga Betela, e te au mitinari tutu aere tei kore i tae ki Gileada.

17. Mei teaa te puapinga o te terenianga Gileada?

¹⁷ Kua puapinga ainei te Apii Gileada? Ae. Ka tamanako ana i tei tupu i Tiapani. Ia Aukute 1949, e iti ake i te tai ngauru papuritia i te reira enua. Inara te tae anga ki te openga o te reira mataiti, e 13 mitinari e tutu kapiti ra ki te au papuritia o te reira ngai. I teia rā, e 216,000 papuritia i Tiapani, vaitata rai e apa ia ratou e au painia!

18. Eaa atu tetai o ta tatou au apii?

¹⁸ E maata ta tatou au apii ke, mei te Apii Orometua Patireia, te Apii Tavini Anga Painia, te Apii na te Aronga Tutu Evangelia, te Apii na te au Akaaere Kotinga e ta Ratou Vaine, e te Apii na te au Mema o te Kumiti Manga e ta Ratou Vaine. Kua tereni meitaki teia au apii i te au taeake e te au tuaine e kua akaketaketa i to ratou akarongo. Te taka meitaki ra ta Iesu tereni ua anga i te tangata e manganui.

19. Eaa ta te Taeake ko Russell i karanga no runga i te angaanga tutu aere, e akapeea teia te tupuanga?

¹⁹ Kua tutara te Patireia o te Atua e tere atu i te 100 mataiti i teianei. I te reira tuatau, kua arataki to tatou Ariki ko Iesu Karaiti i te angaanga tutu aere. I te 1916, irinaki te Taeake ko Russell e ka tupu maata atu te tutu anga nuti meitaki ki teianei ao e pini ua ake. Karanga aia e: “Te tupu viviki ra te angaanga, e ka tupu ua atu rai, no te mea e angaanga tetai ka raveia i teianei ao katoa ko te tutuanga i te ‘evangeria o te patireia.’” (Faith on the Mati, na A. H. Macmillan, kapi 69) Te raveia ra te reira angaanga i teia rā! Te akameitaki nei matou ia Iehova, te Atua o te au, tei oronga mai i te au mea ravarai ta tatou i inangaro kia rave i tona anoano!