1, 2. Akapeea te au irava i te akaari anga i te puapinga o te aroa?

KO TE aroa te tu maata roa atu o te Atua ko Iehova. (1 Ioane 4:16) Ko Iesu Karaiti, tana i anga mua, kua pou e pirioni ua atu mataiti i te rangi ma tona Metua e te kite anga e Atua aroa a Iehova. (Kolosa 1:15) Kua akaari a Iesu i taua tu aroa i tona oraanga katoa, i te rangi e te enua nei. No reira ka rauka ia tatou i te akapapu e ka tutara ua rai a Iehova e Iesu ma te tu aroa.

² Te ui anga tetai kia Iesu eaa te akaueanga maata roa atu, karanga a Iesu e: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata. E mei te reira katoa ra te rua, ‘E aroa atu koe i toou tangata tupu mei te aroa ia koe uaorai.’”​—Mataio 22:37-39.

3. Koai to tatou “tangata tupu”?

³ E puapinga no tatou kia akaari i te aroa i te au pirianga  katoatoa. Karanga a Iesu kia aroa tatou ia Iehova e to tatou tangata tupu. Inara koai to tatou “tangata tupu”? Me kua akaipoipo tatou, to tatou tangata tupu vaitata roa atu ko ta tatou tane me kore vaine. Kapiti mai ki to tatou tangata tupu ko te au taeake e te au tuaine i roto i te putuputuanga, pera katoa te aronga ta tatou ka aravei i te ngai tutu aere. I roto i teia atikara, ka apii tatou akapeea me akaari i te aroa ki to tatou tangata tupu?

4. Akapeea te oraanga akaipoipo te autu anga noatu te tu apa ua o te tangata?

⁴ Kua anga a Iehova ia Adamu e Eva e kua kapiti ia raua roa ai ei tokorua. Ko te reira te akaipoipoanga mua. Kua inangaro te Atua ia raua kia rauka tetai oraanga akaipoipo mataora e kia akaki i te enua ki ta raua tamariki. (Genese 1:27, 28) Inara, i muri ake i to raua akarongo kore anga kia Iehova, kua takinoia to raua oraanga akaipoipo, e kua iri mai te ara e te mate kia tatou katoatoa. (Roma 5:12) Noatu te reira, ka autu rai te oraanga akaipoipo i teia tuatau. I roto i te Pipiria, kua oronga mai a Iehova, Tei akamata i te akaipoipo, i te ako anga meitaki roa atu ki te au tane e te au vaine.​—E tatau ia 2 Timoteo 3:16, 17.

5. Eaa te puapinga o te aroa i roto i te oraanga akaipoipo?

⁵ Te akaari maira te Pipiria e puapinga maata te aroa maana e te maru no te pirianga mataora. E tika teia i roto i te oraanga akaipoipo. Te akataka maira te apotetoro ko Paulo i te aroa ngakau tae i tona karanga anga e: “E akakoromaki anga roa to te aroa, e te takinga-meitaki; kare te aroa e vareae, kare te aroa e akamaata, kare oki e akatietie, Kare e rave i te mea tau kore, kare e kimi i te meitaki nona uaorai, kare e riri vave, kare e manako kino ia etai ke; Kare e rekareka i te tuatua-tika kore, e rekareka ra i te tuatua-mou; E tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa. Kare ua te aroa e kore.” (1 Korinetia 13:4-8) Me akamanako tatou i ta Paulo au tuatua e te taangaanga i te reira, ka mataora te oraanga akaipoipo.

6, 7. (a) Eaa ta te Pipiria e karanga ra no runga i te upoko? (e) Akapeea tetai tane Kerititiano te akono anga i tana vaine?

⁶ Kua iki a Iehova i te upoko o te ngutuare tangata. Akamārama mai a Paulo e: “Teia ra toku inangaro, kia kite kotou e, ko te Mesia te upoko o te tangata ravarai nei; e to te vaine ra upoko, ko te tane ïa; e to te Mesia upoko, ko te Atua ïa.” (1 Korinetia 11:3) Te anoano ra a Iehova i te tane ei upoko aroa, auraka ra e māro e te kino. E Upoko takinga meitaki a Iehova e te maru. Tei tupu, te akangateitei ra a Iesu i te mana taoonga o te Atua. Kua karanga aia e: “Te anoano nei au i te Metua.” (Ioane 14:31) Kare a Iesu e manako akapera naringa a Iehova i akakino iaia.

⁷ Noatu ko te tane te upoko o te vaine, te akakite ra te Pipiria kiaia kia akangateitei i te vaine. (1 Petero 3:7) Akapeea te tane me rave i te reira? Ka akamanako aia i te au anoano o tana vaine e ka akangateitei i tana e  inangaro ra. Karanga te Pipiria: “E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko.” (Ephesia 5:25) Ae, kua oronga a Iesu i tona oraanga no tana au pipi. Me e upoko aroa te tane mei ia Iesu rai, ka ngoie ua i te vaine kia aroa, te akangateitei e te āriki i tana au ikianga.​—E tatau ia Tito 2:3-5.

8. Akapeea tatou me manako i to tatou au taeake e te au tuaine?

⁸ I teianei, e mirioni ua atu tangata takapini i teianei ao e akamori ra ia Iehova. Ko ratou to tatou au taeake e te au tuaine. Eaa ta tatou ka manako no runga ia ratou? Karanga te Pipiria e: “E takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10; e tatau ia Roma 12:10.) Kua tata te apotetoro ko Petero na to tatou “akarongo anga i te tuatua mou” e akatupu tikai i te “aroa taeake.” Akakite katoa a Petero ki tona au taeake Kerititiano e: “Ko te aroa rai, kia maata tikaia ïa ia kotou uaorai.”​—1 Petero 1:22; 4:8.

9, 10. No teaa ra i taokotai ei te iti tangata o te Atua?

⁹ E mea umere tikai ta tatou akaaerenga i  te ao katoa. No teaa ra? No te mea e aroa oonu e te ngakau tae to tatou no te au taeake e te au tuaine. Tei puapinga maata atu, no te inangaro ia Iehova ma te aru i tana au ture, te turu nei aia ia tatou na roto i te mana ririnui roa atu i teianei ao e pini ua ake koia oki tona vaerua tapu. Tauturu to te Atua vaerua ia tatou ei taokotaianga taeake tikai i te ao katoa.​—E tatau ia 1 Ioane 4:20, 21.

¹⁰ Akaketaketa a Paulo i te anoano o te aroa i rotopu i te au Kerititiano i tona tataanga e: “Ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia, e te ikiia e te Atua ra: E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou. E ei runga ravao i taua au mea katoa nei e kakau na i te aroa, ko taua tatua apa kore ua ra ïa.” (Kolosa 3:12-14) Mei teaa atura to tatou akameitaki “ko taua tatua apa kore ua rai ïa” ko te aroa te vaira i rotopu ia tatou noatu e noea mai tatou!

11. Eaa te akataka ra i te akaaerenga a te Atua?

¹¹ Na te aroa ngakau tae e te tu taokotai o te au tavini o Iehova e akataka ra ia ratou ei aronga irinaki i te akonoanga mou. Karanga a Iesu e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:34, 35) Kua tata te apotetoro ko Ioane: “Ko te mea teia e kiteaʼi te tamariki a te Atua, e te tamariki a te diabolo; ko tei kore e rave i te tuatua-tika ra, kare ïa i to te Atua, kare katoa tei kore e aroa i tona taeake. Teia oki te tuatua ta kotou i akarongo mei muatangana mai, kia aroa tatou ia tatou uaorai.” (1 Ioane 3:10, 11) Na te aroa e te tu taokotai e akataka i te Au Kite o Iehova ei au pipi mou na Karaiti, te iti tangata ta te Atua e taangaanga ra ei tutu aere i te nuti meitaki o te Patireia ki te ao katoa.​—Mataio 24:14.

12, 13. Eaa ta te “aronga maata rava” e rave ra i teia tuatau, e eaa ta ratou ka kite kare e roa atu ana?

¹² Te maata anga o te au tavini o Iehova i teia tuatau e tuanga no te “aronga maata rava” tei aere mai mei tetai tuanga ke ke o teianei ao, e te turuturu ra i te Patireia. “Ko te aronga teia i aere mai mei roto i te mate maata, e kua orei i to ratou kakau, e kua akateatea i te toto o te Punua-mamoe ra” na te akaari anga i te akarongo ki roto i te atinga oko o Iesu. Te “aronga maata rava” tei inangaro ia Iehova e tana Tamaiti, e te akamori ra ia Iehova “i te po e te ao.”​—Apokalupo 7:9, 14, 15.

¹³ Kare e roa atu ana ka takore te Atua i teia ao kino na roto i te “mate maata.” (Mataio 24:21; e tatau ia Ieremia 25:32, 33.) Inara ka paruru a Iehova e te arataki  i tona au tavini ki roto i tona ao ou no te mea te inangaro ra aia ia ratou. Mei tana i taputou vaitata i te 2,000 mataiti i topa, “e nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.” Te akara ra ainei koe ki mua kia noo ki roto i tetai Parataito kare e kino, e mamae, e te mate?​—Apokalupo 21:4.

14. Eaa te maata o te aronga maata rava i teianei?

¹⁴ Te akamata anga te tuatau openga i te 1914, e tauatini tuma rai au tavini o te Atua. No tei akakeuia e te aroa no te tangata tupu ma te tauturu o te vaerua tapu o te Atua, kua tutu aere tetai pupu akatainuia o te au taeake e te au tuaine i te tuatua meitaki o te Patireia noatu te au tu ngata. Eaa tei tupu? I teia tuatau te akaputuputuia nei te aronga maata rava ma te manakonakoanga kia noo i te enua nei tuatau ua atu. E 8,000,000 tuma Au Kite i roto i te 115,400 tuma putuputuanga takapini i teianei ao, e te tupu ua atura te numero ki te maata anga. Ei akaraanga, e 275,500 tuma Au Kite ou tei papetitoia i te mataiti tavinianga 2014. E 5,300 aronga e papetitoia ra i te epetoma tataki tai.

15. Akapeea te manganui te rongo anga i te nuti meitaki i teia tuatau?

¹⁵ E mea umere te kite eia aronga tei rongo i te nuti meitaki o te Patireia. I teia rā te vaira ta tatou au puka i roto i te 700 tuma reo. Ko Te Punanga Tiaki te makatini tuʼa maataia i teianei ao. E 52,000,000 tuma kopi tei neneiia i te au marama tataki tai, e kua tukuia e 247 reo. E kua uriia ta tatou puka apii Pipiria Eaa Tikai ta te Pipiria e Apii Maira? ki roto i te 250 tuma reo. I teia rā, e 200,000,000 tuma kopi tei neneiia.

16. Eaa ra ka tupu ua ai ta Iehova akaaerenga?

¹⁶ Te tupu ra ta tatou akaaerenga no te mea e akarongo to tatou i te Atua e te āriki i te Pipiria ei Tuatua akauruia nana. (1 Tesalonia 2:13) Ka mataora ua atu rai tatou i te akameitakianga a Iehova noatu to Satani tu makitakita e te patoi.​—2 Korinetia 4:4.

17, 18. Akapeea a Iehova te tapapa anga ia tatou kia manako i te aronga kare e akamori ana iaia?

¹⁷ Te ariu maira te tangata ki ta tatou tutu aere na tetai au mataara ke ke. Te akarongo maira tetai pae kia tatou, te makitakita ra tetai pae i ta tatou karere. Akapeea a Iehova te tapapa anga ia tatou kia manako i te aronga kare e akamori ana iaia? Noatu to te tangata tu ki ta tatou karere, ka aru tatou i te ako anga i roto i te Pipiria. Karanga ra e: “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.” (Kolosa 4:6) Me paruru ua rai tatou i to tatou irinaki anga, kia pera tatou “ma te maru e te kauraro marie atu” no te mea te aroa ra tatou i te tangata tupu.​—1 Petero 3:15.

¹⁸ Noatu te riri maira te tangata e te kopae ra i ta tatou karere, ka akaari tatou i te aroa ki to tatou tangata tupu e te aru i to Iesu akaraanga. Kare a Iesu “i akakino atu, kia akakinoia mai aia ra; e kia mate aia ra, kare aia i tuatua tutaki atu.” Mari ra, kua irinaki a Iesu ia Iehova. (1 Petero 2:23) No reira i te au taime ravarai, ka akaari tatou i te tu akaaka e te taangaanga i te ako: “Auraka e tutaki atu te kino i te kino, e te  akakino i te akakino: ei mea ke ra, ei akameitaki ta kotou.”​—1 Petero 3:8, 9.

19. Akapeea tatou me akono i to tatou enemi?

¹⁹ Ka tauturu te tu akaaka ia tatou kia akarongo i tetai kaveinga puapinga tei orongaia mai e Iesu. Akamārama aia e: “Kua akarongo kotou e, i tuatuaia maira, ‘E aroa atu koe i toou tangata tupu,’ e makitakita atu i toou enemi: Te karanga atu nei ra au kia kotou, E aroa atu i to kotou aronga enemi, e akaora atu i tei tao mai; e takinga-meitaki atu i te aronga e makitakita mai ia kotou, e pure oki no te aronga e akakino mai e tei takinga-kino mai ia kotou: Kia riro kotou ei tamariki na to kotou Metua i te ao ra: te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mataio 5:43-45) Ei au tavini no te Atua, e aroa i to tatou enemi noatu eaa te ka tupu kia tatou.

20. Akapeea tatou e kite ei e ka ki teia enua katoa i te aroa no te Atua e te tangata tupu? (Akara i te tutu mua o teia atikara.)

²⁰ I te au taime ravarai, kia akaari tatou e te aroa ra tatou ia Iehova e te tangata tupu. Noatu ka patoi mai te tangata i ta tatou karere, ka tauturu tatou ia ratou me anoanoia te reira. Tata te apotetoro ko Paulo e: “Auraka kotou ei kai ou na te tangata ravarai, kareka kia aroa atu tetai ki tetai: ko tei aroa atu oki i tetai ke ra, kua akono ïa i te ture. Ko te au ture nei oki e, ‘Auraka koe e akaturi, Auraka koe e ta ua, Auraka koe e keia, Auraka koe kia riro ei kite pikikaa, Auraka koe e morimori;’ e te vai nei tetai ture ke, kua ope takiri i roto i teianei tuatua e, ‘E aroa atu koe i to tangata tupu mei te aroa ia koe uaorai.’ Kare rava te aroa e takinga-kino i te tangata tupu: ko te aroa mari te akatika anga i te ture.” (Roma 13:8-10) I roto i teia ao maveteia e te kino e te tā ua tei tutaraia e Satani, ka akaari te au tavini o te Atua i te aroa ngakau tae no to ratou tangata tupu. (1 Ioane 5:19) I muri ake me takore a Iehova ia Satani, e tana au temoni, e teia ao kino, ka ki teia enua katoa i te aroa. Mei teaa atura te akameitakianga me inangaro te katoatoa i te enua nei ia Iehova e to ratou tangata tupu!