Aea te Patireia o te Atua e Tae Mai Ei?

“E TE Atu, ei teianei aina koe e akaoki mai ei i te au kia Iseraela?” (Angaanga 1:6) E inangaro to te au apotetoro i te kite e aea a Iesu e akanoo ei i tona Patireia. I teia tuatau, mei etai 2,000 mataiti i muri mai, te inangaro katoa nei te au tangata i te kite e: Aea te Patireia o te Atua e tae mai ei?

I te mea e kua akariro a Iesu i te Patireia e ko te tumu tuatua maata o tana tutu anga, penei ka manako mai koe e kua uriuri aia i teia uianga. E kua rave tikai aia i te reira! Kua tuatua maata aia no runga i tetai tuatau akatakaia, tana i karanga e ko tona “parutia.” (Mataio 24:37, NW) Te piri vaitata atura taua parutia ra ki te akanooanga i te Patireia o te Mesia. Eaa teia parutia? E akamanako ana tatou e a tuatua mou ta te Pipiria e akakite maira no runga i te parutia o Karaiti.

1. Ka akamata to Karaiti parutia i tetai tuatau roa i muri ake i tona mateanga. Kua oronga a Iesu i tetai akatutuanga e kua akaaite iaia uaorai ki tetai tangata tei ‘aere atura ki te enua mamao, kia rauka te taoonga ariki.’ (Luka 19:12) Akapeea te reira akatutuanga totou i te akatupuangaia? Tei tupu, kua mate a Iesu e kua akatuakaouia mai; e oti kua aere atu aia ki tetai “enua mamao,” koia oki, ki te rangi. Mei ta Iesu rai i totou i roto i tetai akatutuanga aiteite, “e roa akera” e oki mai ei aia i roto i te taoonga ariki.​—Mataio 25:19.

Mei etai au mataiti i muri ake i to Iesu aere anga ki te rangi, kua tata te apotetoro ko Paulo e: “Kareka te Mesia, oti akera tana atinga okotai i te apai ei tarangaara, noo rava atura ïa i te rima katau o te Atua ra: E teianei te tatari ra e kia akariroia tona au enemi ei takainga vaevae nona.”  (Ebera 10:12, 13) E no reira kua aru mai tetai tuatau tiaki anga roa i to Iesu tae atu anga ki te rangi. Kua taopenga iora te tiakianga i to te Atua ko Iehova akariroanga i tana Tamaiti ei Ariki no te Patireia o te Mesia tei taputouia no te tuatau roa. Ko te taime te reira i akamata ai te parutia o Karaiti. Ka kite ainei te au tangata i te enua nei i teia tupuanga mataora.

2. Kare te parutia e kite mataia e te tangata. E akamaara, e kua uriuri a Iesu i te akairo o tona parutia. (Mataio 24:3, NW) Naringa ka kite mataia tona parutia e te tangata, ka anoanoia ainei tetai akairo? Ei akatutuanga: E akamanako ana e te teretere ra koe kia kite atu i te moana. Penei ka kite atu koe i te au akairo tataanga i runga i te mataara e taki atura ia koe, inara me tae koe ki te pae taatai, e tu ra i te tapataatai, ma te tai e atea ua atura ki te ionga, i toou manako e ka kite atu ainei koe i tetai akairo tataanga e tou atura ki mua, ma te tuatua tata mamaataia e ko te “Moana”? Kare ravaia! Eaa te puapinga o te akairo tataanga i te tou atu i tetai apinga ngoie ua ia koe i te kite atu ma toou nga mata?

Kua akataka mai a Iesu i te akairo o tona parutia, kare i te tou atu i tetai apinga e ka rauka ua te au tangata i te kite atu ma to ratou nga mata, mari ra i te tauturu ia ratou i te kite mai i tetai apinga te ka tupu i te rangi. No reira, kua karanga a Iesu e: “Kare te aereanga mai o te patireia o te Atua e tupu ma te tu akara anga umereia.” (Luka 17:20, NW) Akapeea i reira te akairo i te akaarianga ki te aronga i te enua nei e kua akamata to Iesu parutia?

3. Ka akairoia to Iesu parutia e tetai tuatau manamanata kino pakari i te enua nei. Kua karanga a Iesu e, tona parutia ei Ariki i te rangi, ka akairoia i te enua nei e te au tamaki, te onge, ngaruerue enua, au maki mate, e te kino. (Mataio 24:7-12; Luka 21:10, 11) Na teaa i akatupu i teia au taitaia pouroa? Te akamarama maira te Pipiria e e aka riri tikai to Satani “te ariki o teianei ao,” no te mea kua kite aia e e poto tikai tona tuatau e kua akamata to Karaiti parutia i teianei ei Ariki. (Ioane 12:31; Apokalupo 12:9, 12) E maata tikai te akapapuanga tei kiteaia i teia tuatau no to Satani riri otooto e to Karaiti parutia. Mei te mataiti 1914 tikai, te mataiti tei arikiia e te aronga tata tuatua enua e ko te tauianga maataia, i kiteaia teia akapapuanga i tetai turanga aite koreia tei takapini rava i te ao katoa.

Penei i te akaraanga e nuti kino ia, inara kare e ko te reira te tu. Te aiteanga koia oki e te tutara nei te Patireia o te Mesia i teianei i te rangi. Kare e roa atu ana, ka taangaanga taua kavamani ra i tana tutaraanga tikai i runga ravao i te enua katoa. Akapeea i reira te au tangata e kite ei no runga i tera Patireia kia rauka i te ariki i ta te reira tutaraanga e kia riro mai ei iti tangata no te reira?

4. Kua akairoia te parutia o Iesu e te angaanga tutu anga i te ao katoa. Kua karanga a Iesu e ka aite tona parutia mei “te tuatau ia Noa ra.” * (Mataio 24:37-39, NW) Kare a Noa i te tangata  tarai araka ua; e ‘tangata ako katoa aia i te tuatua-tika ra.’ (2 Petero 2:5) Kua akamatakite a Noa i te au tangata e te aere maira te akavaanga a te Atua. Kua karanga a Iesu e ka rave katoa rai tana au pipi i te enua nei i tetai apinga aiteite i te tuatau o tona parutia. Kua totou aia e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:14.

Mei ta tatou i kite mai ana i te atikara i mua atu, ka takore te Patireia o te Atua i te au kavamani pouroa o teianei ao. Te akamatakite ra te angaanga tutu anga i te au tangata e kare e roaia ka angaanga teia kavamani i te rangi, i te oronga mai anga ki te katoatoa i te atianga kia ora atu i te takoreanga e aere maira e kia riro mai ei iti tangata no te reira Patireia. Te uianga maata i reira, koia oki, Akapeea koe i te ariu atu anga?

E Nuti Meitaki Ainei te Patireia o te Atua kia Koe?

Te karere ta Iesu i tutu atu, e manakonakoanga aite koreia. I muri ake i te meameaau anga i Edene i te au tauatini mataiti i topa, kua akakoro te Atua ko Iehova kia akanoo i tetai kavamani te ka akatikatika i te au mea ravarai, akaokianga i te au tangata akarongo mou ki te turanga ta te Atua i manako no ratou mei te akamataanga mai​—te ora mutu kore i roto i tetai parataito i te enua nei. Eaa te apinga puapinga atu i te kite e te tutara nei teia kavamani tei taputouia no te tuatau roa i te rangi? Kare te reira i te manako marama kore, puapinga kore ua mari ra e tika tikai!

I teianei, te tutara nei te Ariki akataoongaia a te Atua i rotopu i tona au enemi. (Salamo 110:2) I roto i teia ao pikikaa tei akatakakeia mei te Atua, te akatupu nei te Mesia i te anoano o tona Metua kia kimi i te katoatoa e inangaro ra i te kite i te Atua e koai tikai aia e kia akamori iaia “ma te vaerua e te tuatua-mou.” (Ioane 4:24) Te manakonakoanga no te oraanga mutu kore i raro i te tutara a te Patireia o te Atua, te orongaia nei ki te au katiri tangata, ma te au mataiti tukeke, e te au turanga tukeke. (Angaanga 10:34, 35) Te raurau nei matou ia koe kia ariki i teia atianga manea rava e orongaia nei kia koe. E apii i teianei no runga i te Patireia o te Atua, kia rauka ia koe te mataora i te nooanga i raro ake i ta te reira tutara tuatua tika e tuatau ua atu!​—1 Ioane 2:17.

[Tataanga Rikiriki i Raro]

[Au Tutu i te kapi 8, 9]

Te au nuti kino ta tatou e akarongo ana i te au ra ravarai, te akapapu maira e te vaitata maira te au apinga meitaki

[Akameitakianga]

Antiaircraft gun: U.S. Army photo