Akaoraia Mei te Oraanga Kino i te Mapuanga

Akakiteia e Eusebio Morcillo

Ia Tepetema mataiti 1993, kua aere atu au ki ko i tetai are auri tiaki pakariia. Te tumu, no te papetitoanga i tetai mouauri, tetai oku tuaine ko Mariví. Kua akarakara mai tetai au mouauri e tetai au opita are auri ma te akangateitei iaku e rave nei i te papetitoanga. I mua ake ka akamarama atu ei au e i akapeea maua i tae mai ei ki konei, ka akataka atu au i to matou oraanga i mua ana.

KUA anauia au ki Paniora i te ra 5 o Me, mataiti 1954, te mataiapo o tetai au tamariki e varu. Ko Mariví te toru. Kua utuutuia matou e to matou mama kereni ei au Katorika tumu, e te maara nei iaku te au tupuanga manea o to matou tamariki anga i te akatapu i te Atua iaku i ko iaia. Inara te aorangi i roto i te ngutuare o toku nga metua kare e akonoia ana te tu Atua. E papa putuputu uaia ana a Mama e matou te tamariki, e Papa. E tuanga te tu mataku i roto i to matou oraanga, e e mamae oonu ua ana au i te akara atu ia Mama e mamae ra.

I te apii, maata atu te au tu taitaia taku e ariu atu ana. Tetai puapii, e orometua, e reru ana i to matou katu ki runga i te paruru me tarevake ta matou pauanga i te uianga. Tetai orometua kua akakino na roto i te kanga i tetai au tamariki apii iaia e akara ra i ta ratou apii ngutuare e ratou. Tetai atu, te au apiianga Katorika mei te ai era e oripu ra e e tamataku ana iaku. Taku akatapuanga i te Atua kua kore takiri.

Ereereia i Roto i Tetai Oraanga Puapinga Kore

No te ngere i te aratakianga pae vaerua, kua akamata au i te piri atu ki te aronga kino akono tau kore, i ko i te au are ura. Te maataanga o te taime e tupu ana te taanga, ki te au matipi, te au vivi, te au karati, e te au nooanga ei au apinga ta. Noatu e kare au e o atu ana ki roto i te taanga, i tetai atianga kua motoia au kia matapoiriia.

I te openga kua iu au i tera ngai e kua akara atu ki tetai atu au are ura muteki mai. I ko rai i taua au ngai ra, e matau uaia ana te kai i te au mea akakona. Inara kare i rauka te mataoraanga e te manako au, kua akatupu te au mea akakona i te au tu manako pikikaa e te apiapi.

Noatu toku tu merengo kore, kua maunu au i toku nga teina meangiti, ko José Luis, e tetai oa  piri tikai, ko Miguel, ki roto i teia tu oraanga. Ma te au mapu e manganui atu i Paniora i taua taime ra, kua mou matou ki roto i te ereere o tetai ao kino. Kua rave au i tetai ua atu ravenga kia rauka mai tetai moni no te au mea akakona. Kua ngaro iaku te au tu tapunui.

Akaoraia e Iehova

I taua taime ra, kua tuatua au no tetai au taime ki toku au oa i te vai ua anga o te Atua e te aiteanga o te oraanga. Kua akamata au i te kimi i te Atua na te akara anga i tetai tangata kia akakite atu i toku au manako. Kua kite mai au ia Francisco, e angaanga kapiti ana maua, e e tuke rai aia mei etai ke atu. E akaraanga mataora, tika, e te meitaki aia, no reira kua akakite au i toku manako ngakau kiaia. A Francisco, koia tetai o te Au Kite o Iehova, e kua oake mai aia kiaku i tetai itiu o Te Punanga Tiaki no runga i te atikara o te au mea akakona.

I muri ake i te tatauanga i te atikara, kua pure au ki te Atua no tetai tauturu: “E te Atu, kua kite au e te vai nei koe, e ka inangaro au kia kite ia koe e kia rave i toou anoano. Tauturu mai iaku ine!” Kua taangaanga a Francisco e etai atu Au Kite i te Pipiria i te akamaroiroi iaku e kua oronga mai i te au puka tei akatumuia ki runga i te Pipiria ei tatau. Kua kite mai au e te oronga mai nei ratou i te tauturu taku i pati atu ki te Atua. Kare i roa kua akamata au i te tuatua ki toku au oa e José Luis no runga i te au apinga taku e apii ra.

I tetai ra ia matou e akaruke ra i te rock concert ma tetai au oa, kua akaatea mai au iaku mei te pupu. Kua akara atu au ia ratou mei tetai tangata e akarakara atura kare i o atu kia ratou, e kua kite mai au e mei teaa te viivii i to matou tu no te akakeuanga a te au mea akakona. I tera taime tikai, kua anoano au i te akaruke i tera tu oraanga e kia riro mai ko tetai o te Au Kite o Iehova.

Kua pati au kia Francisco i tetai Pipiria, e kua oake mai aia i tetai ma te puka Te Tuatua-Mou te Ka Arataki ki te Ora Mutukore. * I te tatau anga au i te taputou a te Atua i te orei i te roimata katoatoa e te akakore i te mate, kare rava au i ekoko ana e kua kitea e au te tuatua mou te ka akarangatira i te tangata. (Ioane 8:32; Apokalupo 21:4) I muri mai, kua aere atu au ki te uipaanga i ko i te Are Uipaanga Patireia o te Au Kite o Iehova. Te tu oaoa e te maanaana i reira kua reka tikai au.

No te inangaro i te akakite atu i taku i kite i ko i te Are Uipaanga Patireia, kua kimi viviki atu au ia José Luis e toku au oa e kua akakite atu i te reira. I tetai au ra i muri mai, kua aere pouroa atu matou ki te uipaanga. Tetai tamaine e noo ra i mua ua ake ia matou kua akara viviki mai ia matou. Kua poitirere aia i te kite anga mai i teia pupu hippie rouru roaroa aere, e kare aia i taanga akaou mai ana. Kare e ekoko e kua poitirere aia i te kite anga ia matou i te oki atu ki ko i te Are Uipaanga Patireia i tera mai epetoma, no te mea i te reira taime te aao pereue e te neketai aere ra matou.

I muri poto ua mai, kua tae katoa atu maua ko Miguel ki tetai akaputuputuanga kotinga na te Au Kite o Iehova. Kare rava maua i kite ana i tetai tupuanga mei te reira rai i mua ana​—e taokotaianga taeake mou no te au tangata tukeke te mataiti. E te mea umere, kua raveia te akaputuputuanga ki roto i te are teata tikai i aere ei matou ki te rock concert. Inara i teia atianga, te aorangi e te akatangi imene ta matou i akarongo kua akamareka i to matou ngakau.

Kua akamata to matou pupu katoatoa i te apii i te Pipiria. Mei tetai varu marama i muri mai, i te  ra 26 o Tiurai, mataiti 1974, kua papetitoia maua ko Miguel. E 20 o maua roa rai mataiti. E a aronga i roto i to matou pupu kua papetitoia i tetai au marama i muri mai. Te terenianga Pipiria taku i rauka mai kua akakeu te reira iaku kia tauturu i toku mama, akakoromaki maata i te angaanga o te ngutuare e te akakite kiaia i toku akarongo ou. E pirianga vaitata tikai to maua. Kua akapou katoa au i tetai taime roa i te tauturu i toku au teina e te au tuaine.

Kare i roa ana, kua apii a mama e te katoatoa o toku au teina e te au tuaine i te tuatua mou Pipiria e kua papetitoia ei Au Kite no Iehova, okotai ua i toe te kare i piri mai. I te mataiti 1977, kua akaipoipo au ia Soledad. Koia te tamaine mapu ou tei poitirere i te kiteanga ia matou i to matou aere mua anga ki ko i te Are Uipaanga Patireia. I roto i tetai au marama, kua riro mai maua ei nga painia, mei tei kapikiia e te Au Kite o Iehova te aronga tamou i te tutu aere i te tuatua meitaki.

Akaoraia Tetai Tei Akaperepereia

Tetai oku tuaine ko Mariví kua akakinoia i te pae ainga i te tamariki anga, e kua riro taua tupuanga viivii ra i te akakeu pakari iaia. I tona mapu ou anga, e oraanga tau kore tikai tona te kapitiia maira te kai i te apinga akakona, te keikeia, e te ainga tutakiia. E 23 ona mataiti, i apaina ai ki roto i te are auri, te ngai i rave ua atu ei aia i taua tu oraanga ra.

I taua taime ra, te tavini ra au ei akaaere kotinga, e orometua tutaka no te Au Kite o Iehova. I te mataiti 1989, kua tukuia maua ko Soledad ki te ngai tei reira a Mariví e mouauri ra. Kua raveaia tana tamaiti e te mana akaaere mei iaia; kua taitaia tikai aia, ma te kore e akakoroanga kia ora ua atu. I tetai ra kua atoro atu au iaia e kua karanga atu e ka apii kapiti maua i te Pipiria, e kua akatika mai aia. I muri ake i tetai marama i to maua apiianga, kua akaruke aia i te kai i te apinga akakona e te kai avaava. Rekareka tikai au i te kiteanga i ta Iehova oronga anga i te maroiroi kiaia kia rauka teia au taui anga i roto i tona oraanga.​—Ebera 4:12.

I muri poto ua ake i te apii anga, kua akamata a Mariví i te akakitekite i te tuatua mou o te Pipiria ki tona au taeake mouauri e te au opita o te are auri. Noatu e kua neke aereia aia mei tetai are auri ki tetai, kua rave ua atu rai aia i tana angaanga tutu aere. I roto i tetai are auri kua tutu aere aia mei tetai pia ki tetai. No tetai au mataiti, kua akamata a Mariví i tetai au apii Pipiria ki te au mouauri i roto i te au are auri tukeke.

I tetai ra kua akakite mai a Mariví kiaku i tona anoano kia akatapu i tona oraanga kia Iehova e kia papetitoia. Inara kare aia e akatikaia kia akaruke i te are auri, kare katoa tetai tangata e akatikaia kia aere mai e papetito iaia. Kua rauka iaia te akakoromaki akaou atu i te turanga kino o taua are auri ra no tetai a mataiti. Eaa tei tauturu iaia i te akono i tona akarongo? I te taime tikai e rave ra te putuputuanga o te reira ngai i ta ratou uipaanga, te rave katoa ra aia i te reira porokaramu tikai i roto i tona pia are auri. E porokaramu katoa tana e rave putuputuia ana no te apii Pipiria e te pure.

Kare i roa ana, kua nekeia a Mariví ki tetai are auri tiaki pakariia e ngai pai vai to reira. Kua kite mai aia e penei ka riro teia au akanooanga ou i te akatupu i tona papetitoanga. E tika atu rai, kua orongaia tetai tikaanga kia Mariví. No reira au i kite mai ei iaku i te oronga i tona tuatuaanga no te papetito. Tei ko au iaia i te tuatau puapinga rava atu o tona oraanga.

Ko te openga i tona oraanga i mua ana, kua tuia a Mariví e te AIDS. Noatu ra, kua riro tona tu meitaki i te akamatara vave mai iaia mei te mouaurianga, i roto ia Mati i te mataiti 1994. Kua noo aia i te kainga raua ko Mama e kua akono maroiroi i tetai oraanga Kerititiano e tae rava atu ki tona mateanga e rua mataiti i muri mai.

Autuanga i te Au Manako Ngakau Kino

Kare katoa au i ngere ana i te kokoti i te au tupuanga o toku oraanga i mua ana. Te akakinoanga ta toku papa i rave pera katoa te tu o toku oraanga i te mapuanga kua takino i toku tu. I roto  i toku oraanga aronga mamaata, e putuputu ana au i te taitaia i te au manako ngakau kino e te ngere i tetai tu manako puapinga iaku uaorai. I tetai au taime e maromaroa kino roa ana au. Inara, e kite ana au i te puapinga i te Tuatua a te Atua i te tauturu iaku i te akakore i teia au manako tamanamanata. Te manako oonu putuputu ki runga i teia au tuatua tapu mei a Isaia 1:18 e Salamo 103:8-13 kua rauka i te tauturu iaku no tetai au mataiti i te akaiti atu i te tupuanga mai o teia au manako ngakau kino.

E pure tetai apinga tamaki pae vaerua taku e taangaanga ana ei kopae atu i te au manako ngakau akapuapinga kore. E kite putuputu ana au iaku e pure ra kia Iehova ma te kiki te mata i te roimata. Noatu ra, te au tuatua rekotiia a 1 Ioane 3:19, 20 e akamaroiroi mai ana iaku: “Ko te mea teia e kite ei tatou e, no te tuatua-mou tatou, e e kore ei to tatou ngakau e mataku i mua iaia. Kia akaapa mai oki to tatou ngakau ia tatou, e maata te Atua i to tatou ngakau, e kua kite aia i te au mea katoa nei.”

No te mea e e pure akatenga ana au ki te Atua ma “te ngakau paruparu e te aue,” kua kite mai au e kare au e kino roa ana mei taku e manako ra i mua ana. Te akapapu maira te Pipiria ki te aronga katoatoa e kimi ra ia Iehova e kare aia e riri ana i te aronga e tataraara tikai ra i to ratou tu i topa ki muri e kua uri i te rave i tona anoano.​—Salamo 51:17.

Me tupu mai ana te au manako ekoko, e tauta ana au i te akaki i toku roro ki te au manako memeitaki, te au apinga pae vaerua e taikuia maira e Philipi 4:8. Kua tamou ngakau au ia Salamo 23 e te Tuatua i runga i te Maunga. Me tupu mai te au manako kino kiaku, e tuatua ana au i teia au irava Tuatua Tapu kiaku uaorai. Te tamaanga i teia au manako kino mei to ratou tupuanga mai, e tauturu pakari tikai i te au po me kare e varea e te moe.

Ko tetai tumu akaou no te tauturu koia oki ko te akameitakianga e oronga mai ana taku vaine e te au Kerititiano pakari. Noatu e i te akamataanga e ngata ana iaku te ariki i ta ratou au tuatua akamaroiroi, e tauturu mai ana te Pipiria iaku kia marama e ko te aroa “e akarongo i te au mea katoa.” (1 Korinetia 13:7) E, no reira, kua apii marie au ma te akaaka i te ariki i toku au tu paruparu e te au kotinga.

I te pae o te tua meitaki, taku au tautaanga i te kopae i te au manako kino kua tauturu iaku kia riro au ei akaaere tutaka tangi aroa. Kua rauka ia maua ko taku vaine mei tetai 30 mataiti tataki tai ei nga orometua tamou no te tuatua meitaki. Te rekarekaanga e rauka ana iaku no te tavinianga i etai ke e tauturu ana i te opara i te au manako kino e te au manakoanga o toku au tupuanga viivii ki muri rava atu i te ngai kare e tamanamanata mai.

I teianei me akara au ki muri e akamaara i te au akameitakianga katoatoa a Iehova i oronga mai kiaku, kua akakeuia au kia tuatua mei ta te tata taramo rai e: “E akameitaki ia Iehova . . . Koia tei akakore i taau katoa ra au apa; ko tei akaora i toou katoa ra au maki; Ko tei akaora ia koe i te mate; ko tei akakorona ia koe i te takinga-meitaki e te aroa.”​—Salamo 103:1-4.

[Tataanga Rikiriki i Raro]

[Tataanga i te kapi 30]

E putuputu ana au i te taitaia i te au manako ngakau kino e te ngere i tetai tu manako puapinga iaku uaorai. Inara, e kite ana au i te puapinga i te Tuatua a te Atua i te tauturu iaku i te akakore i teia au manako tamanamanata

[Au Tutu i te kapi 27]

Toku teina ko José Luis e te oa ko Miguel tei aru i taku akaraanga meitaki e te kino

[Tutu i te kapi 28, 29]

Te pamiri Morcillo i te mataiti 1973

[Tutu i te kapi 29]

Ko Mariví e mouauri

[Tutu i te kapi 30]

Maua ko taku vaine, ko Soledad