E Metua Aite Koreia
E Akavaitata Atu ki te Atua
E Metua Aite Koreia
“PAPA.” Tokoiti ua te au tuatua te akakeu ra i te au manako oonu i roto i te au tangata. Ko te metua tane te inangaro tikai ra i tana tamariki te tauturu ra ia ratou kia tupu meitaki. Ma te tumu meitaki, te taiku maira te Pipiria i te Atua ko Iehova e ko te “Metua.” (Mataio 6:9) E Metua aa ra a Iehova? E pau ei i te reira, ka akara matatio tatou i te au tuatua ta Iehova i tuatua ana kia Iesu i te tuatau i papetitoia ai a Iesu. Ko te tikaanga, te tu e tuatua ra tetai metua tane ki tana tamariki te akaari maata maira e mei teaa te tu o te metua.
Mei ia Okotopa 29 T.N., kua aere atu a Iesu ki te Kauvai Ioridana kia papetitoia. Te ripoti maira te Pipiria e eaa tei tupu ana: “E oti akerā Iesu i te bapetizoia, kake maira aia ki runga mei raro mai i te vai; e i na, veveteia akera te rangi iaia, akara akera aia i te Vaerua o te Atua i te eke anga mai mei te kukupa, e te to anga mai ki rungao iaia: E i na, ko te reo maira no te rangi, i te na ko anga mai e, Taku Tamaiti akaperepere teia, kua mareka rava au iaia.” * (Mataio 3:16, 17) Na Iehova uaorai i tuatua mai, te akakite maata maira taua au tuatua maru ra e e Metua aa ra aia. E akara ra e e toru apinga ta Iehova i akakite ki tana Tamaiti.
Te mea mua, na roto i te au tuatua ‘taku Tamaiti teia,’ te karanga ra a Iehova, mei tera te tu e, ‘E ngakau parau tikai au e e Papa au noou.’ Te akamerengo ra tetai metua tane matakite i te anoano o tana tamariki kia arikiia mai e kia manakoia mai. Te inangaro ra te tamariki kia akapapuia atu kia ratou e te akaperepereia ra ratou ei au mema takake no te pamiri. E akamanako ana ra e mei teaa ra te aiteanga o te reira kia Iesu—ei tangata mamaata katoa—kia rauka mai taua arikianga ra mei tona Metua!
Te rua, na te akataka anga mai i tana Tamaiti ei “akaperepere,” kua akaari mai a Iehova ki te katoatoa i tona inangaro ia Iesu. I roto i tetai tu, te karanga ra te Papa e, ‘Inangaro tikai au ia koe.’ Ka akakite tetai metua tane meitaki ki tana tamariki e te akaperepere tikai ra aia ia ratou. Te tauturu ra taua au tuatua—aruia mai e te aroa tau—kia tupu ruperupe te tamariki. Mei teaa atura te akakeuia anga to Iesu ngakau i te akarongo anga i te reo o tona Metua i te akakite anga mai i tona aroa!
Te toru, na roto i te au tuatua e “kua mareka rava au,” te akakite maira a Iehova e te mareka ra aia i tana Tamaiti. Mei te mea e te karanga ra a Iehova e, ‘E tama, rekareka au i taau i rave.’ Te akara ra tetai metua tane aroa i te au atianga kia akakite atu ki tana tamariki e te rekareka ra aia i te au mea meitaki ta ratou e tuatua ra me kore e rave ra. Te akaketaketaia ra e te akamaroiroiia ra te tamariki me akakite te metua e te akaperepereia ra ratou. Papu tikai e kua akamaroiroiia a Iesu i te akarongo anga e kua rauka mai iaia te akaperepere anga a tona Metua!
E tika tikai, e Metua aite koreia a Iehova. Te inangaro ra ainei toou ngakau i tetai metua tane mei tera rai? Me koia ia, ka akapumaanaia koe i te kite anga e ka rauka ia koe tetai pirianga kia Iehova. Me na roto i te akarongo i kite ei koe iaia e te tauta tikai ra i te rave i tona anoano, ka ariu mai aia. Te karanga ra te Pipiria e: “E akavaitata atu ki te Atua, e nana e akavaitata mai kia kotou na.” (Iakobo 4:8) Eaa te ka akariro ia koe kia manako tinamou tikai kare ainei e te rauka anga tetai tatua pirianga vaitata ki te Atua ko Iehova, te Metua meitaki rava atu?
[Tataanga Rikiriki i Raro]
^ para. 2 Kia tau ki ta te papaanga aiteite i roto i te Evangeria a Luka, kua taangaanga a Iehova i te kauono nomena “koe,” i te karanga anga e: “Ko taku tamaiti akaperepere koe; kua mareka rava au ia koe.”—Luka 3:22.