E Patianga te Uiia nei i te Ao Katoa

E AKAMANAKO ana i te au anere mirioni, me kore au pirioni ua atu tangata, e pati pouroa ra i tetai apinga aiteite. Te pati ra ratou ki te mana teitei rava atu i roto i te ao katoa e pini ua ake kia akatupu i tetai patianga tikai. Inara, e iti ua ia ratou tei kite meitaki tikai e eaa ta ratou e pati ra. Ka tupu ainei tikai tetai apinga mei teia rai? Ko te tikaanga, e tupu ana te reira i te au ra ravarai. Eaa ta teia au tangata pouroa e pati nei? Ko te aere anga mai o te Patireia o te Atua!

I tetai akamanakoanga, te vai ra mei etai 37,000 au akonoanga tei kapiki ia ratou uaorai ei Kerititiano, i te karangaanga e ko Iesu Karaiti to ratou Arataki. Kua tere atu i te rua pirioni mema o taua au akonoanga ra. E manganui ia ratou e pure ana i tei kapiki putuputuia e ko te Pure a te Atu. Kua kite ainei koe i teia pure? Ia Iesu e apii atura i te reira ki tana au pipi, te akamata ra te reira e: “E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:9, 10.

No te au anere mataiti i teianei, kua ripiti akangateitei te aronga akamori i te reira au tuatua i roto i te au akonoanga. Kua taiku katoa ratou i te reira ei au pupu pamiri e ei aronga tataki tai i te au tuatau meitaki e te au tuatau kino. Kua tuatua katoa ratou i te au tuatua ma te ngakau tae, e te manako oonu. Kua mou ngakau ua i etai ke i te au tuatua e kua taiku i te reira ma te manako kore anga i tona aiteanga. Kare teia au mema nei o Kerititome e ko te aronga anake ua tei manakonako e tei pure no te aere anga mai o te Patireia o te Atua.

E Patianga na te Aronga Kare i te Kerititiano

Ko tetai pure kite meitakiia a te akonoanga ngati Iuda koia oki ko te pure Kaddish a te aronga akaevaeva. Noatu e kare te reira e akamanako tika ana i te mate me kore i te mii, e taiku putuputuia ana te reira i te au tuatau mii anga. Te ui ra te pure e: “Kia akanoo aia [te Atua] i tona Patireia i roto i te tuatau o toou oraanga . . . ma te viviki.” * Te tuatua akaou ra tetai pure taito a te tunako i te manakonakoanga no te Patireia o te Mesia mei te ngutuare o Davida.

Kua kite mai tetai aronga o te au akonoanga e kare i te Kerititiano, i te manako o te Patireia o te Atua ei mea marekaia. Kia tau ki The Times of India, kua karanga tetai arataki rongonui akonoanga Initia o te 19 anere mataiti, tei inangaro i te taokotai i te Initu, Muslim, e te au akonoanga Kerititiano e: “Kare te Patireia mou o te Atua e akatupuia kia kapiti roaia te pae itinga ki te pae opunga.” E tetai puapii maata o tetai koreti Islamic i Strathfield, Autireria, kua tata ua akenei ki tetai nuti pepa e: “Mei te au Muslim katoatoa, te irinaki nei au [e] ka oki mai a Iesu e ka akanoo i te Patireia mou o te Atua.”

Kare e ekokoanga e, e pirioni ua atu te au tangata e manakonako ra e te pati ra i te Patireia o te Atua. Inara e akamanako ana i tetai tikaanga umere.

Penei kua kite koe e e aere ana matou, te Au Kite o Iehova, tei nenei i teia makatini, mei tetai ngutuare ki tetai ngutuare i roto i toou oire kia akapiri mai i te au tangata i roto i te au uriurianga no runga i te Pipiria. E tataia nei teia atikara, te rave nei matou i teia angaanga takapini  i te ao katoa, i roto i te 236 enua e i roto i te au reo e 400 e tere atu. Te tumu tuatua maata o ta matou angaanga tutuanga koia oki ko te Patireia o te Atua. Ko te tika, e akatau ana e ko te ingoa katoa o teia makatini nei ko Te Punanga Tiaki Akakiteanga i te Patireia o Iehova. E ui putuputu ana matou ki te au tangata me e pure ana ratou no te reira Patireia. Te pau maira te maataanga e ae. Inara, me uiia atu e eaa te reira Patireia, ko te tikaanga, e pau mai ana te maataanga o te au tangata e, “Kare au i kite,” me kore kare e taka meitaki ana me kore kare e papu ana ta ratou pauanga.

Eaa ra te manganui e ui ei i tetai apinga kare ratou e marama ana? No te mea ainei e e manako pakari e te marama kore te Patireia o te Atua? Kare. Te akataka meitaki e te marama uaia maira te Patireia i roto i te Pipiria. Pera katoa, ka oronga mai te karere a te Pipiria no runga i te Patireia i te manakonakoanga tikai kia koe i roto i teia au tuatau manamanata. I roto i te atikara e aru mai nei, ka kite mai tatou e akapeea te Pipiria i te akamarama anga mai i tera manakonakoanga. E oti ka kite mai tatou e aea te pure a Iesu no te Patireia kia aere mai, e pauia ai.

[Tataanga Rikiriki i Raro]