Eaa te Patireia o te Atua?

EAA te tumu tuatua o te angaanga tutu anga a Iesu? Mei ta Iesu uaorai i karanga mai e, ko te Patireia o te Atua te reira. (Luka 4:43) E taiku putuputuia ana te Patireia i to Iesu tuatua anga ki te au tangata. Kua marama kore, me kare kua ekoko ainei ratou? Kua ui atu ana ainei ratou kiaia e eaa te reira Patireia? Kare. Kare te au Evangelia i taiku mai ana i te reira au uianga. E irinakianga matauia ainei te Patireia o te Atua ki te reira au tangata?

Ko te tikaanga, te au Tuatua Tapu taito ta te ngati Iuda i akangateitei ei tapu, kua akamarama mai i te reira Patireia, i te akakiteanga mai i roto i te au tuatua taka meitaki e te papu meitaki e eaa te reira e eaa ta te reira ka akatupu. I teia tuatau, e maata atu ta tatou ka kite mai no runga i te Patireia mei ta te ngati Iuda rai i rave​—na te taangaanga anga i te Pipiria. E akamanako ana tatou e itu tuatua mou ta te Pipiria e apii maira ia tatou no runga i te Patireia. Te mea mua e toru kua rauka ua i te ngati Iuda i te tuatau o Iesu e i mua atu ana. Te toru tei aru mai, kua akakiteia mai e Karaiti me kore e tana au apotetoro i te anere mataiti mua. Te mea openga kua kitea marama uaia i to tatou uaorai tuatau.

1. E kavamani tika tikai te Patireia o te Atua, e ka vai e mutu kore ua atu. Te akakite maira te totou mua a te Pipiria e ka tono mai te Atua i tetai akaora ki te au tangata tiratiratu ravarai. Kapikiia e ko te “uanga,” Nana e akakore i te au manamanata kino pakari tei akamataia i te meameaau anga a Adamu, a Eva, e Satani. (Genese 3:15) I muri roa mai, kua akakite te ariki tiratiratu ko Davida i tetai apinga mataora tikai no runga i teia “uanga,” me kore te Mesia. Ka tutara aia i rungao i tetai Patireia. Ka tuke teia kavamani mei te au kavamani ravarai. Ka vai ua rai te reira e mutu kore ua atu.​—2 Samuela 7:12-14.

2. Ka takore te Patireia o te Atua i te au kavamani pouroa a te tangata. Kua orongaia tetai orama ki te peroveta ko Daniela e kua kite atu aia i te au mana tutara tataki tai o te ao te ka aru mai i roto i te tuatua enua e tae ua mai ki to tatou tuatau nei. E akara ana i te taopenga anga mataora tikai ki te reira orama: “I te au rā o taua au ariki [tangata openga] ra, e akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i  taua au basileia katoa ra, e ka vai rai te reira e tuatau ua atu.” E no reira pouroa te au patireia, me kore te au kavamani o te ao nei​—ma ta ratou au tamakianga, taomianga, e te pikikaa—​ka takore mutu koreia te reira. Mei ta te totou a Daniela e akaari maira, kare e roa atu ka tutara te Patireia o te Atua i rungao i te ao katoa. (Daniela 2:44, 45) Ko tetai tikaanga papu meitaki e, ko te kavamani anake ua te reira te ka vai ua rai. *

3. Ka takore te Patireia o te Atua i te au tamakianga, maki, onge, e te mate katoa. Te akakite maira te au totou Pipiria e eaa ta te Patireia o te Atua ka rave i te enua nei. Ka akatupu te reira kavamani i te au mea kare te au akaaerenga tangata i rave ana me kore kare rava e rauka i te rave i te tuatau ki mua. E akamanako ana​—ka takore mutu koreia te au apinga tamaki ravarai! “Kua akakore aia i te tamaki e tae rava akenei ki te openga enua.” (Salamo 46:9) Kare e au taote akaou, e au are maki, me kore e au tu maki ua atu. “Kare oki to reira e karanga e, Kua maki au.” (Isaia 33:24) Kare e onge akaou, rava kore o te kai, me kore te mate pongi. “E manga sitona okotai rima i ki i te enua nei.” (Salamo 72:16) Kare e tanu mate, kare katoa e kave eva, e au tanumanga, au ngai vairanga kopapa mate, me kore e mamae te kapitiia mai ki te reira. I te openga ra, ka takoreia te mate, to tatou enemi tapu koreia. Ka “akakore rava [te Atua] i te mate e tuatau ua atu; e na te Atu ra na Iehova e orei i te roi-mata i te au mata ravarai.”​—Isaia 25:8.

4. E Tutara to te Patireia o te Atua tei ikiia e te Atua. Kare na te Mesia i iki iaia uaorai, e kare katoa aia i ikiia e te au tangata apa kore. Na te Atua tikai ko Iehova i iki iaia. Te akataka maira te au taoonga tikai te “Mesia” e te “Karaiti” i te reira. Te aiteanga o nga tuatua roa ai koia oki ko “Tei Akatainuia.” E no reira kua akatainuia me kore kua akataoongaia teia Ariki e Iehova, no tana tukuanga angaanga. Kua karanga te Atua iaia e: “Ka akara ana i toku tavini, taku e tauturu nei; tei ikiia e au ra, kua rekareka rava toku ngakau iaia; kua tukuia e au toku Vaerua ki runga iaia: nana e tuku atu i te tuatua-tau ki te au etene.” (Isaia 42:1; Mataio 12:17, 18) Koai tei kite meitaki atu i Tei Anga mai ia tatou i te tu Tutara ta tatou e anoano ra?

5. Kua akaari te Tutara o te Patireia o te Atua i tona puapinga i mua i te au tangata ravarai. Kua akapapu mai a Iesu o Nazareta e koia te Mesia totouia. Kua anauia mai aia i roto i te papaanga pamiri ta te Atua i akataka mai. (Genese 22:18; 1 Paraleipomeno 17:11; Mataio 1:1) Iaia i te enua nei, e manganui tana au totou i akatupu no runga i te Mesia tei rekotiia i te au anere mataiti i mua atu. Kua akataka katoaia mai aia mei te rangi mai e ko te Mesia. Akapeea? I na, kua tuatua mai te Atua mei te rangi mai, i te akatakaanga iaia ei Tamaiti Nana; kua tou atu te au angera kia Iesu e ko te Mesia totouia; e kua rave a Iesu i te au temeio​—tei kite putuputuia e te au anere e te au tauatini aronga kite mata katoa—​ma te irinakianga ki runga i te mana o te Atua. * Kua akaari putuputu a Iesu e mei teaa rai tona tu ei Tutara. Kare e kua rauka anake ua iaia te mana kia tauturu i te au tangata mari ra te anoano katoa. (Mataio 8:1-3) E tangata karapii kore aia, e tangi aroa, e mataku kore e te akaaka. Te rekoti o tona oraanga i runga nei i te enua tei roto i te Pipiria kia tatauia e te katoatoa.

6. E 144,000 aronga te ka tutara kapiti atu kia Karaiti. Kua karanga a Iesu e e aronga ke atu, kapiti mai tana au pipi, te ka tutara atu e ia i te rangi. Kua kapiki aia i teia pupu e ko te “anana iti.” (Luka 12:32) I muri ake, kua akakiteia ki te apotetoro ko Ioane e ka taeria te numero o teia anana iti ki te 144,000.  E angaanga umere rava ta ratou i te rangi, i te tutara anga ei ui ariki e te tavini kapiti atu anga kia Karaiti ei kau taunga.​—Apokalupo 5:9, 10; 14:1, 3.

7. Te Patireia o te Atua, e tutara nei i te rangi, kua papa i te akamata i te tutara ki rungao i te enua katoa. Ko teia tuatua mou openga tetai mea mataora rava atuia ka kite mai tatou. Te oronga maira te Pipiria i te akapapuanga maata e kua orongaia kia Iesu tona mana ei Ariki i te rangi. Te tutara nei aia i teianei, i to tatou tuatau tikai, e kare e roa atu ana ka akamaata atu aia i tana tutaraanga ki te ao katoa e ka akatupu i tana au totou umere rava tikai tei taiku takereia e matou. Inara akapeea e papu ei ia tatou e te tutara nei te Patireia o te Atua i teianei? E aea te reira e akamata ai i te tutara i rungao i te enua?

[Au Tataanga Rikiriki i Raro]