Ki ta Matou Aronga Tatau

TE MATAORA nei matou i te akakite atu kia kotou e, akamata i teia itiu, ka tauiia te papaanga o Te Punanga Tiaki. I mua ake ka akamarama atu ei matou i te tuke, ka akakite atu matou i te au tuanga kare e tauiia.

Kare te ingoa o teia makatini, Te Punanga Tiaki Akakiteanga i te Patireia o Iehova, e tauiia. No reira, ka akangateitei ua atu rai Te Punanga Tiaki ia Iehova e ko te Atua mou e ka akapumaana katoa i tana aronga tatau ma te tuatua meitaki o tona Patireia. Te uriuri ra te au atikara i te kapi 5 ki te 9 o teia itiu e eaa te reira Patireia e aea e tae mai ei. Kapiti katoa mai, ka tamou ua atu rai Te Punanga Tiaki i te akamaroiroi i te irinaki i roto ia Iesu Karaiti, i te turu i te tuatua mou Pipiria, e te akamarama i te aiteanga o te au tupuanga i te ao nei i te akamanakoanga i te au totou Pipiria, mei ta teia makatini rai i rave ana no te au anere mataiti e tere atu.

Eaa te apinga tuke i reira? Ka akamarama atu matou i tetai au atikara ou mataora tikai te ka kiteaia i roto i te tuanga toru marama. *

E maata te au atikara ka kitea mai i roto i teia tuanga te akakeu ra i te manako. Ka oronga mai te atikara “Kua Kite Ainei Koe?” i tetai akakiteanga umere tikai te akamarama maira i te aiteanga o tetai au tataanga Pipiria tei ikiia. Te atikara “E Akavaitata Atu ki te Atua” ka akamarama mai i ta tatou ka kite mai no runga ia Iehova mei tetai au irava Pipiria tikai. Te tuanga “Te Ui nei ta Tatou Aronga Tatau” ka uriuri i te au pauanga ki te au uianga Pipiria e ui putuputuia ana. Ei akaraanga, e maata te au tangata te akamanako ra e me, “Tei roto ainei te Patireia o te Atua i toou ngakau?” Ka kite mai koe i te pauanga i te kapi 13.

Kua akanooia tetai au atikara kia puapinga te au pamiri. Ko tetai atikara ko te “Au Taviri kia Mataora te Pamiri,” ka oronga mai te reira i te au akatutuanga tika tikai o te au manamanata o te pamiri e ka akaari mai e akapeea te au kaveinga Pipiria i te tauturu i te akatikatika i te au manamanata. Te atikara e “Apii i Taau Tamariki,” ka kitea katoaia no te au metua kia tatau e ta ratou tamariki e “No ta Tatou Au Mapu,” te akataka maira i tetai apii Pipiria tei akatanoia ki te mapu.

Ka kitea mai tetai atu au atikara ou i roto i teia tuanga. Ka akamaroiroi te “Aru i to Ratou Akarongo” ia tatou kia aru i te akaraanga o tetai tangata i roto i te Pipiria. Ei akatauanga, i te kapi 18 ki te 21 o teia itiu, ka tatau koe i tetai tataanga akakeuanga no runga i te peroveta ko Elia e ka kite mai e akapeea tatou i te aruanga i tona akarongo. Te tuanga “E Reta no ko Mai . . . ” ka oronga mai i tetai ripoti mei te au mitinari e tetai atu i roto i te au tuanga aere o te ao nei. “Ta Tatou i Kite Mai mei ia Iesu” ka akatutu mai i te au tumu apiianga Pipiria i roto i tetai papaanga ngoie ua.

Te irinaki papu nei matou e ka akamareka ua atu rai Te Punanga Tiaki i te aronga tatau tei akangateitei i te Pipiria e te inangaro ra i te kite e eaa tikai ta teia puka e apii maira. Te irinaki nei matou e ka tauturu teia tianara ia koe i te akamerengo i toou kaki no te tuatua mou Pipiria.

ARONGA NENEI

[Tataanga Rikiriki i Raro]