Kua Kite Ainei Koe?

I naea te aronga akara etu i atoro atu ei ia Iesu?

I roto i te Evangeria a Mataio, te akakiteia maira kia tatou e ‘e au tangata akara etu mei te itinga o te rā mai’ tei atoro atu ia Iesu, i te apai atu anga i te au apinga aroa. (Mataio 2:1-12) Eia aronga akara etu, me kore “taunga purepure,” i atoro atu ei i te tamaiti ko Iesu, kare i akakiteia mai, e kare e tumuanga papu no te irinakianga peu taito e e toru tangata; e kare katoa to ratou ingoa i taikuia i roto i te tataanga Pipiria.

Te akakite maira te New International Version Study Bible i teia manako no runga ia Mataio 2:11 e: “Ei tukeanga ki te peu taito, kare te Taunga Purepure i atoro ana ia Iesu i roto i te are puakatoro i te po o tona anauanga mei ta te au tiaki mamoe rai i rave. Kua aere mai ratou i nga mea marama i muri mai e kua atoro atu iaia ei ‘tamaiti ra’ i roto i tona ‘are.’” Kua akapapuia teia e te tikaanga e, ia Heroda e kimi ra i te ta i te tamaiti meangiti, kua akaue aia kia tamateia te au tamariki tamaroa pouroa e rua mataiti aere mai ki raro i te au ngai katoatoa o Betelehema e tona au tapere. Kua takete aia i te pupu mataiti na te tareanga “mei te tuatau mairai tana i ui marie i te au tangata pakari [me kore, te aronga akara etu] ra.”​—Mataio 2:16.

Naringa teia aronga akara etu i atoro atu ia Iesu i te po o tona anauanga e kua apai mai i te auro e tetai atu au apinga oko maata, kare e tano e ka oronga ua a Maria e rua manu rikiriki, e 40 ra i muri ake i tona oronga anga ia Iesu i ko i te iero i Ierusalema. (Luka 2:22-24) E akanoonooanga te reira i raro i te Ture no te au tangata putaua kare e peke ia ratou i te oronga i tetai punua mamoe toa. (Levitiku 12:6-8) Inara, penei kua tau meitaki tikai e kua puapinga katoa teia au apinga aroa oko maata ei moni tauturu i te nooanga te pamiri o Iesu i Aiphiti.​—Mataio 2:13-15.

Eaa i pou ei e a ra ia Iesu i te tae atu anga ki te tanumanga o Lazaro?

I te akaraanga kua akakoro rai a Iesu kia akapera rai. Eaa tatou i karanga ai i te reira? E akamanako i te tataanga tei rekotiia e Ioane pene 11.

I te maki kino anga a Lazaro, e tangata no Betania e e taeake no Iesu, kua tono atu tona nga tuaine i tetai karere kia akakite kia Iesu. (Irava 1-3) I taua taime ra, e rua ra e ara te mamao ia Iesu mei ia Betania. (Ioane 10:40) I te akaraanga kua mate a Lazaro i te taime paa i tae atu ei te nuti kia Iesu. Eaa ta Iesu i rave? Kua “noo iora aia i taua ngai ra e po rua,” e oti kua aere atu aia ki Betania. (Irava 6, 7) No reira, i te tiakianga e rua ra e te teretere anga e rua ra, kua tae atu aia ki te tanumanga o Lazaro e a ra i muri ake i mate ei a Lazaro.​—Irava 17.

I mua atu ana, kua rave a Iesu e rua tuakaouanga​—tetai i muri mai tikai i te mate anga tetai tangata e tetai mai, i te akaraanga i muri roa mai i te ra tikai o te mateanga. (Luka 7:11-17; 8:49-55) Ka rauka ainei iaia i te akatu i tetai tangata tei mate e a ra e kua akamata ke ana tona kopapa i te pe? (Irava 39) Ma te umere, te karanga ra tetai tataanga Pipiria e i rotopu i te au ngati Iuda, te vai ra te irinakianga e kare e manakonakoanga no tetai tangata tei mate ke ana e a ra; i taua taime ra te kite uaia atura e kua pe te kopapa, e te meta, tei manakoia e te panu ra i rungao i te kopapa e toru ra, kua akaruke atura.”

Me kua ekoko te aronga tei akaputu atu i ko i te tanumanga, ka kite mai ratou i te mana o Iesu i rungao i te mate. I te tu anga i mua i te tanumanga e tuera ua ra, kua kapiki atura a Iesu ma te reo maata e: “E Lazaro, ka aere mai ki vao!” E oti, “kua aere maira taua tangata i mate ra ki vao.” (Irava 43, 44) Ko te tuakaouanga tikai te manakonakoanga no te aronga mate, kare e ko te manako pikikaa o te manganui e ka ora ua atu rai te meta i muri ake i te mateanga.​—Ezekiela 18:4; Ioane 11:25.