Ta Iehova i Totou Mai ka Akatupuia

“KO AU oki te Atua, e kare atu; ko au te Atua, e kare atu e aite iaku nei: I te akakite anga i te openga mei te muatangana mairai, e mei te au tuatau taito mairai i te au mea e kare i tupu ra.” (Isaia 46:9, 10) I karanga ai a Iehova, tei rauka i te totou mai tikai i te tuatau ki mua ma te kore e tarevake.

Kua kite ateaia e kare e rauka i te tangata i te totou tika mai i te tuatau ki mua. I te mea e e puka no te totou anga te Pipiria te riro ra i te akakeu i te aronga katoatoa te kimi ra i te tuatua mou kia makitoro marie i ta te reira e karanga ra e ko te Atua te Tumutata. Ka akamanako ana tatou i etai au totou Pipiria tei tupu ke ana.

Au Taiate Tangata Taito

Kua totou mai te Atua e ka takore takiriia a Edoma, Moabi, e Amona. (Ieremia 48:42; 49:17, 18; 51:24-26; Obadia 8, 18; Zephania 2:8, 9) Te ngaro anga teia au iti tangata nei ei pupu pa enua takake te akapapu maira i te tu tika tikai no ta te Atua Tuatua totou.

E tika rai, penei ka akaapa tetai te rauka ra i te totou mai e ka takore takiriia tetai pa enua, noatu e mei teaa te ririnui. Inara te kopae ra taua akaapaanga ra i te manako puapinga maata e e maata atu te au akataka anga ta te Pipiria i akakite mai. Ei akaraanga, kua oronga mai te reira i te au akataka anga e akapeea tikai to Babulonia uritumuia anga. Kua akakite mai te Pipiria e ka autuia taua oire ra e Madai, e tei raro ake te au vaeau kaitamaki i te aratakianga a Kuro, e ka maro te au kauvai te paruru ra i te oire.​—Isaia 13:17-19; 44:27–​45:1.

I roto i te au turanga ravarai kare te Pipiria i totou mai ana e ka takore takiriia e tuatau ua atu tetai pa enua me kore te iti tangata autuia. Ei tuke anga, i te totou anga i te uritumuia anga e to Babulonia a Ierusalema, kua karanga te Atua e ka kite te oire i tetai oki akaou anga, noatu e kua e ture na te Babulonia e kare rava aia e tuku i tona aronga tuikaa kia aere. (Ieremia 24:4-7; 29:10; 30:18, 19) Kua akatupuia teia, e kua vai ua rai te uanga o te ngati Iuda ei iti tangata takake e tae ua mai ki teia tuatau.

Pera katoa, kua totou mai a Iehova e ka uritumuia a Aiphiti ki raro ei mana tutara o te ao inara ka “tangataia ra te reira a muri ake, mei tei te au rā taito ra.” Me tae te tuatau, “ka riro  [teia mana tutara taito] ei basileia akaaka.” (Ieremia 46:25, 26; Ezekiela 29:14, 15) Kua tupu katoa mai teia. Kapiti atu, kua totou mai a Iehova e ka uritumuia a Ereni ki raro ei mana tutara o te ao, inara kare rava aia i karanga ana e ka ngaro takiri teia pa enua. Eaa ta tatou i kite mai i te ngaro anga te au taiate tangata ta Iehova i totou mai ana e ka akapouia e te vai anga o tetai tu taiate tangata kare aia i totou mai ana e ka takoreia? e vai ra i roto i te Tuatua a te Atua te totou tika, irinakiia tikai.

Akataka Anga Umere

Mei tei akakiteia mai i runga akenei, e manganui te au akatakaanga ta Iehova i oronga mai i te tu o te inga anga a Babulonia. Mei te reira katoa rai, i te akakite anga mai i te akapouia anga a Turia, te karanga ra te puka a Ezekiela e ko tona au toka, tona rakau, e te one pueu ka tukuia “ki raro i te moana.” (Ezekiela 26:4, 5, 12) Kua akatupuia teia totou i te mataiti 332 M.T.N. i te taangaanga anga a Alexander te Tangata Rongonui e tona vaeau i te au pueu o te tuanga maata o te oire tei autuia kia patu i tetai mataara ki te tuanga o te motu o Turia, tei autu katoaia.

Te oronga katoa maira te totou tei tataia i roto ia Daniela 8:5-8, 21, 22 e te 11:3, 4 i te au akakite anga umere no runga i tetai ‘ariki maata tikai no Eleni.’ Ka mate teia tutara i te take o tona tutara anga, e oti ka tua taki a ia tona patireia kare ra e i rotopu i tona uanga. Kua tere atu e 200 mataiti i muri ake i te tataia anga teia totou nei, kua riro mai e ko Alexander te Tangata Rongonui taua ariki ririnui ra. Te akakite maira te tuatua enua o teianei ao kia tatou e kua mate aia i tetai mate manako koreia e i te openga kua tuaia tona patireia i rotopu i tona au rangatira vaeau e a​—kare ki tona uanga.

Kua karanga te aronga akaapa e kua tataia teia totou nei i muri ake i tupu ei te reira. E akara akaou ana i te papaanga tei taikuia mai i runga akenei i roto i te puka o Daniela. Me akaraia mei te manako totou anga ra, e mea umere tikai ta  te reira au akataka anga. Inara me akamanakoia ei tuatua enua maani pikikaa uaia ei totou anga, i te akara anga kare ainei tikai e te ngere ra i te akataka anga? Me te tauta ra tetai tangata pikikaa tei ora mai i muri ake ia Alexander i te akareka ua i te aronga tatau ki tetai totou tamanako ua, eaa ra aia i kore ei i kapiti mai ana i te tumu manako e i muri ua ake i te mateanga a Alexander, e rua ana nga tamaroa tei tauta i te akanoo i to raua taoonga ariki inara ka tamateia? Eaa ra aia i kore ei i taiku mai e e manganui te au mataiti i mua ake ka akamata ai te au rangatira katoatoa e a ra i te tuku ia ratou uaorai ki rungao i te au tuanga tukeke o te patireia o Alexander? No taua tumu ra, eaa ra aia i kore ei i taiku mai i te au ingoa o te ariki maata, e tona au rangatira e a?

Kua roa te manakoia anga te tuatua e kua tataia te totou Pipiria i muri ake i tupu ei te reira, inara kare i akapapuia mai ana e te aronga tei iki mai i mua ake i akara ai ratou i te akapapuanga, e ko te au tupuanga tei totouia mai no te tuatau ki mua kare te reira e rauka. No te mea kua patoi ratou i te ariki i te Pipiria ei Tuatua na te Atua, kua akaueia ratou kia akamarama mai i te au mea ravarai mei te tumu manako tikai o te tangata. Noatu rai, kua akauru meitaki mai te Atua e kia rava ua te akataka anga totou no te akanoo anga e nana i tata i te reira. *

Ka rauka i te totou Pipiria i te akaketaketa i toou akarongo me akamanako marie koe i te au totou tikai e te tupu anga mai o te reira. Eaa ka kore ei e rave i tetai apiianga i te totou Pipiria? Penei ka riro mai te au tiati i runga i te kapi 343 ki te 346 o te puka “All Scripture Is Inspired of God and Beneficial” ei mea puapinga kia koe i roto i taua turanga ra. * Me aru koe i teia akakiteanga, e akara i te apiianga ma te akakoroanga ei akaketaketa anga i toou akarongo. Auraka e rapurapu ua i te tatau ua i te apii. Inara, e akamanako meitaki i te tikaanga e noatu e eaa ta Iehova i totou mai ka tupu tikai te reira.

[Au Tataanga Rikiriki i Raro]

[Pia/​Tutu i te kapi 24]

AU KAVEINGA NO TE ORAANGA

Teia tetai manako kia akamanakoia. Ko te Atua tei totou mai tikai i te tu anga e te inga anga te au mana tutara o te ao koia katoa te Tumu o te au kaveinga Pipiria no te oraanga. Teia ra tetai koia oki:

Ko taau i ruru ko taau ia ka kokoti.​—Galatia 6:7.

E mea meitaki i te oronga atu i te rave mai.​—Angaanga 20:35.

Tei runga te mataora te rauka anga mai te akamerengo anga i te au anoano i te pae vaerua.​—Mataio 5:3.

Me tuku koe i teia au kaveinga kia taangaangaia i roto i toou oraanga, papu ia koe e ka riro mai te reira ei mea puapinga tikai kia koe.

[Tutu i te kapi 22, 23]

Kua totou mai te Tuatua a te Atua i te taopenga takiriia anga teia au taiate tangata . . .

EDOMA

BABULONIA

. . . inara kare no teia

ERENI

AIPHITI

[Au Akameitakianga]

Pictorial Archive (Near Eastern History) Est.

WHO photo by Edouard Boubat

[Tutu i te kapi 23]

Alexander te Tangata Rongonui