Te Rotai ra Ainei te Mea Tupu ua Mai ki te Pipiria?

KA TAU ainei e kua taangaanga te Atua i te mea tupu ua mai i te maani i te au tangata mei te au animara? Kua akaue ainei te Atua i te pakiteria kia riro mai ei ika e oti kia tupu ua atu ei au manu totoro e ei au mammal, e i te openga iora kua riro mai tetai katiri mangiki ei au tangata? Tetai au taineti e te au arataki akonoanga e irinaki ana ratou i nga mea e rua, te apiianga o te mea tupu ua mai e te Pipiria. Te karanga ra ratou e ko te puka Pipiria a Genese e parapore ia. Penei i akamanako ana koe e, ‘Te rotai ra ainei te apiianga e kua tupu ua mai te tangata mei te au animara ki ta te Pipiria?’

Te maramaanga i to tatou kapuaanga mai e puapinga tikai kia marama tatou e koai tatou, te aere nei tatou kiea, e akapeea tatou i te nooanga. I te kite ua anga i te kapuaanga mai o te tangata e marama ei tatou e eaa te Atua i akatika ua ai te mamaeanga e tona akakoroanga no te tuatau o te tangata ki mua. Kare rava e rauka ia tatou tetai pirianga mataora ki te Atua me kare tatou e papu ana e koia Tei Anga mai ia tatou. No reira ka akara matatio tatou e eaa ta te Pipiria e karanga maira no te kapuaanga mai o te tangata, tona turanga i teianei, e tona tuatau ki mua. I reira tatou e kite ei e me te rotai ra te apiianga o te mea tupu ua mai ki te Pipiria.

Okotai ua rai Tangata

Te karanga nei te aronga irinaki i te mea tupu ua mai e ko tetai tareanga animara ka tupu marie ua ki roto i tetai tareanga tangata, i te patoianga e i tetai tuatau i vai ana okotai ua rai tangata. Inara, te akaari maira te Pipiria i tetai rekotianga tuke takiri. Te karanga ra e kua kapuaia mai tatou mei te tangata okotai, ko Adamu. Te akaari maira te tataanga Pipiria ia Adamu ei tangata tika tikai. Te oronga maira kia tatou i te au ingoa o tana vaine e tetai o tana au tamariki. Te akakite taka meitaki katoa maira te tataanga i tana i rave, eaa tana i tuatua, i naea aia i ora ai, e i naea aia i mate ei. Kare a Iesu i manako ana i te reira tataanga ei tua maani ua no te aronga kare i apiiia ana. I te tuatuaanga ki te au arataki akonoanga apii teiteiia, kua karanga aia e: “Kare rai kotou i tatau e, ko tei anga ia raua i muatangana, i anga ïa i te tane okotai e te vaine okotai?” (Mataio 19:3-5) Kua taiku atu i reira a Iesu i te au tuatua no Adamu e Eva tei rekotiia i roto ia Genese 2:24.

Ko Luka, e tangata tata Pipiria e e tangata tuatua enua, te akakite maira ia Adamu e e tangata tika tikai mei a Iesu rai. Kua tata mai a Luka i te papaanga o Iesu tei tae rava atu ki te tangata mua. (Luka 3:23-38) Pera katoa, i te tuatuaanga atu te apotetoro ko Paulo ki te au tangata te kapiti maira te aronga apii teitei tei apiiia i roto i te au apii rongonui Ereni, kua akakite aia kia ratou e: “Ko te Atua i anga i teianei ao, e te apinga tini ravarai i roto, . . . i anga i te tangata i te pa enua katoa nei i te [“tangata okotai,” NW] ei noo i te pa enua katoatoa nei.” (Angaanga 17:24-26) Taka meitaki ua e, te apii maira te Pipiria e kua na roto mai tatou i te “tangata okotai.” Te rotai ra ainei ta te Pipiria e tuatua maira i te kapuaangaia mai te tangata ki te mea tupu ua mai?

Topaanga te Tangata mei te Tu Apa Kore

Kia tau ki ta te Pipiria, kua anga a Iehova i te tangata mua kia apa kore. Kare rava e rauka i te Atua  i te anga i te au apinga i tetai atu tu. Te karanga ra te tataanga no te au mea angaia e: “Kua anga iora oki te Atua i te tangata i tona uaorai tu . . . Akara akera te Atua i te au mea katoa tana i anga, e i na, te meitaki roa ra.” (Genese 1:27, 31) Eaa te tu o te tangata apa kore?

E tu rangatira to te tangata apa kore e ka rauka iaia i te aru i to te Atua au tu katoatoa. Te karanga ra te Pipiria e: “Kua anga te Atua i te tangata ma te tiratiratu, kua kimi ra ratou i te au ravenga e manganui.” (Koheleta 7:29) Kua iki a Adamu i te meameaau ki te Atua. Na tona meameaau anga, kua ngere a Adamu i te tu apa kore nona uaorai e no tona uanga. Te topaanga te tangata mei te tu apa kore te akamarama maira i te tumu e akataitaia putuputu ana tatou ia tatou uaorai, noatu e te inangaro ra tatou i te rave i te mea meitaki. Kua tata te apotetoro a Paulo e: “E ko taku e anoano ra, kare au e rave; ko taku ra mea makitakita ra, ko taku ïa e rave nei.”​—Roma 7:15.

Ka noo te tangata apa kore ma te kore e maki e mutu kore ua atu, i na te Pipiria ai. Ka kitea uaia mei ta te Atua i tuatua kia Adamu e naringa te tangata mua i akarongo ki te Atua, kare rava aia e mate. (Genese 2:16, 17; 3:22, 23) Kare a Iehova e akakite i te anga anga o te tangata e e “meitaki roa ra” me ka makiia me kore ka meameaau te tangata. Te topaanga mei te tu apa kore te akamarama maira e eaa ra te kopapa tangata, noatu e kua anga meitaki tikaiia, ka kino ei e ka makiia. No reira i kore ei te mea tupu ua mai e rotai ki te Pipiria. Te oronga maira te mea tupu ua mai i te tangata ou kia riro ua atu ei animara meitaki atu. Te oronga maira te Pipiria i te tangata ou, ei uanga te kino atura te kopapa no te tangata apa kore.

Kare katoa te manako e te akatere ra te Atua i te mea tupu ua mai kia anga mai te tangata ra e rotai ana ki ta te Pipiria e karanga ra no runga i te tu o te Atua. Naringa e na te Atua e arataki ana i te ravenga no te mea tupu ua mai, ko te aiteanga i reira te arataki ra aia i te tangata i teianei ki roto i te tu maki e te taitaia. Inara, te karanga ra te Pipiria no te Atua e: “Ko te Mato aia ko tei tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu! Kua kino ratou, kare oki to ratou titoutou i to tana ra au tamariki.” (Deuteronomi 32:4, 5) No reira, kare te mamae anga o te tangata i teianei ei tupuanga no ta te Atua akatereanga i te mea tupu ua mai. E tupuanga no ta te tangata okotai akakoreanga i te tu apa kore nona uaorai e tona uanga i te meameaau anga ki te Atua. I teianei kua uriuri ana tatou no Adamu, ka akara atu tatou ia Iesu. Te rotai ra ainei te mea tupu ua mai ki ta te Pipiria e karanga ra no Iesu?

Ka Irinaki Ainei Koe i te Mea Tupu ua Mai e te Akonoanga Kerititiano?

“I mate te Mesia i ta tatou nei ara.” Kare e kore kua kite koe e, ko tetai apiianga mua teia a te Akonoanga Kerititiano. (1 Korinetia 15:3; 1 Petero 3:18) Kia kitea e eaa i kore ei te mea tupu ua mai e rotai ki tera akakiteanga, ka anoanoia tatou na mua kia marama e eaa te Pipiria i kapiki ei ia tatou ei aronga ara e eaa ta te ara e akatupu nei kia tatou.

 E aronga ara pouroa tatou na roto i te tu e kare e rauka ia tatou i te aru apa kore i te au tu kaka o te Atua, mei tona aroa e te tu tika. No reira, te Pipiria i karanga ai e: “Kua rave katoatoa oki i te ara, e kua ngere i te akameitaki a te Atua.” (Roma 3:23) Te apii maira te Pipiria e na te ara i akatupu i te mate. “To te mate nei tara, ko te ara ïa,” i karanga ai a 1 Korinetia 15:56. Ta tatou tuanga no te ara tetai katoa ia tumu maata no te maki. Kua tou mai a Iesu e e piri anga tetai i rotopu i te maki e to tatou tu ara. Kua tuatua aia ki tei akangoru e, “Kua akakoreia taau ara,” e kua meitaki te reira tangata.​—Mataio 9:2-7.

Akapeea to Iesu mateanga i te tauturu anga ia tatou? Te akatuke ra te Pipiria ia Adamu kia Iesu Karaiti e te karanga ra e: “Mei te tangata i ope i te mate ia Adamu, e ope katoa i te akaoraia e te Mesia.” (1 Korinetia 15:22) Na te akaatinga anga i tona oraanga, kua tutaki a Iesu i te oko no te ara tei iri mai ki runga ia tatou mei a Adamu. No reira, ko te katoatoa rava e irinaki ra i roto ia Iesu e te akarongo ra iaia ka rauka mai tei ngere ia Adamu​—te manakonakoanga no te ora mutu kore.​—Ioane 3:16; Roma 6:23.

Te kite ra ainei koe, i reira e, kare te mea tupu ua mai e rotai ana ki te Akonoanga Kerititiano? Me te ekoko ra tatou e “mei te tangata i ope i te mate ia Adamu,” akapeea tatou i te manakonakoanga atu e “e ope katoa i te akaoraia e te Mesia”?

Te Tumu i Reka ai te Tangata i te Mea Tupu ua Mai

Te akakite maira te Pipiria e akapeea te reira au tu apiianga mei te mea tupu ua mai i inangaro maataia ai. Te karanga ra e: “Te vaira te tuatau e kare ratou e akarongo i te au apiianga oraora, inara, i tau ki to ratou uaorai au anoano, ka akaputu ratou i te au puapii no ratou uaorai kia akamainiiniia to ratou taringa; e ka uri ke ratou i to ratou au taringa mei te tuatua mou, e ka uri atu ratou ki te au tua pikikaa.” (2 Timoteo 4:3, 4, NW) Noatu e te orongaia maira te mea tupu ua mai i roto i te reo taineti, te tikaanga tikai e apiianga akonoanga te reira. Te apii ra i tetai manako tuke no te oraanga e tetai turanga ki te Atua. Ko tona au irinakianga e tu kikite i te akavare i te tu karapii, te au anoano takake o te tangata. Manganui tei irinaki i te mea tupu ua mai e karanga ana e te irinaki katoa ra ratou i te Atua. Inara, te manako tu rangatira ua ra ratou i te Atua e kare i anga i te au apinga, kare e akao mai ana ki roto i te au akaaerenga a te tangata, e kare e akava mai i te tangata. E irinakianga te tamainiini ra i te au taringa o te tangata.

Te akakeu putuputuia ra te au puapii o te mea tupu ua mai, kare e na te au tika tikai, mari ra na “to ratou uaorai au anoano”​—penei e anoano kia arikiia mai e te taokotaianga taineti e ko te mea tupu ua mai te apiianga irinaki maata rava atu. Ko te poropeta o te akatereanga no te kemikara o te au mea ora ko Michael Behe, ko tei akapou i te maataanga o tona oraanga i te apii i te tu ngata o te au angaanga i roto i te au teera ora, te akamarama maira e ko te aronga e apii ra i te mea tupu ua mai i te papaanga o te teera kare rava e tumu no ta ratou au tamanakoanga. Ka tupu ainei te mea tupu ua mai i te revera (level) molecular poepoe? “Ko te mea tupu ua mai no te molecular kare i akatumuia ki runga i te mana taineti,” i tata mai ei aia. “Kare e puka neneiia i roto i te au tataanga puka taineti​—i roto i te au tianara kite meitakiia, au tianara takake rava, me kore au puka—​te akataka maira e akapeea te mea tupu ua mai no te molecular no tetai ua atu tu tika, tu ngata, o tetai akatereanga no te kemikara o te au mea ora te mea tupu me kore penei i tupu ana . . . Te maroanga i te mea tupu ua mai no te molecular a Darwin e mea tamanako uaia.”

Me kare e au akamaramaanga a te aronga irinaki i te mea tupu ua mai, eaa ra ratou i maro ei kia akakite ua atu i to ratou au manako? Te akamarama maira a Behe e: “Manganui te tangata, kapiti mai e manganui te au taineti puapinga e te akangateiteiia, e kare e inangaro ana i tetai ua atu apinga i vao mai i te tu natura.”

Te rekaia ra te apiianga o te mea tupu ua mai e te au orometua e inangaro ra kia akaraanga kite ratou. Te aiteia atura ratou ki te aronga ta te apotetoro ko Paulo e akataka ra i roto i tana reta ki te au Kerititiano o Roma. Kua tata a Paulo e: “Ko te au mea ravarai o te Atua e kitea ra, te vai ua nei ïa ia ratou . . . Te au mea oki nona tei kore e tau kia akara ra, tei kitea puia nei ïa, i te au mea katoa i  angaia nei, mei te maani anga mai i teianei ao; koia oki, tona ra mana mutu kore anga, e te Atua anga; kare ua atura o ratou kotoe anga. No te mea e, kite ua rai ratou e, e Atua, kare ratou i akakakā iaia i tei tau i te Atua ra, kare oki i akameitaki atu; riro atura ta ratou eumiumianga ei mea puapinga kore, e to ratou ngakau manako kore, poiri atura ïa: I akatangata pakari oki ratou, e riro atura ei neneva.” (Roma 1:19-22) Akapeea koe i te kopae anga kia kore koe e akavareia e te au puapii pikikaa?

Akapapuanga Tumuia ki Runga i te Akarongo i Tei Anga Mai

Te akateiaa maira te Pipiria i te puapinga o te akapapuanga i te akatakaanga mai i te akarongo. Te karanga ra e: “E teianei, ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei.” (Ebera 11:1) Te akarongo mou i te Atua ka akatumuia ki runga i te akapapuanga te akatutu maira i te tu tika tikai o Tei Anga mai. Te akaari maira te Pipiria e ka kitea e koe taua akapapuanga ra kiea.

Kua tata te tangata tata Pipiria akauruia ko Davida e: “Ka akameitaki au ia koe, e mea mataku e te taka ke oki toku anga angaia.” (Salamo 139:14) Te akapou anga i te taime i te akara i te tu umere i te maanianga i to tatou uaorai kopapa e etai atu au mea ora te akatupu ra ki roto ia tatou i te tu vavaria ua i te pakari o Tei Anga mai ia tatou. Te au tuanga o te au akatereanga e tauatini ua atu e taokotai ra i te akaora ua mai ia tatou e mea maani meitaki tikaiia. Pera katoa, te ao e pini ua ake te akaari maira i te akapapuanga o te tareanga tano meitaki tikai e te mako. Kua tata a Davida e: “Te tuatua nei te au rangi i te kakā o te Atua; e te akakite nei te reva i te angaanga a tona rima.”​—Salamo 19:1.

Te Pipiria uaorai e tumu maata ia no te akapapuanga mai i Tei Anga mai. Te akapou anga i te taime i te akara matatio i te tu rotai o te au puka e 66, te ngateitei no tona au tu tau, e te akatupu papu meitakianga i te au tuatua totou ka oronga atu kia koe e manganui ua atu te akapapuanga e ko tona tumutata ko Tei Anga mai. Ko te marama anga i te au apiianga Pipiria ka oronga katoa atu kia koe te irinakianga e ko te Pipiria, e tika rai, e Tuatua na Tei Anga mai. Ei akaraanga, me marama koe i te reira au apiianga Pipiria mei te tumu o te mamae anga, te Patireia o te Atua, te tuatau o te tangata ki mua, e te mataara e kitea ai te mataora, ka kite koe i te akapapuanga e akatutu maira i to te Atua pakari. Penei ka aite toou manako ki to Paulo i te tataanga e: “Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e!”​—Roma 11:33.

Ia koe e akara matatio ra i te akapapuanga e te tupu ra toou akarongo, ka riro koe i te akakeuia e me tatau koe i te Pipiria, te akarongo atura koe ki Tei Anga mai tikai. Te karanga ra aia e: “Naku uaorai te enua nei i anga, e te tangata katoa i rungao, naku rai i anga: e na toku uaorai rima i oora i te rangi; e naku i akaue i to reira au nuku ravarai ra.” (Isaia 45:12) E mea papu e kare rava koe e tataraara i te tautaanga i te akapapu kia koe uaorai e ko Iehova Tei Anga mai i te au apinga katoatoa.

[Tataanga i te kapi 14]

Kua akakite te apotetoro a Paulo ki te aronga apiiia o Ereni e: ‘Anga te Atua i te tangata i te pa enua katoa nei i te tangata okotai’

[Tataanga i te kapi 15]

Te oronga maira te mea tupu ua mai i te tangata ou kia riro ua atu ei animara meitaki atu. Te oronga maira te Pipiria i te tangata ou ei uanga te kino atura te kopapa no te tangata apa kore

[Tataanga i te kapi 16]

“Ko te mea tupu ua mai no te molecular kare i akatumuia ki runga i te mana taineti”

[Tataanga i te kapi 17]

Te tu umere i te maanianga i te au mea ora te akatupu ra ki roto ia tatou te tu vavaria o te pakari o Tei Anga mai ia tatou