Ka Ui ta Tatou Aronga Tatau

Tei Roto Ainei te Patireia o te Atua i Toou Ngakau?

Te irinaki nei te manganui i teia tuatau e te pauanga no te uianga i runga akenei e ae. Ei akaraanga, te tuatua ra The Catholic Encyclopedia e: “Te aiteanga o te patireia o te Atua . . . ko te tutaraanga a te Atua i roto i to tatou ngakau.” E apii putuputu ana te orometua i teia manako. Te apii tikai ra ainei te Pipiria e te noo ra te Patireia o te Atua i roto i te au ngakau tangata?

Te manako ra tetai aronga e na Iesu uaorai i akamata i te turuturu i te manako e tei roto te Patireia o te Atua i te au ngakau o te tangata. Kua tuatua a Iesu e: “I na oki, te patireia o te Atua tei rotopu ia kotou na.” (Luka 17:21, NW) Te karanga ra tetai au urianga i konei e: “Tei roto ake te patireia o te Atua ia kotou” me kore tei “roto ia kotou.” E tika ainei tera au urianga ki ta Iesu i tuatua? Te irinaki ra ainei aia e tei roto te Patireia o te Atua i te au ngakau tangata?

Te mea mua, e akamanako ana e eaa te ngakau tangata. Me taikuia mai i roto i te Pipiria, te ngakau akatutu ko te aiteanga koia oki ko te tangata o roto, te tumu o tona au manako, te au tu, e te au manako ngakau. Te manako e te vai ra tetai apinga ngateitei mei te Patireia o te Atua i roto i te ngakau tangata​—i roto i te tu e taui ra e e akangateitei ra i te tangata, ei akaraanga—​penei ka tangianga reka, inara e mea tau ainei?

Te karanga maira te Pipiria kia tatou e: “E pikikaa maata to te ngakau i te au mea katoa nei, e kua kino takiri.” (Ieremia 17:9) Kua tuatua a Iesu uaorai e: “No roto mai oki no roto i te ngakau tangata, te manako kikino, te moeaana te akaturi, te ta tangata, te keia, te noinoi apinga, te vareae, te pikikaa, te kanga, te manava kino.” (Mareko 7:20-22) E akamanako ana: Kare ainei te maata anga o te taitaia, ta tatou e kite nei i roto i teianei ao i teia tuatau e taki atu ana ia tatou ki te akamataanga i te tu ara o te ngakau tangata? No reira akapeea roa ai te Patireia apa kore o te Atua ka rauka mai ei no tetai tumu mei tera? E tikai, kare e rauka i te ngakau tangata i te oronga mai i te Patireia o te Atua mei te rakau taratara rai kare e ua mai i te au tuke.​—Mataio 7:16.

Te rua, e akamanako ana i te aronga ta Iesu e tuatua atura i tona tuatua anga i te au tuatua tei kitea ia Luka 17:21. Te tatau ra te irava i mua ake e: “I uiia mai aia e te au Pharisea, i te tupu anga o te basileia o te Atua; kua karanga atura aia kia ratou.” (Luka 17:20) E enemi te au Pharisea no Iesu. Kua akakite atu a Iesu e kare taua au pikikaa ra e tomo ki roto i te Patireia o te Atua. (Mataio 23:13) No reira me kare te au Pharisea e tomo ki roto i te Patireia o te Atua, ka tau ainei e tei roto te Patireia i to ratou au ngakau? Kare rava! Eaa i reira, te aiteanga o ta Iesu tuatua?

I te urianga i teia au tuatua a Iesu, te taangaanga ra tetai au urianga Pipiria mako meitaki i te au tuatua aite atu ki te tataanga i roto i te New World Translation. Te karanga ra tetai aronga e tei “roto ia kotou” me kore tei “rotopu ia kotou” te Patireia. Akapeea ake te Patireia o te Atua i riro ei i rotopu i taua au tangata i taua taime ra, kapitiia mai te au Pharisea? I na, ko Iesu ta te Atua ko Iehova i iki ei Ariki no te Patireia. Ei Ariki Akataoongaia, tei rotopu tikai a Iesu i taua aronga tangata ra. Kua apii aia i taua Patireia o te Atua ra e kua rave katoa i te au angaanga temeio, i te oronga anga kia ratou tetai akaraanga ki mua i ta te Patireia ka rave. I roto i tetai tu tika, i reira, tei rotopu rai te Patireia ia ratou.

Taka meitaki tikai e, kare e turuanga Tuatua Tapu no te manako e tei roto te Patireia o te Atua i te au ngakau o te tangata. Ei tukeanga, e kavamani tikai, te ka apai mai i te au tauianga puapinga ki runga i te enua nei, mei tei totouia e te au peroveta.​—Isaia 9:5, 6; Daniela 2:44.