Akaariia Mai te Mana o te Atua i Roto i te Au Etu

“Ka nānā na i to kotou mata ki runga, ka akara: naai te reira i anga? te arataki ra aia i taua au nuku ra ki vao ma te tatauia: kua tapa anakeia to ratou au ingoa e ia; no tona ra ririnui, e te mana maata, i kore ei tetai i ngaro.”​—ISAIA 40:26.

TO TATOU ra, e etu tano ua tona maatamaata. Noatu rai, e 330,000 taime i te maata atu o tona tu maatamaata i te maatamaata o te enua. Te maataanga o te au etu i te pae mai, e meangiti ake ratou i te ra. Ko tetai au etu, mei te etu tei tapaia e ko V382 Cygni, e 27 taime tona maatamaata i to tatou ra.

Mei teaa rai te ririnui me vera mai to tatou ra? E akamanako ana e mei teaa tikai te ririnui o tetai ai i te ka anga mai, me e 15 kiro mita te mamao ia koe mei te reira e te kite ra rai koe i te vera. Mei te 150 mirioni kiro mita te mamao o te ra mei te enua nei. Inara, i tetai ra vera ka pakapakaia te pakiri e te ra! Ma te umere, okotai ua rai pirioni te ririnui o te ra e tae mai ana ki te enua nei. Noatu rai, ka rauka i teia tuanga meangiti ua o te ririnui o te ra i te akono i te oraanga i runga nei i te paraneta.

E tika rai, kua tareia e te au taineti e ka rava ua i te katoaanga o te ririnui tei aere mai no roto mai i to tatou ra i te akono i etai 31 tirioni paraneta mei te enua rai. Me kore me vaitoia teia aka ririnui na roto i tetai ua atu tu e: Me ka rauka i te ri pouroa i te ririnui o te ra no te okotai ua tekoni, ka rauka i te reira i te oronga kia Marike “te ririnui maata, i te maataanga o te ririnui ta Marike e taangaanga ra i teia tuatau, no te au mataiti e 9,000,000 e aere maira,” i karanga ai te Web site a te Space Weather Prediction Center (SWPC).

No rotopu roa mai i te ra te ririnui​—e apinga akatupu nukiria tei reru aere i te au atomu e tei akatupu maata mai i te ririnui. E maatamaata tikai te ra e e petetue tikai a rotopu i te reira e ka tae rai e e mirioni ua atu mataiti te ririnui tei akatupuia i rotopu i reira e mama mai ei ki runga. “Me akamutu ua te Ra i te akatupu i te ririnui i teia ra nei,” i karanga ai te Web site SWPC, “ka pou rai e 50,000,000 mataiti e kite tikaiia ai te au tupu anga i te Enua nei!”

E akamanako ana i teia tikaanga i teianei: Me nana ana koe i toou nga mata i te po manea tikai, e tauatini ua atu au etu taau ka kite, te mura maira tataki tai i tetai aka ririnui, tei aiteite ki to tatou ra. E i tare ana te au taineti e e pirioni e pirioni ua atu au etu i te ao katoa e pini ua ake!

Noea mai teia au etu? Te irinaki ra te maataanga o te aronga kimikimi i teianei e no tetai atu au tumu kare ratou i marama ana, e mea tupu poitirere ua mai teia ao katoa e pini ua ake i etai 14 pirioni mataiti i topa akenei. Te akakite ua maira te Pipiria e: “I muatangana ra, kua anga iora te Atua i te rangi e te enua.” (Genese 1:1) Kare e ekokoanga, ko Tei anga mai i te aka matini ririnui ta tatou e kapiki ra e ko te au etu ka tau kia akatakaia mai e e “mana maata” ia.​—Isaia 40:26.

Te Taangaanga Anga te Atua i Tona Mana

Te taangaanga ra te Atua ko Iehova i tona mana ei akamaroiroi i te aronga te rave ra i tona anoano. Ei akaraanga, kua taangaanga te apotetoro ko Paulo i tona maroiroi i te apiianga i etai ke no runga i te Atua. Kare a Paulo i te tangata ririnui atu i tetai ke, inara kua rauka iaia i te rave meitaki i te angaanga noatu te patoianga pakari. Akapeea ra? Kua kite mai aia e kua rauka iaia te “mana maata meitaki” no ko mai i te Atua.​—2 Korinetia 4:7-9.

 Kua taangaanga katoa ana te Atua ko Iehova i tona mana i te takore atu i te aronga tei aati akakoro tikai i tana au turanga tau. Kua tou mai a Iesu Karaiti i te takoreia anga a Sodoma e Gomora e ki te Vaipuke i to Noa tuatau ei au akaraanga e akapeea a Iehova i te taangaanga tau tikai anga i tona mana akapouanga ki runga ua i te aronga kino. Kua taputou mai a Iesu e kare e roa atu ka taangaanga akaou a Iehova i tona mana i te takore atu i te aronga tei kopae ke i Tona au turanga.​—Mataio 24:3, 37-39; Luka 17:26-30.

Akapeea Koe i te Akakeuia Anga?

I muri ake i te akamanako oonu anga no runga i te mana o te Atua tei kiteaia i roto i te au etu, penei te manako ra rai koe mei te Ariki ko Davida, tei tuatua e: “Kia akara au i to au rangi i te angaanga a to maikao-rima na; te marama e te au etu taau i anga ra; Eaa te tangata nei, i manako mai ei koe iaia? e ta te tangata nei tamaiti, i akono mai ei koe iaia?”​—Salamo 8:3, 4.

Ae, e tu akaaka te reira i te kite anga e e meangiti ua tatou me akaaiteia atu ki te tu atea mamao o te ao katoa e pini ua ake. Inara, eiaa tatou e manamanata no runga i te mana o te Atua. Kua akauru a Iehova i te peroveta ko Isaia kia tata i teia au tuatua akapumaana e: “Te oronga nei aia [te Atua] i te maroiroi no tei paruparu; e te akamaata nei aia i te maroiroi no tei apikepike. E potopoto te aʼo o te aronga mapu, e mate oki i te roiroi, e te au tangata ou, e inga takiri roa ïa ki raro: Ko te aronga ra e tapapa ia Iehova, e rauka ïa te maroiroi ou; e rere ratou ki runga i te peau mei to te au aeto ra; e oro ratou e kare e roiroi; e aere atu rai oki ratou, e kare ïa e potopoto te aʼo.”​—Isaia 40:29-31.

Me te inangaro ra koe i te rave i te anoano o te Atua, papu ia koe e ka oronga mai aia i tona vaerua tapu kia koe ei tauturu i te akamaroiroi ia koe. Inara e pati koe i te reira. (Luka 11:13) Ma te turuturuanga a te Atua, ka rauka ia koe i te tamou marie i tetai ua atu timataanga e kia rauka mai te maroiroi kia rave i te mea tika.

[Tataanga i te kapi 7]

Ma te turuturuanga a te Atua, ka rauka ia koe te maroiroi i te rave i te mea tika

[Au Tutu i te kapi 7]

Akamataanga i runga i te tua kaui: Ruakoko tarava, te pupu etu Matariki, te Iva-nui tarava, “Andromeda” tarava

[Au Tutu i te kapi 7]

Te tu maatamaata o te ra e 330,000 taime te maata atu i te maatamaata o te enua

[Au Akameitakianga no te Tutu i te kapi 7]

Pleiades: NASA, ESA and AURA/​Caltech; all others above: National Optical Astronomy Observatories