Ka Irinaki ua Ainei Tatou i ta Tatou e Kite Ra?

Te manako ra etai aronga e “kare rava e kiteaia te tikaanga i te au tumu mei te Atua e te oraanga no te tuatau ki mua ta te Akonoanga Kerititiano e tetai atu au akonoanga e manako ra. Me kore, me ka rauka te reira, kare ra e rauka i teia taime nei.”​—TANGATA KITE KARAPE KO BERTRAND RUSSELL, 1953.

TE TANGATA tei akataka mai i teia tu manako nei e tangata taineti apii i te au manu ko Thomas Huxley tona ingoa. Kua anauia i te mataiti 1825, e tai o Huxley tuatau raua ko Charles Darwin e e tangata tei turu i te apiianga no runga i te au mea tupu ua. I te mataiti 1863, kua tata a Huxley e kare aia i kite ana i te akapapu anga e e Atua tetai “te aroa maira ia tatou e te manako maira ia tatou mei ta te Akonoanga Kerititiano e akakite maira.”

E manganui i teia tuatau te ariki ra i te au manako o taua aronga rongonui, i te karanga anga e ka irinaki ua ratou i ta ratou e kite ra. Penei ka karanga mai ratou e, te irinaki anga i tetai tangata me kore i tetai apinga kare e akapapu anga e mea neneva ia.

Te akaue maira ainei te Pipiria e kia irinaki manako kore ua tatou i te Atua? E tuke ta te Pipiria apiianga. Te akaari maira te Pipiria e e kamakura​—e e neneva katoa—​i te irinaki anga i ta te au tangata i akakite mai, kare i turuia e te akapapu anga. “Te akarongo ra te kite kore i te au tuatua katoa ra,” i akakite mai ei te Pipiria, “te akara meitaki ra te tangata akono ra i tona takainga.”​—Maseli 14:15.

Akapeea i reira, no runga i te irinaki anga i te Atua? E akapapu anga tikai ainei tetai e te vai ua nei te Atua, e te aroa katoa maira ia tatou e te manako maira ia tatou?

Akaariia Mai te Au Tu o te Atua

Kua akakite mai te tangata tata Pipiria ko Paulo, iaia e tuatua ra ki te pupu tangata Atene tei apiiia i te apii teitei, e na te Atua “i anga i teianei ao, e te apinga tini ravarai i roto.” Kua akakite a Paulo ki te aronga manako ekoko te akarongo maira kiaia e te manako tikai maira te Atua i te au tangata ravarai e, ko te tikaanga, “kare ra aia i atea ke atu ia tatou katoa nei.”​—Angaanga 17:24-27.

Eaa ra i papu ei ia Paulo e te vai ua nei te Atua e te manako tikai maira i Tona au tangata i angaia? Kua akaari mai a Paulo i tetai tumu i te tataanga ki te au taeake Kerititiano i roto i te oire o Roma. Kua karanga aia no runga i te Atua e: “Te au mea oki nona tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao.”​—Roma 1:20.

Te akaari maira te au kapi e aru maira i nga tu e toru o te Atua tei kitea puia mei te au apinga i angaia e ia. Ia koe e akara matatio ra i teia au akaraanga, e ui kia koe uaorai e, I te apiianga i te au tu o te Atua ka akapeea te reira i te akakeu anga iaku?

[Tataanga i te kapi 3]

Kare te Pipiria e akaue maira e kia irinaki manako kore ua tatou i te Atua