Ta Tatou i Apii Mai mei ia Iesu

No Runga i te Patireia o te Atua

Eaa te Patireia o te Atua?

Ko te Patireia o te Atua e kavamani te ka tutara mai ki rungao i te enua katoa nei. Kua tuatua a Iesu e: “Na ko kotou kia pure: . . . Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:9, 10; Daniela 2:44.

Koai ma te au tutara o te Patireia o te Atua?

Kua anauia a Iesu ei Tutara no te Patireia o te Atua. Kua akakite tetai angera ki te metua vaine o Iesu e: “E na te Atu ra, na te Atua e oronga mai i te terono o tona metua o Davida nona: Ei iaia te au.” (Luka 1:30-33) Kapiti katoa mai, kua iki a Iesu i tetai o tana au pipi kia tutara i te pae iaia. Kua tuatua aia ki tana au apotetoro e: “Ko kotou ko te aronga e noo tamou i vaitata iaku i toku au timataanga nei: Mei toku metua i akono i tetai basileia noku ra, kua akono katoa au ia kotou.” (Luka 22:28, 29; Daniela 7:27) E 144,000 te katoatoa anga o te au pipi a Iesu ka tutara mai i tona pae.​—Apokalupo 5:9, 10; 14:1.

Ka akanooia te kavamani kiea?

Ka tutara mai te Patireia o te Atua mei te rangi mai. Kua tuatua a Iesu ki tana au pipi e: “Kua oti anake i te akamaneaia e au [i te rangi] ra, ka oki mai au, e arataki ia kotou ki oku ra; ei reira katoa kotou, i te ngai e nooia e au ra . . . te aere nei au ki taku Metua ra.”​—Ioane 14:2, 3, 12; Daniela 7:13, 14.

Eaa ta te Patireia o te Atua ka rave no te kino?

Ka tama a Iesu i te enua nei i te au tangata kino. Kua tuatua a Iesu e: “E kia tae maira te Tamaiti a te tangata [a Iesu] ma tona kakā, e te aronga angela tapu ravarai, ei reira aia e noo ei ki rungao i tona terono  kakā; E akaputuputuia to te pa enua ravarai ki mua i tona aroaro: e nana e akataka ia ratou . . . Ko te [aronga kino] ka aere ke ïa i te mate mutu kore, kareka te aronga tuatua-tika ra, ei te ora mutu kore ïa.”​—Mataio 25:31-34, 46.

Koai te ka noo i te enua nei ei au tangata no te Patireia?

Kua tuatua a Iesu e: “E ao to tei maru: e riro ia ratou te enua.” (Mataio 5:5; Salamo 37:29; 72:8) Ka akakiia te enua ki te au tangata e apii nei i teianei i te aroa ia ratou uaorai. Kua tuatua a Iesu ki tana au pipi e: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:34, 35.

Eaa ta te Patireia o te Atua ka rave no te tangata i runga nei i te enua?

Ka akaora a Iesu i te au maki o te tangata. Iaia i runga nei i te enua, kua tuatua a Iesu ki te tangata tini “no te basileia o te Atua, e akaora akera i te aronga maki.” (Luka 9:11) I muri ake i te kiteanga ia Iesu tei akatuakaouia i roto i tetai orama, kua tuatua te apotetoro a Ioane e: “E kite atura au i te rangi ou e te enua ou . . . Kua akarongo atura au i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua . . . E nana e orei i te roi-mata katoatoa; e e kore rava te mate.”​—Apokalupo 21:1-4.

Ka akaoki mai te Patireia o te Atua i te Parataito ki te enua nei. Ko tetai tangata rave kino tei tamate katoaia e Iesu kua tuatua e: “E te Atu, e akamaara mai koe iaku, kia tae koe ki toou basileia.” E kua tuatua atu a Iesu kiaia e: “Koia mou taku e karanga atu kia koe nei, ei Paradaiso taua katoa.”​—Luka 23:42, 43; Isaia 11:4-9.

No tetai atu akakiteanga, akara i te pene 8 o te puka Eaa Tikai ta te Pipiria e Apii Maira? *

[Tataanga Rikiriki i Raro]