“Tamaine Ngati Iseraela” no Teia Tuatau

I TE mataiti 2006, e rua epetoma i mua ake i te Akamaaraanga i te mate o Iesu, kua akapapa te mema tataki tai o te ngutuare Sales i Praia Grande, i Paratiri, i tetai papaanga no te aronga ta ratou ka inangaro i te pati. Kua orongaia atura kia Abigayl e ono ona mataiti okotai patianga e kua uiia atu kiaia e koai tana e inangaro ra i te oronga i te reira.

“Ko te tangata tei katakata ua mai ana kiaku,” i pau atu ei aia.

“Koai aia?” i ui mai ei tona nga metua.

“Te tangata i runga i te pereoo oparapara,” i pau atu ei aia.

E a ra i muri mai, kua tou atu a Abigayl i te tangata ki tona nga metua. Te ngai e noo ra te tangata, ko Walter, kare e mamao ana mei te Are Uipaanga Patireia. Mei te 15 mataiti i topa akenei, i tona 28 mataiti anga, kua kino tikai aia i roto i tetai u anga motoka e kua akangoru takiriia mei te kopu aere ua atu ki raro. E rua ona nga tangata paruru iaia, no te mea e tangata apinganui aia. I muri ake i te rauka anga mai te tikaanga kia tuatua atu a Abigayl kia Walter, kua akamarama atu tona nga metua kiaia e te inangaro ra ta raua tamaine i te oronga atu i tetai patianga kiaia.

I te oti anga tana tuatuaanga, kua tuatua atu a Abigayl e: “E maata ta te katoatoa au patianga i roto i to matou Are Uipaanga Patireia, inara e okotai ua rai aku patianga. No reira ko koe anake ua taku e pati atu nei. Me kare koe e aere mai, kare aku tangata. Inara me ka aere mai koe, ka mataora tikai au, e ka mataora rava atu rai a Iehova.”

I te ra o te Akamaaraanga, te tama aere ra te Au Kite, e Abigayl atu, i te Are Uipaanga Patireia i te teateamamao anga no te porokaramu o te Akamaaraanga i te aiai. I taua avatea ra ia Walter e pati ra, e te kite atu anga ia Abigayl, kua akakite atu aia ki tona tangata akaoro kia tapu i te motoka. Kua maeu mai te maramarama, e kua ui mai aia e eaa ta Abigayl e rave ra. Kua akakite atu aia kiaia e te tama ra ratou i te are uipaanga ei akamanea anga i te reira nona.

I taua aiai ra kua manamanata tikai a Abigayl. Kua akamata te akoanga, e kua akara aere aia e me kua tae mai rai a Walter. Kare i roa ana, kua tae mai aia e tona nga tangata paruru iaia. Katakata mataora tikai a Abigayl. I muri ake i te akoanga, kua akakite a Walter e te aere ra aia i runga i tetai tere ki tetai oire ke, inara kua taui aia i tona manako e kua aere mai ki te Akamaaraanga, no Abigayl. E kua tuatua mai aia e: “Ko te akoanga ia taku e inangaro ra i te akarongo.” Kua pati mai aia i tetai Pipiria e kua akamata i te apii e te aere maira ki te au uipaanga.

I taua taime rai, kua karanga mai te tuaine o Walter e e inangaro aia i te aravei i teia Abigayl, e taiku putuputu ua ana tona tungane iaia. I tona aravei anga iaia, rekareka tikai aia i te kite anga i te tu meitaki o teia tamaine ou ko Abigayl. “Kua kite au i teianei e eaa ra toku tungane i mataora ai,” i karanga ai aia.

Te apii nei e te aere ra rai a Walter ki te au uipaanga. Te paupau katoa ra aia e te akakite ra ki tetai ke i te au mea tana i kite mai. Papu tikai e te akamaara maira a Abigayl meangiti kia tatou i te tamaine ngati Iseraela tei tauturu ana ia Naamana kia kite mai i te Atua mou, ko Iehova.​—2 Ariki 5:2-14.