Akakoromaki Anga i te Mamae Ngakau

“Kua timata iora tana [Iakoba] katoa ra au tamariki tamaroa e te au tamaine katoa i te akapumaana iaia; kare akerai i tika iaia; e kua tuatua maira aia, E aere roa au ki raro i te vaarua ma te aue i taku tamaiti. Aue iora tona metua iaia.”​—GENESE 37:35.

KUA mamae pakari tikai te ngakau o te pateriareka ko Iakoba i te takakeanga tana tamaiti. Kua manako aia e ka mamae ua aia e tae ua atu ki te ra ka mate ei aia. Mei ia Iakoba rai, penei te manako ra koe e kare teia mamae oonu tikai no te takakeanga o tei akaperepereia e ngaro. Te akaari maira ainei taua mamae pakari tikai o te ngakau e e kare oou akarongo i roto i te Atua? Kare rava!

Te akataka maira te Pipiria ia Iakoba e e tangata akarongo aia. Kapiti mai i te pae i tona tupuna tane ko Aberahama e tona metua tane, ko Isaaka, kua akameitakiia a Iakoba no tona tu akarongo meitaki rava atu. (Ebera 11:8, 9, 13) I tetai atianga, kua kukumi katoa raua ko tetai angera i te katoaanga o te po kia rauka mai tetai akameitakianga mei te Atua! (Genese 32:24-30) No reira, papu e e pirianga ketaketa tikai to Iakoba kia Iehova. Eaa i reira ta tatou ka kite mai mei to Iakoba mamae ngakau? Koia oki, ka mamae pakari ua rai e ka mii rai tetai tangata akarongo meitaki i roto i te Atua me mate tei akaperepereia. E mea matauia te mamae ngakau me takake tetai ta tatou e akaperepere ra.

Eaa te Mamae Ngakau?

E tukeke te au tu ka rokoia tatou e te mamae, inara no te manganui ko te manako  ngakau maata rava atu, koia oki ko te pakari o te mamae i roto i te ngakau. E akamanako i tei tupu kia Leonardo, e 14 ona mataiti te mate poitirere anga tona papa no te maki pukuatu e te poupou ao. Kare rava i ngaropoina ana ia Leonardo te ra i akakite mai ei tona aniti i te nuti kiaia. I te akamataanga kare aia e irinaki ana e kua tupu te reira. Kua kite atu aia i te kopapa o tona papa i te tuatau tanumanga, inara kiaia kare e tika ana. Mei te ono marama, kare a Leonardo i aue ana. E maata te taime, kua tiaki ua aia i tona papa kia oki mai no te angaanga mai. E vaitata rai e e tai mataiti i te maramaanga tikai aia e kua mate tona papa. I tona maramaanga i te reira, maromaroa takiri aia. Te au mea matauia i roto i te oraanga​—mei te oki mai anga ki te kainga e kare e tangata​—ka maara ua rai iaia e kare tona papa i reira. I tetai au taime, ka aue maata aia. Kua mii tikai aia i tona papa!

Mei to Leonardo tupuanga e akatutu meitaki maira, e pakari tikai te mamae ngakau. Ko te nuti meitaki ra, ka rauka te tauturu. Inara, penei ka roa te tuatau. Mei tetai motu oonu i runga i te kopapa, ka roa te tuatau me meitaki mai te reira, pera katoa rai te mamae ngakau me mate tei akaperepereia. Te meitaki anga mai te mamae ngakau, penei ka pou te au marama, te au mataiti, me kore ka roa atu te reira. Inara, ko te mamae pakari taau i kite ra i te akamataanga ka maru mai te reira i roto i tetai tuatau, ma te tu marie, ka meitaki mai te oraanga.

Inara i teia taime, te karangaia ra e e tuanga tau te mamae ngakau no te rapakauanga e no te arikianga i teia turanga ou. Te ngai e tangata tetai i mua ana, i teianei kare e tangata. Te anoanoia ra tatou kia akatano ki te oraanga kare taua tangata ra i reira. Penei ka rauka i te mamae ngakau i te tauturu ia koe kia akakite koe i toou au manako ngakau. E tika rai, tukeke tikai te tu mamae ngakau o te au tangata katoatoa. Inara, okotai mea tika tikai: E kino tikai te tapu anga i toou mamae ngakau i te pae manako, te ngakau e te kopapa. I reira, akapeea koe i te akaari anga i toou mamae ngakau na roto i tetai au mataara meitaki? Te vai ra i roto i te Pipiria tetai akoanga tau. *

Akakoromaki i te Mamae Ngakau

E manganui te au tangata te mamae ngakau ra kua kite mai e ka rauka te tuatuaanga ei tauturu ia ratou i te tuku ua i to ratou mamae ngakau. Ei akaraanga, e akamanako ana i te au tuatua a te tangata i roto i te Pipiria, ko Iobu, kua mamae aia no te takakeanga tana tamariki e tai ngauru e kua akakoromaki aia i tetai ua atu au tumatetenga. Kua karanga aia e: “Kua iu rava toku vaerua i toku nei ora anga; ka tuku au iaku uaorai kia aue ua na; e tuatua rai au ma te mamae o toku nei vaerua.” (Iobu 1:2, 18, 19; 10:1) E akamanako e te anoano ra a Iobu kia ‘tuku ua’ aia ki tona au manamanata. Akapeea aia i te rave anga i te reira? Kua akamarama mai aia e ‘ka tuatua rai au.’

Ko Paulo, kua takake tona mama, kua karanga mai aia e: “Ko tetai au mea tei tauturu  mai iaku, koia oki ko te tuatuaanga no runga i toku mama.” No reira, te tuatuaanga i toou au manako ki tetai oa tu manava, ka oronga mai te reira i te pumaana. (Maseli 17:17) I muri ake i te takakeanga tona mama, kua pati a Yone i tona au taeake Kerititiano kia atoro putuputu mai iaia. “Na te tuatuaanga e tauturu i te akamaru mai i te mamae,” i karanga ai aia. Penei ka kite katoa koe e na te tukuanga i toou au manako ngakau na roto i te au tuatua e te akakiteanga i te reira ki tetai taeake aroa, ka ngoie ua i reira i te akakoromaki i te mamae.

Ka riro katoa te tataanga ei tauturu i te tuku ua anga i te mamae ngakau. Ko tetai aronga tei ngata ia ratou i te tuatua no runga i to ratou au manako ngakau, penei e ngoie ua ia ratou i te akakite mai i to ratou au manako na te tataanga i te reira. I muri ake i te mateanga a Saula raua ko Ionatana, kua tata te tangata akarongo mou ko Davida i tetai pee akaevaeva oonu, no te akakite mai anga i tona mamae ngakau. Kua riro mai teia pee ngakau oonu ei tuanga no te puka Rua a Samuela i roto i te Pipiria.​—2 Samuela 1:17–27.

Penei ka riro katoa te aueanga ei tauturu i te tuku ua anga i te mamae ngakau. “E atianga to te au mea katoa nei, e e . . . tuatau to te aue,” i karanga ai te Pipiria. (Koheleta 3:1, 4) E papu e, e “tuatau to te aue” me mate tetai tangata ta tatou e akaperepere ra. Kare te aueanga ei mea akama. E maata te au akaraanga i roto i te Pipiria no te au tane e te au vaine akarongo mou tei akakite ua mai i to ratou mamae ngakau na te aueanga. (Genese 23:2; 2 Samuela 1:11, 12) Kua “aue iorā” a Iesu Karaiti i tona aere vaitata atu anga ki te ngai tanumanga o tona oa akaperepere ko Lazaro, koi mate ua ake nei.​—Ioane 11:33, 35.

Te anoanoia ra koe kia akakoromaki i te akonoanga i toou mamae ngakau, no te mea ka taui viviki ua toou au manako ngakau. E maara ra, eiaa koe e akama i te aue. E maata te aronga akarongo mou tataki tai tei kite mai e, ko te aue e mea matauia e e tuanga tau no te rapakauanga.

E Akavaitata Atu ki te Atua

Te akakite maira te Pipiria kia tatou e: “E  akavaitata atu ki te Atua, e nana e akavaitata mai kia kotou na.” (Iakobo 4:8) Ko tetai au mataara puapinga i te akavaitata atu ki te Atua, koia oki na roto i te pure. Eiaa e ngaropoina i te tu puapinga o te pure! Te akakite maira te Pipiria i teia taputou pumaana e: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:18) Te akapapu katoa maira te reira kia tatou e: “E tuku koe i taau apainga kia Iehova ra, e nana koe e tauturu mai.” (Salamo 55:22) E tamanako ana i teia. Mei ta tatou i kite mai i mua atu ana, e maata tei kite e kua tauturuia ratou kia tuatua no runga i to ratou au manako ngakau ki tetai oa tu manava. Kare ainei ei mea puapinga i te akakite pu tikai anga i to tatou au manako ngakau ki te Atua, tei taputou mai i te akapumaana i to tatou ngakau?​—2 Tesalonia 2:16, 17.

Kua tuatua mai a Paulo, tei taikuia i mua akenei e: “Me manako au e kare e rauka iaku i te akakoromaki i te mamae, ka tuturi au ki raro e ka pure atu ki te Atua. Kua pati akatenga au kia tauturu mai aia iaku.” Kua papu ia Paulo e kua tauturu mai te pure iaia. Penei ka kite katoa koe e ka pau mai “te Atua nona anake te pumaana” i taau au pure putuputu, na te oronga anga mai i te maroiroi e te ketaketa kia akakoromaki ua koe.​—2 Korinetia 1:3, 4; Roma 12:12.

 Te Manakonakoanga no te Tuakaouanga

Kua tuatua a Iesu e: “Ko au te tuakaouanga, e te ora; ko te akarongo mai iaku ra, mate ua atu rai, ka ora ra ïa.” (Ioane 11:25) Te apii maira te Pipiria e ka akaoraia mai te aronga i mate. * Ia Iesu i runga i te enua, kua akaari mai aia e ka rauka iaia i te akatu mai i te aronga i mate. I tetai atianga, kua akatu mai aia i tetai tamaine, e 12 ona mataiti. Akapeea tona nga metua i te ariu atu anga i te reira? Kua “va maata ua iora” raua. (Mareko 5:42) I raro ake i te tutaraanga o tona Patireia, e maata tikai te au tangata ta te Ariki o te rangi, ko Iesu Karaiti ka akatuakaou mai ki runga nei i te enua​—i raro ake i te au turanga au e te tu tika. (Angaanga 24:15; 2 Petero 3:13) E akamanako ana i te rekareka maata me akaoraia mai te aronga tei mate e kia taokotai atu ki te aronga tei akaperepere ia ratou!

Ko Claudete, kua mate tana tamaiti ko Renato te u anga te pairere, kua tuku aia i tetai tutu o tana tamaiti ki runga i te pia akaanuanu kai. E akara putuputu ana aia i te tutu e ka tuatua aia kiaia uaorai, ‘Ka aravei akaou taua i te tuatau tuakaouanga.’ E akamanako ana a Leonardo me akaoraia mai tona papa i roto i te ao ou ta te Atua i taputou mai. Ae, te manakonakoanga no te tuakaouanga, ka riro ei tumuanga tika no te pumaana kia ratou, pera katoa tetai aronga ke atu kua takake to ratou aronga akaperepereia. Ka rauka katoa ia koe tera taputou!

[Au Tataanga Rikiriki i Raro]

[Pia/​Tutu i te kapi 7]

“Te Atua Nona Anake te Pumaana”

“Kia akameitakiia te Atua, te Metua o to tatou Atu ra o Iesu Mesia, te tumu o te aroa, e ko te Atua nona anake te pumaana.”​—2 Korinetia 1:3.

Te akakite maira teia irava o te Pipiria e ka rauka i te Atua i te tauturu i tona tavini akarongo mou kia akakoromaki i tetai ua atu manamanata me kore tetai ua atu akaaoanga ta ratou ka aro atu. Ko tetai mataara ka oronga mai a Iehova i te pumaana, koia oki na roto i tetai oa me kore na roto i tetai tei akaperepereia, aiteite ua to korua irinaki anga akonoanga.

Te maara ra ia Leonardo, tei takake tona papa, i tetai tupuanga tei oronga mai ana i te maroiroi e te pumaana kiaia. Koi tae ua mai aia ki te kainga, maara ra iaia e kare e tangata i te kainga, no reira kua akamata aia i te aue maata. Kua aere atu aia ki tetai paka vaitata ua mai e kua noo aia ki runga i te nooanga, e kua aue akaou aia. I tona aueanga, kua pati aia ki te Atua kia tauturu mai iaia. Kua tapu poitirere mai tetai vani i te pae mai, e kua kite atu a Leonardo i te tangata e akaoro ra i te vani e ko tetai o tona au taeake Kerititiano. Te taritari aere nei teia taeake i tetai au apinga e kua tarevake tona tapae anga. I tona kite anga iaia kua akapumaanaia a Leonardo.

I tetai atianga, kua maromaroa e kua taitaia tikai tetai tane takaua. Kare e rauka iaia i te akamutu i te aue no te mea i tona akaraanga e mea puapinga kore ua te au mea ravarai. Kua pati akatenga tikai aia ki te Atua no te tauturu. Iaia e pure ra, kua tangi mai te terepaoni. Ko tana utaro te ringi maira. Te maara ra iaia e: “I to maua pukapuka poto ua anga, kua akamaroiroi akaouia mai au. Kua irinaki tikai au e, i tona ringi mai anga iaku, e pauanga te reira i taku pure no te tauturu.”

 [Pia i te kapi 9]

Akapumaanaanga i Tetai Ke

“[Ko te Atua] tei akapumaana mai ia matou i to matou au mate katoa nei, kia tika ia matou kia akapumaana i te aronga i rokoia e te mate ra, i te pumaana a te Atua i pumaanaʼi matou uaorai nei.”​—2 Korinetia 1:4.

E maata te au Kerititiano kua kite tikai ratou i te aiteanga o tera au tuatua. Te rauka anga te pumaana kia akakoromaki ua te takakeanga o tei akaperepereia, kua kite mai ratou e ka rauka ia ratou i te akamaroiroi atu e te akapumaana atu i tetai ke.

E akamanako ana i te akaraanga o Claudete, tei atoro putuputu ana i tetai ke i te akakite i tona au irinakianga akatumuia ki runga i te Pipiria. I mua ake ka mate ei tana tamaiti, e atoro ana aia i tetai vaine kua takake tana tamaiti no te maki rukimia. E reka ana te vaine i te au atoroanga, inara kua manako mai aia e kare rava a Claudete e marama pu tikai i tona mamae. Inara, i muri poto ake te takakeanga ta Claudete tamaiti, kua atoro mai tera vaine iaia e kua akakite aia kiaia e te aere maira aia i te akara me te irinaki ra rai a Claudete i te Atua, no te mea e kua mate tana tamaiti i teianei. Kua umere tikai teia vaine no te irinaki pakari o Claudete, e te apii putuputu ra teia vaine raua ko Claudete i te Pipiria e te kite nei aia i te akapumaanaanga maata no roto mai i te Tuatua a te Atua.

I muri ake te takakeanga tona papa, kua iki a Leonardo i te apii i te reo akairo kia rauka iaia i te akakite i te karere pumaana o te Pipiria ki te aronga turi. Kua kite mai aia e ko tana au tautaanga i te tauturu anga i te aronga turi, kua tupu te akameitakianga maata kiaia. Kua karanga aia e: “Ko tetai apinga tei tauturu mai iaku i te akakoromaki i te mamae ngakau, koia oki ko toku inangaro i te tauturu i te aronga turi kia kite i te Atua. Kua akapou maata au i te taime e te maroiroi i te tauturu anga ia ratou. Kua taui toku au manako ngakau mii ki te rekareka, i te kite anga au i te tangata mua taku i apii i te Pipiria i te papetitoia anga! Te tikaanga, ka tai nei taime mei te mateanga toku papa, kua kite au i te mataora oonu tikai.”​—Angaanga 20:35.

[Tutu i te kapi 5]

Te tuatuaanga i toou au manako ka oronga mai i tetai pumaana

[Tutu i te kapi 6]

Te tatauanga i te manakonakoanga no te tuakaouanga ka riro ei tumuanga tika no te pumaana

[Tutu i te kapi 6]

Ka tauturu katoa te tataanga i te akaari anga i te mamae ngakau

[Tutu i te kapi 8, 9]

Kua taputou mai a Iesu i tetai tuakaouanga no te aronga tei akarongo kiaia