Eaa ka Akaari ei i te Tu Arikianga Rekareka?

“E Raquel,

Te akameitaki maata atu nei au ia koe ei tumuanga akamaroiroianga iaku. Noatu e kare koe i kite mai ana i te reira, kua tauturu mai ra toou tu akamaroiroianga e taau au tuatua meitaki iaku.”​—Jennifer.

KUA orongaia mai ainei kia koe tetai tataanga akameitakianga? Me koia ia, kare e ekokoanga e kua akapumaana taua tuatua i toou ngakau. No te mea, e mea natura ua i te manako e te akaperepereia ra e te arikiia maira koe.​—Mataio 25:19-23.

Te akatupu ra te au tuatua akameitakianga i tetai pirianga vaitata i rotopu i te tangata e oronga ra e te tangata te ariki maira i te akameitakianga. Pera katoa, ko tetai tangata te akaari ra i te tu arikianga rekareka te aru ra i te au takainga vaevae o Iesu Karaiti, kare rava e ngaropoina ana iaia te au angaanga meitaki a tetai ke.​—Mareko 14:3-9; Luka 21:1-4.

Ma te mii, i te akaraanga te meangiti ua atura te au tuatua akameitakianga, tei tuatuaia e tei tataia. Te akamatakite maira te Pipiria e “i taua tuatau openga ra,” ka “mareka kore” ua te au tangata. (2 Timoteo 3:1, 2) Me kare tatou e matakite ana, penei ka akakore te tu ngere akatotoa aereia no te akameitakianga tei kiteaia i teia tuatau, kia kore tatou e akakite i tetai ua atu au manako aroa no te arikianga rekareka tei kiteaia i roto ia tatou.

Eaa te au takainga tau ta te au metua ka rave i te apii i ta ratou tamariki e akapeea me akaari i te tu arikianga rekareka? Koai ma ta tatou ka akameitaki atu? E eaa ra tatou ka akaari ei i te tu arikianga rekareka, noatu e kare te aronga takapini ia tatou e mareka mai ana?

I Roto Tikai i te Ngutuare Tangata

E angaanga pakari ana te au metua i te akono i ta ratou tamariki. Inara, i tetai au taime, penei te manako ra te au metua e kare ta ratou au tautaanga e arikiia mai ana. Eaa ra ta ratou ka rave kia akatikatikaia teia turanga? E toru mea te ka anoanoia.

(1) Akaraanga. Mei te au tu terenianga i te tamariki, e mataara meitaki tikai te akaraanga no te apiianga. No runga i te metua vaine angaanga pakari i Iseraela taito, te karanga ra te Pipiria e: “E tuatua meitaki tana au tamariki no runga iaia.” Noea mai te ngai i kite ei teia au tamariki kia akameitaki? Te oronga maira te toenga o te irava i tetai akakiteanga. Te karanga ra te reira e: “Kua akapaapaa katoa tana tane iaia.” (Maseli 31:28, New Century Version) Ko te au metua te akaari ra i te tu arikianga rekareka ki tetai e tetai te akaari ra ki ta ratou tamariki e ko taua au tuatua ra te oronga ra i te marekaanga ki te tangata tei orongaia atu te reira, i te akameitaki mai i te au pirianga o te ngutuare, e e akairo i te reira no te tu pakari.

Te karanga ra tetai metua tane ko Stephen tona ingoa e: “Kua tauta au i te akanoo i te akaraanga no taku tamariki na te akameitakianga i taku vaine no te kai.” Eaa tei tupu mai? “Kua kite mai rai taku nga tamaine i teia, e na te reira i tauturu ia raua kia akaari katoa i te tu arikianga rekareka,” i na Stephen ei. Me kua akaipoipo koe, te akameitaki putuputu ra ainei koe i toou tokorua no te rave anga i te au angaanga i te au ra ravarai noatu e kare te reira angaanga e kiteaia mai ana? Te akameitaki ra ainei koe i taau tamariki, noatu rai kua rave ratou i ta ratou angaanga matauia?

(2) Terenianga. Mei te au tiare rai te au manako akameitakianga. Te anoanoia ra kia akono  meitakiia te reira kia tupu meitaki mai. Akapeea te au metua i te tauturu anga i ta ratou tamariki kia akameitaki e kia akakite i te tu arikianga rekareka? Kua akakite mai te ariki pakari ko Solomona i tetai tumu i tona tataanga e: “Te kimi ra te ngakau o te aronga tuatua-tika ra i tana e tuatua atu.”​—Maseli 15:28.

E te au metua, ka rauka ainei ia kotou i te tereni i ta kotou tamariki kia akamanako i te tautaanga e te tu aroa no te au apinga tei orongaia atu kia ratou? Na teia tu akamanakoanga e akatupu mai i te tu arikianga rekareka mei te one meitaki rai te akatupu ra i te au tiare. Te karanga ra a Maria, tei utuutu mai i tana nga tamariki e toru e: “Te umuumuia ra te tuatau kia noo ki raro e kia akamarama atu kia ratou e eaa te o maira me oronga mai tetai tangata i tetai apinga​—e te manako maira tetai tangata ia koe e te inangaro ra i te akaari mai e te manako tikai maira ratou ia koe. Inara i toku manako, puapinga tikai te tautaanga.” Ka tauturu taua au pukapukaanga i te tamariki kia kite mai e eaa ta ratou ka tuatua me akaari ratou i te tu arikianga rekareka, pera katoa no teaa ra ka tuatua ai ratou i te reira.

Te au metua meitaki te tauturu ra ratou i ta ratou tamariki kia kopae i te manako e pouroa te au mea meitaki tei rauka mai ia ratou e mea tau rai e kia orongaia atu kia ratou. * Tano meitaki tikai te akamatakiteanga tei kiteaia i roto ia Maseli 29:21, no runga i te akono anga i te au tavini, ki te au tamariki e: “Ko tei rave akaperepere i tona tavini mei te mea-ngiti anga mairai, e riro aia i te akono atu iaia ei tamaiti [“mareka kore,” NW].”

Akapeea te au tamariki rikiriki tikai te tauturuia anga kia akaari i te tu arikianga rekareka? Te karanga ra a Linda, e metua vaine e toru ana tamariki e: “E akamaroiroi ana maua ko taku tane i ta maua tamariki kia tata i te au reta akameitakianga ta maua ka tata te ka kapitiia atu na te toroa anga i tetai tutu me kore na te taina anga i to ratou ingoa ki runga i te kati.” E tika rai, penei mama ua te tutu e ka akatanotano akaouia te tataanga, inara te apiianga ta te tamariki ka kite mai no teia ravenga nei e puapinga maata tikai.

(3) Akakoromakianga. Kua tu pouroa tatou i te manako karapii, e penei ka taparuparu teia manako nei i te au tuatua akameitakianga. (Genese 8:21; Mataio 15:19) Inara, te raurau maira te Pipiria i te au tavini o te Atua e: “Kia akaouia oki kotou i to kotou vaerua ra i te ngakau: E kia akatangata ou oki ko tei angaia kia tau i te Atua ra.”​—Ephesia 4:23, 24.

Inara, te kite ra te au metua kua kite i te reira e te tauturu anga i te tamariki kia “akatangata ou oki” kare te reira i te mea mama ua. Te karanga ra a Stephen tei taikuia mai i runga akenei e: “I te apiianga i ta maua nga tamaine kia tuatua raua e na raua ua rai te tuatua akameitakianga, ma te kore i te akakeu atu ia raua, i te akaraanga ka pou rai te tuatau.” Inara kare a Stephen raua ko tana vaine i tukutuku ana i te reira. “Ma te akakoromakianga maata,” i na Stephen ei, “kua kite mai ta maua nga tamaine i te apiianga. I teianei, rekareka tikai maua i te tu e akameitaki ana raua i tetai ke.”

Akapeea te Au Oa e te Tangata Tupu?

Noatu e te ariki rekareka ra tatou i te reira, penei i tetai au taime ngaropoina ua ia tatou i te akameitaki atu. E puapinga tikai ainei kia arikiia mai tatou, pera katoa kia akameitaki atu tatou? E pau ei i taua uianga, e akamanako ana i tetai mea tei tupu kia Iesu e ki etai au repera.

I tona aere atu anga ki Ierusalema, kua aravei atu a Iesu i tetai aronga repera tino ngauru. Te akakite maira te Pipiria e: “Kapiki ua maira te reo, na ko maira, E te Orometua, e Iesu e, e aroa mai koe ia matou. E kia akara atura aia ia ratou, kua karanga atura, Ka aere, ka akakite ki te kau taunga ia kotou. E tei to ratou aere anga na te arataa, tamāia iora ratou. E kia akara iora tetai o ratou iaia uaorai, kua ora, kua oki maira ma te kapiki ua te reo i te akakakā anga i te Atua: Kua tipapa iora aia ki raro i te vaevaeo o Iesu, kua akameitaki maira iaia: no Samaria oki taua tangata ra.”​—Luka 17:11-16.

Kua kopae ainei a Iesu i te aronga kare i akameitaki mai ana? Te akakite maira te papaanga e: “Kua karanga aturā Iesu, na ko atura, Kare ainei tino ngauru katoa i akaoraia nei? teiea io nei ra e toko iva? Kare rava tetai i oki mai e akakakā i te Atua, mari ra ko teianei tangata ke.”​—Luka 17:17, 18.

Kare te aronga repera toko iva i te aronga kino. I mua atu ana, kua akakite pu ua mai ratou i to ratou akarongo i roto ia Iesu e te akarongo puareinga ua anga ki tana au ikuikuanga, te aere atu anga ki Ierusalema kia akakite ia ratou uaorai ki te  kau taunga. Inara, kare e ekokoanga e te ariki rekareka oonu ra ratou i ta Iesu ravenga takinga meitaki, kareka ra, kare ratou i akaari ana i taua tu arikianga rekareka kiaia. Kare to ratou tu i akamareka ana i te Karaiti. Akapeea ra tatou? Me akono meitaki mai tetai tangata ia tatou, ka viviki ainei tatou i te akameitaki atu, e me ka tau, kia akaari atu tatou i te tu arikianga rekareka na te tataanga i tetai reta?

Te karanga ra te Pipiria e “kare te aroa e takinga kino me kore e karapii.” (1 Korinetia 13:5, Today’s English Version) No reira, kare te au tuatua ngakau tae no te tu arikianga rekareka ei akairo no te tu meitaki mari ra e akapapuanga katoa te reira i te aroa. Mei tei tupu ki te aronga repera e apii maira kia tatou, te aronga te inangaro ra i te akamareka ia Karaiti e mea tau kia oronga i taua aroa e te tu arikianga rekareka ki te katoatoa, noatu e noea mai ratou, to ratou iti tangata, me kore ta ratou akonoanga.

E ui kia koe uaorai e, ‘I naea ra, i akameitaki atu ei au i tetai tangata tupu, tetai oa angaanga, tetai oa apii, tetai mema e angaanga ra i ko i te are maki, tetai tiaki toa, me kore i tetai tangata ke tei tauturu mai ana iaku?’ Kore ainei e akono ua i tetai rekoti e tai me kore e rua ra, i te tataanga e eia au taime te karanga anga koe e meitaki maata me kore te tataanga i tetai reta akameitakianga? Penei ka tauturu mai taua rekoti ra ia koe kia kite koe, ko teea te ngai ka rauka ia koe i te akakite atu i te tu arikianga rekareka.

E tika rai, ko ta tatou ka akameitaki maata rava atu, koia oki ko te Atua ko Iehova. Koia Tei Oronga mai i te “au mea memeitaki i o maiia ra, e te au mea tika ravarai.” (Iakobo 1:17) I naea ra koe i te akakite tikai anga i toou tu arikianga rekareka ki te Atua no te au mea tataki tai tana i rave ana noou?​—1 Tesalonia 5:17, 18.

Eaa ka Akaari ei i te Tu Arikianga Rekareka Noatu e Kare Tetai e Ariki Mai?

Penei kare tetai aronga e ariki mai me akaari atu tatou i te tu arikianga rekareka. Eaa ra tatou ka akameitaki atu ei, noatu e kare tetai ke e ariki mai ana? E akamanako ana e tai ua tumu.

Na te rave anga i te meitaki ki te aronga kare e akaari mai ana i te tu arikianga rekareka, te aru ra tatou i Tei Anga takinga meitaki mai ia tatou, te Atua ko Iehova. No te mea, kare te maataanga e ariki rekareka ana i te aroa ta Iehova e akaari ra kia ratou, kare te reira e tapu iaia kia rave i te meitaki kia ratou. (Roma 5:8; 1 Ioane 4:9, 10) “Te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” Me te tauta ra tatou i te akaari i te tu arikianga rekareka noatu e te noo nei tatou i roto i tetai ao aroa kore, te akapapu ra tatou kia tatou uaorai ei “tamariki na [to tatou] Metua i te ao ra.”​—Mataio 5:45.

[Tataanga Rikiriki i Raro]

[Tataanga i te kapi 23]

E akono i tetai rekoti e tai me kore e rua ra, i te tataanga e eia au taime te karanga anga koe e meitaki maata me kore te tataanga i tetai reta akameitakianga

[Tutu i te kapi 23]

E akanoo i tetai akaraanga meitaki no taau tamariki i te akakite anga i te tu arikianga rekareka

[Tutu i te kapi 23]

Ka rauka katoa rai te tamariki rikiriki kia tereniia kia akakite i te tu arikianga rekareka