Apii i Taau Tamariki

Kua Rave ua Atu a Samuela i te Mea Tika

I KITE ana koe i tetai au tangata i te rave anga i te au mea kino?​— * Kua kite a Samuela i tera. I noo ana aia i roto i tetai ngai kare i manako ana e ka rave te tangata i te au mea kino. Ko te tapenakara o te Atua taua ngai ra, me kore e ngai akamorianga, i roto i te oire o Silo. Tere atu i tetai 3,000 mataiti i topa, ka akara tatou e akapeea te tapenakara i riro ei e kainga no Samuela.

I mua ake ka anauia mai ei a Samuela, inangaro maata tikai tona mama, ko Hana, i tetai pepe. I tona atoro anga i te tapenakara, kua pure a Hana ki te Atua no runga i te reira. Kamutamuta ua tona vaa i tona pure akatenga anga. No teia tu nei kua manako te taunga maata ko Eli, e e kona kava aia. I tona kite anga e kare aia i te kona kava inara e maata tona taitaia, kua akameitaki atu a Eli iaia, i te na ko anga e: “Kia akatika mai oki te Atua no Iseraela i taau i pati atu iaia ra.”​—1 Samuela 1:15-17.

I muri mai, anauia mai a Samuela, kua mataora tikai a Hana e kua akakite atu aia ki tana tane, kia Elikana e: ‘Kia topa ake taku angai anga ia Samuela ki te u, ka apai au iaia ki te tapenakara kia tavini aia i te Atua i reira. Ko tana rai ia i rave! I te reira taime, penei e a me kore e rima o Samuela mataiti.

Kua ruaine a Eli, kare tana nga tamaiti ko Hophini raua ko Phinehaza e akamori tau ana ia Iehova. Te rave katoa ra raua i te au pirianga tau kore ki te au vaine te atoro maira i te tapenakara! Eaa toou manako ta to raua papa ka rave?​— Ae, tano tikai ka ako aia ia raua e kare e akatika ia raua i te rave i taua au mea kino ra.

Tupu atura a Samuela i tona noo anga i roto i te tapenakara, penei kua kite aia i te tu kino o te nga tamaiti a Eli. Kua aru ainei a Samuela i to raua akaraanga kino?​— Kare, kua rave ua rai aia i te mea tika, mei ta tona nga metua i apii ana kiaia. No reira rai a Iehova i riri ei ia Eli. Kua tono katoa aia i tetai peroveta kia akakite kia Eli, e ka akapeea Aia i te akautunga anga i to Eli ngutuare, tana nga tamaiti tikai.​—1 Samuela 2:22-36.

 Kua tavini ua atu a Samuela ma Eli i ko i te tapenakara. No reira, i tetai po te moe anga a Samuela, kua rongo atu aia i tetai reo i te kapiki anga mai i tona ingoa. No reira kua oro atu a Samuela kia Eli, inara kua karanga mai a Eli e kare aia i kapiki atu ana iaia. Kua tupu akaou taua mea rai. I muri mai i te tupu akaou anga taua mea ra i te toru o te taime, kua akakite atu a Eli kia Samuela kia tuatua e: “E tuatua mai koe, e Iehova e; te akarongo nei oki to tavini.” I to Samuela tuatua anga i tera, kua tuatua a Iehova kiaia. Kua kite ainei koe e eaa ta Iehova i tuatua kia Samuela?​—

Kua tuatua akaou te Atua kia Samuela no runga i Tona akakoroanga i te akautunga anga i to Eli ngutuare. I tera mai popongi kua mataku a Samuela i te akakite atu kia Eli eaa ta Iehova i tuatua mai. Inara kua pati akatenga a Eli kia Samuela e: “Auraka koe e uuna i taua tuatua ra iaku.” I te openga iora, kua akakite a Samuela kia Eli i te au mea pouroa ta Iehova i tuatua e ka rave Aia​—mei ta Tana peroveta rai i akakite mai kia Eli i mua atu ana. Ta Eli pauanga koia oki e: “Kia rave aia [ko Iehova] i tei tau iaia uaorai.” Kua tamateia atu a Hophini raua ko Phinehaza, e kua mate katoa a Eli.​—1 Samuela 3:1-18.

I taua taime rai, te ‘tupu aturā a Samuela, e kua vaitata mairā a Iehova kiaia.’ Penei e mapu ua a Samuela i te reira taime, e tuatau puapinga ia i roto i te oraanga o te au tamariki. I toou manako e, e mea mama ua no Samuela kia rave ua atu i te mea tika, noatu rai e kare tetai au tangata e rave ana i te reira?​— Noatu rai e kare i te mea mama ua, kua tavini akarongo mou a Samuela ia Iehova no te toenga o tona oraanga.​—1 Samuela 3:19-21.

Akapeea koe? Ka aite ainei koe mei ia Samuela rai ia koe e tupu maira? Ka rave ua atu ainei koe i te mea tika? Ka akarongo ua atu ainei koe i te au apiianga a te Pipiria e ki te au mea ta to nga metua i apii mai kia koe? Me ka rave koe i tera, ka akarekareka koe ia Iehova e pera katoa toou nga metua.

[Tataanga Rikiriki i Raro]

Au Uianga:

○ Akapeea a Samuela i riro ei e tavini i ko i te tapenakara o Iehova?

○ Eaa te au akaaoanga ta Samuela i aro atu i ko i te tapenakara?

○ Eaa te akaraanga ta Samuela i oronga mai no te au tamariki?