Me Mate Tei Akaperepereia

I te aiai Ruirua ia Tiurai ra 17, 2007, i te ora itu, kua pateka tetai pairere i runga i te ngai akato anga i ko i tetai eapoti (airport) e taangaanga maataia ra i Paratiri, tei rotopu tikai ia São Paulo. Kua aere tikoti atu te pairere ki runga i tetai aranui maata e kua u atu ki runga i tetai are kako. Mei tetai 200 tangata i mate i roto i teia tumatetenga.

KO TEI akatakaia mai i runga akenei e ko te tumatetenga kino rava atu o te pairere i Paratiri, kare rava e ngaropoinaia e te aronga kua mate ta ratou akaperepereia. Ko Claudete tetai o te aronga kua mate tana akaperepereia. Te akarakara tivi ra aia i tona akarongoanga i te nuti no runga i te u anga te pairere. Ko tana tamaiti ko Renato, tei runga aia i te pairere. E 26 ua rai ona mataiti. Te parani ra aia i te akaipoipo i roto ia Okotopa. Kua tauta pakari tikai a Claudete i te ringi iaia i runga i tana cell phone, inara kare e tangata i pau mai. Topa ua aia ki runga i te taua e kare aia e akamutu i te aue.

Te tane ka akaipoipo a Antje, kua mate aia i roto i tetai u anga motoka kino tikai ia Tianuare 1986. I tona akarongoanga i teia nuti, kua poitirere takiri aia. “Toku manako mua kare au e inangaro i te irinaki i tera. Manako ua au e e moemoea kino ua te reira e ka ara poitirere mai au e ka kite atu e kare te reira i tupu ana. Kua ru toku kopapa e kua tupu mai te mamae mei te mea rai e kua rutu mai tetai tangata i toku kopu.” No tera mai mataiti e toru, rokoia a Antje i te manako taitaia. Noatu e e 20 mataiti i pati te tupuanga te tumatetenga, te ru ra rai aia i tona akamaaraanga i tei tupu.

Kare e rauka i te au tuatua i te akakite mai i te au manako pakari no te tu poitirere, irinaki kore, te tu ngenge, e te taitaia te ka tupu mai no taua tumatetenga kino tikai kare i tapapaia ana. Noatu e te tapapaia ra te mate o tei akaperepereia, ka pakari ua rai te mamae ngakau. Kare rava tetai tangata i akateateamamaoia no te mate o tei akaperepereia. Kua mate te mama o Nanci i te mataiti 2002 i muri ake i tetai maki anga roa. Inara, te ra i mate ei tona mama, kua noo poitirere ua a Nanci ki runga i te taua o te are maki. I te akaraanga, kua ngaro pouroa tona akakoroanga no te oraanga. E rima mataiti i topa, te aue ra rai aia me akamanako aia i tona mama.

“Kare rava te tangata e akangaropoina ana i te takakeanga o tei akaperepereia, inara ka tuku ua ratou i te akakoromakianga,” i karanga ai te Taote ko Holly G. Prigerson. Me kua takake tei akaperepereia i roto i te mate, me e tapapaia me kore kare e tapapaia, penei ka manako koe e: ‘E mea matau ua ainei te mamae ngakau? Akapeea e rauka ai i te akakoromaki i te takakeanga o tei akaperepereia? Ka kite akaou ainei au i taku akaperepere?’ Ka uriuri te atikara e aru maira i teia au uianga e tetai atu au uianga naau.

[Akameitakianga no te Tutu i te kapi 3]

EVERTON DE FREITAS/AFP/Getty Images