Rotai Ainei Taau Au Parani ki to te Atua Akakoroanga?

KO TE manu tei kiteaia ko te Clark’s nutcracker e manu imene te reira ma te kara inaina e te teatea, ka kitea uaia atu te reira te rererere anga na roto i te vaorakau i te tuanga opunga o Marike Tokerau. Tere atu e 3,000 ana ua rauka e koi ana e e uuna ana i roto i te mataiti okotai, i te akaputu anga i te reira i te au ngai tukeke e 2,500 ei akapapa anga no te au marama anu pakari. E tika rai, ‘maata nei te pakari’ o teia manu no te mea no tana akaputuanga i te kai no te tuatau ki mua.​—Maseli 30:24.

E maata atu tikai te tu karape o te tangata. O te au mea angaia a Iehova i runga i te enua, tei te tangata anake ua te tu karape i te apii no te au tupuanga i topa, e te akatika anga i teia au apiianga kia akakeu i ta ratou au parani no te tuatau ki mua. “E manganui te manako [me kore “te parani,” NW] i roto i te ngakau o te tangata,” i akara ai te ariki pakari ko Solomona.​—Maseli 19:21.

Noatu ra, e tu karape to te au tangata no te apiianga no te au mea i tupu, kare e ravenga ke atu mari ra kia akatumuia ta ratou au parani ki runga i ta ratou e tamanako ra no te tuatau ki mua. Ei akaraanga, ka parani koe i te au angaanga no apopo i te manako anga e ka iti mai te ra e ka ora ua rai koe. Te manako mua kua akatumu meitakiia te tika anga o te reira; te rua kare i papu. E tika rai, te karanga ra te tangata tata o te Pipiria ko Iakobo e: “Kotou oki ko tei kore i kite i te ka tupu apopo.”​—Iakobo 4:13, 14.

Kare to te Atua ko Iehova kotingaanga. Kua kite aia “i te openga mei te muatangana mairai.” Ka akatupu papuia mai tana akakoroanga tei akakiteia mai. “Ko taku te tuatua te ka mou,” tana i akakite mai, “e tei inangaroia e au ra, ko taku ïa e rave.” (Isaia 46:10) Eaa ra te ka tupu me kare te au parani a te tangata e rotai ana ki to te Atua akakoroanga?

Me Tuke te Au Parani a te Au Tangata mei to te Atua Akakoroanga

Mei etai 4,000 mataiti i topa, kua parani te aronga patu i te Punanga o Babela e kia noo ua te au tangata i roto i teia ngai kare te katiri tangata e totoa aereia. Kua karanga ratou e: “Taki aere tatou, ka patu i tetai oire no tatou, e tetai punanga, kia tae ua atu te take ki runga i te rangi ra, kia kitea to tatou ingoa; ko te pueurikiriki ke ua atu aea tatou e pini ua ake te enua katoa nei.”​—Genese 11:4.

 Inara, e tuke tikai to te Atua akakoroanga no te enua. Kua akaue aia ia Noa e tana au tamaiti e: “Kia anau, e kia maata kotou, e akaki i te enua nei.” (Genese 9:1) Eaa ta te Atua i rave ki te au akakoroanga a teia aronga meameaau o Babela? Kua akatarevake aia i to ratou reo kia kore ratou e kite i to tetai reo. Tei tupu? “I reira to Iehova akapueurikiriki ke anga ia ratou, ki runga i te enua katoa e pini ua ake.” (Genese 11:5-8) Kua maroia te aronga patu ia Babela kia kite i tetai apiianga puapinga. Me tuke te au parani a te tangata e to te Atua akakoroanga, “ko te akakoro a Iehova ra te ka mou.” (Maseli 19:21) Ka akatika ainei koe i taua au apiianga i te tuatau i topa kia akakeu i toou oraanga?

Tu Neneva o Tetai Tangata Apinga Nui

Penei kare koe i parani ana i te patu i tetai punanga, inara i teia tuatau e maata te tangata te parani ra i te patu i tetai pangika maatamaata e kia akaputu i te au apinga materia me ritaea mai ratou, maata te moni e te au apinga. E mea matauia no tetai tangata i te inangaro kia rekareka i te au apinga tei rauka mai no tana angaanga pakari. “Kia kaikai anake ra te tangata e kia inu, e kia rave aia i te meitaki no tana katoa ra au angaanga,” kua tata mai a Solomona. “E mea o maiia mai ïa e te Atua.”​—Koheleta 3:13.

Ka pau atu tatou kia Iehova no te tu e taangaanga ai tatou i teia mea i o maiia mai. Vaitata e 2,000 mataiti i topa, kua akakite pakari mai a Iesu i teia manako ki tana au pipi na roto i tetai akatutuanga. Kua karanga aia e: “E kainga ua maata to tetai tangata apinga nui: Kua na ko iora aia, i te akaeatu anga ki roto iaia uaorai, Eaa ra au, kare oki aku vairanga e o mai ei toku apinga? Kua na ko akera aia, E akapera au: e vavaʼi au i toku au are kai nei e akatu atu ei ei are mamaata; ei reira akaputuputu ei au i taku kai ravarai e toku apinga: Ka karanga atu ei ki toku vaerua, E taku vaerua e, e apinga maata toou, kua uipa ïa ki te vairanga no te au mataiti e manganui; e akaangaroi marie, e kaikai, e inu, e kia rekareka marie.” (Luka 12:16-19) E mea tau to te tangata apinga nui akakoroanga, kare ainei? Mei te manu rai tei taikuia mai i mua akenei, Clark’s nutcracker, i te akaraanga te akapapa ra te tangata i roto i te akatutuanga no tona au anoano no te tuatau ki mua.

Inara, tarevake te manako o te reira tangata. Kua karanga a Iesu e: “Kua tuatua maira ra te Atua kiaia, E tera ra neneva e! ei teianei rai po e tiki naia mai ei toou vaerua: noai iora tenana au apinga taau i akaputu na?” (Luka 12:20) Te patoi ra ainei a Iesu i ta Solomona tuatua e e mea o maiia mai e te Atua te angaanga e te au apinga meitaki tei akatupu mai i te reira? Kare. Eaa ra te aiteanga o ta Iesu tuatua? “Ko te tu ïa,” i karanga ai a Iesu, o “te tangata i akaputuputu i te apinga  nona uaorai, kare i maata tona apinga i te Atua ra.”​—Luka 12:21.

Te apii nei a Iesu i te aronga e akarongo maira kiaia e te inangaro ra a Iehova ia tatou kia akamanako Iaia me rave tatou i ta tatou au parani. Ka apingaia te tangata apinga nui ki te Atua na te kimi anga i te au mataara i te akaketaketa i tona pirianga ki te Atua, e kia tupu te pakari e te aroa. Kare te au tuatua a tera tangata i akaari ana i te inangaro no taua au mea ra, kare katoa i akaruke mai ana i tetai o tana au kai tanutanu na te aronga putaua kia koi, kare katoa i oronga ana i te au mea akaatinga kia Iehova. Te aru anga i te au mea pae vaerua e te au angaanga karapii kore, kare te reira e tuanga i roto i te oraanga o tera tangata apinga nui. No runga ua rai tana au parani i tona uaorai au anoano e tana au apinga.

I kite ana koe e e manganui te au tangata i teia tuatau, aiteite ua to ratou akakoroanga ki te tangata apinga nui ta Iesu i taiku mai? Noatu e aronga apinga nui me kore e putaua ua tatou, ka ngoie ua kia topa atu ki roto i te ereere no te au apinga materia, e te akangaropoina anga i to tatou pirianga ki te Atua, no te mea kua varenga ua tatou ki te au anoano e te inangaro o te oraanga i te au ra ravarai. Eaa taau ka rave kia kore koe e topa atu ki roto i taua ereere ra?

Paranianga i Tetai Oraanga “Matauia”

Kare i aite ki te tangata apinga nui o ta Iesu akatutuanga, penei te manamanata maata ra koe kare e rava ana te moni. Noatu ra, me kua akaipoipo koe, papu e te parani ra koe i te akono i te au anoano no toou ngutuare e, me ka rauka, tetai apii meitaki na taau tamariki. Me kare koe i akaipoipo, penei te kapiti maira taau au parani i te kimi anga i tetai angaanga me kore kia vai ua rai taau angaanga, kia kore koe e tamanamanata i tetai ke. E au akakoroanga puapinga teia.​—2 Tesalonia 3:10-12; 1 Timoteo 5:8.

Noatu ra, penei ka riro te angaanga, te kaikai anga, te inu anga​—te au mea matauia i roto i te oraanga—​i te tuku atu i tetai tangata ki roto i tetai oraanga kare e rotai ana ki te anoano o te Atua. Akapeea ra? Kua karanga mai a Iesu e: “E mei te tuatau ia Noa ra, koia katoa te aerenga mai o te Tamaiti a te tangata nei. Mei tei te tuatau i muao i te diluvi ra, te kaikai ra ratou e te inu ra, te akaipoipo ra, e te orongaia ra kia akaipoipoia, e tae rava atu ki te rā i tomo ei a Noa ki roto i te araka, Kare rava i kite, e rokoia iora ratou e te diluvi, e ope takiri akera ratou i te mate; koia katoa te aerenga mai o te Tamaiti a te tangata nei.”​—Mataio 24:37-39.

I mua ake i te Vaipuke, e reka ana te maataanga o te tangata i ta ratou e manako ra e ko te oraanga matauia. Inara, to ratou manamanata, “kare rava [ratou] i kite” i to te Atua akakoroanga kia takore i tera ao kino na roto i tetai tiruvi i te ao katoa. Kare e ekoko e, e manako ana ratou e kare to Noa oraanga ei oraanga tau. Inara, i te tae mai anga te Vaipuke, kua riro te tu oraanga o Noa e tona ngutuare ei oraanga tau.

I teia tuatau, te oronga pouroa maira te au akapapuanga e te noo nei tatou i roto i te tuatau openga. (Mataio 24:3-12; 2 Timoteo 3:1-5) Kare e roa atu, ka ‘akapueurikiriki e ka akapou’ te Patireia o te Atua i teia akatereanga o te au mea nei. (Daniela 2:44) I raro ake i taua Patireia, ka tauiia te enua ei parataito. Ka takore te Patireia i te maki e te mate. (Isaia 33:24; Apokalupo 21:3-5) Ka noo rotai pouroa te au mea ora i runga i te enua e kare rava e pongi akaou.​—Salamo 72:16; Isaia 11:6-9.

Inara, i mua ake ka rave ei aia i te angaanga, kua akakoro a Iehova e “e tutu aereia,” te tuatua meitaki o tona Patireia “e kako rava ake te ao katoa nei; ei kite no te pa enua ravarai.” (Mataio 24:14) Kia rotai ki to te Atua akakoroanga, mei te itu mirioni Au Kite o Iehova te tutu aere nei i teia tuatua meitaki i roto i te 236 enua e tere atu e a anere au reo.

Ki te au tangata o teia nei ao, te tu oraanga o te Au Kite o Iehova, akaraanga tuke e te auouo kia ratou. (2 Petero 3:3, 4) Mei te aronga rai i ora ana i mua ake i te Vaipuke, te maataanga o te au tangata te varenga ua nei ratou ki te au mea matauia o te oraanga i te au ra ravarai. Penei te manako ra ratou e kare e tau ana te aronga kare e aru ana i te oraanga matauia o te taiate. Inara, mei te manako o te aronga tei irinaki i ta te Atua e taputou maira, e tau tikai tetai oraanga tei akanooia i te tavini anga i te Atua.

No reira, me e tangata apinga nui koe, putaua, me kore e rotopu e nga mea roa rai, e meitaki tikai kia akamanako akaou mei tetai taime ki tetai taime i taau au parani no te tuatau ki mua. Ia koe e rave ra i te reira, e ui kia koe uaorai e, ‘Rotai ainei taku au parani ki to te Atua akakoroanga?’

[Tutu i te kapi 11]

Me kare e rotai ana ta te tangata au parani ki to te Atua akakoroanga, ko te tuatua a Iehova te ka mou

[Tutu i te kapi 12]

I te rave anga i tana au parani, kare te tangata apinga nui i roto ta Iesu parapore i akara mou ana ki runga i to te Atua akakoroanga