Taui te Pipiria i te Oraanga

Na teaa ra i akakeu i tetai mema no te kangi (gang) mapu i Meiko, tei tapaia ko te au Tatani Tiunia, kia taui e kia riro mai ei tangata angaanga pakari e te tu tika? Eaa tetai vaine pitiniti puapinga, no Tiapani mai, i akamutu ei i te aruaru i te apinga nui ei akakoroanga maata i roto i tona oraanga, e eaa ra tona manako no runga i te au tauianga tana i rave ana? Na teaa i akakeu i tetai tangata okooko apinga tamaki i Rutia kia akaruke i tana angaanga monimoni tei araiia e te ture? Akamanako e eaa ta teia aronga ka tuatua mai.

PROFILE

INGOA: ADRIAN PEREZ

MATAITI: 30

ENUA: MEIKO

ORAANGA: MEMA KANGI

TOKU ORAANGA I MUA ANA: E 13 ua rai oku mataiti, kua neke atu toku ngutuare tangata ki Ecatepec de Morelos, i Mexico State. I taua taime rai, e maata tikai te tamariki kanga, te taviivii anga, e te apinga akakona i tera ngai. Kua akamata katoa au i te kai kava, te taviivii i te au ngai, e kua piri atu rai au ki roto i te tu tau kore.

I muri mai, kua oki akaou atu matou ki San Vicente, te taoni i anauia ai au. Inara, kua riro mai te apinga akakona ei mea tamanamanata anga tikai i reira. E mea matau i te kite atu i te au mapu kua mate i runga i te au mataara. Kua piri atu au ki roto i tetai kangi tei tapaia e ko te au Tatani Tiunia. Kua keikeia e kua kai matou i te apinga akakona, te maataanga o te taime te ongiongi anga i te apinga no te peni me kore te apinga tapou. E maata rai te taime, kare e maara ana iaku e akapeea au i tae atu ei ki te kainga, e i tetai au taime e moe ua ana au ki runga i te mataara. Kua peke tetai o toku au oa ki roto i te are auri no te keikeia e te ta anga.

Noatu te au mea tarevake taku i rave ana, kua irinaki au i te Atua. Ei akamaru mai i toku akava ngakau, e kapiti ana au ki roto i te au angaanga a te akonoanga Katorika, mei te akanoonooanga nuku no te koroti i te tuatau o te Epetoma Tapu. Inara, i muri ake i te reira, ko matou pouroa, kapitiia mai te tangata nana e akatutu  maira i te Karaiti, ka tamataora matou no te piri atu anga ki roto i te reira angaanga na te aere anga i te kai kava.

KUA TAUI TE PIPIRIA I TOKU ORAANGA: I te openga tikai o toku mapuanga, kua akamata au i te apii i te Pipiria ma te Au Kite o Iehova. Kua kite mai au e kare rava oku akakoroanga tikai i roto i toku oraanga, e me ka aru ua rai au i teia turanga, kare toku oraanga e meitaki mai. Ko taku mea i umere, koia oki ko te manako tei tataia i roto ia Galatia 6:8 e: “Ko tei ruru i ta tona uaorai kopapa, ka rauka iaia te kino i taua kopapa ra; kareka te ruru i ta te Vaerua, ko te ora mutu kore tana e rauka i te Vaerua ra.” Kua akaari mai teia irava kiaku e me ka inangaro au kia meitaki mai te au mea noku, te manako no te tuatau ki mua ko taku ia ka ruru.

Iaku e apii ra i te Pipiria, kua akamata au i te ariki rekareka e e Atua ora a Iehova tei manako tikai mai iaku, e te inangaro maira aia i te akakore mai i taku au ara taku i rave ana i te tuatau i topa. Kua kite mai au e te akarongo maira e te pau maira aia i te au pure.

Kare i te mea ngoie i te rave i te au taui anga i roto i toku tu oraanga. E ngata tikai te akaruke anga i te kangi. Kua kotingaia tetai au ngai e kare au e aere ana na reira, noatu e kare au i roto i te kangi. I tetai au taime, ka pipini au mei toku au oa taito no te mea ka kimi mai ratou iaku e ka puto akaou atu iaku ki roto i taku au peu taito.

Ei tukeanga, i toku akamataanga i te aere ki te au uipaanga i ko i te Are Uipaanga Patireia ma te Au Kite, kua kite mai au i te tu aroa e te tu pumaana o te putuputuanga. Umere tikai au e e irinakianga papu tikai to teia au tangata e te aru rotai ra ratou ki ta ratou i apii ana. E ngai tuke tikai te reira, kare au i matau ana.

KUA PUAPINGA AU: E tai ngauru mataiti i teianei toku papetitoia anga ko tetai o te Au Kite o Iehova. E tauta pakari ana au i te taangaanga i te au apiianga Pipiria i roto i toku oraanga. Tei tupu mai, te rauka nei iaku te akangateitei anga a toku ngutuare tangata. I teianei te kite nei ratou e e tangata angaanga pakari au, e kua rauka iaku i te tauturu atu ia ratou i te pae moni. Kua akamata toku mama i te apii i te Pipiria e i teianei kua riro mai aia ko tetai o te Au Kite o Iehova. Te rave katoa nei toku papa i te au tauianga i roto i tona oraanga. Te maataanga o toku ngutuare tangata kare ratou i te Au Kite o Iehova, inara i muri ake te kite mai anga e eaa tei tupu kiaku, kua akakite mai ratou e ka rauka i te Pipiria i te tauturu i tetai tangata kia akameitaki i tona oraanga.

PROFILE

INGOA: YAYOI NAGATANI

MATAITI: 50

ENUA: TIAPANI

ORAANGA: VAINE PITINITI PUAPINGA

TOKU ORAANGA I MUA ANA: Kua maata mai au i roto i tetai taoni meangiti e kua ki taoni i te au tangata oaoa. E aka are toa ta toku papa i roto i te taoni e e tai ngauru ana aronga angaanga. Tei te pae mai to matou are i te toa, noatu e e maata ta Papa raua ko Mama angaanga, kare rava au e manako maromaroa ana.

Ko au te mataiapo o te toko toru tamaine, e mei te meangiti anga mai, kua tereniia au e naku e akaaere  i te pitiniti a te ngutuare. I toku akaipoipoanga e vaine mapu ua au. Kua akaruke taku tane i tana angaanga i ko i te pangika e kua aere mai aia i te tauturu i te pitiniti a te ngutuare. E toru a maua tamariki i muri ake i tetai e tetai. Na toku mama e tiaki ana i te tamariki, iaia e rave ra i te angaanga i te kainga, iaku e angaanga ra i ko i te are toa mei te popongi e tae ua atu ki te po. Noatu rai, e taime rai to maua i te taokotai mai ei ngutuare tangata.

E oti, kua tupu te manamanata i ko i te ngai okooko anga te topa anga te makete moni, e kua akamata ta matou pitiniti i te aere ki raro. E tauturu ei i teia turanga, kua iki matou i te akamata i tetai toa ke no te ripea anga i te au kainga i te pae mai i tetai mataara maata. I te ra i mua ake ka akamataia ai te patuanga, kua topa poitirere ua toku papa ki raro no tetai maki kino o te roro, koia te peretiteni o to matou kamupani. Kare aia e rauka i te tuatua, no reira kua aere mai te apainga ki runga iaku no te are toa ou. Kua noo atu rai taku tane ki ko i te are toa mua. E maata tikai te angaanga i roto i to maua oraanga.

Kua puapinga tikai to matou are toa ou. Kua akaparau au no taku au tautaanga, e kare e maata ana taku moe, kia rave ua atu rai au i te angaanga. Noatu e te inangaro ra au i taku tamariki, e manako ua ana rai au i te angaanga. Kare oku taime i te pukapuka ki taku tane, e me ka pukapuka maua, ka karo ua rai maua. E akakoromaki ei i te taitaia, kua akamata au i te aere ki vao e te inuinu ma toku au taeake e te au oa pitiniti, vaitata rai i te au po katoatoa. Ko taku mea i rave ana, ko te angaanga, te inuinu, e te moe. Puapinga tikai au i te pae moni inara kare au e mataora ana e kare rai au i kite e no teaa ra.

KUA TAUI TE PIPIRIA I TOKU ORAANGA: I toku akamataanga i te apii i te Pipiria ma te Au Kite o Iehova, e toru irava i roto i te Pipiria tei rauka i te akakeu maata iaku. Kua aue au i toku kite anga i te aiteanga o te tuatua i roto ia Mataio 5:3 e: “E mataora to te aronga tei manako i to ratou anoano i te pae vaerua, no ratou oki te patireia o te au rangi ra.” (NW) Kua akamarama mai teia irava kiaku e eaa te tumu i manako puapinga kore ua ai ei au, noatu e kua puapinga au i te pae moni e e vaine rekaia au e toku au oa pitiniti. Kua kite mai ra au e na te akamanakoanga e te akamerengoanga i toku anoano pae vaerua, ka mataora tikai au.

I taua taime rai, kua kino pakari tikai te makete moni i Tiapani, kua kite atu rai au i rotopu i toku au oa pitiniti te tikaanga o te tuatua i roto ia 1 Timoteo 6:9 e: “Te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.” I roto i toku manako tano tikai te au tuatua a Iesu tei tataia i roto ia Mataio 6:24 kiaku uaorai e, “kare e tika kia akono atu i te Atua e te Mamona,” no reira kua iki au i te rave i tetai au tauianga i roto i toku oraanga.

Kua kite mai au e kua akarukeruke ua au i toku nga metua, taku tane, e taku tamariki. Kua kite katoaia mai e kua tupu mai tetai au peu tau kore i roto iaku. Kua riro mai au ei vaine ngakau parau. Kare roa oku tu akakoromakianga no te tangata. E riririri ua ana au. I te akamataanga, kua manako mai au e kare e rauka i te taui iaku e kia riro mai e e Kerititiano. Inara, maata tikai toku inangaro i taku tamariki e kua kite mai au e i toku taangaanga anga i te akoanga a te Pipiria i te akono anga i toku ngutuare tangata, kua ariu meitaki mai taku tamariki. E maata toku taime e akapou ana kia ratou e kua apai atu au ia ratou ki te au uipaanga Kerititiano.

KUA PUAPINGA AU: Te kite anga i te akakoroanga o te oraanga e te tavini anga i te Atua, te akono anga i tetai oraanga kia akamareka iaia, kua oronga mai te reira i te rekareka e te mataora tikai. Kare au e akaruke akaou ana i toku ngutuare tangata no te angaanga, no reira kua rauka akaou mai te tu ngateitei kiaku uaorai tei ngaro ana i mua ana.

I te kite anga e kua taui meitaki toku tu iaku e taangaanga ra i te au kaveinga o te Pipiria, kua akakeuia toku mama kia apii i te Pipiria e kia riro mai e e Kerititiano. Ma te mataora, kare toku papa e taku tane i patoi ana i ta maua ikianga. E piri anga vaitata tikai matou ko taku tamariki, e te rekareka nei au i tetai oraanga mataora tikai i roto i te ngutuare tangata.

 PROFILE

INGOA: MIKHAIL ZUYEV

MATAITI: 51

ENUA: RUTIA

ORAANGA: TANGATA OKOOKO APINGA TAMAKI

TOKU ORAANGA I MUA ANA: Kua koropiniia toku oire, ko Krasnogorsk, e te au ngai tanutanu anga meitaki. Te tae atura te Kauvai Moscow ki tonga. Ki te opunga e ki tokerau, vaitata rai e kua koropiniia te au oire rikiriki e te vaorakau.

I toku meangiti anga, e reka ana au i te motomoto e te kangakanga i te au apinga tamaki. Pou ua toku taime i te terenianga no runga i te reira. Kua maani katoa au i te au apinga tamaki tei araiia e te ture, te au pooki pupui, e te au matipi. Kare i roa ana, kua akariro au i teia ei pitiniti naku. Kua akapapa meitaki au e kua puapinga tikai i te okooko i taku au apinga ki te aronga rave i te kino.

KUA TAUI TE PIPIRIA I TOKU ORAANGA: Mei te akamataanga mai o te mataiti 1990, kua aravei atu au i te Au Kite o Iehova, inara i te akamataanga kare au e irinaki ana ia ratou. I toku manako, maata roa ta ratou au uianga e ui mai ana.

I tetai ra, kua tatau mai tetai o ratou kiaku nei ia Roma 14:12 e: “Ka ope takiri rava tatou i te aaki i te tuatua iaia uaorai i te Atua ra.” Kua manako au e eaa taku ka tuatua atu ki te Atua. Kua akakeu mai teia irava iaku kia apii au e eaa ta te Atua e umuumu maira mei iaku.

Kua rave pakari au i te taangaanga i te akoanga a te Pipiria tei tataia i roto ia Kolosa 3:5-10 e: “E tenana ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore, e te noinoi apinga, e akamori idolo oki te reira: No taua au mea ra i rokoia mai ei te tamariki akarongo kore i te riri o te Atua . . . , e akaope atu kotou i taua au mea katoa nei, te riri, te makitakita, te vareae, te akakino, te tuatua viivii ra, i to kotou vaa. Auraka e pikikaa tetai ki tetai, kua kopae oki kotou i te tangata taito ra e tana katoa au ravenga; E kua akatangata ou.”

E ngata tikai iaku i te rave i taua au tauianga. Kua oronga ua mai toku “au oa pitiniti” o mua ana kiaku i te moni no te au apinga, e mea ngata iaku i te tapu iaku uaorai me akariri mai tetai tangata iaku. Noatu ra, kua takoreia atu e au taku au apinga tamaki puapinga tikai. I toku kite anga i te aroa ta te Atua raua ko te Karaiti i akaari mai ana kiaku, kua akakeuia au kia inangaro atu ia raua. Kua tauta ua rai au i te rave i taku uaorai apii Pipiria, kua aere atu ki te au uipaanga a te putuputuanga o tera ngai, e kua pure atu au ki te Atua no tana tauturu.

KUA PUAPINGA AU: Ma te marie, e ma te tautaanga pakari e ma te tauturu anga a toku au taeake Kerititiano, meitaki rava atu toku tu. Rekareka tikai au te kite anga e te manako maira te Atua ko Iehova ia tatou tataki tai, pera katoa te aronga tei mate. (Angaanga 24:15) Te akaperepere ra au i te tu ngakau tae e te tu tika taku e kite ra i rotopu i te Au Kite o Iehova. E te ariki rekareka nei au i te inangaro tikai ta ratou i akaari mai kiaku e e reka ana au i to ratou tu tiratiratu ki te Atua.

I te akamataanga, kua patoi mai tetai o toku ngutuare tangata e toku au oa i toku akarongo ou. Inara kua manako ua ratou i roto ia ratou uaorai e e meitaki atu kia kapiti atu au ki tetai akonoanga, e kare e ki roto i te angaanga kino. Te mataora nei au e kare au i akapou i toku oraanga ki te angaanga okooko anga i te au apinga tamaki, inara kua oronga ra au i te taime i te tauturu anga i tetai ke kia kite mai i te Atua o te au.

[Tutu i te kapi 27]

Kua kapiti atu au ki roto i te au angaanga a te Katorika ei akamaru mai i toku akava ngakau

[Tutu i te kapi 28]

Puapinga tikai au i te pae moni inara kare e mataora ana