Tauturu i Taau Tamaiti kia Akakoromaki ua i te Mamae Ngakau

I ROTO i tetai are toa oko puka, kua kapiki nui atura tetai metua vaine manamanata ki tetai vaine tiaki toa: “Ki ua to kotou are toa i te au puka inara kare e apinga i te tauturu mai i taku tamaiti!” Te kimi ra te metua vaine i tetai aratakianga i te tauturu i tana manga tamaiti kia akakoromaki ua te mate viviki anga o tetai mema ngutuare piri vaitata.

E tau tikai te manamanata o teia metua vaine. Mei teaa ra te taitaia me kite atu tetai manga tamaiti e kua mate tetai o tana e akaperepere ra! Ka tupu meitaki ua te tamariki i raro ake i te utuutuanga a tona ngutuare tangata, inara na te mate e akaatea i tetai tei akaperepereia e te tamaiti, e pirianga vaitata to raua. Ei metua, akapeea koe i te tauturu anga i taau tamaiti me ka tupu mai taua mate ra me kore kua tupu ke ana te reira?

E tika rai, te kite anga e kua mate tetai tei akaperepereia, penei te akakoromaki ua ra koe i toou uaorai au manako ngakau; penei te manako taitaia ra e te manakonako ua rai koe i tei takake. Inara, eiaa e ngaropoina ia koe e te inangaro maira taau tamaiti i taau turu anga. “E akarongo ana te au tamariki i tetai au tuanga o te au tuatua, e me akarukenaia ki ta ratou e manako ra, e maata te taime kare ratou e marama tikai i te reira me kore te manako ua ra ratou i tetai apinga tarevake,” i akakite mai ei tetai puka tei tua aereia e tetai are maki no te aronga ka mate i Minnesota, U.S.A. Te akakite katoa maira te reira e: “Ta te tamariki e inangaro ra koia oki kia akakiteia atu te tikaanga.” No reira e meitaki i te akamarama atu i te tikaanga ki ta kotou tamariki, na roto i tetai tu te marama ra ratou, kia tau ki to ratou mataiti. E mea ngata teia, no te mea tukeke tikai te au tamariki i roto i to ratou tu kite i te marama anga e eaa tei tupu.​—1 Korinetia 13:11.

Te Akamarama Anga i te Mate

Te karanga ra tetai aronga kimikimi e me tuatua atu ki tetai tamaiti no runga i te mate, kia matakite te nga metua i te au tuatua mei “te moe anga,” “te ngaro anga,” me kore “te aere ke anga.” Te tuatua anga i taua au tuatua e kare e akamarama atu i te reira, penei ka tamanamanataia te tamaiti. E tika rai, kua tuatua a Iesu i te moe ei akatutuanga i te mate e e mea tau tikai teia ki te aronga te akarongo maira kiaia. Inara, kia maara ra e kare aia e tuatua ra ki te tamariki. Pera katoa, kua akamarama mai aia i te akatutuanga. Kua akakite a Iesu ki tana au pipi e: “Kua moe to tatou oa ko Lazaro.” Inara, ko te au pipi ra, e aronga mamaata ratou kua “manako ra ratou e no te akāvai moe ua nei [ta Iesu] i tuatua maira.” No reira kua  akataka meitaki atu a Iesu i te manako: “Kua mate takiri a Lazaro.” (Ioane 11:11-14) Me te inangaro ra te aronga mamaata i taua akatakaanga meitaki ra, pera katoa rai ta tatou au tamariki!

“Penei ka tamaru mai tetai metua i tana tuatua i te akamarama anga i te mate ki tana tamaiti,” i karanga ai te nga tangata tata puka ko Mary Ann Emswiler raua ko James P. Emswiler, “inara ko te rave anga i te reira, penei te tuku ra aia i te au mea ki roto i tona manako kare i manakoia ana i mua ana, e penei ka riro mai te reira ei tamataku anga me kore ei mea kino.” Ei akatauanga, te akakite anga ki tetai manga tamaiti e te moe ua ra tei takake, penei ka tamatakutaku te reira i te tamaiti me moe aia i te po, no te mea kare aia e ara akaou mai. Me akakiteia atu e kua “aere ke” tei takake, penei ka manako te manga tamaiti e kare aia i inangaroia mai me kore kua akarukenaia mai aia.

Me tauta ra i te akamarama anga i te mate ki tetai tamaiti, e maata te au metua tei kite mai e te marama ua ra te au tamariki i te au tuatua mama ua e te tika, i to te au manako ngata tikai me kore te au tuatua kare e tau ana. (1 Korinetia 14:9) Te akakite maira te aronga kimikimi e e akamaroiroi kotou i ta kotou tamariki kia ui i te au uianga e kia akakite mai ratou i te au mea te manamanata ra ratou. Penei ka rauka te au pukapukaanga putuputu i te tauturu ia koe kia akatikatika i te au manako tarevake e ka akaari mai i tetai ua atu au mataara no te tauturu anga i taau tamaiti.

Tumu Irinakiia no te Aratakianga

I tetai tuatau akaevaeva anga, ka akara mai taau tamaiti kia koe no te aratakianga, turuanga, e te au pauanga. Kiea ra e rauka ai ia koe i te kimi i te akakiteanga irinakiia no runga i te mate? E maata te au tangata tei kite mai e kua riro te Pipiria ko te tumu irinakiia no te akapumaanaanga e te manakonakoanga. Te oronga maira te reira i te akakiteanga tika tikai e i akamata mai te mate mei ea, te turanga o te aronga tei mate, e te manakonakoanga no te aronga tei mate. Ko te tikaanga mou tikai “kare ra a te aronga i mate ra e tuatua i kitea” ka tauturuia taau tamaiti kia kite e kare te aronga tana e akaperepere ra e mamae ra. (Koheleta 9:5) Pera katoa, i roto i te Pipiria, te oronga maira te Atua i te manakonakoanga e ka kite akaou tatou i te aronga ta tatou e akaperepere ra i roto i te parataito i runga i te enua nei.​—Ioane 5:28, 29.

Na te uri anga ki te au Tuatua Tapu, ka rauka ia koe i te tauturu i taau tamaiti kia kite e te oronga maira te Pipiria i te aratakianga e te akapumaanaanga tau i roto i tetai turanga taitaia tikai. I taua taime rai, ka kite mai taau tamaiti e, ei metua ra, te irinaki ra koe ki runga i te Tuatua a te Atua no te aratakianga no runga i te au mea puapinga i roto i te oraanga.​—Maseli 22:6; 2 Timoteo 3:15.

Kua Pauia Mai Taau Au Uianga

I te tauturu anga i taau tamaiti kia akakoromaki no runga i te mate o tetai tei akaperepereia, penei ka aro atu koe i te au turanga kare koe i kite e ka akapeea ra koe. Eaa taau ka rave? * Ka akamanako ana tatou i tetai au uianga matauia te ka uiia mai.

• Ka uuna ainei au i toku mamae ngakau mei taku tamaiti? E mea tau ua i te inangaro i te paruru i taau tamaiti. Inara, e mea tarevake ainei me kite mai taau tamaiti e te mamae ra koe? E maata te au metua tei kite mai e e meitaki ake kia akakite tika ua ratou i to ratou mamae, te akaari anga ki ta ratou tamariki e e mea tau te mamae ngakau. Kua uriuri manako tetai pae ki ta ratou tamariki i te au akaraanga o te aronga tataki tai i roto i te Pipiria tei mamae ngakau ana. Ei akaraanga, kua aue a Iesu te mate anga tona oa akaperepere ko Lazaro. Kare a Iesu i uuna ana i tona au manako ngakau.​—Ioane 11:35.

• Ka aere ainei taku manga tamaiti ki te ngai e raveia ana te akoanga no te mate me kore ki te ngai tanumanga me kore ki tetai akamaaraanga i tei mate ra? Me ka aere atu te tamaiti ki reira, penei e meitaki kia akamarama atu kiaia na mua e eaa te ka inangaroia, kapiti mai e eaa ra te akamaaraanga tanumanga i raveia ai. E tika rai, i roto i tetai au turanga, penei ka iki te nga metua e e tumu meitaki tetai no ta raua tamariki kia kore e aere  atu ki te katoaanga me kore ki tetai tuanga ua o te akoanga tanumanga. Ko te au tamariki tei tae atu ki tetai akoanga tanumanga tei raveia e te Au Kite o Iehova, penei ka puapingaia ratou mei te akoanga tei akatumuia ki runga i te Pipiria tei orongaia mai. Pera katoa, “te aroa mou” tei kiteaia i rotopu i te aronga tei tae mai, pera katoa ki tetai tamaiti, ka riro te reira ei tupuanga puapinga e ei akapumaanaanga.​—Roma 12:10, 15; Ioane 13:34, 35.

• Ka tuatua ainei au ki taku tamaiti no runga i tei akaperepereia tei takake ra? Te karanga ra tetai aronga kimikimi e me kare koe e tuatua ana no runga i tei akaperepereia tei takake ra, ka manako mai taau tamaiti e te uuna ra koe i tetai apinga no runga i te tangata tei mate me kore kare koe e inangaro ana i te akamaara i taua tangata ra. Te akakite maira te vaine tata ko Julia Rathkey e: “E puapinga tikai i te tauturu i te tamariki kia akamaaraara ua rai ratou i tei mate, e eiaa e mataku.” E tuatua ua rai no runga i te tangata tei takake, te taiku anga i te au tu meitaki e te tu oraanga o taua tangata, penei na te reira e tauturu mai i te turanga mamae. Te akapumaana ra te au metua Kite i ta ratou tamariki i te manakonakoanga a te Pipiria no te tuakaouanga ki tetai enua parataito, ka akakoreia te maki e te mate.​—Apokalupo 21:4.

• Akapeea au i te tauturu anga i taku tamaiti me te mii ra aia? I te tuatau no te turanga mamae, penei ka tupu mai te au turanga kinokino i te pae kopapa ki taau tamaiti, penei ka tupu mai te maki. Penei ka riririri me kore ka apeape te tamaiti, no te mea, te manako puapinga kore ra e te manamanata ra aia. Auraka e poitirere me te manako ra taau tamaiti e kua apa aia, te piripiri mai anga kia koe, me kore ka manamanata aia me reiti koe i te tae mai anga ki te kainga me kore kua rokoia koe e te maki. Akapeea koe te akono anga i te au manamanata o taau tamaiti? Auraka rava taau tamaiti e manako e kare koe e kite atu ana e kua tarevake tetai apinga. No reira, kia matakite e kia akamanako ua rai koe i tona turanga mamae. Eiaa e ngaropoina e kua akakeu maataia taau tamaiti e te mate. E oronga putuputu i te akapapuanga, e e akamaroiroi i te au uianga e te komunikeiti meitaki anga. Ka rauka ia koe i te akaketaketa i te manakonakoanga o taau tamaiti​—e toou rai—​na roto i “te pumaana o te tuatua i tataia ra.”​—Roma 15:4.

• Aea au e akanoo viviki akaou ei i te au mea tei matauia no te ngutuare e e tetai atu au angaanga? E akono tamou ua rai i te au mea e manganui tei matauia, i karanga ai te aronga kite. Te akono tamou anga i te au mea oraora tei matauia, kua karangaia e e ravenga tau te reira no te akono anga i te mamae ngakau. I rotopu i te Au Kite o Iehova, e maata te au metua tei kite mai e te akono tamou anga i tetai ravenga meitaki i te pae vaerua, kapitiia mai te apii putuputu Pipiria a te ngutuare e te aere atu anga ki te au uipaanga Kerititiano, te akatupu ra i tetai turanga ngaueue kore e te akaketaketa anga i te ngutuare tangata.​—Deuteronomi 6:4-9; Ebera 10:24, 25.

E tae ua atu ki te tuatau ka takore ei te Atua ko Iehova i te maki e te mate, mei tetai taime ki tetai taime ka aro atu te tamariki i te tumatetenga o te mate. (Isaia 25:8) Inara, ma te akapapu anga tau e te turuturu anga, ka tauturuia te tamariki kia akakoromaki meitaki tikai me takake tetai tei akaperepereia.

[Tataanga Rikiriki i Raro]

[Tataanga i te kapi 19]

E akamaroiroi kotou i ta kotou tamariki kia ui i te au uianga e kia akakite mai ratou i te au mea te manamanata ra ratou

[Tutu i te kapi 20]

Akono tamou i te au mea tei matauia, kapiti mai ta kotou apii Pipiria a te ngutuare