E Akavaitata Atu ki te Atua

“Te Atua Nona Anake te Pumaana”

2 Korinetia 1:3, 4

E MAATA te au mea i roto i te oraanga​—te mamae, te tu mareka kore, te maromaroa​—te ka akatupu i te tu mii, pera katoa i te taitaia. I taua au taime ra penei ka akamanako koe e, ‘Ka kitea e au i ea te tauturu?’ Te tou ra te au tuatua a te apotetoro ko Paulo, tei kiteaia i roto ia 2 Korinetia 1:3, 4 ki te tumu mou tikai no te pumaana​—te Atua ko Iehova.

I roto i te irava 3, kua kapikiia te Atua “te tumu o te aroa.” Eaa te aiteanga o tera? Te kupu Ereni tei uriia e “aroa” te akakite maira i te manako tangi aroa ua no tetai ke te mamae ra. * Te karanga ra tetai papaanga Pipiria e penei te uri katoaia ra teia kupu e e “akaaroa” me kore e e “tiaki anga ma te aroa maata.” Ko te “aroa” o te Atua tei akakeu iaia kia rave i tetai apinga. I te kite anga i teia tu o te Atua te akakeu ra ia tatou kia inangaro i te akavaitata atu kiaia, me kare ainei?

Kua taiku katoa a Paulo ia Iehova ei “Atua nona anake te pumaana.” I konei te taangaanga ra a Paulo i te tuatua te kapiti maira i “te manako no te akapumaana anga i tetai tangata tei rokoia e te manamanata me kore te mamae ngakau ra e kia oronga i tetai tauturu me kore i tetai akamaroiroi anga.” Te akamarama maira The Interpreter’s Bible e: “Ka akapumaana tatou i tetai tangata te mamae ra me oronga atu tatou kiaia te maroiroi kia akakoromaki ua i tona mamae.”

Penei ka ui koe, ‘Akapeea te Atua i te akapumaana anga ia tatou e te oronga mai i te maroiroi kia akakoromaki ua tatou i to tatou mamae?’ Te tauturu maira aia ia tatou na roto i tana Tuatua, te Pipiria, e na roto i te apinga aroa ko te pure. Te akakite maira a Paulo kia tatou e te oronga aroa maira te Atua i tana Tuatua kia tatou “kia rauka to tatou tatari anga . . . e te pumaana o te tuatua i tataia ra.” Pera katoa, na roto i te pure ngakau tae, ka kite tatou i “te au o te Atua, ko tei maata ua atu i te kite tangata.”​—Roma 15:4; Philipi 4:7.

Mei teaa ra te maata i to Iehova akapumaana anga i tona au tangata? Kua karanga mai a Paulo e ko te Atua ‘tei akapumaana mai ia tatou i to tatou au mate katoa nei.’ (2 Korinetia 1:4) Noatu eaa te taomianga, e te mamae ta tatou ka aro atu, ka rauka i te Atua i te oronga mai kia tatou i te maroiroi e te ketaketa tei tau kia akakoromaki ua tatou. Kare ainei tera i te mea pumaana?

Te pumaana ta te Atua e oronga maira, kare e akamutu ua ki te tangata tei orongaia atu te reira. Te karanga ra a Paulo e te akapumaana ra te Atua ia tatou ‘kia tika ia tatou kia akapumaana i te aronga i rokoia e te mate ra, i te pumaana a te Atua i pumaanaʼi tatou uaorai nei.’ Te rauka anga te pumaana i roto i to tatou tumatetenga, kua tauturuia tatou kia tangi aroa atu i tetai ke e kua akakeuia kia tauturu i te aronga te anoano ra i te pumaana.

Ei “Atua nona anake te pumaana,” kare a Iehova e akaatea ua ana rai i to tatou au manamanata e to tatou mamae. Inara, papu ia tatou teia: Me uri tatou kiaia no te pumaana, ka rauka iaia i te akamatutu ia tatou kia akakoromaki i tetai ua atu mamae ngakau me kore i tetai manamanata ta te oraanga ka akatupu mai. E mea tau tikai kia oronga tatou i te akamorianga e te akapaapaa anga ki te Atua tangi aroa.

[Tataanga Rikiriki i Raro]