Koai te ka Kite i te Tuatau ki Mua?
Koai te ka Kite i te Tuatau ki Mua?
“Ko au te Atua . . . I te akakite anga i te openga mei te muatangana mairai, e mei te au tuatau taito mairai i te au mea e kare i tupu ra.” —Isaia 46:9, 10.
I ROTO i teia au tuatau papu kore, te apii nei te aronga poritiki, te aronga kimi moni, e te aronga apii i te turanga o te tangata no runga i te tuatua enua e te au akatereanga ou i te tauta anga kia akakite mai i te tuatau ki mua. Tetai pae, te inangaro tikai ra i te kite i te tuatau ki mua no ratou uaorai, te akara ra ki te aronga akara etu me kore ki te aronga purepure no te au pauanga. E maata te taime kare taua aronga e mataora ana i ta ratou i kite mai. Ka rauka ainei tikai ia tatou i te kite e eaa te ka tupu i roto i teianei ao, ki to tatou ngutuare tangata, e ia tatou ei tangata tataki tai? I te openga, ka rauka ainei tikai i tetai ua atu i te kite i te tuatau ki mua?
I roto i tana au tuatua ki te peroveta ko Isaia, tei taikuia i runga akenei, kua akataka mai te Atua Mana Katoatoa, ko Iehova, i tona uaorai tu kite karape i te akakite mai i te tuatau ki mua. Na roto ia Isaia, kua totou mai te Atua i te akamatara anga mai i te ngati Iseraela i taito mei te tuikaa anga i Babulonia e to ratou oki anga kia patu akaou ia Ierusalema e te iero. Mei teaa ra te tikaanga tikai o teia totou? Mei tetai 200 mataiti i mua ake, kua akakite tika mai a Isaia i te ingoa o te tangata ka akavi ia Babulonia i te tuatau ki mua, koia oki ko Kuro. Pera katoa, kua akakite taka meitaki mai a Isaia i ta Kuro i rave—ko te akatae ke anga i te Kauvai Eupharati, tei riro ana ei paruru i te oire. Kua kite katoa mai aia e ka kite a Kuro e rua nga pa tei eeuia o te oire, te oronga anga kia Kuro te autu ngoie ua.—Isaia 44:24–45:7.
Me akaaiteia atu ki te Atua, e puapinga kore tikai te tangata i te akara atu ki te tuatau ki mua. “Auraka koe e akatietie i to apopo,” i tata ei te ariki pakari ko Solomona, “kare oki koe i kite i te ka tupu i te rā okotai nei rai.” (Maseli 27:1) Te tika nei rai tera tataanga. Kare rava tetai tangata e kite atu i tona uaorai tuatau ki mua. Eaa te Atua i tuke ei? Te marama meitaki tikai ra aia i te au mea katoatoa tana i anga, kapitiia mai te tu natura e te au manako o te tangata. Me iki aia i te rave i te reira, ka kite atu te Atua e eaa tikai ta te au tangata tataki tai e ta te au pa enua ka rave. Pera katoa, e maata tona tu kite karape i te akaaere i te au mea ka tupu mai. Me totou aia na roto i tana au peroveta e ka tupu tetai apinga, ka riro mai aia e “ko tei akatinamou i te tuatua a tona tavini, e kua akatupu oki i te ako a tana ra au karere.” (Isaia 44:26) Ko te Atua ko Iehova anake ua te ka rauka i te tuatua i tera tuatua mou.
Kua ora ana a Isaia no tetai 700 tuma mataiti i mua ake ia Iesu, te Mesia. Inara, kua totou a Isaia no runga i te aere anga mai o te Mesia. Mei te 18 anere mataiti e aere atu, kua maro te aronga akaapa i te Pipiria i te tu tika tikai o te puka a Isaia. Kua karanga ratou e kare e tika ana te au totou a Isaia, inara kua tataia i muri ake ka tupu ei te reira, e na tetai tangata tata o muri mai i rekoti i te au mea tei tupu takere ana. E tika ainei tera? I te mataiti 1947 kua kitea mai tetai kopi o te puka o Isaia, pera katoa tetai au pokaikai tuatua taito, i roto i tetai ana vaitata atu ki te Tai Mate. Kua
akapapu mai te aronga apii e kua tataia teia kopi no tetai anere ua atu mataiti i mua ake i te totou angaia te anau anga o te Mesia, me kore te Karaiti. Ae, te akaari maira te Pipiria i te tuatau ki mua!Kare e rauka ia Isaia e tetai atu aronga tata Pipiria kia totou mai i te au tupuanga no te tuatau ki mua tei akatumuia ki runga ua i to ratou uaorai kite. Inara, ka rauka ia ratou i te ‘tuatua i ta te vaerua tapu i tukuia mai e te Atua kia ratou.’ (2 Petero 1:21) I roto i te au atikara e aru maira, ka akara atu tatou i tetai au tataanga no runga i te oraanga o Iesu tei totouia mai na roto ia Isaia. I reira ka akamanako atu tatou i te au tupuanga ta Iesu e tana au pipi i totou mai no to tatou tuatau e te tuatau ki mua.