Ka Ui ta Tatou Aronga Tatau

Te Irinaki ra Ainei te au Kite o Iehova e ko Ratou Anake ua te Aronga ka Akaoraia?

Te manako ra te Au Kite o Iehova e kua kitea e ratou te akonoanga tika. Me kare ratou e manako akapera ana, ka taui ratou i ta ratou au irinakianga. Mei te aronga irinaki rai o te au akonoanga e manganui, te irinaki nei te Au Kite o Iehova e ka akaoraia ratou. Inara, te irinaki katoa ra ratou e kare na ratou ia angaanga i te akava, e koai te ka akaoraia. I te openga rai, ko te Atua te Akava. Nana e iki.—Isaia 33:22.

Te akaari maira te Tuatua a te Atua e ko te aronga te ka akaoraia kare e inangaro ua kia akaoraia, inara kia taokotai katoa ki te Akaora. Ei akatutuanga: E akamanako ana i tetai tangata aaere tei ngaro i roto i te vaorakau. Te inangaro maata ra aia kia kite i te mataara ki vao. Ka mate ainei aia, me ka ora aia? Tei runga te tupuanga i tana ka rave me orongaia atu te tauturu. Penei no te tu parau, ka patoi mai aia i te tauturu a te tangata tauturu, me kore te tangata akaora. I tetai tua, ka ariki akaaka aia i te tauturu e ka ora mai.

I tetai tu aiteite, ka akaoraia te aronga te ka taokotai ki Tei Akaora i te tangata, te Atua ko Iehova. E apinga aroa te akaoraanga mei te Atua, inara kare te katoatoa anga o te tangata e akaoraia. Kua tuatua te Tamaiti a te Atua, ko Iesu e: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra.”—Mataio 7:21.

Te irinaki nei te Au Kite o Iehova e ka akaora ua te Atua i te aronga te taangaanga ra i te akarongo na roto i te atinga oko o Iesu e te aru vaitata ra i te au apiianga a Iesu. (Angaanga 4:10-12) Ka akara ana e e toru umuumuanga puapinga no te akaoraanga te akaariia maira i roto i te Tuatua a te Atua.

(1) “Ko te mea teia e kite ei te tangata katoa e e pipi kotou naku, kia aroa kotou ia kotou uaorai,” i akakite ei a Iesu ki tona au taeake. (Ioane 13:35) Ko te akaraanga o Iesu uaorai no te oronga anga i tona oraanga no tetai ke, te akaketaketa maira i te puapinga o te aroa. Ko te aronga e aroa ra i tetai ke, te akatutu ra i tetai tu puapinga no te akaoraanga.

(2) “Kua akakite atu oki au kia ratou . . . i toou ingoa,” i tuatua ai a Iesu i roto i tana pure ki tona Metua. (Ioane 17:26) Kua kite a Iesu i te puapinga o te ingoa o te Atua, ko Iehova, ki tona Metua. Kua pure a Iesu ‘kia akatapuia’ te ingoa o tona Metua. (Mataio 6:9) Te kapiti maira te akatapuanga i te ingoa o te Atua ki te kite anga i taua ingoa ra e te akonoanga i te reira ei mea puapinga e te tapu. Mei ia Iesu rai, te aronga e kimi ra i te akaoraanga ka anoanoia kia taangaanga i te ingoa o te Atua. Ka anoano katoaia ratou kia apii i tetai ke no te ingoa e te au tu o te Atua. (Mataio 28:19, 20) Ko te tika, ko te aronga ua e kapiki ra i te ingoa o te Atua te ka akaoraia.—Roma 10:13.

(3) “Kare to teianei ao taku basileia,” i tuatua atu ei a Iesu kia Ponotio Pilato. (Ioane 18:36) E tokoiti ua te tangata i teia tuatau te irinaki ra ki runga i te Patireia o te Atua, me kore te kavamani, ko Iesu te Ariki. Te irinaki ra ratou i te au akatereanga a te tangata. Ei tuke ra, ko te aronga ka akaoraia te turu maroiroi ra i te Patireia o te Atua e te apii ra i tetai ke akapeea te reira i te akamatara anga i te au tangata akarongo mou katoatoa.—Mataio 4:17.

I muri ake i te apiianga i te au umuumuanga no te akaoraanga, kua tuatua a Iesu ki tana au pipi e: “Koai oki te ka ora?” Kua pau atu a Iesu e: “Ko te au mea e kore e tika i te tangata nei, e tika ïa i te Atua.” (Luka 18:18-30) Te tauta pakari nei te Au Kite o Iehova i te rave i teia au umuumuanga no te akaoraanga. Te angaanga pakari katoa nei ratou i te tauturu i tetai ke kia ora mai.