Ta Tatou i Apii Mai mei ia Iesu

Te Manakonakoanga o Tei Mate

Kua akatu mai a Iesu e toru tangata, i te akatutuanga e e manakonakoanga to tei mate. (Luka 7:11-17; 8:49-56; Ioane 11:1-45) Kia marama i te manakonakoanga no tei mate, ka anoanoia tatou na mua kia marama oonu i te tumu e i akamataia mai te mate kiea.

Eaa Tatou i Maki ei e i Mate Ei?

I te akakore anga a Iesu i te ara a te tangata, kua meitaki ratou. Ei akaraanga, i te aravei anga aia i te tangata akangoru, kua tuatua a Iesu e: “Teea te mea rave ngoie, ko te karanga atu aina, Kua akakoreia taau ara; e ko te karanga atu aina, Ka tu ki runga, ka aere? Kia kite ra kotou e, e mana to te Tamaiti a te tangata i te ao nei kia akakore i te ara, (kua karanga atura aia ki taua akangoru ra,) Ka tu, ka rave i to roi, ka aere i to ngutuare.” (Mataio 9:2-6) No reira ko te ara te tumu o te maki e te mate. To tatou turanga ara kua akamata mai mei te tangata mua, ko Adamu.—Luka 3:38; Roma 5:12.

Eaa a Iesu i Mate Ei?

Kare rava a Iesu i ara ana. No reira, kare aia e tau kia mate. Na te mate anga no tatou, kua tutaki a Iesu i ta tatou ara. Kua tuatua aia e ka “akamaringiia [tona toto] no te tangata e manganui, kia matara te ara.”—Mataio 26:28.

Kua tuatua katoa a Iesu e: “Kare oki te Tamaiti a te tangata i aere mai kia taviniia tona, ei tavini ra, e kia oronga i tona ora ei oko no te tangata e manganui.” (Mataio 20:28) Kua kapiki a Iesu i tana i tutaki e e “oko” no te mea kua akamatara i tetai ua atu mei te mate. Kua tuatua katoa a Iesu e: “I aere mai nei ra au kia rauka to ratou ora, e kia maata ua atu te ora.” (Ioane 10:10) Kia marama pu tikai i te manakonakoanga no tei mate, ka anoano katoaia tatou kia kite i te turanga o tei mate.

 Eaa Tei Tupu ki te Tangata Tei Mate?

I te mate anga te oa o Iesu ko Lazaro, kua akataka mai a Iesu i tei tupu ki te tangata tei mate. Kua tuatua aia ki tana au pipi e: “Kua moe to tatou oa ko Lazaro; e te aere nei au e akaara iaia . . . i manako ra ratou e no te akāvai moe ua nei tana i tuatua maira. Kua akakite pu aturā Iesu kia ratou, Kua mate takiri a Lazaro.” No reira, te akataka meitaki maira a Iesu e te moe ra tei mate, e kare e kite mai.—Ioane 11:1-14.

Kua mate ana a Lazaro e a ra, i akatu mai ei a Iesu iaia. Inara, kare e rekoti a te Pipiria i akakite mai ana i tetai tuatua mei ia Lazaro no tei tupu kiaia i te reira taime. I tona mate anga, kare a Lazaro apinga i manako mai ana e kare katoa ana apinga i kite ana.—Koheleta 9:5, 10; Ioane 11:17-44.

Eaa te Manakonakoanga no Tei Mate?

Ka ora akaou mai tei mate ma te manakonakoanga no te ora mutu kore. Kua tuatua a Iesu e: “Te vaitata mai nei oki te ora, e akarongo ei te aronga katoa i roto i te rua i tona [to Iesu] reo, E kua aere mai ki vao.”—Ioane 5:28, 29.

E akakite anga teia manakonakoanga i to te Atua aroa. Kua tuatua a Iesu e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioane 3:16; Apokalupo 21:4, 5.

No tetai akakiteanga maata, e akara i te pene 6 o te puka Eaa Tikai ta te Pipiria e Apii Maira? *

[Tataanga Rikiriki i Raro]