E Peretana Tikai Ainei te Atua?

Au pauanga matauia:

▪ “Tei te au ngai ravarai aia, i roto i te au mea ravarai. Mei te matangi rai aia.”

▪ “E peretana kite pakari me kore e mana ririnui aia, kare e rauka i te akatakaia.”

Eaa ta Iesu i tuatua?

▪ “Manganui te nooanga tikai i te are o taku Metua ra.” (Ioane 14:2) Kua tuatua a Iesu mei te mea rai e e are me kore e ngai nooanga akatutu to te Atua.

▪ “I aere mai nei au ki te ao nei, mei mua mai i te aroaro o te Metua ra: te akaruke nei au i teianei ao, e te oki nei au ki te Metua ra.” (Ioane 16:28) Kua irinaki a Iesu i te Atua ei Peretana tika tikai e te noo ra ki tetai ngai tikai.

KARE rava a Iesu i karanga ana e e mana ririnui te Atua, kare e rauka i te akatakaia. Ei tukeanga, kua tuatua aia ki te Atua e kua pure kiaia. E kapiki putuputu ana aia ia Iehova e ko tona Metua i te rangi, e tuatua te akaari maira i tona pirianga vaitata tikai ki te Atua.—Ioane 8:19, 38, 54.

E tika rai e “kare ua e tangata i kite i te Atua” e e “Vaerua te Atua.” (Ioane 1:18; 4:24) Inara kare te aiteanga o teia e kare ona kopapa me kore kare ona tu. Te akakite maira te Pipiria kia tatou e: “Te vai ra te kopapa tangata, e te vai ra te kopapa vaerua.” (1 Korinetia 15:44) No reira e kopapa vaerua ainei to Iehova?

Ae. Te akatuakaouia mai anga a Iesu mei te mate, kua “tomo [aia] ki roto i . . . te rangi mou ra, kia akakite aia iaia uaorai ki mua i te aroaro o te Atua no tatou i teianei.” (Ebera 9:24) Te apii maira teia ia tatou e rua nga apinga puapinga no runga i te Atua. Te mea mua, e ngai nooanga tona. Te rua, e Peretana aia, kare i tetai mana ririnui kare e rauka kia akatakaia e te noo ra i te au ngai ravarai.

Akapeea i reira, e rauka ai ta te Atua akakeuanga i te au ngai ravarai? Ka rauka i te Atua i te tono i tona vaerua tapu me kore mana akakeu, ki tetai ua atu ngai i roto i te ao katoa e pini ua ake. Mei tetai metua tane e oronga ra i tona rima i te akapumaana e te turu i tana tamariki, te oronga katoa maira te Atua i tona vaerua tapu i te akatupu i tona akakoroanga.—Salamo 104:30; 139:7.

No te mea e Peretana te Atua, e tu katoa tona, e au apinga tana e reka ana e e reka kore ana—e e manako katoa tona. Te akakite maira te Pipiria kia tatou e te aroa ra aia i tona iti tangata, e rekareka ana aia i tana au angaanga, e riri ana aia i te akamori itoro, e e mamae ngakau ana i te tu kino. (Genese 6:6; Deuteronomi 16:22; 1 Ariki 10:9; Salamo 104:31) I roto ia 1 Timoteo 1:11, te kapikiia ra aia e ko te “Atua mataora.” (NW) No reira rai a Iesu i tuatua ai e ka rauka ia tatou i te apii i te inangaro i teia Atua ma to tatou ngakau katoa!—Mareko 12:30. *

[Tataanga Rikiriki i Raro]

[Tataanga i te kapi 5]

Mei tetai metua tane e oronga ra i tona rima, te oronga maira te Atua i tona vaerua tapu i te akatupu i tona akakoroanga