Ka Ariki te Atua i te Au Tu Akamorianga Katoatoa?

Au pauanga matauia:

▪ “Pouroa te au akonoanga katoatoa e mataara ia te taki atura ki te Atua.”

▪ “Kare e kino e eaa taau e irinaki ra me te irinaki tikai ra koe.”

Eaa ta Iesu i tuatua?

▪ “E tomo kotou na te [n]gutupa o iti; te atea maata nei te ngutupa, e te pararauare nei te ara, e tae atu ei ki te mate; e manganui te na reira i te tomo. Te kokota ua nei te ngutupa, e te piri oki o te ara, e tae atu ei ki te ora, e tokoia ua ake tei kite atu i te reira.” (Mataio 7:13, 14) Kare a Iesu i irinaki ana e ko te au akonoanga katoatoa te taki atura ki te Atua.

▪ “E manganui te ka tuatua mai kiaku i taua rā ra, E te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa? Ko taku ïa e karanga atu, Kare takiri au i kite ia kotou: ka aere ke atu kotou, te aronga rave tuatua kino.” (Mataio 7:22, 23) Kare a Iesu e ariki ana i te aronga katoatoa te karanga ra e te aru ra ratou iaia.

E MANGANUI te aronga akonoanga e akaperepere ana i ta ratou uaorai au irinakianga e te au peu. Inara, ka akapeea i reira me kare teia au apiianga e rotai ana ki tei kiteaia i roto i te Tuatua a te Atua, ko te Pipiria? Kua akaari mai a Iesu i te kino no te aru i te au peu a te tangata i tona akakiteanga ki te au arataki o te akonoanga i tona tuatau e: “Kua pera oki kotou i te akakore anga i ta te Atua akauenga i ta kotou uaorai ikuiku.” Kua taiku katoa aia i teia au tuatua a te Atua e: “Te topiri mai nei teianei aronga iaku i to ratou vaa, e te akameitaki mai nei to ratou ngutu iaku; tei te atea ke ra to ratou ngakau iaku. E akamorianga puapinga kore ra ta ratou iaku, ka apii ei i tei tukuia mai e te tangata anake ra.”—Mataio 15:1-9; Isaia 29:13.

E puapinga katoa te tu o te tangata, kare e ko te au irinakianga ua. Te tuatua ra te Pipiria no tetai aronga te karanga ra e te akamori ra i te Atua e: “Te karanga nei ratou e kua kite i te Atua; kareka i ta ratou angaanga te uuna nei ratou iaia.” (Tito 1:16) Ko te tikaanga, te karanga ra te Pipiria no te aronga e noo ra i to tatou tuatau e: “Ei anoano i te au mea e navenave ei ra, kare i anoano i te Atua; E tutu akono i te Atua to ratou, kareka te mana ra, kua akakore ratou i te reira: e ariu ke koe i taua aronga ra.”—2 Timoteo 3:4, 5.

Ka umuumuia te irinaki tikai, inara e maata atu te anoanoia ra. No teaa ra? No te mea e tarevake ana tetai tangata irinaki tikai. No reira e puapinga maata tikai te kite tika tikai no runga i te Atua. (Roma 10:2, 3) Ko te apiianga i teia kite e te taangaanga anga i te reira kia rotai ki ta te Pipiria e tuatua ra, ka tauturu ia tatou i te akamareka i te Atua. (Mataio 7:21) Ko te tikaanga tikai i reira, ko te akonoanga tika te o maira te akakeuanga tika, te irinakianga tika, e te angaanga tika. E ko te angaanga tika ko te aiteanga ko te rave anga i te anoano o te Atua i te au ra ravarai!—1 Ioane 2:17.

Me ka inangaro koe i te kite maata atu i ta te Pipiria e akakite maira kia tatou no runga i te Atua, e aravei atu i te Au Kite o Iehova no tetai apii Pipiria ki te kainga kare e tutaki.

[Tataanga i te kapi 9]

Ko te akonoanga tika te o maira te akakeuanga tika, te irinakianga tika, e te angaanga tika